Ka Baibala Hemolele © Partners Development Foundation, 2018.

¶ Ma hope iho holo akula ʻo Iesū ma kēlā kapa o ka moana wai ʻo Galilaia, ʻo ia ʻo Tiberia.
A nui loa nā kānaka i hahai iā ia, no ko lākou ʻike ʻana i nā hana mana āna i hana ai i ka poʻe maʻi.
Piʻi aʻela ʻo Iesū ma kekahi mauna, a noho ihola i laila me kāna poʻe haumāna.
A ua kokoke mai ka Mōliaola, he ʻahaʻaina na ka poʻe Iudaio.
ʻAlawa aʻela ko Iesū mau maka, ʻike akula i ka poʻe kānaka nui e hele mai ana i ona lā, nīnau maila ʻo ia iā Pilipo, “Ma hea kākou e kūʻai ai i berena e ʻai iho kēia poʻe?”
ʻO kēia kāna i nīnau mai ai i mea e hoʻāʻo ai iā ia; no ka mea, ua ʻike nō ia i kāna mea e hana mai ai.
ʻĪ akula ʻo Pilipo iā ia, “ʻAʻole lākou e lawa i ka berena no nā haneri denari ʻelua, i pākahi ai ka ʻāpana ʻuʻuku na lākou a pau.”
ʻŌlelo akula iā ia kekahi o kāna poʻe haumāna, ʻo ʻAnederea, ka hoahānau o Simona Petero,
“He wahi keiki ma ʻaneʻi, he mau pōpō berena bale ʻelima kāna, a me nā iʻa liʻiliʻi ʻelua; a he aha lā ia mau mea i kēia poʻe nui?”
ʻŌlelo maila ʻo Iesū, “E hoʻonoho i nā kānaka i lalo.” He nui nō ka weuweu ma ia wahi. Noho ihola nā kānaka, ʻelima tausani paha.
Lālau maila ʻo Iesū i nā pōpō berena; hoʻomaikaʻi akula, a hāʻawi maila i nā haumāna, a ʻo nā haumāna hoʻi i ka poʻe e noho ana; pēlā nō hoʻi nā iʻa, a like ka nui me ko lākou makemake.
A māʻona aʻela lākou, ʻī maila ia i kāna poʻe haumāna, “E hōʻiliʻili i nā hakina i koe, i hoʻolei ʻole ʻia ai kekahi mea.”
Hōʻiliʻili ihola lākou, a piha nā hīnaʻi he ʻumikumamālua i nā hakina o nā pōpō berena bale ʻelima i koe i ka poʻe i ʻai.
ʻŌlelo akula ka poʻe kānaka i ʻike i ka hana mana a Iesū i hana ai, “He ʻoiaʻiʻo, ʻo ke Kāula kēia e hele mai ana i ke ao nei.”
¶ A ʻike ihola ʻo Iesū, e kiʻi mai ana lākou e lawe iā ia, i hoʻolilo ai lākou iā ia i aliʻi, hele hou akula ia ma kekahi mauna, ʻo ia wale nō.
¶ A ahiahi aʻela, iho akula kāna poʻe haumāna ma ka moana wai.
Eʻe akula lākou ma luna o ka moku, holo akula i kēlā kapa o ka moana wai ma Kaperenauma; a pōʻeleʻele ihola, ʻaʻole ʻo Iesū i hiki mai i o lākou lā.
ʻOlokū aʻela ka moana wai i ka makani nui e nou mai ana.
Hoe akula lākou i nā setadia he iwakāluakumamālima, he kanakolu paha, ʻike akula lākou iā Iesū e hele mai ana ma luna o ka moana wai, a kokoke ia ma ka moku; makaʻu ihola lākou.
ʻĪ maila ʻo ia iā lākou, “ʻO wau nō kēia; mai makaʻu ʻoukou.”
A laila ʻoliʻoli lākou i kona eʻe ʻana i luna o ka moku; a hikiwawe akula ka moku ma ka ʻāina, kahi i holo ai lākou.
¶ Ia lā aku, ʻo ka ʻaha kanaka e kū ana ma kēlā kapa o ka moana wai, ʻike aʻela lākou, ʻaʻole moku ʻē aʻe ma laila, ʻo ka mea wale nō a kāna poʻe haumāna i eʻe aku ai, ʻaʻole naʻe i eʻe pū ʻo Iesū me kāna poʻe haumāna ma luna o ka moku, ʻo kāna poʻe haumāna wale nō i holo.
Akā hoʻi, holo maila nā moku mai Tiberia mai, kokoke ma kahi i ʻai ai lākou i ka berena, ma hope iho o ko ka Haku hoʻomaikai ʻana aku.
A ʻike aʻela ka ʻaha kanaka, ʻaʻole ʻo Iesū ma laila, ʻaʻole hoʻi kāna poʻe haumāna, eʻe akula lākou i luna o nā moku, holo akula i Kaperenauma e ʻimi ana iā Iesū.
A loaʻa iā lākou ia ma kēlā kapa o ka moana wai, ʻī akula lākou iā ia, “E Rabi, ināhea i hiki mai ʻoe i ʻaneʻi?”
ʻŌlelo maila ʻo Iesū iā lākou, ʻī maila, “Ke ʻimi nei ʻoukou iaʻu, ʻaʻole no ka hana mana a ʻoukou i ʻike ai; akā, no kā ʻoukou ʻai ʻana i nā pōpō berena, a māʻona aʻe.
“Mai hoʻoikaika ʻoukou no ka ʻai e pau wale; akā, no ka ʻai e mau ana a hiki i ke ola loa, ka mea a ke Keiki a ke Kanaka e hāʻawi ai na ʻoukou; no ka mea, ʻo ia kā ka Makua ke Akua i hōʻoiaʻiʻo mai ai.”
No ia mea, nīnau akula lākou iā ia, “He aha kā mākou e hana ai, i hana aku ai mākou i nā hana a ke Akua?”
ʻŌlelo maila ʻo Iesū iā lākou, ʻī maila, “Eia ka hana a ke Akua, e manaʻoʻiʻo mai ʻoukou i ka mea āna i hoʻouna mai ai.”
A laila nīnau akula lākou iā ia, “He aha ka hana mana āu e hana mai ai, i ʻike ai mākou, a i manaʻoʻiʻo ai iā ʻoe? He aha kāu e hana ai?
“ʻAi ihola ko mākou poʻe kūpuna i ka mane ma ka wao nahele; e like me ka mea i palapala ʻia, ‘«Hāʻawi maila ia i ka berena mai ka lani mai e ʻai lākou».’”
ʻŌlelo maila ʻo Iesū iā lākou, “ʻOiaʻiʻo, he ʻoiaʻiʻo kaʻu e ʻōlelo aku nei iā ʻoukou, ʻaʻole ʻo Mose i hāʻawi mai na ʻoukou i ka berena mai ka lani mai; akā, ʻo koʻu Makua ke hāʻawi mai nei na ʻoukou i ka berena ʻoiaʻiʻo mai ka lani mai.
“No ka mea, ʻo kā ke Akua berena, ʻo ia ka mea i iho mai mai ka lani mai, a hāʻawi i ke ola no ko ke ao nei.”
ʻĪ akula lākou iā ia, “E ka Haku, e hāʻawi mau mai ʻoe i kēia berena na mākou.”
ʻŌlelo maila ʻo Iesū iā lākou, “ʻO wau nō ka berena e ola ai; ʻo ka mea e hele mai i oʻu nei, ʻaʻole loa ia e pōloli; a ʻo ka mea e manaʻoʻiʻo mai iaʻu, ʻaʻole loa ia e make wai.
“A ʻōlelo akula au iā ʻoukou, ua ʻike nō ʻoukou iaʻu, ʻaʻole naʻe ʻoukou e manaʻoʻiʻo mai.
“ʻO nā mea a pau a ka Makua e hāʻawi mai ai noʻu, e hele mai nō lākou i oʻu nei; a ʻo ka mea e hele mai i oʻu nei, ʻaʻole loa wau e kipaku aku iā ia.
“No ka mea, ʻaʻole au i iho mai, mai ka lani mai e hana i koʻu makemake; akā, i ka makemake o ka Mea nāna au i hoʻouna mai.
“Eia ka makemake o ka Mea nāna au i hoʻouna mai, i ʻole e lilo aku mai oʻu aku nei kekahi o nā mea a pau āna i hāʻawi mai ai iaʻu; akā, e hoʻāla mai au iā ia i ka lā ma hope.
“No ka mea, eia ka makemake o ka Mea nāna au i hoʻouna mai, ʻo nā mea a pau e ʻike mai i ke Keiki, a e manaʻoʻiʻo hoʻi iā ia, e loaʻa iā ia ke ola mau loa; a e hoʻāla mai au iā ia i ka lā ma hope.”
¶ ʻŌhumu ihola ka poʻe Iudaio nona, no kāna ʻōlelo ʻana, “ʻO wau nō ka berena i iho mai mai ka lani mai.”
ʻŌlelo aʻela lākou, “ʻAʻole anei ʻo Iesū kēia ke keiki a Iosepa? Ua ʻike nō kākou i kona makua kāne a me kona makuahine; pehea lā hoʻi ia i ʻōlelo mai ai, ‘Ua iho mai au mai ka lani mai’?”
No laila ʻōlelo maila ʻo Iesū iā lākou, ʻī maila, “Mai ʻōhumu ʻoukou kekahi me kekahi.
“ʻAʻohe mea e hiki iā ia ke hele mai i oʻu nei, ke kauō ʻole mai iā ia ka Makua nāna au i hoʻouna mai; a naʻu ia e hoʻāla mai i ka lā ma hope.
“Ua palapala ʻia e nā kāula, ‘«E aʻo ʻia lākou a pau e ke Akua».’ No ia hoʻi, ʻo ka mea i hoʻolohe i kā ka Makua, a i aʻo ʻia hoʻi, ʻo ia ke hele mai i oʻu nei.
“ʻAʻole ke kanaka i ʻike i ka Makua, ʻo ka Mea wale nō no ke Akua mai, ʻo ia kai ʻike i ka Makua.
“ʻOiaʻiʻo, he ʻoiaʻiʻo kaʻu e ʻōlelo aku nei iā ʻoukou, ʻo ka mea e manaʻoʻiʻo mai iaʻu, he ola mau loa kona.
“ʻO wau nō ka berena e ola ai.
“ʻAi nō ko ʻoukou poʻe kūpuna i ka mane ma ka wao nahele, a ua make lākou.
“ʻO kēia ka berena i iho mai mai ka lani mai; inā e ʻai kekahi i kēia, ʻaʻole ia e make.
“ʻO wau nō ka berena ola, ka mea i iho mai mai ka lani mai. Inā e ʻai kekahi i kēia berena, e ola mau loa ia; a ʻo ka berena aʻu e hāʻawi aku ai, ʻo koʻu kino ia, ka mea aʻu e hāʻawi aku i ola no ko ke ao nei.”
¶ Hoʻopaʻapaʻa ihola nā Iudaio iā lākou iho, ʻī aʻela, “Pehea lā e hiki ai iā ia ke hāʻawi mai i kona kino iā kākou e ʻai?”
ʻŌlelo akula ʻo Iesū iā lākou, “ʻOiaʻiʻo, he ʻoiaʻiʻo kaʻu e ʻōlelo aku nei iā ʻoukou, a i ʻai ʻole ʻoukou i ke kino o ke Keiki a ke Kanaka, a i inu ʻole hoʻi i kona koko, ʻaʻole he ola i loko o ʻoukou.
“ʻO ka mea e ʻai i koʻu kino, a e inu hoʻi i koʻu koko, he ola mau loa kona, a naʻu ia e hoʻāla mai i ka lā ma hope.
“No ka mea, he ʻai ʻiʻo koʻu kino, a he mea inu ʻiʻo koʻu koko.
“ʻO ka mea e ʻai i koʻu kino, a e inu hoʻi i koʻu koko, ke noho nei ia i loko oʻu, ʻo wau hoʻi i loko ona.
“E like me ka Makua ola, nāna au i hoʻouna mai, a e ola ana au i ka Makua; pēlā hoʻi ka mea e ʻai mai iaʻu, e ola nō ia iaʻu.
“ʻO kēia ka berena i iho mai mai ka lani mai; ʻaʻole e like me ko ʻoukou poʻe kūpuna i ʻai ai i ka mane, a make akula; ʻo ka mea e ʻai i kēia berena, e ola mau loa ia.”
ʻO ia nā mea āna i ʻōlelo mai ai i loko o ka hale hālāwai i ke aʻo ʻana ma Kaperenauma.
¶ A lohe aʻela nā haumāna āna he nui, ʻī aʻela lākou, “He ʻōlelo paʻakikī kēia; ʻo wai lā ka mea e hiki iā ia ke hoʻolohe aku ia?”
A ʻike ihola ʻo Iesū i ka ʻōhumu ʻana o nā haumāna āna, no kēia mea, ʻī maila ʻo ia iā lākou, “ʻO kēia anei ka mea a ʻoukou i ukiuki ai?
“Pehea lā hoʻi, inā e ʻike ʻoukou i ke Keiki a ke Kanaka e piʻi hou aku ana i luna i kona wahi ma mua?
“ʻO ka ʻUhane ka mea nāna e hoʻōla; ʻaʻole ke kino he mea e pono ai; ʻo ka ʻōlelo aʻu e ʻōlelo aku nei iā ʻoukou, he ʻuhane ia a me ke ola.
“Akā, ua manaʻoʻiʻo ʻole mai kekahi poʻe o ʻoukou.” No ka mea, ua ʻike nō Iesū mai kinohi mai i ka poʻe manaʻoʻiʻo ʻole, a me ka mea nāna ia e kumakaia aku.
A ʻī maila ia, “No kēia mea kaʻu i ʻōlelo aku ai iā ʻoukou, ʻaʻole e hiki i kekahi, ke hele mai i oʻu nei, ke hāʻawi ʻole ʻia mai ia nāna e koʻu Makua.”
¶ Mai ia manawa, nui nā haumāna āna i hoʻi hope, ʻaʻole hoʻi i hele pū hou me ia.
Nīnau maila ʻo Iesū i ka poʻe ʻumikumamālua, “ʻO ʻoukou anei kekahi i makemake e hele aku?”
ʻĪ akula ʻo Simona Petero iā ia, “E ka Haku, i o wai lā mākou e hele aku ai? Iā ʻoe nō ka ʻōlelo o ke ola mau loa.
“A ua manaʻoʻiʻo mākou, a ua ʻike hoʻi, ʻo ʻoe nō ka Mesia, ke Keiki a ke Akua.”
ʻŌlelo maila ʻo Iesū iā lākou, “ʻAʻole anei au i wae iā ʻoukou he ʻumikumamālua, a ʻo kekahi o ʻoukou, he diabolō ia?”
ʻŌlelo maila ia no Iuda ʻIsekariota, ke keiki a Simona, kekahi o ka ʻumikumamālua, nāna ia e kumakaia aku.

Listen to KA ʻEUANELIO I KĀKAU ʻIA AI E IOANE 6