GÉNESIS 7
7
Jatun musphay para
1Señorqa Noeman nerqa: Arcaman yaykuy tukuy aylluykiwan; imaraykuchus qanlla allinta purinki ñaupaqeypi tukuy kay tiempo runasmanta nisqaqa. 2Tukuy llimphupaj qhawasqa uywasmanta churay qanchis china orqosta. Mana llimphupaj qhawasqa kajkunamantarí uj china orqollata churanki. 3Jinallataj phawaykachajkunamantapis qanchis china orqostakama, sapa layamanta, jallp'a patamanta ama chinkanankupaj. 4Noqataj qanchis p'unchaymantawan parachimusaj, tawa chunka p'unchayta tawa chunka tutatawan. Jallp'a patamanta chinkachisaj tukuy kausajkuna ruwasqasniyta.
5Noetaj Señorpa tukuy kamachisqanta ruwarqa. 6Noeqa karqa sojta pachaj watasniyoj yaku kay mundota p'ampaykushajtin. 7Noetaj arcaman yaykuporqa wawasninwan, warminwan, qhachunisninwan ima, jatun musphay paramanta pakakunankupaj. 8-9Jinallataj mikhuna kaj animales, mana mikhuna kaj animalespis, p'isqos, jallp'a patata qhatatakojkuna ima, Noewan khuska china orqo, iskay iskaymanta arcaman yaykorqanku, Dios Noeman nisqanman jina. 10Qanchis dianmantaj yakoqa jallp'ata p'ampayta qallarerqa. 11Chaypacha karqa chunka qanchisniyoj día iskay kaj killapi. Noetaj karqa sojta pachaj watasniyoj. Chay diapipuni yuyay chinkay ukhu pacha qocha t'ojyamorqa, jinallataj janaj pachapi kaj yakupis t'ojyamuspa musphayta jich'akamorqa.
12Jallp'a patata paraqa tawa chunka p'unchayta, tawa chunka tutatawan pararqa. 13Kikin chay p'unchaypi Noé arcaman yaykorqa wawasninwan Sem, Cam, Jafetwan; jinallataj warminwan, kinsantin qhachunisninwan ima. 14Paykunawan khuska yaykorqanku tukuy laya monte animales, layankuman jina, uywas, qhatatakoj animales, tukuy laya p'isqos ima. 15Tukuy laya animales arcaman yaykorqanku Noewan khuska iskay iskaymanta, tukuy kausayniyoj kajkuna. 16Sapa laya animales china orqo yaykorqanku, Noeman Dios kamachisqanman jina. Chaymantataj Señorqa arcaj punkunta wisq'aykorqa.
17Jatun musphay parataj jich'akorqa tawa chunka p'unchaykunata. Yakustaj manchayta llump'irispa oqharikorqanku; arcatataj pampamanta tuytucherqapacha. 18Yakoqa uj ima jina kay mundoman junt'aykusharqa, arcataj yakus patapi tuytorqa. 19Yakoqa manchayta wicharispa tukuy jallp'ata p'ampaykorqa, kay mundopi aswan jatun kaj orqosnintinta. 20Chay orqosta p'ampaykuytawan yakoqa qanchis metrostawan jinaraj wicharerqa chay orqos patamanta. 21Ajinapi wañuraporqanku tukuy kausajkuna kay jallp'a patapi: P'isqos, uywas, monte animales, jallp'a patapi qhatatakoj animales, tukuy runas ima. 22Jallp'a patapi tukuy kausayniyojkuna wañurarqanku senqasninkumanta samajkuna. 23Noella kausarqa, pikunachus arcapi karqanku chaykunallawan khuska. Chay ujkunaqa tukuyninku chinkaporqanku: Runas, uywas, p'isqos, qhatatakoj animales ima. 24Yakutaj karqa jallp'a patapi pachaj phishqa chunkayoj diasta.
বর্তমানে নির্বাচিত:
GÉNESIS 7: QCHSB
হাইলাইট
শেয়ার
কপি
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.
