路加 10
10
耶穌差派七十二個人
1過一站時間，主另外揀選七十二個人 #10:1 有兜古卷係「七十個人」； 17 節也共樣。，派佢等出去，一組兩個人，先去佢愛訪問个城市㧯村莊。 2佢對佢等講：「愛收成个盡多，總係收割个人忒少。你等愛祈求田主加派工人來收割。 3你等去！𠊎派你等出去，像送細羊仔入狼群一樣。 4毋好帶錢包，毋好帶旅行袋，毋好帶鞋仔，也毋好了時間在路上同人請安。 5你等無論到㖠家，愛先講：『願你全家平安！』 6該位若有歡喜平安个人，你等所求个平安就會臨到佢；若無，該祝福就歸轉你等。 7你等愛住在該家，食啉佢等所供給个，因為工人得工錢係合理个；毋好對這家徙到別家去。 8你等無論去到㖠座城市，若有人歡迎你等，為你等準備麼介食个，你等就食麼介； 9也愛醫好該地方个病人，並對佢等講：『上帝个國會在你等中間實現了！』 10總係，若係你等去到一座城市，該位个人毋歡迎你等，你等就去大街宣佈講： 11『連你等這城肚个泥粉，黏在𠊎等腳項个，𠊎等也愛蹬掉，表示對你等个警告。總係你等愛記得，上帝个主權會實現了！』 12𠊎㧯你等講，在審判該日，所多瑪所受个責罰會比該城市所受个輕盡多！
毋信个城
(馬太 11:20-24)
13「哥拉汛啊，你壞了！伯賽大啊，你慘了！𠊎在你等中間所行个神蹟，若係行在泰爾㧯西頓，該位个人早就坐在地上，著麻衫，委火灰在頭那頂來表示悔改囉！ 14在審判該日，泰爾㧯西頓所受个責罰會比你等所受个還較輕！ 15若係你，迦百農啊，你想愛高高在上嗎？總係，你將來會跌落地獄去！」
16耶穌又對厥學生講：「聽從你等个，就係聽從𠊎；拒絕你等个，就係拒絕𠊎；拒絕𠊎个，也就係拒絕該差𠊎來个。」
七十二個人轉來
17該七十二個人歡歡喜喜轉來，報告講：「主啊！𠊎等用你个名命令，連鬼也服從𠊎等！」
18耶穌對佢等講：「𠊎看到撒但像𥍉爧恁樣對天頂抨下來。 19聽好噢！𠊎已經賜你等權柄，好踐踏蛇㧯蠍仔，也能贏過仇敵一切个力量；無麼介能害你等了。 20總係，毋好因為邪靈降服你等來歡喜；愛因為你等个名記錄在天頂來歡喜。」
耶穌个歡喜
(馬太 11:25-27；13:16-17)
21就在該時，耶穌因為聖靈 #10:21 「聖靈」有兜古卷無「聖」這隻字；也有兜古卷係「自家个靈」。个感動，充滿歡喜，就講：「阿爸，天地个主啊，𠊎感謝你，因為你將這兜事囥等毋給聰明有學問个人知，反轉顯明給細人仔。阿爸啊，無毋著，這種安排係你所歡喜个旨意。
22「吾爸已經將一切賜給𠊎了！除了阿爸，無人識孻仔；除了孻仔㧯孻仔所愛啟示个人，也無人會識阿爸。」
23然後，耶穌轉身向學生，私下對佢等講：「你等个目珠看到這一切事情，實在真有福氣啊！ 24𠊎㧯你等講，頭擺有盡多先知㧯君王想愛看你等所看到个，總係無看到；想愛聽你等所聽到个，也無聽到。」
好撒馬利亞人个比喻
25有一個法律教師䟘起來試探耶穌，講：「先生，𠊎愛做麼介正做得承受永遠个生命？」
26耶穌講：「法律書樣般講？你所研究个結論係麼介？」
27該人應講：「你愛用全部个心志、情感、力量㧯理智敬愛主 — 你个上帝；也愛惜鄰舍，就像惜自家一樣。」
28耶穌對佢講：「你个回答盡著，照恁樣做，你就會承受永遠个生命。」
29該法律教師想愛顯明自家有理，就問耶穌講：「麼人係𠊎个鄰舍啊？」
30耶穌應講：「有一個人對耶路撒冷下去耶利哥，路上堵到強盜。佢等剝掉佢个衫，將佢打到半生死，㧒在該位。 31堵好，有一個祭司也對該條路下去；佢一看到該人，就閃開，對另外一片過去。 32共樣，有一個利未人也經過該位，看一下，也閃開，對另外一片過去。 33總係，有一個撒馬利亞人路過該位；佢一看到該人，就憐憫佢。 34佢進前，用油㧯酒倒在該人个傷口，代佢包好，然後扶佢上自家个驢仔，帶佢去到一間旅舍，在該位照顧佢。 35第二日，佢拿兩隻銀錢 #10:35 一隻「銀錢」係當時工人一日个工錢。交給旅舍个主人，講：『請你照顧佢，等𠊎倒轉來經過這位个時，𠊎會納清全部个所費。』」
36接等，耶穌問講：「照你个看法，這三個人當中，㖠個係堵到強盜个人个鄰舍呢？」
37法律教師應講：「係該用慈悲對待佢个人。」
耶穌講：「你去，照恁樣去做！」
耶穌訪問馬大㧯馬利亞
38耶穌㧯學生繼續向前行，來到一隻村莊。在該位有一個名安到馬大个婦人家，接待耶穌去厥屋下。 39馬大有一個老妹，安到馬利亞。馬利亞來坐在主个腳前，緊聽佢講道理。 40馬大因為接待个事盡無閒，心肝當亂，就進前來講：「主啊，𠊎老妹放𠊎一儕恁無閒，你看做得嗎？喊姖來同𠊎𢯭手啊！」
41主應講：「馬大，馬大，你為到恁多事情操心煩勞， 42總係只有一件事係做毋得無个。馬利亞所選个係最好个部份，係毋會被人搶走个。」
বর্তমানে নির্বাচিত:
路加 10: THV12Hdb
হাইলাইট
শেয়ার
কপি
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012
