Chhóng-sṳ Ki 5

Â-tông ke Heu-thoi

(Li̍t-thoi-chṳ Song 1:1-4)

1Liá he Â-tông heu-thoi ke chhu̍k-phú. (Song-ti chhóng-chho ngìn ke sṳ̀, he cheu Song-ti ke yong-sṳt chho kì. 2Kì chhóng-chho kì-têu, yû-nàm yû-ńg. Kì-têu su-chho ke sṳ̀, Song-ti su-fuk pûn kì-têu, chiông kì-têu ôn-cho “ngìn”.) 3Â-tông yit-pak sâm-sṳ̍p se ke sṳ̀, kiung yit-ke lai-é, hìn-siong, yong-sṳt lâu kì chhṳ-kâ chhin siông-chhiong, chhiu lâu kì ôn-to Sai-thi̍t. 4Â-tông kiung Sai-thi̍t yî-heu, hàn chhai-sṳ pat-pak ngièn, yu sên-yông chṳ́-ńg. 5Â-tông sṳ̍t-to kiú-pak sâm-sṳ̍p se chang ko-sṳ̂n.

6Sai-thi̍t yit-pak làng ńg-se ke sṳ̀, kiung Yî-nò-sṳ. 7Sai-thi̍t kiung Yî-nò-sṳ yî-heu, hàn chhai-sṳ pat-pak làng chhit-ngièn, yu sên-yông chṳ́-ńg. 8Sai-thi̍t sṳ̍t-to kiú-pak yit-sṳ̍p ngi-se chang ko-sṳ̂n.

9Yî-nò-sṳ kiú-sṳ̍p se ke sṳ̀, kiung Kâi-nàm. 10Yî-nò-sṳ kiung Kâi-nàm yî-heu, hàn chhai-sṳ pat-pak yit-sṳ̍p ńg-ngièn, yu sên-yông chṳ́-ńg. 11Yî-nò-sṳ sṳ̍t-to kiú-pak làng ńg-se chang ko-sṳ̂n.

12Kâi-nàm chhit-sṳ̍p se ke sṳ̀, kiung Mâ-le̍t-lie̍t. 13Kâi-nàm kiung Mâ-le̍t-lie̍t yî-heu, hàn chhai-sṳ pat-pak si-sṳ̍p ngièn, yu sên-yông chṳ́-ńg. 14Kâi-nàm sṳ̍t-to kiú-pak yit-sṳ̍p se chang ko-sṳ̂n.

15Mâ-le̍t-lie̍t liuk-sṳ̍p ńg-se ke sṳ̀, kiung Ngâ-lie̍t. 16Mâ-le̍t-lie̍t kiung Ngâ-lie̍t yî-heu, hàn chhai-sṳ pat-pak sâm-sṳ̍p ngièn, yu sên-yông chṳ́-ńg. 17Mâ-le̍t-lie̍t sṳ̍t-to pat-pak kiú-sṳ̍p ńg-se chang ko-sṳ̂n.

18Ngâ-lie̍t yit-pak liuk-sṳ̍p ngi-se ke sṳ̀, kiung Yî-nok. 19Ngâ-lie̍t kiung Yî-nok yî-heu, hàn chhai-sṳ pat-pak ngièn, yu sên-yông chṳ́-ńg. 20Ngâ-lie̍t sṳ̍t-to kiú-pak liuk-sṳ̍p ngi-se chang ko-sṳ̂n.

21Yî-nok liuk-sṳ̍p ńg-se ke sṳ̀, kiung Mâ-thú-sat-lâ. 22Yî-nok kiung Mâ-thú-sat-lâ yî-heu, lâu Song-ti thùng-hàng sâm-pak ngièn, yu sên-yông chṳ́-ńg. 23Yî-nok chhai-sṳ sṳ̍t-to sâm-pak liuk-sṳ̍p ńg-se. 24Yî-nok lâu Song-ti khiung-ha hàng, yî-heu Song-ti chiông kì tai-chéu, kì chhiu mò-chhôi lé.

25Mâ-thú-sat-lâ yit-pak pat-sṳ̍p chhit-se ke sṳ̀, kiung Lâ-ma̍k. 26Mâ-thú-sat-lâ kiung Lâ-ma̍k yî-heu, hàn chhai-sṳ chhit-pak pat-sṳ̍p ngi-ngièn, yu sên-yông chṳ́-ńg. 27Mâ-thú-sat-lâ sṳ̍t-to kiú-pak liuk-sṳ̍p kiú-se chang ko-sṳ̂n.

28Lâ-ma̍k yit-pak pat-sṳ̍p ngi-se ke sṳ̀, kiung yit-ke lai-é, 29lâu kì ôn-to Nò-â#5:29 “Nò-â” yû “ôn-ví” ke yi-sṳ., kóng: “Yîn-vi Song-chú chu-chú thú-thi, pûn ngài-têu lò-luk kâng-chung, liá-ke lai-é voi pûn ngài-têu chhai sîn-khú chûng tet-tó ôn-ví.” 30Lâ-ma̍k kiung Nò-â yî-heu, hàn chhai-sṳ ńg-pak kiú-sṳ̍p ńg-ngièn, yu sên-yông chṳ́-ńg. 31Lâ-ma̍k sṳ̍t-to chhit-pak chhit-sṳ̍p chhit-se chang ko-sṳ̂n.

32Nò-â ńg-pak se ke sṳ̀, kiung Sám, Hàm lâu Ngâ-fut.

বর্তমানে নির্বাচিত:

Chhóng-sṳ Ki 5: THV12Rdb

হাইলাইট

কপি