Matay 7
7
Ji manraherahet so icyatatao
(Locya 6:37-38,41-42)
1“Ji kamo manraherahet so icyatatao nyo, ta no si manraherahet kamo so icyatatao nyo am akman kamo sang a raheraheten da. 2Ta o ahahapan nyo so panraherahetan nyo so icyatatao nyo am akman sang o ahapan da sya no tao a amraherahet jinyo. To macilocilolo do kakdekdeng no iraherahet nyo so icyatatao nyo o raherahetan da jinyo. 3Ikongo nyo pacivalalan do da karatan no kadwan jinyo a yanyo kaji makalavatan so nyo karatan. 4Yanyo kapanci no kakteh nyo do cinai a amlis do marahet a nakenakem da am nyo jiblisi o yamarahet a nakenakem nyo. 5Inyo rana mapakapyapya so nakenakem a tao am manmanma o kablis nyo so karatan nyo. Ta ori o ipakacita nyo so karatan no kadwan jinyo an.
6“Ji norwan do ino o apya kanekanen, ta olin na imo a songiten. Jya to norwan do kois o vowawan, ta ingbeywan a saganeyan na.
Makowyat kamo a meynozi
(Locya 11:9-13)
7“Makowyat kamo a meynozi, ta ori o ipakahap nyo so apyahen nyo no nakem. Makowyat kamo a komala si Ama ta do to, ta iya o yanan no kakzeben nyo no nakem. Makowyat kamo a tomawag ji Ama ta do to, ta iya o makasidong jinyo. 8Ta o mapasyasi jya, komala sya, tomawag jya am mahap da o isidong na sira. 9-10Sino jinyo o manta no minapodpod jinyo so vato a kano mavowaw no macyami sira so myanpaw a kano among. 11Kakwakwan nyo a meyraraten a tao a yamakateneng do kapanta no anak nyo so pipya kanekanen a imanngo rana si Ama ta do to. Ta jyabo kaji na norwan nya jinyo no amin nyo o ikeykakza nyo a. 12No si kakzeben nyo o kapya da so nakem jinyo no icyatatao nyo am akman kamo sang so nakem jira. Ta ori o na agagazan no nivatvatkan ni Moyse a kano panoyonoywan na so ciring ni Ama ta do to.
Alikey a asdesdepan
(Locya 13:24)
13“Somdep kamo do alikey a asdesdepan. Ta o asdesdepan a rarahan a meypangay do kararatan am mowvong ori a jyasalit a pangonongan. So ikaro no tao a mangonong do dang. 14O asdesdepan a rarahan a meypangay do kavyayan no pahad am meylid ori a masalit a pangonongan. Apereh o tao a makakala so sang.
Kayo a kano asi na
(Locya 6:43-44)
15“Azimanen nyo o malas so ipangnanao a tao. Ta akmey apiya o ipangnanao da am jyakman sang, ta tey manginanawa sira a mangalalas so ciring. 16To nyo na tovili o iwawalam da. Jyabo kato nyo mamozasan do tazici so potaw a. O tamek am ji to meyyasi so vazacinok. 17O pipya kayo o makapeyyasi so apya so kakanan. O mararahet a kayo am meyyasi so marahet so kakanan. 18Ji meyyasi o pipya kayo so marahet a asi no kayo an. O marahet a kayo am ji to meyyasi so pipya asi no kayo an. 19O ji meyyasi a kayo am to rananba kasleb sya do apoy. 20Am ori o to rana makatenngi do iwawalam da no malas so nanao a tao.
O makasdep do teyngato
(Locya 13:25-27)
21“O tomawag jyaken a tao a manci no, ‘Mo Panirsirngen, mo Panirsirngen,’ am jyamimin sira macikaop do italamozong ni Ama ta do to. Ta o mahap so nanao ni Ama ta do to o macikaop jya. 22No masngen rana o araraw no kapeykapyapinpin na so tao ni Ama ta do to am aro o tao a manci nya jyaken so, ‘Mo Panirsirngen, mo Panirsirngen, nipangozayan namen o ngaran mo asyo a meylimwang no nanao ni Ama ta do to. Nipangozayan namen o ngaran mo asyo a mamozwaw so kalamsoyan ni Satan. Aro o mapeyzokab a vazay a mina vazay namen asyo.’ 23No si maniring ko jira am, ‘Ko jyatenngi inyo. Kazey kamo a yameyraraten a tao.’
Meytarek so ipangamaog so vahay a tao
(Locya 6:46-49)
24“O tao a omamizing so ciring ko a mapeyvazay sya am akman so mapatak a tao a mapatnek so vahay na do lalitan. 25Tana meykawan a macimoy am ji na kava ori, ta nipatnek na do lalitan. 26Am o makamizing so ciring ko a tao a ji ngahap sya am akman so jyapatapatak a tao a mangay mapatnek so vahay na do kananayan. 27No meykawan a macimoy am ji meyyahahay o vahay a makavakava.”
28Mateyka ni Yeso o ciring na am isavasavak da no makamizing so nipangnanao na. 29Ta tey rako oyowyat na no ipangnanao na, do kapacitarek na no ipangnanao na kano aro a mangnanao no iwawalam ni Ama ta do to a tao.
বর্তমানে নির্বাচিত:
Matay 7: snt
হাইলাইট
শেয়ার
কপি
Want to have your highlights saved across all your devices? Sign up or sign in
The Bible Society in Taiwan