Jɔn 5

Raan cï tɔ Waar në Awuöl Nɔm

1Na wën, acï kakë thök, ke Judai ë ke jɔ Dhuëëŋ looi, ago Yecu jäl le Jeruthalem. 2Ku ade awuöl nu Jeruthalem awuöl thiääk ke kal thok Kal ë Amɛ̈l, awuöl de göl kadhïc, ku acɔl Bethaida në thoŋ de Ɣeberuu. 3Ku ade kut dïït ë kɔc ë tɔ̈c ë gölke yiic, kɔc tök, cöör, ayï ŋöl ayï aduɛɛny, ke ke ye kööl bï pïïu weer tiit. 4Ade tunynhial ë Bɛ̈nydït ee bɛ̈n piny le ë awuölic ëkööl mɛɛn, bï pïïu bɛ̈n weer: ku raan ë kɔn lɔ ë pïïu yiic, të cï ke weer, ka bï waar ë juändɛn nu ë yeguöp. 5Ku ade raan ëtɛ̈ɛ̈n, raan ë töök ë run kathiërdiäk ku bɛ̈t. 6Na wën, acï Yecu e tïŋ adhɔt piny, ku ŋic nɔn cï e töök ë run juëc, ke jɔ thiëëc an, “De yï piɔ̈u nɔn bï yïn guöp pial?”

7Go raan tök puk nɔm, an, “Bɛ̈ny, yɛn cïn nɔm raan bï a tääu ë awuölic, të cï pïïu weer: ku tën aa yɛn ŋoot kueer, ke raan däŋ ee guɔ lɔ ë yanɔm tueŋ.”

8Go Yecu yɔ̈ɔ̈k an, “Jɔt rɔt, jɔt biöŋdu, cathë.” 9Go raan guöp waar ënɔnthiinë, go biöŋde jɔt, ku ciɛth.

Ku ëköölë ee kööl ë Thabath. 10#Neɣe 13:19; Jer 17:21. Na wën, ke Judai ke ke yöök raan wën cï dem an, “Ëköölë ee kööl ë Thabath, acïï piɛth luɔi ɣɛ̈ɛ̈c yïn biöŋdu.”

11Go pɔ̈k nɔm keek an, “Raan ë tɔ ya piɔl, yen aa yöök ɛn an, jɔt biöŋdu, cathë.”

12Gokï thiëëc an, “Ee raan ŋa ë yöök yïn an, jɔt biöŋdu, cathë?”

13Ku kuc raan cï dem nɔn ee yen ŋa: Yecu acï jäl, në baŋ de kut ë kɔc nu ëtɛ̈ɛ̈n.

14Të cï kakë thök, ke Yecu jɔ raanë yök ë Luaŋdïtic, go lɛ̈k en an, “Tïŋ, yïn cï guöp waar: du käŋ ee bɛ wööc, ke yï cïï kërac bï yök kërɛɛc wär këwään.”

15Go raanë jäl le lɛ̈k Judai nɔn ee yen Yecu, yen ë tɔ yen dem. 16Yen aaye Judai Yecu yɔŋ, ku yek kɔɔr an, bïk nɔ̈k, në kë cï en kakë looi ëkööl ë Thabath. 17Go Yecu pɔ̈k nɔm keek an, “Wäär ee luui aɣet cï ënɔɔnë, ku yɛn ee luui aya.”

18Yen akɔɔr Judai luɔi nɛ̈k kek en, acie luɔi cï en kööl ë Thabath rɛɛc theek etök, ee luɔi cï en Nhialic tɔ ye Wun aya, ago rɔt thɔ̈ɔ̈ŋ kekë Nhialic.

Riɛl de Wënde

19Go Yecu bɛ̈ɛ̈r, yöök keek an, “Wek yɔ̈ɔ̈k ëyic, an, Wënde acïn kën ee lëu etök, ee kë cï tïŋ aye Wääda looi, yen aye looi: käŋ kedhie kak ee Wääda looi, kek aye Wënde ke looi ayadäŋ. 20Wääda anhiaar Wënde, go ya nyuöth käŋ kedhie kak ee looi: ku bï nyuöth luɔi dïït wär ee kakë, ke we bï gäi. 21Acït man ee Wääda kɔc cï thou jɔt, tɔ keek pïïr, yen aye këde Wënde aya, ee kɔc tɔ pïïr kɔc nu ë yenpiɔ̈u. 22Acïn raan ee Wääda löŋde guiir, acï guiëërëlöŋ tääu ë Wënde ciin ëbɛ̈n. 23Ke kɔc ë ke bï Wënde aa riëëu kedhie, cït man ee kek Wääda riëëu aya, raan ë toc e.

24“Wek yɔ̈ɔ̈k ëyic an, Raan piŋ wëlkï, ku gɛm raan ë toc ɛn, ka cath ke pïïr athɛɛr, ku acïn gääk bï tääu ë yeyeth, acï bɛ̈n bei ë thuɔɔuwic, le të nu pïïr. 25Wek yɔ̈ɔ̈k ëyic an, kööl abɔ̈, ku anu ënɔɔnë, kööl bï kɔc cï thou röl ë Wën ë Nhialic piŋ, ku kɔc ë pïŋ abïk pïïr. 26Acït man ciɛthë Wääda ke pïïr ë yenhde etök. 27Ago Wëde gäm bɛ̈ɛ̈ny bï en löŋ de kɔc aa guiir, luɔi ee yen Wën ë Raan. 28Duökï gäi në kënë: kööl abɔ̈, kööl bï kɔc nu ë rɛ̈ŋ yiic rölde piŋ kɔc kedhie, 29#Dan 12:2. agokï bɛ̈n biic, kɔc ee këpiɛth looi, abïk röt jɔt në jönërɔt de pïïr, ku jɔt kɔc ee kërac looi röt, në jönërɔt ë gääk nu ë keyiëth.

Cäätɔ de Yecu

30Yɛn cïn kën aa lëu yatök: kën aa piŋ, yen aya yɛn löŋ guiir: ku piɛth guiëërdï, në kë cän këde piɔ̈ndï ee kɔɔr, ee këde piɔ̈n ë Wäär, raan ë toc ɛn, yen aya kɔɔr.

31Të ta yɛn rɔt ee cäätɔ ë rɔt, ke këdï acie yic. 32Ee raan däŋ yen aye cäätɔdï, ku këdɛn lueel ee këdï aŋiɛc nɔn ee yen yic. 33#Jɔn 1:19-27; 3:27-30. Wek ë kɔc tuöc Jɔn, ku acï aa cäätɔ de yic. 34Ku yɛn cïï këde raan ee gam: kakë alɛ̈k ke week tei, ke we bï kony wëi. 35Yen aaye many ë dɛ̈p ku ye piny riaau: ku wek ë piɔ̈ɔ̈th dɛ luɔi bä wek piɔ̈ɔ̈th miɛt në maanyde tëthiinakäŋ. 36Ku yɛn cath wo cäätɔ wär Jɔn: luɔi cï Wääda yiɛ̈n ɛn, bä ke bɛ̈n thöl, luɔi luɔɔiyë, kek aye cäätɔɔkï, lueel en, an, ee yen Wääda yen ë toc ɛn. 37#Math 3:17; Mak 1:11; Luk 3:22. Ku Wääda guöp, raan ë toc ɛn, yen aye cäätɔdï. Rölde akɛ̈nkï piŋ anandun, ayï täu tɔ̈u en akɛ̈nkï tïŋ, 38ku jamde acie tɔ̈u ë weyiic: luɔi cä wek raan ee gam, raan ë tooc. 39We ye kacïgɔ̈ɔ̈r cök ë kuɛɛn wek keyiic, luɔi aa wek e lueel an, yak pïïr athɛɛr yök në keyiic, ku kakë ayek cäätɔɔkï, 40ku wek ee rɛɛc bɛ̈n tëde yɛn, bäk pïïr bɛ̈n yök.

41“Yɛn cïï lɛc ee gam tëde kɔc. 42Ku wek ŋiɛc, nɔn liiuwë nhiëër ë Nhialic ë weyiic. 43Yɛn ë bɔ̈ në rin ke Wäär, ku we kën a gam: të bï raan däŋ në rin ke yenguöp, yen abäk gam. 44Duɛ̈ɛ̈rkï gäm lëu wäkdï, wek kɔc ë lɛc gam lɛc aa wek röt leec wapäc, ku cäkï lɛc ee kɔɔr lɛc bɔ̈ tëde Nhialic etök? 45Duökï ee lueel nɔn bän we lɔ gaany ë Wäär nɔm: raan gɔɔny week anu, yen Mothe raan ŋäthkï. 46Tëë we cï Mothe gam, adï cäk ɛn gam aya: acï këdï gɔ̈ɔ̈r. 47Ku të rɛɛc wek kakɛn cï gɔ̈ɔ̈r gam, ke we bï wëlkï gam wäkdï?”

বর্তমানে নির্বাচিত:

Jɔn 5: dip-JPB

হাইলাইট

কপি