Matiyò 16

Ghɨta hì khɨŋa hi yena chwena

(Mâk 8.11-13; Lûk 12.54-56)

1Ghɨt a Falàsî nì ghɨt a Sadùsî tî bên ha Jisòs hì khɨŋa wu lum hi kwo wun atɨ̂n ki jîs na wù ni gha kanani yile te a chwe hi chwùtì na jyak a wuna lo kə nâ ha Yènfù. 2Jisòs jis ha ghɨna na, “Yuchwî shihi lye a nyə̂ yi hi bâŋà, ghɨ jis na luktu bè hì jwôfàlò yi bîs. 3Tuku bis yû, luktu hì gunà kə̂kà, ghàn jis na wuli nè nâlò lân. Ghàn shìki ke a bɨn, fôktè gha ye yi mô hi gàn biyani ghàn wi hi yen a khɨle gha ghe chwènu wun chin fòktè. 4À mô kə ghɨt ghe ghɨ lêmà wi təm a ghɨna ha Yènfù a ghɨ mô hi tè bufa a chwena. Ghàn bè yena wi chwena ale, a bu kə yì Jonà.”

Wù jis ni, lo kolo lò.

Jisòs fôktì gha kum nì yikî Falàsî nì ghɨt a Sadùsî

(Mâk 8.14-21)

5Jisòs ghê jùmtìbàmsu wunsu shihi dàŋ yi jin yi lwi yile, ghɨna yità hi lyè ban a kwaŋa, 6daŋ tân, Jisòs ki jîs ha ghɨna na, “Ghàn hi tôknè kum chɨmlana ghɨt a Falàsî ghê ghɨt a Sadùsî.”

7Ghɨna hì bitè gha atɨna a ghɨna fùtɨ̂n jîsà na, “Wù jìsà ni beka ghàhnà tê yità hi lyè a bân.”

8Jisòs khɨli gha ye ghɨna ndùku bîtè buf ha ghɨna na, “À mò te samhi yani tobte ni? Kum ghə te ghàn jìsà na a mò beka ghàn kəta wi ban a kwaŋa agha? 9Bà yi mô na ghàn tà khɨli jə gha? Ghàn baha kwâktè wi te mu tì yəhe ghɨt ghe kam sù tân nì ban wù tân agha? Ghàn tì kumti chyàk se su tì faŋa su lun kàsù sek? 10Ghàn ti yità ghɨt ghe kamsù kìk a mu tì yəhe nì ban sàmba ni agha? Ghàn ti kumti chyàk se su faŋa su lun kàsù sek? 11Njwô ghə te ghàn ye faŋ hi khɨlî na mu yê hì jîsà wi ha ghàn kum a bân agha? Ghàn hi tôknè kum chɨmlana ghɨt a Falàsî ghê ghɨt a Sadùsî.”

12Wù jis ni, jùmtìbàmsu wunsu ki khɨlî na wù yehì jîsà wijə kum chɨmlana ban a kwaŋa. Ghɨna ki khɨlî na wù yê jîsà kum yikî ghɨt a Falàsî ghê ghɨt a Sadùsî.

Bità fôktì wùt we Jisòs mò wûn

(Mâk 8.27-30; Lûk 9.18-21)

13Jisòs yen a bàh à yi lak yi bakhe yi tèk yi Sìsaliyà Fìlibây ghê jùmtìbàmsu wunsu ki buf ha ghɨna na, “Ghɨta jìsà na Wâ Wùt mò nde?”

14Ghɨna fîsì na, “Ghɨta jìsà na wò mò Jon Fo Mòlû, ghɨ le jîsà na wò mò fòktì Ìlajà, ghɨ le jîsà na wò mò fòktì Jèlìmayà, a bu ya ma wò hi mô kəbi fòktì wù chìk wùlè.”

15Jisòs buf ha ghɨna na, “Nâ ghàn ni jìsà na mu mò nde?”

16Samùn Bità jis na, “À mò wò we ghɨ chwoka lema Wâ Yèn fe fu mô yû mù jɨ̀m.”

17Jisòs ki jîs na, “Jùŋ mò ha wò Samùn wâ Jonà, beka à tà fôktì jə wùt gha mi yin ha wò, na wò jis, à fòkti Bâ mù, Yèn fe fu mô a nyə̂. 18Mu jìsà kəbi ha wò na yet ya mò Bità, mu nè balò ndâ yùŋtì ghɨt a ma ghɨ bimena a tô ti mi yîn, ma jyak a yi kpo bê tè ta chyà jə#16.18 Bità yi jìs yi Gɨlìs mò na, yi ti. 19Mu nè folò chwok a fə̂n wù Fùyènù ha wò. Nâbi ghə wò kwuta a chyə̂ ma ghɨ bê kwut a nyə̂, ma nâbi ghə ghe wò yènte a chyə̂ ma ghɨ bê yenti a nyə̂.”

20Jisòs jis ni ki chîhì ha jùmtìbàmsu wunsu na kə wùt nè ywo na yi mò Klistù we ghɨ chwoka lema.

Jisòs fôktì na yi nè yenalò ngə̂k hi kpû

(Mâk 8.31–9.1; Lûk 9.22-27)

21Jisòs yîmì wu yu afû hì fôktè ha jùmtìbàmsu wunsu na yi kəta hi yèn a Jèlusalèm hi yena ngə̂k yì chìk, na chəhsu ghê ngàŋsù ndâ Fùyènsu chiksu nì chichàsu saksu na yi yen ngə̂k a ghɨna wô ma ghɨ ywi yi ma hi mô yi bàm yi mtuk mù tât, ma yi kahà loti a yi kpû.

22Bità gûftì wun yi bàm hì njaŋâ ha wûn jîsà na, “Kə Yènfù de na nki gha yin gan ha wò a bâ! Yi wi hi bè gàn ha wò.”

23Jisòs kahi ki Bità jis ha wun na, “Kahi a mu yi bàm a Satàn! Wò tàhèlò mu. Wò kəta wi kwâktì yi Fùyènì, wò kwàktè kə te wût.” 24Jisòs jis ni ki jîs ha jùmtìbàmsu wunsu na, “À hì kôŋà nâbi nde hì jûmtè mu, wù mâkà ngɨŋ à wûn wu bêkà kâkfùtàfù wun fu wù jûmtì mu.” 25À mòmhi nâbi nde hi chìn à yohnà wuna ma wù kpu, ma màka nâbi nde yohnà wuna ma wù kwoti. 26Wùt mò hi khɨti mbè ghə a wu yu afa wù khɨte nâ mbyi yì jɨ̀m lesì a yohnà wuna agha? Wùt ni mò hi yun nâ to wuna nì ghə? 27Mu jìsà ni beka Wâ Wùt nè motè kə ni ma wù bè kahà ben atɨ̂n à ban yi chiki Bè wuni ghê anjèlsù wunsu a yu afû ma wù fo nâbi maktu nde kə yi ghəl te wù ndùku fêtà. 28Mu jìsà ha ghàn hamok na, ghɨt ale làwû afân chîn, bu hi bè kpû nâ hakoh hi tàn te Wâ Wùt bè bê ma wù sak fə̂n wù wunu.#16.28 Yet yinâ na Bità nì gha yina na yi wo mò yi ghəl yi jìs yi Gilɨ̂s.

বর্তমানে নির্বাচিত:

Matiyò 16: bmv

হাইলাইট

কপি