有一遍，真多貿稅的及罪人倚來耶穌遐欲聽伊講道。 法利賽派的人及經學教師嗷嗷唸，講：「此個人接納罪人，及𪜶食飯！」 耶穌就給𪜶講此個譬喻：
「恁中間什麼人有一百隻羊拍毋見一隻，伊豈𣍐放彼九十九隻佇曠野，去尋拍毋見彼隻，尋到著？ 一下尋著，伊就真歡喜，將彼隻羊揹佇肩頭。 伊轉來到厝，叫朋友及厝邊來，給𪜶講：『來鬥歡喜，因為拍毋見彼隻羊已經尋著。』 我給恁講，親像按呢，為著有一個悔改的罪人，比有九十九個毋免悔改的義人，佇天頂的歡喜會閣較大。」

「抑是，有一個婦仁人有十個銀圓，拍毋見一個，豈𣍐點燈，掃厝內，拍拼尋，尋到著？ 伊一下尋著，就叫朋友及厝邊來，給𪜶講：『來鬥歡喜，因為拍毋見彼個銀圓已經尋著。』 我給恁講，親像按呢，上帝的天使會為著一個罪人悔改來歡喜。」

耶穌閣講：「有一個人有兩個子； 細漢的給老父講：『阿爸，我應該得的財產，請你分互我。』老父就將財產分互𪜶兩個。 過無幾日，細漢子將所得著全部的財產攏換做現金，然後出外去真遠的所在，佇遐放蕩，錢烏白開。 伊所有的攏開了了的時，抵好彼所在發生大飢荒，伊才知欠缺的艱苦。 伊就去互彼所在的一個人倩。彼個人叫伊去園裡飼豬。 伊枵甲想欲提豬啲食的豆莢止飢，毋拘連這人嘛無互伊。
「後來，伊覺醒，講：『阮老父有赫呢多倩工，𪜶攏有物通食，閣食到有賰，毋拘我佇遮啲欲餓死。 我欲起來，轉去我的老父遐，給伊講：阿爸，我有得罪天，嘛有得罪你， 已經無資格做你的子。請互我做你的倩工就好。』 伊就出發轉去老父遐。
「伊離𪜶兜猶真遠，老父就看著伊，心真毋甘，趕緊走倚去給伊攬啲，直直給伊唚。 子就對老父講：『阿爸，我有得罪天，嘛有得罪你。我已經無資格做你的子。』 毋拘，老父給僕人講：『趕緊挔上好的外袍來給伊穿，給伊掛手指，閣給伊穿鞋， 續牽彼隻肥的牛仔子來刣，來慶祝。 因為我此個子是死去有閣活，失落有閣得著。』𪜶就開始慶祝。
「彼時，大子佇園裡。伊轉來，啲欲到厝的時聽著奏樂及跳舞的聲。 伊叫一個僕人來，問看到底是什麼代誌。 彼個僕人給伊講：『恁小弟轉來；恁老父因為伊平安無事倒來，就刣彼隻肥的牛仔子。』 大子非常受氣，毋入去。伊的老父出來給伊苦勸。 毋拘伊應老父講：『你想看咧，我作奴才服事你即多年，毋曾違背你的命令，你連一隻山羊仔都毋曾互我及朋友做夥歡喜！ 毋拘，你此個子為著娼妓給你的財產開了了，伊一下轉來，你就為著伊刣彼隻肥的牛仔子。』 伊的老父應講：『子啊，你不時都及我做夥，我所有的攏是你的。 總是你此個小弟，伊是死去有閣活，失落有閣得著，咱應該歡歡喜喜來慶祝。』」

Listen to 路加福音 15