Matthieu 9

Yésʉs lɨ́ etiʼ nzwóó

(Marc 2.1-12; Luc 5.17-26)

1Yésʉs ntɔ̂ʼ kalwo ɨ́ byɛ̂l, nzě báʼǎ tô nkana yé. 2Abea nɛ́ɛ: bê nzě nze nyé e mbʉ́mbʉ́ʼ mʉ̂r ɨ́ myɛɛla. Mbeá nyé á bee mpʉ bé á dyɛ̂ʼwo e né yɨ́, nye ntɔ̂ʼ lɛ́ɛ e mbʉ́mbʉ́ʼ ó: «Mwân wǎm, talaǎ léme. Bibaa bí ébébe lô, bí pɛʼɔɔ!» 3Nó bʉ́ʉ́ ólɛ̂ʼla o métié á nze lɛ́ɛ ɨ́ milémé myɔ́ɔ́ ó: «Mʉr nyâ, nye lɨ́ ekʉ́ sâ yɨ́ɛ Nzyɛ̌m nkěh!» 4Mpʉ̌ Yésʉs á gʉ́a bijwɨʼ byɔ́ɔ́ yɨ́, nó ó nyé á nze dî e bé ó: «Bɨ̌n bé lɨ́ edi e bibɨ́bla bíjwɨʼ bínɨ̌ ɨ́ milémé mín ɨ́ yé? 5Yé dí ɨ́ kúnwo lɨ́ elɛ́ɛ mʉ̂r? Le ó: “Bibaa bí ébébe lô, bí pɛʼɔɔ”, nkʉ̂ ntɔ̂ʼ ó: “Gbɔlwaa sí. Bʉŋláa”? 6Sâ gwár, mě gwɨ́m ó, bɨ̌n gʉ́ŋaa ó, Mwân mé Mʉr, nyě e nkul jwɨ́ɨ ɨ́ sí yɨ̂ʼ ó, nye pɛ́ʼɛɛ bʉr bibaa bí ébébě Nzyɛ̌m dí eniʼe bé bí.» Nye ntɔ̂ʼ lɛ́ɛ e mbʉ́mbʉ́ʼ ó: «Gbɔlwáa, nkɛ́yɨ́ɨ́ joó yô, go e tó kwár nyǒ.» 7Mʉ̌r nɨ̌ ntémé ntɔ̂ʼ gbɔlwa sí, nzě tô kwá nyé. 8Jɔ̌ʼ sɔ́má bʉ̂r, yé á bee syɛ́ɛla yaá yɨ́, ekɛ̂n kʉ́ nzě swɨɨ bé menyʉ̂l, bé ntɔ̂ʼ dwě Nzyɛ̌m kûm, ebě, nye á be ó sí bánǎ dwe bʉ̂r nkul jwɨ́ɨ nyaá.

Yésʉs lɨ́ ejébě Matthieu

(Marc 2.13-17; Luc 5.27-32)

9Yésʉs, nyé osí duhǒ sûm yaá, nye mû lɨ́ elaa nɛ́ɛ: nyě kǎ bee ó, nyʉ́ʉ́ mʉ̂r ndîndǐl ɨ́ gúmó nyé á nʉnʉa mɔnɨ́ tœ́a yɨ́. Díé é mʉ̂r waá, lé á be ó Matthieu. Yésʉs, nye e né ó: «Dúʼóó mê. Nye ntɔ̂ʼ mɔa sí, nzě dû nyê.»

10Jɔʼ bé á be lɨ́ ede ɨ́ mbɛ̌r mé Matthieu yɨ́, bʉ́ʉ́ bʉ̂r ɨ́ buo buo bé á nʉnʉa mɔnɨ́ tœ́a bá le bʉ́ʉ́ ósyɛ̂l o mísyóm, bé á be ntémé ó, lɨ́ ede bé e boo nɔ́ɔ́ le ompʉ́n mé Yésʉs. 11Mpʉ óFarizyɛ̂n, bé á bee sâ yaá yɨ́, bê nzě dî le ompʉ́n bé ó: «Lɛ̂ʼla wɨ́n, nye lɨ́ epûhla mébô lɨ́ ebánǎ de e bʉr o dí enʉǎ mɔnɨ́ tœ́a bá, le osyɛ̂l o mísyóm ɨ́ yé?» 12Yésʉs nzě jóʼo tíá nyaá. Nye ntɔ̂ʼ lɛ́ɛ e bé ó: «Bʉr o dí minjɨ̂h bá, bé ajɨ ójomo o bʉ̂r. Mimbêl myé omér ó dí ejɨ bê. 13Swíʼɨ́ɨ́ gâ. Bɨ̌n a tó jɨ̂ʼ sá mékǎn mâʼ dí elɛ́ɛ ɨ́ Mekaná mé Nzyɛ̌m yɨ́. Yê cɛmá ó: Mě gwɨ́m ó, bɨ̌n lɛ̂ʼlaa bʉr mpam, laa ó, bɨ̌n dwêʼ me mindwéá mí ótír. »

Yésʉs nzě kɛl tɨ̂ʼ ó: «Ebě, me á bé anzě jébe ótîtyěl o bʉ̂r. Me á nze jébe ó, osyɛ̂l o mísyóm.»

Eti méde

(Marc 2.18-22; Luc 5.33-39)

14Ompʉ́n mé Yʉánɛs Ndubʉr nzě sîhlě súm Yésʉs á be yɨ́. Bê nzě dî e né ó: «Bɨ̌h bɨɛ le oFarizyɛ̂n, bé lɨ́ etiti méde pâʼ e pâʼ lɨ́ edwě Nzyɛ̌m kûm, ompʉ́n bô bɨ́ɛ l'ati ɨ́ yé?» 15Yésʉs, nye e bé ó: «Nzê bɨ̌n bûʼlá ó, bʉr o mû sí báŋlɔɔ ɨ́ nzɔɔ ebâ bá, bé e nkul edi, asoho ɨ́ jɔʼ mbɛ̂l mʉmá dína ɨ́ duo nzɔ́ɔ yɨ́ ɛ́? Sɔ̂ʼ, yé abe e nkul esâ nó! Yé ópyâl jɔʼ dí ó, mbɛ̂l mʉmá ngá pɛʼɔɔ ɨ́ sɔ́má yɔ́ɔ́ yɨ́. Jɔʼ yaá ó bé ngá kpaa mébúʼ, ti méde yɨ́.»

Kɨkɛnǎ kán dwân le menyoʼ medwân

(Marc 2.21-22; Luc 5.36-39)

16«Mʉr nyé anʉǎ kán dwân, ntɔ̂ʼ sâ ébágá lɨ́ esú lé élar égʉ́á é njʉ̌m kán, kán dwân waá l'apǎ dubɔɔ ɨ́ medíbé, dulo, ebě, péh kán dwân yaá, bé adubɔɔ ɨ́ medíbé nó, ɨ́ jɔʼ mʉ̂r ókǎ jwɨɨ̌ kán waá yɨ́, ebágá é kán dwân laá, lé ópʉʼa, ntɔ̂ʼ báʼǎ beʼ égʉ́á é kán. 17Nó ntémé ó, bé dí abe lɨ́ elwan ményoʼ medwân ɨ́ minjʉ̌m bíntaʼ bi dí misɛ́á e bikʉ́r bí ótír bí yɨ́. Mʉ̂r sá nó wá, menyoʼ me tɨ̂, mé ógʉ́lwa, bintaʼ ntɔ̂ʼ tʉ̂l, menyoʼ kʉ́ma sí, bintaʼ dwě ntuʼ. Bé lulwan ményoʼ medwân ó ɨ́ bintaʼ bidwân. Jɔʼ yaá ó bíntaʼ ngá gwá baʼlɔɔ yɨ́.»

Yésʉs lɨ́ etiʼ éséhé mé Yárwis

(Marc 5.21-43; Luc 8.40-56)

18Yésʉs dína lɨ́ elwib nɛ́ɛ: nyʉ́ʉ́ njwɨ́ɨ oYúden nzě pyâl, ntɔ̂ʼ bɨʼ mébóó sí, lɨ́ edwe nyé kûm. Nye e Yésʉs ó: «Eséhé lâm, lé alúno dwe ɨ́ báánâ. Damá jóʼo nó, ntaá nzě kɛl nyé mbô, nye nkʉ̂ tiʼe.» 19Yésʉs nzě mɔa sí, dû nyê, bé le ompʉ́n bé.

20Bé mû nzɨ́ e nzɨ̌ nɛ́ɛ: nyʉ́ʉ́ mʉ́má á be mbêl, metié lɨ́ esʉsolo nyé ɨ́ nyʉ̂l, tâŋ mimbû kám e mimbá nyá, ntɔ̂ʼ pyâl Yésʉs kúnókúno ɨ́ koo píhe, tyěn mbô, kúna le odumo ó kán wé. 21Ebě, nye á be lɨ́ ejwɨʼ ɨ́ lémé wé ó: «Mê sí kúnǎ kúnáa le odumo ó kán wé nó, me tiʼe.» 22Yésʉs nzě dwɛ̂ʼ píhe, bee mʉ́má nɨ̌. Nye e né ó: «Mwân wǎm, talaǎ léme. Búʼó yô, yɨ́ tiʼ gô!» Ɨ́ tyé e tyé gwár yaá, mʉmá waá ntɔ̂ʼ tiʼe.

23Jɔ̌ʼ Yésʉs á nze kumǒ mbɛ̌r mé njwɨ́ɨ oYúden yɨ́, nye á ka bee ó, bʉr o b'á be lɨ́ elʉ́o míndie bá, le entumo e bʉ̂r. Tɨ̂ʼ, yé á be ó, yé mû áleŋéleŋé. 24Yésʉs nzě lɛ́ɛ e bé ó: «Búláá gá wâ, ebě, mwân nyâ, nyé adwe. Nye ɨ́ jô.» Bê nzě jo nyé le epya nyê. 25Jɔʼ bé á be, bé mû sí pyêl éntumo e bʉ̂r kʉ̌l yɨ́, Yésʉs ntɔ̂ʼ nî mbɛ̌r waá, mɛ̂r mâ mʉmá waá ɨ́ mbô, ntɔ̂ʼ gbɛl nyé sí. 26Lɔ́ɔ waá nzě jalǎ sí yaá yɨ́yɛ̂h.

Yésʉs lɨ́ etiʼ báántím óbá

27Jɔ̌ʼ Yésʉs á be lɨ́ eduhǒ sûm yaá, nye mû lɨ́ esámle yɨ́, baántím óbá, bê nzě dû nyê, le ebʉ̂ bítím. Bé ó: «Mwâ mé David ɔ́, jɨ́ʼɨ́ɨ́ bɨ́h ekpaa nkóó ɔ̌!» 28Nó ó, ɨ́ jɔ̌ʼ Yésʉs á nî mbɛ̌r tʉ́ŋlʉ̌ yɨ́, baántím baá nzě sîhlě súm nyé á be yɨ́. Yésʉs, nye e bé ó: «Nzê bɨ̌n bé lɨ́ ebúʼla ó, mě e nkul esâ sá bɨ́n dí edî nɨ̌ ɛ̌?» Bê nzě kam ó: «Eee, Dâ, gǒ e nkul esâ.» 29Nó ó Yésʉs á nze kúna e bé mîh. Nye e né ó: «Yé syɛ́yɨɨ bɨ̌n mpʉ̌ búʼó yɨ́n dí yɨ́!» 30Míh mɔ́ɔ́ ntɔ̂ʼ táare ébee. Yésʉs nzě bɛ̂ŋ bê. Nye e bé ó: «Mě lɛ́ɛ́ bɨ́n ó, anyamlě lɛ́ɛ gá mʉr swîh lɔ́ɔ́ wɨ̂.» 31Damá jóʼo nó, tœ́á bé á tô kʉ̌l wɨ́, bé ntɔ̂ʼ tô le ejʉŋla le elɛ́ɛ̌ lɔ́ɔ waá ɨ́ sí yaá yɨ́yɛ̂h.

Yésʉs lɨ́ etiʼ mʉ̂r á be le emúmó nyá

32Jɔʼ bé e boo Yésʉs, bé á be, bé mû lɨ́ enkɛ́ɛ yɨ́, bʉr ntɔ̂ʼ nze e nyʉ́ʉ́ mʉ̂r kwá nyé. Mʉr waá á be ó ányâ-emúmó, duho lɨ́ eleme lé á nzɨnzamra nye lɨ́. 33Lě Yésʉs á so eleme laá, le mʉ̂r á pa be le emúmó nyá, á taare elwib ntémé. Mentumo me bʉ̂r, mé ntɔ̂ʼ kâm lɔ̌b waá. Bé ó: «Bɨ̌h dína ó, apǎ beě mbi wɨ̂ʼ wâʼ ɨ́ sí Ɨ́zraɛ̂l!» 34Sâ gwár, oFarizyɛ̂n bɨ́ɛ, bé á be lɨ́ ekʉ́ boʼlo. Bé ó: «Njwɨ́ɨ meleme ó dí edwe nyé nkul ó, nye sôʼ meleme!»

Yésʉs lɨ́ ejɨ̂ʼ méntumo me bʉ̂r nkoó

35Yésʉs nzě tô le etô bínkana e bínkana byɛ̂h le mékwár e mékwár mɛ̂h, lɨ́ etô le elɛ̂ʼle bʉ̂r ɨ́ mempáh mínjɨʼla mɔ́ɔ́, le etúnǒ Mbɨambɨa Lɔ́ɔ dí edumo e Mpóʼo mé Dâ Nzyɛ̌m wɨ́, le etiʼ bʉ̂r o b'á be e mekpaa mɨ́mɛ̂h le bidyɛ̂m bíbyɛ̂h bá.

36Ebee nyé á bee mentumo me bʉ̂r yɨ́, nye nzě buú jɨ̂ʼ bé nkoó, ebě, nkul á si gwíi bê, menyʉ̂l sí tyɛʼ. Bé á be ó mpʉ bínteme bi dí abe le mbɔʼlʉ bí. 37Nó nyé á lɛ́ɛ le ompʉ́n bé ó: «Yé ɨ́ buo méde mû sí tɨ̂ ɨ́ pemé má. Yé kǎ sáa ó, bʉr o tó kpɛm. 38Nó, jɨʼlaa gá e Kúm pemé, ó nye lómaa bilóbila ɨ́ buo buo, ó bé tôʼ kpɛm méde ɨ́ pemé.»

বর্তমানে নির্বাচিত:

Matthieu 9: ozm

হাইলাইট

কপি