Matthew 8
8
Jesus kaa miinuwaachihaat naapeu kaa umichiiwaaspineyich
Mark 1.40-45; Luke 5.12-16
1Iskutak maak Jesus piyechi pinisuwet aniyuu wachiyuu, mihchetu aweyuuh chii ati nuushuushkaakuu. 2Ekw naapeu kaa maayaataniyich umichiiwaaspinewiniyuu e ayaayich kaa pechi naatikut kaa uchihchiihkunipayihuyich anite uhchishkuu e ihtaat, ekw kaa itikut, “Utipeyihchikeu, wii pechi wiichihiyine chika chii ihtuuten chechii payehtisiyaan.”
3Jesus maak chii taahtineu e itaat, “Chiwii wiichihiitin, payehchisiih.” Tiiwehch maak chii miinuwaatisiyuu an naapeu aniyuu kaa itaaspinet. 4Ekw Jesus kaa itaat, “Yaaitei, ekaawii mitun wiihtamuu awen paatishkaan chii nituuchischeyimiske ayimiheuchimaau itiske maak shaash e miinuwaatisiyin. Kaye chii pachishtinamane an miiwewin aniyaa Moses kaa itashuwet chechii miiwaanuyich iskutak e miinuwaachihaakanuut awen. Eukw maak uyeyuu uhchi che chischeyimiskwaau awenichii tekash e miinuwaatisiyuut.”
Jesus kaa miinuwaachihiimaat shimaakanisha kaa niikaanishkuwaayich utaapachihaakaniyuuh
Luke 7.1-10
5Iskutak Jesus tekushihk anite ihtaawinihch Capernaum kaa ishinihkaateyich, chii nachishkaakuu aniyuu naapeu kaa niikaanishkuwaayich shimaakanisha e pukuseyimikut chechii wiichihaat. 6E itikut, “Utipeyihchikeu, nitaapachihaakan e ihtaayaahch ihtaau e aahkusit ekaa chii aahtinisut kaye maak naashch wiisacheyihtamihpineu mikw e pimishinit unipewinihch.”
7Ekw Jesus kaa itaat, “Nika nituwaapamaau, che miinuwaachihiik.”
8Ekw an shimaakanishuuchimaau kaa itaat aniyuu Jesus, “Namui nitepicheyihtaakusin chechii pechi piihcheyin niwaaskaahiikanimihch. Mikw maak itweh chechii miinuwaatisiit nitaapachihaakan ekw maak che miinuwaatisiit aat ekaa takushiniyine. 9Nichischeyihten chechii ihtuutaman uu, kaye niya ihtaauch nuuchimaamach e pishichihiikwaau. Kaye maak ihtaauch shimaakanishach niya e wawiishuumakwaau. E itak peyakw shimaakanish ‘Anite ituhte,’ tiiwehch ekute e ituhtet kaye maak e itak shimaakanish, ‘Aashtam,’ tiiwehch takushinuu. Ekw kaye kutak e itak nitaapachihaakan ‘Uu maa ihtuut,’ eukw aniyuu e ihtuutahk.”
10Iskutak maak Jesus piyehtawaat uyuu e itweyich naashch taapwe chii miskaateyihtamihiikuu utaapwehtamuwiniyuu. Ekw kaa itaat aniyuu aweyuuh kaa wiicheukut, “Aat maak ekaa Jewa itiskaanesit uu naapeu eshkw namui nuuhchi waapamaau Jewa e itiskaanesit awen utah Israelihch chechii ishpish suuhchitaapwehtahk. 11Chiwiihtamaatinaawaau waapanuutaahch kaye maak paashtaachiiwetinuutaahch chika uhtuhteuch awenichii che wiitapimaatwaau Abraham, Isaac ekw maak Jacob makushaanuyiche kihchikiishikw chisheuchimaawinihch. 12Mikw maak anichii kaa masinaasutwaau chisheuchimaawinihch che ishi wiichihiiwewaakupanenich namui chika uhchi piihtakahaakanuuch anite. Wanitipiskusiiwinihch chika ishiwepinaakanuuch, ekute anite che maatutwaau kaye che mamiteyaapitesinitwaau.” 13Ekw Jesus kaa itaat aniyuuh shimaakanishuuchimaauh, “Chiiwe, taan kaa ishi taapwehtaman ekun che ishi ihtuutamaakuyin.” Aniyuu maak mekwaach kaa itaat aniyuu shimaakanisha, ekut mwehch aniyuu tipahiikaniyuu kaa miinuwaatisiyich aniyuu utaapachihaakanh an shimaakanishuuchimaau.
Jesus kaa miinuwaachihaat mihchetu aweyuuh
Mark 1.29-34; Luke 4.38-41
14Ekw Jesus kaa ituhtet anite Peter wiichiihch, ekw kaa waapamaat aniyuu Peter usikusiyuuh e aahkusiyich e chishiteunikusiyich. 15Ekw Jesus kaa taahtinamuwaat aniyuu Peter usikusiyuuh utihchiyuu, kaa iishtepayiyich aniyuu kaa chishiteunikusiyich, ekw kaa ati wanishkaayich aniyuu iskweu, kaa ati miyuhkaakut Jesus aniyuuh iskweuh.
16Iskutak maak e ati utaakushiyich, ekw kaa peshuwaatwaau awenichii mihchetu aweyuuh kaa piihchishkaakuyich machiahchaahkwa anite Jesus e ihtaayich. Jesus maak chii itashumeu chechii wiiwiyich aniyuu machiahchaahkwa aniyuu kaa piihchishkaakuyich iinuuh, kaye maak misiwe chii miinuwaachiheu aniyuu kaa aahkusiitwaauh. 17Aniyuu maak kaa ihtuutahk chii ispayiniyuu taan kaa ishi niikaan wiihtamukupane che ispayiyich aniyaa uchischiwehiichesuu Isaiah kaa itwet,
Chichii miinuwaachihiikunuu kaye chii iichenam misiwe nanaahkuu chititaaspinewinuuh.
Jesus kaa wiihtahk taan e iteyihtaakuniyich e nuushuushkuwaakanuut
Luke 9.57-62
18Iskutak maak Jesus wiyaapamaat aniyuu mihchetu aweyuuh anite waaskaa e ihtaat kaa ihtaayich, ekw kaa itaat aniyuu uchischinuhamuwaakanh nete kwestehchekaam aniyuu saakahiikaniyuu chechii itahuyikut. 19Eshkw maak ekaa uhchi mushaauhahkwaau peyakw an kaa chiskutamaachet wiishuwewiniyuu chii iteu aniyuu Jesus, “Chischinuhamaachesuu, chika papaawiicheutin taanite che ituhtewane.”
20Ekw Jesus kaa itaat, “Mahcheshuuch ihtakuniyuu uwaatakuwaauh, piyeshiishach kaye ihtakuniyuu uwachishtunawaauh, mikw maak Iinuu Ukusisa namui ayaayuuh taanit chechii waweyishiniyiyich chechii iiwepiyich.”
21Ekw maak kutak naapeu e nuushuushkuwaat Jesus chii iteu, “Utipeyihchikeu, pachishtinh pitamaa chechii nahiihkuuk nuuhtaawii puunipimaatisiite ekw maak yaakw che wiicheutaan.”
22Ekw Jesus kaa itaat, “Pechi wiicheuh. Ekush anichii mwehch kaa nipitwaau kaa iteyihtaakusitwaau awenich kata nahiihkuweuch aniyuu utiiniimuwaauh kaa nipiyich.”
Jesus kaa wiishuwaatahk e yuutiniyich kaye maak nipiyuu
Mark 4.35-41; Luke 8.22-25
23Ekw Jesus kaa puusit chiimaaniyuu, uchischinuhamuwaakanh e chiimikut. 24Chek sischikuuch kaa mistachiishtiniyich anit saakahiikanihch, chii kushtaatikuniyuu maak chechii kushaapeyaahaniyich aniyuu uchiimaanuwaau. Chii nipaau maak wiya Jesus. 25Chek anichii chischinuhamuwaakanich kaa pekunaatwaau Jesus e itaatwaau, “Utipeyihchikeu, pechi wiichihiinaan, shaash chika wanaachihunaanuu.”
26Ekw Jesus kaa itaat, “Chekwaan wehchi naashch kushtaachiyekw, taapwe nuwach kaa apishaashich chitaapwehtamuwinawaau.” Ekw kaa wanishkaat kaa itashuwaatahk aniyuu e yuutiniyich chechii puunipayiyich kaye aniyuu kiskanh kaa itaat, “Chiyaamisiikw.” Tiiwehch maak chii uhchi ywaashtiniyuu.
27Misiwe maak anchii naapeuch chii maamishkaateyihtamuch e itwetwaau, “Awen uu waawaach e yuutiniyich kaye maak kiskanh e pishichihiikut.”
Niishu naapeuch machiahchaahkwa kaa piihchishkaakutwaau
Mark 5.1-20; Luke 8.26-39
28Iskutak maak Jesus mesikaatwaau anite aniyuu Gadarene kaa ishinihkaateyich aschiiyuu kwestehchekaam aniyuu saakahiikaniyuu, chii nachishkaakuu niishu naapeuh e piihchishkaakuyich machiahchaahkwa anite iihkuhiiskaanihch e uhtuhteyich. Namui waawaach aweyuuh uhchii pimuhteyuuh anite aniyuu meskanaayuu kaa ishpish chii kushtaatikusiitwaau uchii naapeuch. 29Iskutak maak wiyaapamikut Jesus aniyuuh naapeuh tiiwehch chii uhchi aashihkweyuuh e itweyich, “Jesus, taan waa ishiihkuuyaahch, chiya Chishemanituu Ukusisa, shaash aa chiwii pechi wawiisacheyihtamihiinaan eshkw maak ekaa utihchipayihch anit che wawiisacheyihtamuwaauhchipane.” Ekun kaa itikut aniyuuh niishu naapeuh.
30Anit maak aniyuu kaa ihtaatwaau namui waahyuu anit chii ihtaauch e mihchetitwaau kuuhkuushach e miichisutwaau. 31Ekw anichii machiahchaahkuch naashch suuhk chii nitutamuweuch Jesus e itaatwaau, “Che wiiwiitishihuwaauhche, nete itishahunaan anechii kuuhkuushach chechii piihchishkuwachihtwaau.”
32Ekw Jesus kaa itaat, “Maachiikw.” Iskutak maak kaa wiiwiitwaau anichii machiahchaahkuch anit uhchi aniyuu niishu naapeuh e ihtaayich ekw kaa aashuupiihchishkuwaatwaau aniyuu kuuhkuushah. Ekw anichii kuuhkuushach kaa yaamitaauhchipahiitutwaau anite ishi saakahiikanihch, kaa nishtaapaawetwaau.
33Iskutak maak anichii kaa naanaakachihaatwaau aniyuuh kuuhkuushah kaa waapahtahkwaau taan kaa ispayiyich chii ushimuuch, kaa nituu wiihtahkwaau anite ihtaawinihch taan kaa ispayiyich aniyuu niishu naapeuh kaa piihchishkaakuyich machiahchaahkwa. 34Naanaacheshiish maak misiwe awenichii anit ihtaawinihch kaa ihtaatwaau chii nituwaapameuch Jesus. Iskutak maak wiyaapamaatwaau chii siihchimeuch chechii iichesiyich anit utaschiiwaahch uhchi.
বর্তমানে নির্বাচিত:
Matthew 8: crjrNT
হাইলাইট
শেয়ার
কপি
Want to have your highlights saved across all your devices? Sign up or sign in
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.
