If you have would like a copy of this version please contact info@davarpartners.org

The Gaddi New Testament

This work is licensed under Creative Commons Attribution-ShareAlike 4.0 License.

फिरी सो किस्ती पुर चड़ी करी पार गो; अतै अपणै नगरा मन्ज आ। फिरी मतै मणु अक्क अधरंगी जो मन्जै पुर चुक्की करी तैस बल्लै लेई आये; यीशुऐ तंयारा विस्वास जो हेरी करी, तैस अधरंगी सोगी बल्लू; “हे पुत्र हिम्मत रख; मैंई तेरै पाप माफ करी दितै।” अतै हेरा, कई शास्त्री सोचणा लगै, कि “ऐह ता प्रमात्मैं री बुराई करू करदा।” यीशुऐ तंयारै मना री गल्ला जो जाणी करी बल्लू, कि “तुहै मणु अपणै मना मन्ज ऐह कजो सोचु करदै हिन? कै तुहै ऐह ना जाणदै कि ठीक करनै थऊँ पापा जो माफ करना आसान हा क्ओकि तैतिओ हेरी ना सकदै। पर चंगाई रै कम्मा जो हेरी सकदै हिन कि सो ठीक भूआ कि ना? पर ठेरैतांये कि तुसै जाणी लैन कि मणु रै पुत्रा जो धरती पुर पाप माफ करनै रा अधिकार हा।” तिनी अधरंगी सोगी बल्लू उठ “अपणी खाट चुक, अतै अपणै घरा जो चली गा।” सो उूठी करी अपणै घरा जो चली गो। मणु ऐह हेरी करी डरी गै अतै प्रमात्मैं री जय-जयकार करना लगै जिनी मणु जो ऐसा अधिकार दितुरा हा।


तैड़ी थऊँ अगो गिचीकरी यीशुऐ मत्ती नां रै अक्की मणु जो चुंगी लैणै बाळी चौकी पुर बैहुरा हेरू, अतै तैस सोगी बल्लू, “मेरै पिचो चली पै।” सो उूठी करी तेसेरै पिचो चली पैऊ।
अतै जैहणै यीशु अतै तसेरै चेलै मत्ती रै घरै खाणा बैईठै ता मतै चुंगी लैणैबाळै अतै पापी ईच्ची करी सो भी तियां सोगी खाणा बैईठै। ऐह हेरी करी फरीसी तसेरै चेलै सोगी बल्लू; “तून्दा गुरू चुंगी लैणैबाळै अतै पापी सोगी कजो खान्दा?” यीशुऐ ऐह हुणी करी तियां सोगी बल्लू, “बैईद खरै भलै चंगै तांयें ना भुन्दा पर बमारा तांयें भुन्दा। ता तुहै गिच्ची करी ठेरा अर्थ सीखी लेआ, कि ‘अऊँ बलिदान ना पर दया चाहन्दा।’ क्ओकि अऊँ जैड़ै अपणै आपा जो धर्मी समझदै हिन तियां जो ना पर पापी मणु जो हैदणा छूरा।”


ता यूहन्‍ना रै चेलै तैस बलै ईच्ची करी बल्लू; “कै वजह हा कि अहै फरीसी ऐतनै व्रत करदै हिन, पर तेरै चेलै व्रत ना करदै?”
यीशुऐ तियां सोगी बल्लू; “कै बराती, जैहणै तक दूल्हा तियां सोगी हा, शौक करी सकदै हिन? पर सो दिन ईणै जैहणै दूल्हा तियां थऊँ अलग करी दिणा, तैस टैमैं तियां व्रत करनै।”
कोई भी नोए कपड़ै री टल्ली छकी करी पूराणै कपड़ै मन्ज टल्ली ना लान्दा, क्ओकि नोए कपड़ै सो सब कुछ खिन्जी लैणा, अतै तैस होर छकी गाणा। नौआ दाखरस पुराणी खलड़ी मन्ज ना पान्दै; क्ओकि ऐसा करनै थऊँ खलड़ी फटी गाणी, अतै दाखरस निकळी गाणा अतै खलड़ी बर्बाद भूच्ची गाणी, पर नौआ दाखरस नोई खलड़ी मन्ज ही भरदै हिन अतै दोनो बची रैहन्‍दी हिन।


सो तियां सोगी ऐह बल्लू ही करदा थू, कि हेरा, यहूदी रै सभागार थऊँ अक्क सरदार ईच्ची करी तसेरै पैरै पैई करी बिनती करना लगू, “मेरी कुल्ळी हबजु ही मरी गई हा, पर चली करी अपणा हत्थ तैहा पुर रख, ता सो जिन्दी भूच्ची गाणीआ।” यीशु उूठी करी अपणै चेलै समेत तैस सोगी चली पैऊ। अतै बत्ता मन्ज, अक्क जनानी जेहा जो बारह साला थऊँ खून चलनै री बमारी थी, अतै सो अपणै मना मन्ज ऐह सोचदी थी, कि “अगर अऊँ तसेरै कपड़ै रै पल्लै जो छुई लैली ता मुँ ठीक भूच्ची गाणा।” फिरी तैसै जनानी तसेरै पिचो ईच्ची करी यीशु रै कपड़ै रै पल्लै जो छुई लैऊ। यीशुऐ फिरी करी तैहा जो हेरू, अतै बल्लू, “पुत्री हिम्मत रख; तेरै विस्वासै तिजो ठीक करूआ।” ता सो जनानी तैहा घड़ी ही ठीक भूच्ची गई। जैहणै यीशु तैस सरदारा रै घरै पुजु ता रूणै पिटिणै बाळै री भीड़ अतै हौ हल्ला करदै मणु जो हेरू ता तिनी बल्लू, “घिरी गच्छा, कुल्ळी मरूरी निय्आ, पर सोऊ करदी हा।” ऐह हुणी करी सब हासणा लगै। पर जैहणै भीड़ कड्ड़ी दिती ता, तिनी अन्दर गिच्ची करी कुल्ळी रा हत्थ पकडु, अतै सो जी भूई। ऐसा गल्ला री चर्चा तैस पूरै देशा मन्ज फैली गई।

जैहणै यीशु तैड़ी थऊँ अगो गो ता दोई अन्धै तैस पिचो ऐह बलदै चली आये, कि “हे दाऊद री सन्तान, असु पुर दया कर!” जैहणै सो घरै पुजु, ता सो अन्धै तैस बलै आये, अतै यीशुऐ तियां सितै बल्लू, “कै तुसिओ विस्वास हा, कि अऊँ तिजो ठीक करी सकदा?” तिन्यै तैस सोगी बल्लू,
“हा, प्रभु! मिन्जो विस्वास हा तुहै ठीक करी सकदै हिन।”
ता तिनी तंयारी हाख्री छुई करी बल्लू, “तून्दै विस्‍वासा रै अनुसार तुहै ठीक भूची गै हिन।” अतै तंयारी हाख्री हेरना लगी पैई। यीशुऐ तियां जो टणकाई करी बल्लू, “सावधान, कसी जो ऐसा गल्ला रै बारै मन्ज मत दसदै कि मैंई तुसिओ ठीक करूआ।” पर तिन्यै पूरै देशा मन्ज तसेरी चर्चा फैलाई दिती।

जैहणै सो बाहर चलुरै थियै, ता हेरा, मणु अक्क गूंगै जो जैस मन्ज दुष्‍टात्मा थी तैस बलै लेई आये। जैहणै यीशुऐ दुष्‍टात्मा कड्ड़ी दिती, ता गूंगा बलणा लगी पैऊ। अतै भीड़ हैरान भूच्ची करी बलणा लगी, कि “अहै इस्त्राएल मन्ज इन्‍नै कम कदी भी ना हेरै।”
पर फरीसी बलणा लगै, “ऐह ता शैतान री मदद सोगी दुष्‍टात्मा जो कड़दा।”

यीशु अतै तसेरै चेलै गलील परदेस रै कई नगरा अतै ग्राँ मन्ज फिरदै रैह। सो यहूदी रै सभागार मन्ज उपदेश करदा रैऊ, अतै प्रमात्मैं रै राज्य रा सुसमाचार प्रचार करदा, अतै हर तरह री बमारी अतै कमजोरी जो दूर करदा रैऊ। जैहणै तिनी भिड़ा जो हेरू ता तैसिओ मणु पुर तरस आ, क्ओकि सो तियां भैड़ा सैईयें व्याकुल अतै भटकुरै थियै जंयारा कोई भी पाहल ना भुन्दा। ता तिनी अपणै चेलै सोगी बल्लू, “फसल ता बड़ी पक्की गछुरिआ पर कम कमाणै बाळै मजदूर थोड़ै हिन। ठेरैतांये बगड़ी रै मालका सितै बिनती करा कि सो अपणी फसल कटणै तांयें मजदूर भैजी देय्आ।”

Listen to मत्ती 9