Yʉánɛs 10

Kɨkɛna mbɔ̂ʼlʉ binteme

1«Mě lɛ́ɛ́ bɨ́n lɨ́ otyeetye ó, waá nyɨnyɛ̂h dí anî lɨ́ ebé é nkál binteme, tó ntaǎ kôʼ ɨ́ páʼ swîh nyá, nye ó ndíblʉ̌, nkʉ̂ nzilngǎn. 2Waá dí enî lɨ́ ebê nyá, nye ó mbɔʼlʉ binteme. 3Mʉr dí edwéele ébê nyá, nyě dǐb ó mbɔʼlʉ lǎ. Binteme, byé lɨ́ edweʼe étyél lé. Nyě jɨ́jébé bínteme byé ó e míé mɔ́ɔ́, tʉtô e byé kʉ̌l. 4Jɔʼ nyé pyél byé kʉ̌l nó yɨ́, nye mʉr tɨ̂, nye ó dóló, binteme ntɔ̂ʼ dû nyé píhe, ebě, byé lɨ́ edweʼe étyél lé. 5Byé abe e nkul edû mʉ̂r byé dí ejéʼe nyá. Byé kpɨ́kpɛ́ɛ́ nyé ó kpɛ́yɨ́ɨ, ebě, byé adweʼe métyél mé bʉ̂r oswîh.»

6Yésʉs á lɛ́ɛ bé lɔ́ɔ́ nɨ̌ ó, ɨ́ nzɨ̌ bikɨkɛna, bɨ́ɛ l'ajóʼǒ sá nyé á lɛ́ɛ bé tɨ̂ʼ yɨ́.

Yésʉs ó dí mbɔʼlʉ binteme mpâ

7Jɔʼ yaá ó Yésʉs á nze baʼa lɛ́ɛ e bé ó: «Mě lɛ́ɛ́ bɨ́n lɨ́ otyeetye ó, me ó ebé é nkál binteme. 8Baá bɨ́bɛ̂h bé á nze esôʼ e me bá, bé á be ó mindíblʉ̌ ndu e binzilngǎn. Sâ gwár, binteme, byé á bé ajóʼo bê. 9Me ó ebê. Mʉr nyɨnyɛ̂h dí enî ɨ́ me nyá, ótiʼe. Nye óninî, báʼǎ tô kʉ̌l. Nye ókœb méde mé. 10Ndíblʉ̌ nzé ó, lɨ́ enzě díbe, le ejʉ̂, le egbah. Mɛm á nze ó, bʉr bíʼee twiʼ. Bé bíʼee yé ɨ́ buo buo.

11«Me ó mbɔʼlʉ binteme mpâ. Mbɔʼlʉ binteme mpâ, nye lɨ́ edwě twiʼ yé ɨ́ dilá bínteme byé. 12Mʉr dí eséa ɨ́ lɔ̌b mɔnɨ́ nyá, nyé abě mbi mbɔ̂ʼlʉ binteme waá. Binteme nyé dí ebaʼle bí, byé abe byaá byé. Nyé sí bee tír menyan nɛ́ɛ: nye lɨ́ elíʼe bínteme, kpɛ́ɛ, mbi dí ó, tír waá, nyě e nkul emɛ̂r byúú bínteme, gbah byúú yɨ́. 13Nyě kpɛ́ɛ́ ó, ebě, nyě jaá séa ó, njɨ mɔnɨ́. Nyé ajɨ̂ʼ bínteme nkoó. 14-15Mɛm, me ó mbɔʼlʉ binteme mpâ. Mpʉ Sɔ́ŋ wǎm dí egʉ́a mé yɨ́, me lɨ́ egʉ́a nyê. Nó ntémé ó mé dí egʉ́a bínteme byâm, binteme byâm ntémé gʉ́a mé yɨ́. Mě dwé twiʼ yâm ó, lɨ́ esú é bínteme byâm. 16Me dína ó e byúú bínteme bi dí apǎ nî ɨ́ nkál bí. Me ɨ́ jala le etó nʉa byê, níŋle byé ɨ́ nkál nyaá. Byé ójóʼo twíí nyǎm. Bɨ̌n le onɔ́ɔ́, bé óbe ó sɔ́má gwár, mbɔʼlʉ ngwár.

17«Sɔ́ŋ wǎm kpɛl mé ó, ebe mé mû lɨ́ edwě twiʼ yâm. Me ódwe yê, ntɔ̂ʼ báʼǎ nʉa yé, yé mû edwán. 18Mʉr ákóʼó nʉa mé twiʼ. Mɛm mʉr tɨ̂ʼ ó dí edwě twiʼ yâm lɨ́ edû gwɨ́má yâm. Mě e nkul edwe yê. Me ntémé, mě e nkul ebáʼǎ nʉa yé edwán. Yé ó sá Sɔ́ŋ wǎm á dwe me nkul jwɨ́ɨ ó, me sâʼ yɨ́.»

19OYúden nzě báʼǎ bɔ́ʼa métwíí ɨ́ lɔ̌b lwǐb nɨ̌. 20Bʉr ó sɔ́má yɔ́ɔ́ ɨ́ buo buo, bé á lɨlɛ́ɛ ó: «Nyě le eleme! Nye ó gʉ̌! Bɨ̌n jʉ́jóʼló nyé ɨ́ yé?»

21Bʉ́ʉ́, bé ó: «Mʉr dí le eleme nyá, nyé abe e nkul elwǐb mpʉ́nʉ̌. Nzê mʉr dí le eleme nyá, nyě e nkul ebɛ́ɛ báántím mîh ɛ̌?»

OYúden, bɨ́ sǒ Yésʉs

22Yé á be ó jɔ̌ʼ kóló. Bʉr ó Yerʉ́zalɛm, bé á bwal ó, nzɔɔ, le esohǒ móhó bímpám byɔ́ɔ́ bé á pûb mpáh Nzyɛ̌m wɨ́. 23Yésʉs nzě tô le edwáala ɨ́ gwal mé Salomɔ̂ŋ á be siesíe le ebɛhɛ e mpáh Nzyɛ̌m yɨ́. 24OYúden nzě tó kɛb nyê. Bé e né ó: «Go ókǎ sul bɨ́h miléme sí ɨ́ yáǎ jɔʼ? Yé bé go ó Mʉ̌r Nzyɛ̌m á lœm múló mé jwɨ́ɨ nyá nó, páʼláá bɨ́h yǎ!»

25Yésʉs, nye e bé ó: «Me á si boo lɛ́ɛ bɨ̌n. Sâ gwár, bɨ̌n bé abûʼla. Bisyɛ́ɛla mé dí esâ e nkul me Sɔ́ŋ wǎm bí, byé ó dí elɛ̂ʼlě mbi mʉ̂r mé dí wɨ́. 26Bɨ̌n di, adyɛ̂ʼwo e me ó, ebě, bɨ̌n bé abe ɨ́ sɔ́má bínteme byâm. 27Binteme byâm, byé lɨ́ ejóʼo twíí nyǎm. Me lɨ́ egʉ́a byê. Bíɛ ntémé, byé lɨ́ edû mê. 28Me lɨ́ edwe byé twǐʼ njʉ̌m dǐ. Byé ákóʼó dîm ɨ́ nkɔb bʉr. Kâr mʉ̂r ngá pɛʼ mé byǎ ɨ́ mebô. 29Sɔ́ŋ wǎm, mʉr á dwe me byǎ nyá, nyě e nkul, laa bʉ̂r bɨ́bɛ̂h. Nó ó, mʉr, nyé abe e nkul edɛ̂ʼ sɔ̂ʼ ɨ́ mbó wé. 30Bɨ̌h e nɔ́ɔ́, bé ó sâ gwár.»

31OYúden nzě báʼǎ bɨ̂n mékóʼ ó, bé lúmó ó nye. 32Yésʉs, nye e bé ó: «Me á si lɛ̂ʼle bɨ̌n bisyɛ́ɛla bimpâ ɨ́ buo buo, byaá Sɔ́ŋ wǎm á lɛ́ɛ ó, me sâʼ bí. Lɛ́yɨ́ɨ́ gá me: bɨ̌n lúmó mé mekóʼ ɨ́ yaá yáa?»

33OYúden, bé e né ó: «Bɨ̌h bé agwɨ̂m élúmo gó mekóʼ ɨ́ lɔ̌b syɛ́ɛla mpâ yô e yʉ́ʉ́. Yé ó, ebe go dí esâ Nzyɛ̌m nkěh. Gua mʉr, go lɨ́ ebánǎ pɨra e Nzyɛ̌m.»

34Yésʉs, nye e bé ó: «Nzê yé abě cɛmá ɨ́ mekaná métié mɨ́n ó: Nzyɛ̌m á lɛ́ɛ ó, bɨ̌n bé ó onzyɛ̌m ɛ̌? 35Bɨ̌n bé lɨ́ egʉ́a ó, mɨná gá bé abe e nkul edímlě sâ gwár Mékaná mé Nzyɛ̌m á lɛ́ɛ yɨ́. Nzyɛ̌m á jébe “onzyɛ̌m” ó, baá bé á jóʼo lwǐb yé bá. 36Nó ó bɨ̌n lɛ́ɛ́ ó, me lɨ́ esâ nyé nkěh ɨ́ yé? Nzê ebe mê gwíh bɨ́n ó, me ó Mwân wé yɨ́ ɛ́? Me ó waá Nzyɛ̌m á pɛ̂h, lómo ɨ́ sí yɨ̂ʼ nyá. 37Mé bé asâ bísyɛ́ɛla me Sɔ́ŋ wǎm nɛ́ɛ: adyɛ̂ʼwo gá e me! 38Sâ gwár, mé sí sâ byé nɛ́ɛ: bɨ̌n damá be, adyêʼ koo e me, bûʼláá gá yɨ́ɛ ɨ́ lɔ̌b bísyɛ́ɛla byâm. Nó ó bɨ́n ngá sûʼlǎ gʉ́a ó, Sɔ́ŋ wǎm tiʼe ó, ɨ́ mpúhlá e me; mɛm ntémé ɨ́ mpúhlá e né yɨ́.»

39Bé ntɔ̂ʼ kʉ́ báʼǎ sáa ó, bé mɛ́r ó nye. Nye nzě pʉʼa ɨ́ mebó mɔ́ɔ́.

40Yésʉs nzě báʼǎ tô pɨ̌n díbé Yɔrdên kɔ́m nkɛ́ɛ́, nkǒ Yʉánɛs á dudu bʉr yɨ́, tó di gʉ̂. 41Bʉr ɨ́ buo buo nzě dû nko nyé á tô yɨ́. Bé ó: «Yʉánɛs á be ó, asâ damá jóʼo ésimá egwár. Sâ gwár, sá yɨ́yɛ̂h nyé á lɨlɛ́ɛ, dumo e mʉr nyâʼ yɨ́, yé kʉ́ be ó tyeetye.»

42Bʉr ɨ́ buo buo bé á be tɨ̂ʼ bá, bê nzě dyɛ̂ʼwo e Yésʉs.

বর্তমানে নির্বাচিত:

Yʉánɛs 10: ozm

হাইলাইট

কপি