Matiyò 18

Jisòs yiki kum wùt we a wù chyà wùlè

(Mâk 9.33-37; Lûk 9.46-48)

1Jisòs jis mihì motì kə ni jùmtìbàmsu wunsu ben buf ha wun na, “À ngaŋte chyâ nde a lùk wu fə̀n wù Fùyènù agha?” 2Kə wu yu Jisòs toŋti fù walà jis na fu bê timi a ghɨna ashyə̂, 3lyi jis na “Mu jìsà ha ghàn hamok na, ghàn ki faŋ hi kwuna hi tè mò te mwəlà mù tetamù ma ghàn bê tè lye jə̀ a lùk wu fə̀n wù Fùyènù. 4Yi chwûtè na wùt we wù ngaŋte chyâ wùlè a lùk wu fə̀n wù Fùyènù mò we wù ngumle ngɨŋ à wûn hì mô kə te wan wunâ. 5Ma à fyi nâbi nde nì walà te wûn kum mu, ma à hi mô na wù ti fyi mu.”

(Mâk 9.42-48; Lûk 17.1-2)

6“À ki nî nâbi nde na walà fù mòk atɨ̂n à mwəlà munâ a bime ha mu ni, ni be ma yi nê hi jwôfà na ghɨ chwuŋ ti a wun wu mɨ̀ ma yê maka wun a jwô yì chìk na wù kpu. 7Biyani ngə̂k yì chìk mò ha wùt we wù ne na gha ghɨ̂n gan!”

8“Wo gha ki nì na wò ni be makə wula gha, wo kat mâkàlò. Yi jwôfà na wò khɨti chyəna ghe ghɨ bê mê wi nì wo à mòk makə wula à mòk chyâ shyəma wò hi kəta bâh wù wùnu wù jɨ̀m, ma ghɨ mak wò a wu wùs we wù bame lɨmne wi.” 9À ki nê yi se ya na wò ni be, wo boklì fihi mâkàlò. Yi jwôfà na wò khɨti chyəna ghe ghɨ bè mê wi ni se yì mòk, chyâ shyəma ghɨ bê mak wò wu wùs nì se à jɨ̀m.

Jisòs jis kum mwəlà

(Lûk 15.3-7)

10“Ghàn hi tôknè kə wùt bê kehi walà fù mòk atɨ̂n à mwəlà mù teta munâ. Mu jìsà ha ghàn hamok na a mò a nyə̂, anjèl se su kina mwəlà munâ bɨŋle kə bôm a ngwùŋ.” 11(Wâ Wùt ti ben hi bònhe ghɨt a ləhana.)#18.11 Ŋwàklù su mwu su dosu kəta wi luk wûn.

12“Ghàn kwàktè na ghə, wùt shìki kəta njyə̀sù wu wə, yì mòk ləhà. Yi gan ni, ma wù nde sule se mbulamòk mòk njwò bulamòk a kun ma wù hi gbê khɨŋa yìlè yê yì ləha yâ. 13Mu jìsà ha ghàn hamok na, wù ki khɨŋa yên, ma wù hi saŋlê nâ jûŋ kum njyə̀ mi yê yì mòk chyâ te wù saŋle nì su le sê mbulamòk jwò bulamòk a se su mô a kun yâ. 14À mò kəbi yi ghəl te Bì wanù a nyə̂ kòŋà wi na walà fù mòk atɨ̂n à mwəlà mù tetana munâ ləha.”

Tihi wâ nâ a wu yu afa wù ne be ha wò

15Jisòs fî jis na, “Wâ nâ ki nê be ha wò, wo yen yen wûn fôktì gha ye wù bobhe. Wò shihi fòktì, ghàn à wun jis kə à bà. Wù ki yû, ma à hi mô na wò ti kaha ben nì wûn ha wò.” 16Wò yen jis wù faŋ hi yû, wo kaha yen lyi wùt lè makə à bà, ghàn à ghɨna yen jis ha wûn ma ghɨna yê timi te sù bɨ̀n à sak agha atɨna te ŋwàklù Fùyèn jìsà na, ‘Ma ghɨna yê timi te bɨn à sak nâbi yìni gha ye wò jìsa makə à tât.’ 17Ghàn chîntì jis ha wûn, wù fî faŋ hi yû, wò lyi yen nì gha tɨni a ghɨt a bimena yi yùŋtì, wù ki faŋ hi yû kəbi a yi yùŋtì ghɨt a bimena. Wò lem na wù mò ha wò te wùt à tum makə wùt we wù kâtà ŋwàklànà.

18“Mu jìsà ha ghàn hamok na ghàn Kwut nâbi ghə a chyə̂ makə ghàn yèntilò, ma Yènfù nê lem kə yâ a nyə̂.”

19“Mu fê jìsà kpenhe ha ghàn na, ghàn shìki mô à bà a chyə̂ afân chyati buf nâbi ghə a jyə̂ yì mòk, ma Bâ mù a nyə̂ nê ni ha ghàn. 20Beka ghɨta ndòko nâbi afa hi chyati à bà makə à tât a mu yi yet, ma mu nê hi mô ghàh à ghɨna.”

Jisòs yiki na ghɨta kəta hi tè lèhefo kə yu mù jɨ̀m

21Bità fwu ben buf ha Jisòs na, “Bâba, wâ nôm shìki tè nè kə yi nî be ha mu, ma mu nê lèhêfo wûn a ghan à sek? Mu làhi lèhèfo wûn a ghàn sàmba agha?”

22Jisòs ki jîs ha wun na, “Ngaŋ, à wi kə a ghan sàmba. Wò kəta hi lèhèfo wun a ghan msàmba jwò sàmba. 23Gha ye mu jìsà ni mò beka nâ Yènfù saka kə te fə̀n wùlè a wù ndùku khɨŋa hi fate yen na ghɨt a fetana wuna kəta yàni ka hi làk ha wûn agha. 24À hì mô te wù yìme, ghɨ ben nì wùt fètana wùlè ha wun, wu kəta ka hi lak a sù malàm. 25Fə̀n we jis na, ghɨ bəkli wûn nì ywê wûn nì mwəlà mù wûn a wu kwòs bakhe nâbi nì ghɨt ghe wù ndùku kəta ma lyi ka tɨnu ma làk yi atɨ̂n beka wù ndùku kəta wi ka hi làk.” 26Wùt fètana atɨ̂n tum sù ngwuk a wun ashyə̂ hì chyate wûn jîsà na, ‘Kwut təmi kə afu yula ni, ma mu nê kahà lak nâbi ghə ha wò.’ 27Fə̀n àtɨ̂n kwohi yi sen ha wûn jis ha wun na, wò nè fè lakà wi ka tɨnu, de wun wù lô.

28“Te wù tì lo ya hì yênà boŋ yen wùt wùlè te ghê ghɨna ndùku fêtà, wu kəta kə fu kalà ni hi làk ha wûn. Wù khɨti wûn kwo wun a yi sèk jis na wù lak ka wi. 29Wùt àtɨ̂n tum a lwî a chyə̂ hì chyate wûn jîsà na, ‘Kwut təmi ma mu nê lak wò.’ 30Wù tunhî, ni ghɨ kwo khɨtî wun falò, jis na wù faŋ à kə afû hi bè tàn a tuk afa wù bè lâkà ka tɨnu. 31Ghɨt ghe ghê ghɨna ndùku fêtà amok yen gha tɨni hì saŋle wi nâ hakoh kahi yen fôktì ha fə̀n we ghɨna ndùku fêtà ha wûn. 32Wù toŋa wùt fètana àtɨ̂n a ndâ jis ha wun na, ‘Wò mò kə nâ wut fètana wù be! Wò ye chyati mu, mu ti de ka we wò kəta hi làk ha mu. 33À ye gan ghə na kə wò boŋà kwohi seni ha wùt wuna a ghàn à wun ndùku fêtà amok kəbi te mu ye kwohe seni ha wò agha?’ 34Lâ fə̀n we bâŋ, wù lyi fo wun ha ghɨt ghe a ghɨ ndùku fâ ghɨta na ghɨ fa wûn ma fê sam wûn hi bè tàn a wu tuk afa wù bè kaha lâkà nâbi ghə ghe wù kəta hi làk.”

35Jisòs ma mihì ngàn mi yina ki jîs na, “À mò te Bom a nyə̂ bè nê nâbi ha nde we wù faŋa hi lèhèfo wâ nè wûn nì təm a wuna à jɨ̀m.”

বর্তমানে নির্বাচিত:

Matiyò 18: bmv

হাইলাইট

কপি