Matiyò 21

Jisòs lye a Jèlusalèm te fə̀n

(Mâk 11.1-11; Lûk 19.28-40; Jon 12.12-19)

1Jisòs gbî ghê jùmtìbàmsù wunsu hì bakhe yênà a Jèlusalèm, yen tan a yi tèk yi Betfàs a kùn à sù Olìf tum jùmtìbàmsu wunsu sùbà, 2Jis ha ghɨna na, “Ghan lyê yen atɨ̂n à yì tèk afân a ghàn ashyə̂. Ghàn nè hì lye yênà kə ni ma ghàn yen njàkâs te ghɨ chwuŋa nì wan a ngwùŋ àtɨ̂n. Ghàn yên, ghàn yêntì ben nì yinì ha mu, bakhe kə nì wan. 3Ghàn bu hi yèntì, à buf nâbi nde gha ha ghàn, ghàn jis na, ‘Bâba kətalò gha hi nì nì sinsu,’ mô hi kaha chinhe bèn nì sinsu kə chîn.”

4Gha mɨ ghɨ̂n tì gan ni, hi lunhe gha ye Yènfù tì jìsa tohne a fòktì wù chìk na: 5“Jìs ha ghɨt a yi tèk yi Sayòn na, Ghàn yen, fə̀n wânù wu bènà ha ghàn, bonê a tô njàkâs a mô wâ njàkâs.”

6Jùmtìbàmsu wunsu yen yen kə te wù jìsa, 7kaha ben nì njàkâs àtɨ̂n nì wan labhi nì njumù ghɨna mù wafamù, Jisòs kwok ndokò a tû. 8Ghɨta dô kə ni hì chwokte njumù ghɨna lêmà wu lum, Jisòs gbê bê a tô àtɨ̂n. Ghɨta hì fatè kpoŋtu mkàk tù, lêmà wu lum. 9Ghɨt ghe ghɨ ndùku yênà a wun ashyə̂ nì ghê ghɨ tì bê a wun yi bàm yimì hì bwate jîsà na, “Hòsanà mò ha Wâ Fə̀n Defìt! Yutìnì mò ha we wù bènà a Bâba yi yet, Hòsanà ha Yènfù a lùk wu ngaŋtenu!”

10Te Jisòs lye a Jèlusalèm, yì nek kə yì jɨ̀m. Ghɨta hì bufa nâ, wùna mò nde agha.

11Ghɨt ghe fîsì na, “À mò Jisòs fòktì wù chìk we wù lo yi tèk yi Nasalì yi lak yi Galìlî.”

Jisòs jum fihi ghɨt a bəklena a ndâ Fùyèn

(Mâk 11.15-19; Lûk 19.45-48; Jon 2.13-22)

12Jisòs yen lye ndâ Fùyèn yì chìk hì jûmà fihe ghɨt ghe a ghɨ ndùku bəkle, yuna afû nâ à jɨ̀m. Wù bâklì baŋ we ghɨta ndùku kwune ka a tô atɨ̂n, bâklì màkà kpòk me ghɨta ndùku ndokò atɨ̂n hì bəkle wù làt, 13Jisòs jis ha ghɨt ghe na, “Ghɨ ti nyak a ŋwàklù Fùyèn na, ‘Ghɨ bè toŋte ndâ mì na ndâ jə̀mana’; biyani ghàn ti kahi chin na à mò luk wu ghɨt a chwoŋanu.”

14Ghɨt a fefana nì ghɨt a ngəhana hì bè yena wun afû, wu chwuka ghɨna. 15Biyani, ngàŋsu ndâ Fùyènsu chiksu nì chichàsu saksu hì bâŋhè lâ kum gha kanana ghe wù ndùku nê, fê ywo te mwəlà bwate jîsà afû na, “Hòsanà mò ha Wâ Fə̀n Defìt!” 16Ghɨna buf ha Jisòs na “Wò ywolò gha ghe mwəlà muna jìsà agha?”

Jisòs bimî kaha jis ha ghɨna na, ghàn tà taŋ jə luk wu ŋwàklù Fùyèn we ghɨ nyaka atɨ̂n na, “Wù tî ni mwəlà mu baha nyoŋâ na mù kokhe wûn.”

17Jisòs jis ni, fwo a Jèlusalèm yen chyə yi tèk yi Betanì.

Jisòs sûlì kâk fu fikfù

(Mâk 11.12-14, 20-24)

18Tuku yû, wù kaha yen a Jèlusalèm, jìŋ hì yafa wùn. 19Wù yen kâk fu fikfù wu lum, lyi yen yi sah àtɨ̂n biyani te yena jə̀ tamu a tô àtɨ̂n a mô kə tu fu ki jis na, “Wò bè fê mo wi tamu!” Kə wu yu fu yum kə yi yîm.

20Jùmtìbàmsu wunsu yen gha mi yîn hì mô nì kani ki buf ha Jisòs na, “Kâk fun gbi yàni hi yim kə wu yu agha?”

21Jisòs kaha fîsì ha ghɨna na, “Mu jìsà ha ghàn hamok na, ghàn hì mô ma ghàn ti samhi, kante wi yi kantî, ghàn làhi nè gha ye mu ne ha kak fûn, mô hi fè jìs nâ ha kùn yì chìk yina na, ‘Lo ndù chem a jwô yì chìk,’ ma yì nê kə te ghàn jìsa. 22Ghàn shìki tê jə̀m bufa nâbi ghə ha Yènfù, ma fu fo ha ghàn a wu yu afa ghàn kəta bimînì.”

Ghɨta hì khɨŋa hi yu na jyaka Jisòs lô afa agha

(Mâk 11.27-33; Lûk 20.1-8)

23Jisòs kaha yen lye ndâ Fùyèn hì yike ghɨta afû, ngàŋsù ndâ Fùyènsu chiksu nì chəhsu lak su ben buf ha wûn na, “Wò nè gha kanana mɨ ghɨ̂n ma jyaka tɨna lo afa? À jyak mɨ ghɨ̂n ha wò fo nde?”

24Jisòs jis ha ghɨna na, “Mu ti boŋa bufalò gha ha ghàn, ghàn ki fîsì, ma mu fokti wùt we wù fo jyak ghɨ̂n na mu hi nê gha mɨ ghɨ̂n. 25Jon ndùku fo mòlû ma wù lyi afa jyaka agha? À tì fo Yènfù jyaka ha wûn ma, à ghɨ̂t agha?”

Ghɨna yîmì hi gufnà a ghɨna sù ngɨŋ na, “Ghàhnà ki jîs na ‘À tì fo Yènfù nì jyaka ha wûn,’ ma wù buf nâ, ‘Ghàn tê bimi gha ye wù tî jìsa njwo ghə?’ 26Ma ghàhnà ki jîs na, ‘À tì fo ghɨta jyaka ha wûn,’ ghɨta làhi bèn nì ngə̂k ha ghàhnà beka ghɨna à jɨ̀m ti bimî na Jon mò fòktì wù chìk.” 27Ghɨna kwâktì ni, jis ha Jisòs na, “Ghàh khə wi.”

Jisòs ki jîs ha ghɨna na, “Mu ti boŋa fôktè wi luk afa mu lye jyak ghɨ̂n hi tè nè gha ghɨ̂n atɨ̂n.”

Ngàn kum wùt nì mwəlà mù wûn mù bà

28Jisòs fî jis ha ghɨt ghe na, ghɨna kwàktè na ghə kum nì ngàn ye yi khɨŋa hi mà ki jîs na, “Wùt lè ndùku kəta mwəlà mù lɨmà mù bà, yen ha wù shyə̂ tum wûn jis na, ‘Shik ndù fèt a fùk à mu tama lân a wâ mù.’ 29Wan àtɨ̂n jis kə yi tum na, ‘Yi shika wi.’ Biyani fî kaha kwâktì a wun a ngɨŋ na yi shik, shiklò. 30Bì yen ha wan wù kùmte fî tum nâbi wun yâ te wù ye tuma wù shyə̂, tum jis kə ni, wù bimî biyani tê shik.” 31Jisòs jis ni ki buf ha ghɨna na, “À tì ni wùni wan gha ye bè wûn ndùku khɨŋa agha?”

Ghɨna fîsì na “à tì ni wù shyə̂.”

Jisòs jis ki jîs ha ghɨna na, “Mu jìsà ha ghàn hamok na, ghɨt ghe ghɨ kâtà ŋwàklànà nì kpàlànù mò a luk wu fə̀n wù Fùyènù a shyə̂ ha ghàn. 32Mu jìsà ni beka Jon Fo Mòlû ti ben hi chwùtì lum wu chilichili a we ghàn nè hì gbê atɨ̂n a Yènfù ashyə̂, ghàn tê bimî. Biyani ghɨt ghe ghɨ kâtà ŋwaklànà nì kpàlànù bimî. Ghàn yen yâ tunhi na ghàn kahe wi təm ghàn hi bime gha ye wù ndùku jîsà.”

Jisòs ma ngàn kum bè fùk nì ghɨt a wuna ghɨ fetana

33Jisòs fî jis na ghàn yutè kpenhi ngàn yina na, “Bè fùk wùlè tî jîmì fuk à wuna mu tama mù gɨlèb lu baŋ nì mbàn, chɨm yi be ye ghɨ nè hì nûkà tam me atɨ̂n fate mlûk, fi chɨm a baŋ a chìnà a fùk afû fî lem à ghɨ̂t na ghɨ hi fêtà atɨ̂n, jyâtè fo wun nì mwə̀ me mù fwo a fùk atɨna. Lo yen yi gbî yi lak yile. 34Yu kpenu kpên, wù tum ghɨt a wuna fetana ale na ghɨna yê jis ha ghɨt ghe wù tì fo fuk ghê ha ghɨna na ghɨ fo wu wunu tamu. 35Ghɨt a fetana ghe yen khɨti ghɨt ghe wù tì tuma yâ sam wù mòk, ywi kùmti, tumlî wùlè we nì te. 36Bè fùk àtɨ̂n fî tum kpenhi ghɨt ale ghɨ dô chyâ ghe wù tì tuma, ghɨt ghe a fùk afa fî nì kə te ghɨna ye ne ha ghɨ le ghê. 37Wù tum gokhì wâ wûn wù lɨmà ha ghɨna, kwâktè na, ‘Ghɨna nè fânàlò wâ wûn.’ 38Biyani, ghɨt a feta mu ghe yen wâ wûn mu we, kwâktì a ghɨna sù ngɨŋ na, ‘Wùna mô kə nâ yə̂ ndâ bè fùk mu wuna ni. Ghàhnà khɨtè ywi wûn ma kwoti mwə̀ me wù yê mô hi khɨtî.’ 39Ghɨna jis ni khɨti wûn guf fwu nì wun a fùk afû ywi wûn.”

40Jisòs ki buf ha ghɨna na, “Yi ki gân ni, bè fùk mu wùna nê kahà ben, ma wù ni nâ ghə ha ghɨt a fetana mɨ ghɨ̂n?”

41Ghɨna fîsì ha wun na, yi ki gân ni ma bè fùk àtɨ̂n ywiti ghɨt a be mɨ ghɨ̂n a lum wu bəmanu ma wù fo fuk àtɨn a ha ghɨt a lô, ma ghɨna hi fêtà fo mu wûn mwə̀lû kə yu mù jɨ̀m.

42Jisòs ki buf ha ghɨna na, luk wule làwû a ŋwàklù Fùyèn a wu jîsà na: “Ti ye ghɨt a bana tì tuma maka yi ti kahi a yi ti bûlà ndâ. À mò fêt yì Bâba ni; Gha jwo yumani lo afa ni! Ghàn tà taŋ yen jə?”

43Jisòs buf ni ki jîs na, “Mu jìsà ha ghàn na ghɨ bè fyelò fə̀n wù Fùyènù ha ghàn ma ghɨ fo ha ghɨt ghe ghɨna nè hì mo tamu we wu kpene ha fə̂n wù tɨnu.” 44À damta nâbi nde a ti bûlà nda afân, ma wù fə̀n à təntî wu kòm wu kòm, ma yi fə̀n nâbi nde a tû ma yi gwôhè kə wun yi gwôhì.

45Ngàŋsù ndâ Fùyènsu chiksu nì ghɨt a Falàsî tì yu ngànsu Jisòs sîn, khɨli na wù jìsà kum ghɨna, 46hì khɨŋa wu lum hi khɨte wun biyani fan kə ghɨt ghe ghɨ ndùku mô afû, beka ghɨna ndùku lyê wûn te fòktì wù chìk.

বর্তমানে নির্বাচিত:

Matiyò 21: bmv

হাইলাইট

কপি