<div class="version vid2996 iso6393nyn" data-vid="2996" data-iso6393="nyn">
 <div class="book bkGEN">
 <div class="chapter ch2" data-usfm="GEN.2">
 <div class="label">2</div><div class="p"> 1Bityo eiguru n'ensi na byona ebibirimu byahwa eikora. 2Aha kiro kya mukaaga, Ruhanga yaaheza omurimo gwe gwona ogu yaabaire naakora, kandi aha kiro kya mushanju yaarekyera aho kukora ogwo murimo, yaahuumura. 3Atyo Ruhanga yaaha omugisha ekyo kiro kya mushanju, kandi yaakyeeza; ahabw'okuba ahari ekyo kiro Ruhanga akahuumura yaaherize emirimo ye yoona ey'okuhanga.</div><div class="p"> 4Okwo nikwo eiguru n'ensi byakurataine nibihangwa.</div><div class="s">Ruhanga okuta Adamu omuri Edeni</div><div class="p"> 5Obu Mukama Ruhanga yaahanga eiguru n'ensi, hakaba hatariho ebirikumera nobu byakuba ebishaka ebirikushakamba ahansi. Manya Mukama Ruhanga akaba atakagwisize njura omu nsi, kandi hatariho muntu weena ow'okugihinga. 6Omurombe gukaba gwimuka niguruga omu nsi, gubobeeza eitaka. 7Atyo Mukama Ruhanga yaabumba omuntu omu mucuucu gw'ahansi, yaamwikiza omu nyindo omwitsyo gw'amagara. Mpaho omuntu yaaba ekihangwa ekiine amagara. 8Bwanyima Mukama Ruhanga yaata omusiri omuri Edeni, aha rubaju rwa burugwa-izooba, yaagutamu ogwo muntu ou yaabumburikire. 9Reero Mukama Ruhanga yaameza omu itaka ryamwo emiti ya ibara muringo. Egyo miti ekaba neehuzya owaagireeba kandi eri mirungi kuriibwa. Haza yaameza omuti gw'amagara ahagati y'ogwo musiri, n'ogundi muti ogw'okumanya ekirungi n'ekibi.</div><div class="p"> 10Omuri Edeni hakaba nihashenenekamu omugyera gw'okwitirira ogwo musiri. Gukiheza kwogamu gwebaganisa, gurugwamu emigyera ena. 11Ogw'okubanza gukaba nigwetwa Piishoni. Nigwo ogwo ogwehinguriize ensi ya Haavila erimu ezaabu. 12Haza ezaabu y'omuri egyo nsi n'empuuhe. Amacanda g'omugaju bedeliyamu n'amabaare g'obuguzi bwingi onikisi nabyo biriyo. 13Omugyera gwa kabiri nigwetwa Gihooni. Nigwo gwehinguririize ensi ya Kuushi. 14Kandi ogwa kashatu ni Tiguriisi, ogurikuhimintikira burugwa-izooba bwa Asiriya; n'ogwa kana ni Eufuraati.</div><div class="p"> 15Reero Mukama Ruhanga yaatwara ogwo muntu, yaamuta omuri ogwo musiri gwa Edeni, kuguhinga n'okugurinda. 16Haza yaamugira ati: Emiti yoona ey'omuri ogu musiri, noikirizibwa kugiryaho nk'oku orikwenda. 17Kwonka omuti gw'okumanya ekirungi n'ekibi, gwo otariguryaho; ahabw'okuba eizooba ri origuryaho buzimazima oryafa.</div><div class="s">Okuhangwa kwa Eva</div><div class="p"> 18Bwanyima Mukama Ruhanga akagira ati: Ti kirungi omuntu kuguma wenka. Ka mmukorere omuhwezi omushemereire. 19Mpaho Mukama Ruhanga yaabumburika omu itaka enyamaishwa zoona, n'enyonyi z'omu kaabunga zoona, yaazireetera ogwo muntu, kureeba amaziina gu araazeete, haza ekihangirwe kyona ekiine amagara, eki omuntu yaayetsire eiziina, niryo ryabaire eiziina ryakyo. 20Mpaho Adamu yaayeta amatungo goona amaziina, n'enyonyi z'omu mwanya n'enyamaishwa z'omu ishwa zoona. Kwonka omuri ebyo tihaabonekamu muhwezi omushemereire. 21Mukama Ruhanga nikwo kugwejegyeza munonga ogwo muntu; haza ku yaabaire akigwejegyeire, yaiha orubaju omu mbaju ze, n'ahi rwaruga yaigazaho enyama. 22Orubaju ru Mukama Ruhanga yaihire omu mushaija, yaarukoramu omukazi, yaamureetera ogwo mushaija.</div><div class="p"> 23Reero ogwo mushaija yaagira ati:</div><div class="q">Mbwenu eri n'eigufa eryaruga omu magufa gangye, kandi n'enyama eyaaruga omu nyama zangye.</div><div class="q">Ayetwe Omukazi, ahabw'okuba yaihwa omu mushaija. 24Nikyo omushaija atsigiraho ishe na nyina, akahamira aha mukazi we, bakaba omubiri gumwe.</div><div class="p"> 25Haza ogwo mushaija n'ogwo mukazi bombi bakaba bajwaire busha, batarikwitwa nshoni.</div><div class="s">Okugwa kw'omuntu</div>
 </div>
 </div>
</div>

The Bible with Apocrypha in Runyankore-Rukiga, new revised joint translation © The Bible Society of Uganda, 2008. 

Bityo eiguru n'ensi na byona ebibirimu byahwa eikora. Aha kiro kya mukaaga, Ruhanga yaaheza omurimo gwe gwona ogu yaabaire naakora, kandi aha kiro kya mushanju yaarekyera aho kukora ogwo murimo, yaahuumura. Atyo Ruhanga yaaha omugisha ekyo kiro kya mushanju, kandi yaakyeeza; ahabw'okuba ahari ekyo kiro Ruhanga akahuumura yaaherize emirimo ye yoona ey'okuhanga.
Okwo nikwo eiguru n'ensi byakurataine nibihangwa.

Obu Mukama Ruhanga yaahanga eiguru n'ensi, hakaba hatariho ebirikumera nobu byakuba ebishaka ebirikushakamba ahansi. Manya Mukama Ruhanga akaba atakagwisize njura omu nsi, kandi hatariho muntu weena ow'okugihinga. Omurombe gukaba gwimuka niguruga omu nsi, gubobeeza eitaka. Atyo Mukama Ruhanga yaabumba omuntu omu mucuucu gw'ahansi, yaamwikiza omu nyindo omwitsyo gw'amagara. Mpaho omuntu yaaba ekihangwa ekiine amagara. Bwanyima Mukama Ruhanga yaata omusiri omuri Edeni, aha rubaju rwa burugwa-izooba, yaagutamu ogwo muntu ou yaabumburikire. Reero Mukama Ruhanga yaameza omu itaka ryamwo emiti ya ibara muringo. Egyo miti ekaba neehuzya owaagireeba kandi eri mirungi kuriibwa. Haza yaameza omuti gw'amagara ahagati y'ogwo musiri, n'ogundi muti ogw'okumanya ekirungi n'ekibi.
Omuri Edeni hakaba nihashenenekamu omugyera gw'okwitirira ogwo musiri. Gukiheza kwogamu gwebaganisa, gurugwamu emigyera ena. Ogw'okubanza gukaba nigwetwa Piishoni. Nigwo ogwo ogwehinguriize ensi ya Haavila erimu ezaabu. Haza ezaabu y'omuri egyo nsi n'empuuhe. Amacanda g'omugaju bedeliyamu n'amabaare g'obuguzi bwingi onikisi nabyo biriyo. Omugyera gwa kabiri nigwetwa Gihooni. Nigwo gwehinguririize ensi ya Kuushi. Kandi ogwa kashatu ni Tiguriisi, ogurikuhimintikira burugwa-izooba bwa Asiriya; n'ogwa kana ni Eufuraati.
Reero Mukama Ruhanga yaatwara ogwo muntu, yaamuta omuri ogwo musiri gwa Edeni, kuguhinga n'okugurinda. Haza yaamugira ati: Emiti yoona ey'omuri ogu musiri, noikirizibwa kugiryaho nk'oku orikwenda. Kwonka omuti gw'okumanya ekirungi n'ekibi, gwo otariguryaho; ahabw'okuba eizooba ri origuryaho buzimazima oryafa.

Bwanyima Mukama Ruhanga akagira ati: Ti kirungi omuntu kuguma wenka. Ka mmukorere omuhwezi omushemereire. Mpaho Mukama Ruhanga yaabumburika omu itaka enyamaishwa zoona, n'enyonyi z'omu kaabunga zoona, yaazireetera ogwo muntu, kureeba amaziina gu araazeete, haza ekihangirwe kyona ekiine amagara, eki omuntu yaayetsire eiziina, niryo ryabaire eiziina ryakyo. Mpaho Adamu yaayeta amatungo goona amaziina, n'enyonyi z'omu mwanya n'enyamaishwa z'omu ishwa zoona. Kwonka omuri ebyo tihaabonekamu muhwezi omushemereire. Mukama Ruhanga nikwo kugwejegyeza munonga ogwo muntu; haza ku yaabaire akigwejegyeire, yaiha orubaju omu mbaju ze, n'ahi rwaruga yaigazaho enyama. Orubaju ru Mukama Ruhanga yaihire omu mushaija, yaarukoramu omukazi, yaamureetera ogwo mushaija.
Reero ogwo mushaija yaagira ati:
Mbwenu eri n'eigufa eryaruga omu magufa gangye, kandi n'enyama eyaaruga omu nyama zangye.
Ayetwe Omukazi, ahabw'okuba yaihwa omu mushaija. Nikyo omushaija atsigiraho ishe na nyina, akahamira aha mukazi we, bakaba omubiri gumwe.
Haza ogwo mushaija n'ogwo mukazi bombi bakaba bajwaire busha, batarikwitwa nshoni.

Listen to Kut 2