Yʉánɛs 4

Yésʉs, bé e mʉmá Samarî

1-3Nó mpʉ̌ Yésʉs á nze jʉ̂ʼra ó, oFarizyɛ̂n, bɨ́ jóʼo ó, nye mû ó lɨ́ edulo ómpʉ́n le edu bʉ̂r, laǎ Yʉánɛs yɨ́, nye ntɔ̂ʼ duho ɨ́ sí Yʉ́da, nzě tô sí Galilê. (Lɨ́ otyeetye, ntʉ̌ Yésʉs mʉr tɨ̂ʼ á dudu bʉr. Ompʉ́n bé ó b'á dudu.) 4Lɨ́ etô, yé á jala ó, nye cɨ́yɨɨ ɨ́ sí Samarî.

5Nye ntɔ̂ʼ tó pyâl bǎʼ e yʉ́ʉ́ nkanǎ sí Samarî bé dí ejébě “Sukâr” yɨ́. Nye á be ó bǎʼ e pemé Yákɔb á dwe mwân wé, Yóseb yɨ́. 6Edɛɛ́ mé Yákɔb, lé á be ó tɨ̂. Yésʉs nzě tó di ɨ́ nkpâh edɛɛ́, nyé osí tyɛʼ ɨ́ tyen. Yé á be ó kúnókúno e témé móhó.

7Nyʉ́ʉ́ mʉ́má Samarî nzě tó daa médíbé. Yésʉs, nye e né ó: «Dwéʼ mé medíbé. Me óde.»

8(Náǎ yé ó, ompʉ́n bé, bé á be ɨ́ tô nkana, lɨ́ etó bwâm méde.) 9Mpʉ mʉ́má waá á jóʼo nye lɨ́ egwâm nyé medíbé yɨ́, nye e né ó: «Nyá? Gua Yúden, go lɨ́ egwâm mé medíbé ɨ́ yé ɛ́? Mɛm silě Samarî!»

(Ebě, oYúden, bé abe e ndwáala e bʉr ó Samarî.) 10Yésʉs ntɔ̂ʼ lɛ́ɛ e né ó: «Yé bé go bé ɨ́ gʉ́a étʉ́m mé Nzyɛ̌m ti e mʉr gwám gó medíbé nyá nó, lɛ́ɛ́, go ô gwám nyé medíbé mé twiʼ, nye ntɔ̂ʼ gwá dwe gó mǎ.»

11Mʉmá Samarî, nye e né ó: «Dâ ɛ̌, gó abe e dɛa. Edɛɛ́ ntémé, lé ɨ́ buú díme sí. Wáǎ mbi gó dí e nkul edaa médíbé mé twiʼ? 12Mpám yɨ́ná Yákɔb ó b'á líʼe bɨ̌h bɨɛ edɛɛ́ lɨ̂. Nye mʉr tɨ̂ʼ á be ó si de médíbé tɨ̂. Bwán bé le otír bé, sí de. Nó ó, gǒ bûʼlá ó, go ó láá Yákɔb ɨ́?»

13Yésʉs, nye e né ó: «Mʉr nyɨnyɛ̂h dí ede médíbé mâʼ nyá, óbáʼǎ jóʼǒ dwéh médíbé. 14Sâ gwár, mʉr nyɨnyɛ̂h óde médíbé mé ódwe nyé má, nye ákǎ jóʼǒ dwéh médíbé, ebě, medíbé mé ódwe nyé má, mé óliŋa énó ɨ́ nyʉ̂l nyé, gúmó twǐʼ njʉ̌m dǐ óduduho yɨ́.»

15Mʉmá, nye e né ó: «Dâ ɛ̌, dwéʼ mé medíbé maá, me nkʉ̂ di, akǎ báʼǎ jóʼǒ dwéh médíbé, nkʉ̂ nze wâʼ lɨ́ enzě daa médíbé.»

16Yésʉs, nye e né ó: «Tóʼ, tó jébe njʉ̂m gǒ. Bɨ̌n a báʼá nze wâ, bɨ̌n óbɛ̂h.» 17Mʉmá, nye e né ó: «Mɛm, mé abe e njʉ̂m.»

Yésʉs, nye e né ó: «Gǒ e nkam ɨ́ jɔʼ gó dí elɛ́ɛ ó, gó abe e njʉ̂m yɨ́, 18ebě, go á bě sí bi ójʉ́m ótɛ̂n. Nó ó, mʉr bɨ́n e nɔ́ɔ́ dí ɨ́ báánâʼ nɨ̌, nyé abe njʉ̂m gǒ. Gǒ lɛ́ɛ́ ó otyeetye.»

19Mʉmá, nye e né ó: «Dâ ɛ̌, go ó kwaha ngwíha milɔ̌b! Mɨ́ bee nó. 20Bimpám bíh, byé á dwidwe Nzyɛ̌m kûm ó wâʼ, lɨ́ ecwɨ́ʼ lɨ̂. Tó kœb ó, bɨ̌n bɨɛ oYúděn lɨ́lɛ́ɛ́ ó, gúmó mʉ̂r jálá le edwě Nzyɛ̌m kûm yɨ́, yé ó njɨ̌ Yerʉ́zalɛm.» 21Yésʉs, nye e né ó: «Búʼláá mê. Jɔʼ múo lɨ́ enze: ɨ́ jɔʼ yaá, bɨ̌n bé ákǎ dwě Nzyɛ̌m Sɔ́ŋ kûm ɨ́ Yerʉ́zalɛm, nkʉ̂ ntémé lɨ́ ecwɨ́ʼ lɨ̂. 22Bɨ̌n bʉr ó Samarî, bɨ̌n bé agʉ́ǎ sá bɨ́n dí edwe kûm nyɨ́n yɨ́. Bɨ̌h oYúden ó dí egʉ́ǎ sá bɨ́h dí edwe kûm yɨ́, ebě, lɔ́ɔ́ twiʼ, wé duho ó lɨ́ oYúden. 23Sâ gwár, jɔʼ mû ó lɨ́ enze. Yé ntémé mû ó sí pyâl. Ɨ́ jɔʼ yaá ó óbûʼla ompâ, bé ógúmlǒ Nzyɛ̌m Sɔ́ŋ le sísǐm le otyeetye yɨ́, ebě, Nzyɛ̌m Sɔ́ŋ, nye lɨ́ esáa bʉ̂r o ngá dwe nyé kûm ɨ́ mbi waá bá. 24Nzyɛ̌m, nye ó Sísǐm. Sɨ́ǎ yaá ó dí ó, bʉr o dwé nyé kûm bá, bé ɨ́ jala le edwe nyé nyǎ, le Sísǐm, le otyeetye yɨ́.» 25Mʉmá, nye e né ó: «Me lɨ́ egʉ́a ó, Mesî ónze.» (Díe laá, lé páʼlɔ́ɔ́ ó, “Krîst: Mʉ̌r Nzyɛ̌m á lœm múló mé jwɨ́ɨ nyá.”) «Jɔʼ nyé ónze yɨ́, nye ógwá kʉ́ lɛ̂ʼle gá mɨná sá yɨ́yɛ̂h.»

26Yésʉs, nye e né ó: «Me ó dí nye, mɛm, mʉr dí elwib e go nyâ.»

27Ɨ́ jɔʼ yaá ó ómpʉ́n mé Yésʉs á nze búla, duhǒ nkana yɨ́. Bê nzě kâm lɨ́ ebee nyé lɨ́ elwib e mʉmá nɨ̌. Abe e mʉr á dî yɨ́ɛ e né ó, “Gǒ sáá yé e né?” Nkʉ̂ ó, “Go lɨ́ elwib e né ɨ́ yé?”

28Mʉmá nzě líʼě dɛa médíbé yé, báʼǎ tô nkana, tó jébe bʉ̂r. Nye ó:

29«Ntaá nzě bee gá mʉr. Nyɨ́ lɛ́ɛ mé sá yɨ́yɛ̂h mé á sâ yɨ́. Nzê nye óbɛ̌m be Mʉ̂r Nzyɛ̌m á lœm múló mé jwɨ́ɨ nyá ɛ́?»

30Bʉr nzě tɨ́lwǎ nkana, tóŋɔɔ̌ nko nyé á be yɨ́.

31Jɔʼ yaá, ompʉ́n bé, bé á be lɨ́ ejɨʼla e Yésʉs ó, nye páa dě pêh dœʼ. 32Yésʉs, nye e bé ó: «Mě e dœʼ bɨ́n dí agʉ́a yɨ́.»

33Ompʉ́n, bé á be ó, bé mû lɨ́ etô le edíila ó: «Nzê nyʉ́ʉ́ mʉ̂r bê sí nze nyé e mede ɛ̌?»

34Yésʉs, nye e bé ó: «Mede mâm, mé ó, me sâʼ gwɨ́má mʉ̂r á ntɨh me nyá, le esîl syɛ́ɛ́ nyé á lɛ́ɛ ó, me ntáa nzě séa yɨ́. 35Bɨ̌n lɨ́lɛ́ɛ́ ó: “Yɨ́ lîʼ óngɔn onâ. Swɨɨ ékpɛm, wé opyâl.” Nó mɛ̌m lɛ́ɛ́ bɨ́n ó: paá dwɛ̂ʼ gá bipemé: mede, mé mû ó bɛ̌m kǎ kpɛmɔɔ. Yé jaá kǎ lîʼ ó, njɨ mede, mé kpɛ́mɔɔ. 36Kpɛma mede, nye lɨ́ ebi myɛ́na mé. Sá nyé dí esyɛŋ yɨ́, yé ódǐ njʉ̌m dǐ e njʉ̌m dǐ. Nó ó, mbel mempeʼ, bé e kpɛma mede, bɨ́bɛ̂h, bé soho ó mbi ngwár e ngwár. 37Ebě, yê tyeetye lɔ́ɔ́ ó: “Nyâʼ, nye lɨ́ ebe; nyʉ́ʉ́, nye lɨ́ ekpɛm méde me tɨ̂.” 38Me á lómo bɨ̌n ó, bɨ̌n séaa ɨ́ pemé, lɨ́ ekpɛm méde ɨ́ pemé bɨ́n á be abe mempeʼ tɨ̂ʼ yɨ́. Bʉ́ʉ́ bʉ̂r bɨ́ɛ ó b'á bɨbe. Bɨ̌n bɨɛ kǎ nzě dirǎ nyɔm e syɛ́ɛ́ yɔ́ɔ́.»

39Bʉr ó Samarî bé á be ɨ́ nkana yaá bá, bé á si dyɛ̂ʼwo e Yésʉs ɨ́ buo buo, ebě, mʉmá nɨ̌ á be ɨ́ boʼlo ó: “Nye bé ó sí lɛ́ɛ mé sá yɨ́yɛ̂h mé á sâ yɨ́.” 40Jɔʼ bé á nze nkǒ Yésʉs á be yɨ́, bê nzě jɨʼla e né ó, bé le onɔ́ɔ́ díʼeě Sukâr. Yésʉs ntɔ̂ʼ jâ tɨ̂ʼ melú mébá. 41Bʉ́ʉ́ bʉ̂r ɨ́ buo buo ntɔ̂ʼ dyɛ̂ʼwo e né ɨ́ lɔ̌b sá nyé mʉr tɨ̂ʼ á lɨlɛ́ɛ bé yɨ́. 42Bʉr baá, bê nzě lɛ́ɛ mʉ́má nɨ̌ ó: «Ɨ́ báánâ, bɨ̌h bé akǎ dyɛ̂ʼwo e né njɨ ɨ́ lɔ̌b lɔ́ɔ́ gô lɛ́ɛ́ bɨ́h wɨ́, ebě, bɨ̌h bʉr o tɨ̂, bɨ̌h bɨ́ jóʼǒ lwǐb yé le ekʉ́ gʉ́a ntémé ó, ɨ́ sí yɨ̂ʼ yɨ́yɛ̂h, nye ó dí bánǎ be Tiʼbʉr.»

Yésʉs lɨ́ etiʼ mwân mé njwɨ́ʼ syɛ̂l mesâ mé Erôd

(Matthieu 8.5-13; Luc 7.1-10)

43Jɔ̌ʼ Yésʉs á bě sí jâ náǎ melú mébá yɨ́, nye nzě mɔa, tô sí Galilê, 44ebě, Yésʉs mʉr tɨ̂ʼ á bě sí boʼlo ó: “Ngwíha milɔ̌b mé Nzyɛ̌m, nyé abe lɨ́ edweŋɔɔ̌ dúu ɨ́ sí yé.” 45Sâ gwár, ɨ́ jɔʼ nyé á pyâl gʉ̂ʼ yɨ́, bʉr ó Galilê, bé á be ɨ́ nʉa nyé mbɨ̂mbɨá, ebě, bé á be ɨ́ beě sá yɨ́yɛ̂h nyé á sâ Yerʉ́zalɛm ɨ́ jɔʼ bé á tô tɨ̂ʼ ɨ́ nzɔɔ yɨ́.

46Píe tɨ̂, Yésʉs nzě tô Kanâ, nkanǎ Galilê, nko nyé á liŋ medíbé menyoʼ yɨ́. Njwɨ́ʼ syɛ̂l mesâ mé Erôd á be ó tɨ̂. Mwân wé lɨ́ ebíle. Nye á be ó ɨ́ Kapernáʉm. 47Jɔʼ nyé á jóʼo ó, Yésʉs, nyɨ́ duhǒ sí Yʉ́da, nye mû ó sí Galilê yɨ́, nye ntɔ̂ʼ tô nko Yésʉs á be yɨ́. Nye á tô ó, tó jɨʼla e Yésʉs, ó bé e né, bé tôʼ Kapernáʉm, ó Yésʉs tíʼɨɨ nye mwân á be, nye mû kúno edwe nyá. 48Yésʉs, nye e né ó: «Bɨ̌n bé óbɨbe ɨ́ jɔʼ yɨ́yɛ̂h ó, alɨ̌ dyɛ̂ʼwo e mé ɨ́ jɔʼ bɨ́n dína apǎ bee lʉ́ʉ́ ésimá, nkʉ̂ byúú bísá bí ékâm yɨ́.»

49Syɛ̂l mesâ waá, nye e né ó: «Dâ ɛ̌, ntáʼ. Mɨná tôʼ mbɛ̌r wâm jɔʼ mwân wǎm dína apǎ dwe yɨ́.»

50Yésʉs, nye e né ó: «Tóʼ mbɛ̌r gô. Mwân gǒ ótiʼe.»

Mʉ̌r nɨ̌ nzě bûʼlǎ lɔ́ɔ́ Yésʉs á lɛ́ɛ nye wɨ́, nzě búla, tô kwár nyé. 51Nye mû téme-nzɨ̌ nɛ́ɛ: nzě bɔma le osyɛ̂l o mésá bé. Bé á be ó lɨ́ edû nyê. Bé e né ó: «Mwân gǒ, nyɨ́ tiʼe!»

52Nye ó: «Nye á tiʼe dɨ́n?»

Bé e né ó: «Nye á tiʼe ó kʉ̌ʼ, lɨ́ ewala egwár, ɨ́ jɔʼ éjwóo, lé á síe yɨ́.»

53Jɔʼ yaá ó nyé á ka nze símsa ó, yé á be ó, ɨ́ jɔ̌ʼ Yésʉs á lɛ́ɛ e né ó: “Mwân gǒ ótiʼe” yɨ́! Bé e mbɛ̌r bʉ̂r wé wɨ́wɛ̂h nzě dyɛ̂ʼwɔɔ e Yésʉs. 54Lɨ́haá, lé á be ó esimá émbá Yésʉs á sâ píe jɔʼ nyé á duhǒ sí Yʉ́da, tó dǐ sí Galilê yɨ́.

বর্তমানে নির্বাচিত:

Yʉánɛs 4: ozm

হাইলাইট

কপি