Popular Bible Verses from ငဝ်ႈၵမ်ႇၽႃႇ 17

শেয়ার

ဝၢႆး​ၼၼ်ႉ​မိူဝ်ႈ​ဢၼ်​ဢသၢၵ်ႈ​ ဢႃႇပြမ်ႇ လႆႈ​ၵဝ်ႈ​သိပ်း​ပၢႆ​ၵဝ်ႈ​ပီႊ​ၼၼ်ႉ​ၸိုင်၊ ထႃႇဝရႃႉ​ၽြႃး​ပေႃႇ​မႃး​ၵႃႈ​တီႈ​ ဢႃႇပြမ်ႇ ​လႄႈ​လၢတ်ႈ​ဝႃႈ၊ ၵဝ်​ပဵၼ်​ၽြႃး​ပဵၼ်​ၸဝ်ႈ၊ ၸဝ်ႈ​ဢၼၼ်ႇတႃႉ​တၼ်း​ၶူဝ်း​ဢေႃႈ။ ၵႂႃႇ​မႃး​ၵႃႈ​တီႈ​ၽၢႆႇ​ၼႃႈ​ၵဝ်​လႄႈ မီး​တၢင်း​ဢၼ်​ၸေး​ၸုမ်ႇ​တႃႉ။

ၸိုဝ်ႈ​မႂ်း​ၸိုင် ၵမ်း​လိုၼ်း​ဢမ်ႇ​လႆႈ​ႁွင်ႉ​ႁဵၵ်ႈ​ၸိုဝ်ႈ​ ဢႃႇပြမ်ႇ ။ တၵ်း​လႆႈ​ႁွင်ႉ​ႁဵၵ်ႈ​ၸိုဝ်ႈ ဢႃႇပြႃႇႁၢမ်ႇ ​ဢေႃႈ။ လွင်ႈ​မၼ်း​ၸမ်ႉ ၵဝ်​လႆႈ​ႁႂ်ႈ​မႂ်း​ပဵၼ်​ပေႃႈ​မဵဝ်း​ၵူၼ်း​ၼမ်​ၼႃႇ​ယဝ်ႉ။

ၵဝ်​တၵ်း​ပဵၼ်​ၽြႃး​တီႈ​မႂ်း ဢိၵ်ႇ​တင်း​ၸိူဝ်ႉ​ၶိူဝ်း​မႂ်း​လိုၼ်း​မႂ်း​ဢေႃႈ၊ ဝႃႈ​ၼႆ၊ ၵဝ်​တၵ်း​ႁႂ်ႈ​ပတီႉၺိၺ်ႇ​ၵဝ်​ပဵၼ် ပတီႉၺိၺ်ႇ​ထႃႇဝရႃႉ ဝူင်ႈ​ၵၢင်​ၵဝ်​တင်း​မႂ်း ဢိၵ်ႇ​တင်း​ၸိူဝ်ႉ​ၶိူဝ်း​မႂ်း၊ လိုၼ်း​မႂ်း​သိုပ်ႇ​သိုပ်ႇ​တၢမ်း​တၢမ်း​ၼၼ်ႉ​ဢေႃႈ။

တူၺ်း​လူး၊ ပတီႉၺိၺ်ႇ​ဢၼ်​ၵဝ်​ႁဵတ်း​ၼႆႉ​ၸိုင် မီး​ဝႆႉ​တီႈ​မႂ်း​ဢေႃႈ။ မႂ်း​တၵ်း​ပဵၼ်​ပေႃႈ​မဵဝ်း​ၵူၼ်း​ၼမ်​ၼႃႇ​ဢေႃႈ။

ၽြႃး​ပဵၼ်​ၸဝ်ႈ​ၵေႃႈ​ဝႃႈ၊ မေး​မႂ်း​ ၸႃႇရႃႇ ​တၵ်း​ၵိူတ်ႇ​လဵင်ႉ​လုၵ်ႈ​ၸၢႆး​တီႈ​မႂ်း ဢမၢၼ်ႇ​ၶၼ်​ပဵၼ်​ဢေႃႈ။ တၵ်း​လႆႈ​ႁွင်ႉ​ႁဵၵ်ႈ​ၸိုဝ်ႈ​မၼ်း​ ဢီႉၸၢၵ်ႈ ​ဢေႃႈ။ ၵဝ်​တၵ်း​ႁႂ်ႈ​ပတီႉၺိၺ်ႇ​ၵဝ် ပဵၼ်​ပတီႉၺိၺ်ႇ​ထႃႇဝရႃႉ​တီႈ​မၼ်း ဢိၵ်ႇ​တင်း​ၸိူဝ်ႉ​ၶိူဝ်း​မၼ်း​လိုၼ်း​မၼ်း​ဢေႃႈ။

ၵဝ်​တၵ်း​ဢဝ်​မိူင်း​ဢၼ်​မႂ်း​ပဵၼ်​ၶႅၵ်ႇ​ယူႇ​တေႃႈ​လဵဝ် ဢၼ်​ဝႃႈ​မိူင်း​ ၶႃႇၼၢၼ်ႇ တင်း​သဵင်ႈ​တင်း​လူင်​ၼႆႉ ပၼ်​တီႈ​မႂ်း​ဢိၵ်ႇ​တင်း ၸိူဝ်ႉ​ၶိူဝ်း​မႂ်း​လိုၼ်း​မႂ်း​ၼၼ်ႉ ႁႂ်ႈ​လႆႈ​ပိူင်ႇ​ယူႇ​သေႇ​သေႇ​ဢေႃႈ။ ၵဝ်​တၵ်း​ပဵၼ်​ၽြႃး​ၶဝ်​ဢေႃႈ၊ ဝႃႈ​ၼင်ႇ​ၼႆ​ဢေႃႈ။

မိူဝ်ႈ​ၼၼ်ႉ​ ဢႃႇပြႃႇႁၢမ်ႇ ၶုပ်ႉ​မူပ်ႇ​ယူႇ၊ ယုမ်ႉ​ၶူဝ်​ယူႇ​သေ​လႄႈ လၢတ်ႈ​ၼႂ်း​ၸႂ်​လႄႈ​ဝႃႈ၊ ၵေႃႉ​ဢၼ်​ဢသၢၵ်ႈ​လႆႈ​ပၢၵ်ႇ​ပီႊ​ၼႆႉ တၵ်း​မီး​လုၵ်ႈ​မီး​လၢင်း​ႁိုဝ်​ၼေႃႊ။ ၸႃႇရႃႇ ​ဢၼ်​ဢသၢၵ်ႈ​လႆႈ​ၵဝ်ႈ​သိပ်း​ပီႊ​ၼၼ်ႉ တၵ်း​ၵိူတ်ႇ​လဵင်ႉ​လုၵ်ႈ​လဵင်ႉ​လၢင်း​ႁိုဝ်​ၼေႃႊ၊ ဝႃႈ​ၼင်ႇ​ၼႆ​သေ​ယဝ်ႉ၊

ၵမ်း​ၼၼ်ႉ ၽြႃး​ပဵၼ်​ၸဝ်ႈ​လၢတ်ႈ​တီႈ​ ဢႃႇပြႃႇႁၢမ်ႇ ​လႄႈ​ဝႃႈ၊ မေး​မႂ်း​ ၸႃႇရေး ​ၼၼ်ႉ​ၸမ်ႉ၊ ဢမ်ႇ​လႆႈ​ႁွင်ႉ​ႁဵၵ်ႈ​ၸိုဝ်ႈ​သဵင်​ဢၼ်​ဝႃႈ​ ၸႃႇရေး ​ၼၼ်ႉ၊ တၵ်း​လႆႈ​ႁွင်ႉ​ႁဵၵ်ႈ​ၸိုဝ်ႈ​ ၸႃႇရႃႇ ​ဢေႃႈ။

မင်ႇၵလႃႇ​တၢင်း​ဢၼ်​သူ​ၶၢမ်ႇ​တၢင်း​ဢၼ်​ထိူဝ်​ႁိမ်း​ပၢႆ​ၼင်​ၼၼ်ႉ တၵ်း​လႆႈ​ပဵၼ်​လၢၵ်ႈၶၼႃႇ​သၢၵ်ႈ​သေႇ​ပတီႉၺိၺ်ႇ​ဢၼ်​ၵဝ်​ႁဵတ်း​ဝႆႉ ဝူင်ႈ​ၵၢင်​ၵဝ်​တင်း​သူ​ၼၼ်ႉ​ဢေႃႈ။

ၵူၺ်း​ၵႃႈ ပတီႉၺိၺ်ႇ​ၵဝ်​ၸိုင်၊ တၵ်း​ႁႂ်ႈ​တႄႇ​ယူႇ​တီႈ​ ဢီႉၸၢၵ်ႈ၊ လုၵ်ႈ​ၸၢႆး​ဢၼ်​ ၸႃႇရႃႇ ​တၵ်း​ၵိူတ်ႇ​လဵင်ႉ​တီႈ​မႂ်း​ပီႊ​ၼႃႈ မိူဝ်ႈ​ဢၼ်​ထိုင်​ၶိင်ႇ​ၼႆႉ​ၼၼ်ႉ​ဢေႃႈ၊ ဝႃႈ​ၼင်ႇ​ၼႆ​သေ​ယဝ်ႉ၊

ၼႂ်း​ၸိူဝ်ႉ​ၶိူဝ်း​သူ​သိုပ်ႇ​သိုပ်ႇ​တၢမ်း​တၢမ်း​ၼၼ်ႉ ၵူၼ်း​ၸၢႆး​ဢၼ်​ၵိူတ်ႇ​လဵင်ႉ​ၵႃႈ​တီႈ​ႁိူၼ်း​သူ​သေ​ဢမ်ႇ​ဝႃႈ၊ ဢၼ်​ယင်း​ဢမ်ႇ​ပဵၼ် ၸိူဝ်ႉ​ၶိူဝ်း​သူ​လႄႈ သူ​ဢဝ်​ငိုၼ်း​သိုဝ်ႉ​ဢဝ်​တီႈ​ၵူၼ်း​တၢင်ႇ​ၸိူဝ်ႉ​တၢင်ႇ​ၶိူဝ်း​မႃး​သေ​ဢမ်ႇ​ဝႃႈ၊ မိူဝ်ႈ​ဢၼ်​ဢသၢၵ်ႈ​ၶွပ်ႈ​ပႅတ်ႇ​ဝၼ်း​ၼၼ်ႉ​ၸိုင် တၵ်း​လႆႈ​ၶၢမ်ႇ​မင်ႇၵလႃႇ တၢင်း​ဢၼ်​ထိူဝ်​ႁိမ်း​ၵူႈ​ၵေႃႉ​ၵူႈ​ၵူၼ်း​ဢေႃႈ။- ၵေႃႉ​ဢၼ်​ၵိူတ်ႇ​လဵင်ႉ​ၵႃႈ​တီႈ​ႁိူၼ်း​သူ၊ ၵေႃႉ​ဢၼ်​ဢဝ်​ငိုၼ်း​သိုဝ်ႉ​မႃး​ၼၼ်ႉ တၵ်း​လႆႈ​ၶၢမ်ႇ​မင်ႇၵလႃႇ​တၢင်း​ဢၼ်​ထိူဝ်​ႁိမ်း​ဢေႃႈ။ ပတီႉၺိၺ်ႇ​ၵဝ်​ၼၼ်ႉ​ၵေႃႈ၊ တၵ်း​လႆႈ​ပဵၼ်​ပတီႉၺိၺ်ႇ​ထႃႇဝရႃႉ​ၵႃႈ​ၼႂ်း​ၼိူဝ်ႉ​ၼႂ်း​ၼင်​သူ​ဢေႃႈ။