ꠁꠘ꠆ꠎꠤꠟ ৪: ꠢꠣꠘ꠆ꠘꠣꠘ 2

ꠀꠟ-ꠝꠍꠤꠞ ꠔꠛꠟꠤꠉ ꠀꠞ ꠇꠦꠞꠣꠝꠔꠤ ꠇꠣꠝꠞ ꠛꠄꠀꠘ (২:১-১২:৫০)

ꠢꠎꠞꠔ ꠁꠍꠣꠄ ꠙꠣꠘꠤꠞꠦ ꠀꠋꠉꠥꠞꠞ ꠡꠞꠛꠔ ꠛꠣꠘꠣꠁꠟꠣ

1ꠄꠞ ꠖꠥꠁꠖꠤꠘ ꠛꠣꠖꠦ ꠉꠣꠟꠤꠟ ꠎꠤꠟꠣꠞ ꠇꠣꠘ꠆ꠘꠣ ꠉꠣꠃꠔ ꠄꠇ ꠛꠤꠀ ꠀꠍꠤꠟ। ꠢꠎꠞꠔ ꠁꠍꠣꠞ ꠝꠣ ꠅꠃ ꠛꠤꠀꠔ ꠀꠍꠟꠣ। 2ꠅꠃ ꠛꠤꠀꠔ ꠁꠍꠣ ꠀꠞ ꠔꠣꠘ ꠍꠣꠢꠣꠛꠤ ꠅꠇꠟꠦꠅ ꠖꠣꠅꠔ ꠙꠣꠁꠍꠟꠣ। 3ꠛꠤꠀꠞ ꠅꠘꠥꠡ꠆ꠑꠣꠘꠅ ꠎꠦꠛꠟꠣ ꠀꠋꠉꠥꠞꠞ ꠡꠞꠛꠔ ꠚꠥꠠꠣꠁ ꠉꠦꠟ, ꠅꠃ ꠡꠝꠄ ꠁꠍꠣꠞ ꠝꠣʼꠄ ꠁꠍꠣꠞꠦ ꠇꠁꠟꠣ, “ꠄꠞꠣꠞ ꠀꠋꠉꠥꠞꠞ ꠡꠞꠛꠔ ꠡꠦꠡ ꠅꠁꠉꠦꠍꠦ।” 4ꠁꠍꠣꠄ ꠔꠣꠘ ꠝꠣʼꠞꠦ ꠇꠁꠟꠣ, “ꠝꠣꠁ ꠉ, ꠁꠔꠣ ꠔ ꠀꠝꠣꠞ ꠛꠤꠡꠄ ꠘꠣꠄ। ꠅꠈꠘꠅ ꠀꠝꠣꠞ ꠡꠝꠄ ꠅꠁꠍꠦ ꠘꠣ।” 5ꠅꠁꠟꠦ ꠔꠣꠘ ꠝꠣʼꠄ ꠈꠣꠖꠤꠝꠖꠣꠞ ꠅꠇꠟꠞꠦ ꠇꠁꠟꠣ, “ꠅꠛꠣ, ꠔꠣꠁꠘ ꠎꠦꠔꠣ ꠇꠂꠘ, ꠅꠔꠣꠃ ꠇꠞꠅ।”

6ꠁꠢꠥꠖꠤꠞ ꠡꠞꠤꠅꠔ ꠝꠣꠚꠤꠇ ꠅꠎꠥ ꠇꠞꠣꠞ ꠟꠣꠉꠤ ꠢꠤꠘꠅ ꠙꠣꠔ꠆ꠔꠞꠞ ꠍꠄꠐꠣ ꠉꠣꠝꠟꠣ ꠀꠍꠤꠟ। ꠁꠔꠣ ꠄꠇꠅꠐꠣꠔ ꠅꠘꠥꠝꠣꠘ ꠖꠥꠁ-ꠔꠤꠘ ꠝꠘ ꠙꠣꠘꠤ ꠗꠞꠔ। 7ꠁꠍꠣꠄ ꠈꠣꠖꠤꠝꠖꠣꠞ ꠅꠇꠟꠞꠦ ꠇꠁꠟꠣ, “ꠅꠃ ꠉꠣꠝꠟꠣꠁꠘ꠆ꠔꠅ ꠙꠣꠘꠤ ꠜꠞꠅ।” ꠔꠦꠃ ꠔꠣꠞꠣ ꠁꠉꠥꠁꠘ ꠐꠦꠙꠦ ꠐꠦꠙꠦ ꠜꠞꠤ ꠖꠤꠟ। 8ꠛꠣꠖꠦ ꠔꠣꠁꠘ ꠇꠁꠟꠣ, “ꠅꠘ ꠕꠣꠇꠤ ꠕꠥꠠꠣ ꠙꠣꠘꠤ ꠘꠤꠀ ꠙꠞꠗꠣꠘ ꠛꠣꠛꠥꠞ꠆ꠌꠤꠞꠦ ꠖꠦꠅ।” ꠔꠦꠃ ꠔꠣꠞꠣ ꠅꠟꠣꠃ ꠇꠞꠟ। 9ꠛꠣꠛꠥꠞ꠆ꠌꠤꠄ ꠅꠃ ꠙꠣꠘꠤ ꠈꠣꠁꠀ ꠖꠦꠈꠟꠣ, ꠁꠔꠣ ꠔ ꠀꠋꠉꠥꠞꠞ ꠡꠞꠛꠔ। ꠅꠁꠟꠦ ꠁ ꠡꠞꠛꠔ ꠇꠥꠀꠁ ꠕꠣꠇꠤ ꠀꠁꠟ, ꠁꠈꠣꠘ ꠔꠣꠁꠘ ꠎꠣꠘꠔꠣ ꠘꠣ। ꠈꠣꠟꠤ ꠈꠣꠖꠤꠝꠖꠣꠞ ꠅꠇꠟꠦ ꠎꠣꠘꠔ। ꠄꠞꠟꠣꠉꠤ ꠛꠣꠛꠥꠞ꠆ꠌꠤꠄ ꠛꠤꠀꠞ ꠘꠡꠣꠞꠦ ꠒꠣꠇꠤꠀ ꠇꠁꠟꠣ, 10“ꠙꠄꠟꠣ ꠢꠇꠟꠦꠃ ꠝꠣꠘꠡꠞꠦ ꠈꠣꠐꠤ ꠡꠞꠛꠔ ꠈꠣꠁꠔꠦ ꠖꠦꠄ। ꠝꠣꠘꠡꠦ ꠁꠌ꠆ꠍꠣꠝꠔ ꠈꠣꠅꠀꠞ ꠛꠣꠖꠦ ꠎꠦꠛꠟꠣ ꠡꠦꠡ ꠅꠁꠎꠣꠄ, ꠅꠃ ꠡꠝꠄ ꠎꠦ ꠡꠞꠛꠔ ꠖꠦꠄ, ꠁꠔꠣ ꠙꠄꠟꠣ ꠕꠣꠇꠤ ꠇꠤꠍꠥ ꠜꠦꠎꠣꠟ ꠕꠣꠇꠦ। ꠅꠁꠟꠦ ꠔꠥꠝꠤ ꠈꠣꠐꠤ ꠡꠞꠛꠔ ꠅꠈꠘꠅ ꠞꠣꠈꠍ।”

11ꠢꠎꠞꠔ ꠁꠍꠣꠄ ꠉꠣꠟꠤꠟ ꠎꠤꠟꠣꠞ ꠇꠣꠘ꠆ꠘꠣ ꠉꠣꠃꠔ ꠘꠤꠡꠣꠘꠣ ꠢꠤꠡꠣꠛꠦ ꠅꠃ ꠙꠄꠟꠣ ꠇꠦꠞꠣꠝꠔꠤ ꠖꠦꠈꠣꠁꠀ ꠘꠤꠎꠞ ꠝꠢꠤꠝꠣ ꠎꠣꠁꠞ ꠇꠞꠟꠣ। ꠁꠔꠣ ꠖꠦꠈꠤꠀ ꠍꠣꠢꠣꠛꠤ ꠅꠇꠟꠦ ꠔꠣꠘ ꠃꠙꠞꠦ ꠁꠝꠣꠘ ꠀꠘꠟꠣ।

12ꠄꠞꠛꠣꠖꠦ ꠁꠍꠣꠄ ꠔꠣꠘ ꠝꠣ, ꠜꠣꠁꠀꠁꠘ ꠀꠞ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠇꠚꠞꠘꠣꠃꠝ ꠐꠣꠃꠘꠅ ꠉꠦꠟꠣ, ꠉꠤꠀ ꠇꠄꠖꠤꠘ ꠢꠘꠅ ꠞꠁꠟꠣ।

ꠎꠦꠞꠥꠎꠣꠟꠦꠝ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠁꠍꠣ ꠀꠟ-ꠝꠍꠤ

13ꠁꠢꠥꠖꠤꠞ ꠀꠎꠣꠖꠤ ꠁꠖ ꠊꠘꠣꠁ ꠉꠦꠟꠦ ꠁꠍꠣ ꠎꠦꠞꠥꠎꠣꠟꠦꠝ ꠐꠣꠃꠘꠅ ꠀꠁꠟꠣ। 14ꠎꠦꠞꠥꠎꠣꠟꠦꠝꠅ ꠀꠁꠀ ꠔꠣꠁꠘ ꠖꠦꠈꠟꠣ, ꠙꠛꠤꠔ꠆ꠞ ꠛꠣꠄꠔꠥꠟ-ꠝꠥꠇꠣꠖ꠆ꠖꠍ ꠇꠣꠛꠣ ꠊꠞꠞ ꠡꠤꠝꠣꠘꠣꠔ ꠇꠥꠞꠛꠣꠘꠤꠞ ꠉꠞꠥ, ꠝꠦꠠꠣ ꠀꠞ ꠙꠣꠞꠅ ꠛꠦꠌꠣ-ꠇꠤꠘꠣ ꠌꠟꠦꠞ, ꠀꠞ ꠐꠦꠇꠣꠞ ꠛꠣꠐ꠆ꠐꠣꠞ ꠇꠣꠞꠛꠣꠞꠤ ꠅꠇꠟꠅ ꠛꠁ ꠞꠁꠍꠂꠘ। 15ꠁꠔꠣ ꠖꠦꠈꠤꠀ ꠔꠣꠁꠘ ꠖꠠꠤ ꠖꠤꠀ ꠄꠇꠐꠣ ꠌꠣꠛꠥꠇ ꠛꠣꠘꠣꠁꠟꠣ, ꠀꠞ ꠌꠣꠛꠥꠇ ꠖꠤꠀ ꠢꠇꠟ ꠉꠞꠥ-ꠝꠦꠠꠣ ꠀꠞ ꠝꠣꠘꠡꠞꠦ ꠁꠘ ꠕꠘꠦ ꠈꠦꠖꠣꠁ ꠖꠤꠟꠣ। ꠀꠞ ꠐꠦꠇꠣꠞ ꠛꠣꠐ꠆ꠐꠣꠞ ꠇꠣꠞꠛꠣꠞꠤ ꠅꠇꠟꠞ ꠐꠦꠇꠣ-ꠙꠄꠡꠣ ꠍꠤꠔ꠆ꠞꠣꠁꠀ, ꠔꠣꠞꠣꠞ ꠇꠦꠡ ꠛꠣꠇ꠆ꠡ ꠃꠟꠐꠣꠁꠀ ꠚꠣꠟꠣꠁꠟꠣ। 16ꠙꠣꠞꠅ ꠛꠦꠌꠞꠣ ꠅꠇꠟꠞꠦ ꠁꠍꠣꠄ ꠇꠁꠟꠣ, “ꠁꠘ ꠕꠘꠦ ꠢꠇ꠆ꠇꠟꠔꠣ ꠢꠞꠣꠅ। ꠀꠝꠣꠞ ꠛꠣꠚꠞ ꠊꠞꠞꠦ ꠛꠣꠎꠣꠞ ꠛꠣꠘꠣꠁꠅ ꠘꠣ।” 17ꠅꠃ ꠡꠝꠄ ꠙꠣꠇ ꠇꠤꠔꠣꠛꠞ ꠅꠃ ꠇꠕꠣ ꠍꠣꠢꠣꠛꠤ ꠅꠇꠟꠞ ꠝꠘꠅ ꠅꠁꠉꠦꠟ, “ꠔꠥꠝꠣꠞ ꠊꠞꠞ ꠟꠣꠉꠤ ꠀꠝꠣꠞ ꠎꠦ ꠝꠢꠛ꠆ꠛꠔ, ꠅꠃ ꠝꠢꠛ꠆ꠛꠔꠦꠃ ꠀꠝꠣꠞ ꠖꠤꠟꠞ ꠝꠣꠎꠦ ꠀꠉꠥꠘꠤꠞ ꠟꠣꠈꠣꠘ ꠎꠟꠦꠞ।”

18ꠁꠍꠣꠞ ꠁ ꠇꠣꠝꠞ ꠟꠣꠉꠤ ꠁꠢꠥꠖꠤ ꠘꠦꠔꠣ ꠅꠇꠟꠦ ꠔꠣꠘꠞꠦ ꠎꠤꠇꠣꠁꠟꠣ, “ꠁꠔꠣ ꠇꠞꠣꠞ ꠅꠗꠤꠇꠣꠞ ꠎꠦ ꠔꠥꠝꠣꠞ ꠀꠍꠦ, ꠔꠣꠞ ꠙꠞꠝꠣꠘ ꠢꠤꠡꠣꠛꠦ ꠔꠥꠝꠤ ꠇꠥꠘ ꠇꠦꠞꠣꠝꠔꠤ ꠖꠦꠈꠣꠁꠛꠣꠄ?” 19ꠔꠣꠁꠘ ꠎꠥꠀꠙ ꠖꠤꠟꠣ, “ꠀꠙꠘꠣꠞꠣ ꠅꠃ ꠇꠣꠛꠣ ꠊꠞ ꠜꠣꠋꠉꠤꠟꠣꠃꠇ꠆ꠇꠣ, ꠀꠝꠤ ꠔꠤꠘ ꠖꠤꠘꠞ ꠜꠤꠔꠞꠦ ꠢꠤꠞꠛꠣꠞ ꠔꠥꠟꠝꠥ।” 20ꠁꠈꠣꠘ ꠢꠥꠘꠤꠀ ꠔꠣꠞꠣ ꠇꠁꠟꠣ, “ꠁ ꠄꠛꠣꠖꠔ ꠈꠣꠘꠣ ꠛꠣꠘꠣꠁꠔꠦ ꠍꠄꠌꠣꠟ꠆ꠟꠤꠡ ꠛꠍꠞ ꠟꠣꠉꠍꠤꠟ, ꠀꠞ ꠔꠥꠝꠤ ꠇꠤꠔꠣ ꠔꠤꠘ ꠖꠤꠘꠞ ꠜꠤꠔꠞꠦ ꠛꠣꠘꠣꠁꠟꠤꠛꠣꠄ ꠘꠤ?” 21ꠅꠁꠟꠦ ꠁꠍꠣꠄ ꠁꠘꠅ ꠀꠟ꠆ꠟꠣꠞ ꠊꠞ ꠛꠟꠔꠦ ꠘꠤꠎꠞ ꠡꠞꠤꠟꠞ ꠇꠕꠣꠃ ꠇꠁꠍꠂꠘ। 22ꠄꠞꠟꠣꠉꠤ ꠁꠍꠣ ꠝꠞꠣ ꠕꠣꠇꠤ ꠎꠤꠘ꠆ꠖꠣ ꠅꠀꠞ ꠛꠣꠖꠦ ꠍꠣꠢꠣꠛꠤ ꠅꠇꠟꠞ ꠝꠘꠅ ꠅꠁꠍꠤꠟ, ꠔꠣꠁꠘ ꠅꠃ ꠇꠕꠣꠃ ꠇꠁꠍꠟꠣ। ꠔꠦꠃ ꠍꠣꠢꠣꠛꠤ ꠅꠇꠟꠦ ꠙꠣꠇ ꠇꠤꠔꠣꠛꠞ ꠇꠕꠣ ꠀꠞ ꠁꠍꠣꠄ ꠎꠦꠔꠣ ꠇꠁꠍꠟꠣ, ꠅꠔꠣ ꠄꠇꠤꠘ ꠇꠞꠟꠣ।

23ꠀꠎꠣꠖꠤ ꠁꠖꠞ ꠡꠝꠄ ꠁꠍꠣꠄ ꠎꠦꠞꠥꠎꠣꠟꠦꠝ ꠞꠁꠀ ꠎꠦꠔꠣ ꠇꠦꠞꠣꠝꠔꠤ ꠇꠣꠝ ꠇꠞꠍꠤꠟꠣ, ꠁꠔꠣ ꠖꠦꠈꠤꠀ ꠛꠃꠔ ꠝꠣꠘꠡꠦ ꠔꠣꠘ ꠃꠙꠞꠦ ꠁꠝꠣꠘ ꠀꠘꠟ। 24ꠅꠁꠟꠦ ꠁꠍꠣꠄ ꠘꠤꠎꠞꠦ ꠔꠣꠞꠣꠞ ꠉꠦꠍꠦ ꠗꠞꠣ ꠖꠤꠟꠣ ꠘꠣ, ꠇꠣꠞꠘ ꠔꠣꠁꠘ ꠢꠇꠟ ꠝꠣꠘꠡꠞꠦ ꠌꠤꠘꠔꠣ। 25ꠝꠣꠘꠡꠞ ꠛꠦꠙꠣꠞꠦ ꠔꠣꠘ ꠇꠥꠘꠥ ꠡꠣꠇ꠆ꠇꠤꠞ ꠎꠞꠥꠞ ꠀꠍꠤꠟ ꠘꠣ, ꠔꠣꠁꠘ ꠄꠞꠣꠞ ꠖꠤꠟꠞ ꠈꠛꠞ ꠎꠣꠘꠔꠣ।

বর্তমানে নির্বাচিত:

ꠁꠘ꠆ꠎꠤꠟ ৪: ꠢꠣꠘ꠆ꠘꠣꠘ 2: sylN

হাইলাইট

কপি