Tunen - 2017 CABTAL (NT) Non Drama

Tunen - 2017 CABTAL (NT) Drama

Ɔ yɛ́táyɛ́ ikúílí, mɔndɔ ɔmɔtɛ́ nɛ́áyɛ́á niínyə á Lásalɔ, a ka kɔa ɔ mɔɔ́mbɔ. A ka báá ɔ Bɛtánia, ɔ hitikə ɔhɛ́á Malɛ́á na wayɛ́á munínyə́ á Máta bá ná báá bá ndɔ tuənə. Malɛ́á, ɔ́ wɛ́ɛ́yɛ́ muəndú ɔwá a ná Isə́lúkú bunumbə buɛsɛ olókínə ɔ makɔlɔ́, a ná maáta sɔ́tɔ́kɔ́ na tɔ́áyɛ́á tuhúínyi, ɔ́ wayɛ́á munínyə́ á Lásalɔ a ná kɔ́á ɔ mɔɔ́mbɔ. Báyɛ́á bənínyə́ báfandɛ́ bá ná mɔndɔ lɔ́má ɔwá a ká Yə́susu lɛ́na a sɛ́á: «Á Isə́lúkú, yawɔ́á ɛŋgɔ́áyɛ́ yɛ mɔlɛ́má a ndɔ náá.»
Ɛnaka Yə́susu á yɛ́ɛ́yɛ́ imbə́nú ɔ́kɔ́, a sɛ́á: «Tátá nyɛmbɛ́ yɛ́ lɛ́á nisúki nɛ́ wííyí mɔɔ́mbɔ, wɔ́ lɛa ɛlɔ́áyɛ́ injiŋə yɛ tuúmə tɔ́ Huɛlɛ́ ɔ uwinə́niə na wayɛ́á Mɔná ɔ uwumə́siə.» Yə́susu a ka bá a ndɔ Máta na Malɛ́á hikiə, na wəbúə́ munínyə́ a Lásalɔ. Ata nɔ́yɛ́, ɛnaka á ɔ́kɔ́ ɔwá Lásalɔ a ndɔ náá, a ná hɔ́á tɔ́na tunó tɔ́fandɛ́ ɔ ɛbɔ́ka ɔyɛ́á a ná bámɛ́nɛ́na. Əlimə yɛ nɔ́yɛ́, a ná báyɛ́á bɔkɔ́nɛna lɛ́na a sɛ́á: «Tɔ́ tilə́ ɔ Yútɛa.» Bɔkɔ́nɛna bá sɛ́á: «Á Mulə́liə, mənə́níə́, bɛndɔ bá Yútɛa bá ka siəkə ɔ ɔwáwɔ ɔwɔ́nɔ na miɔkɔ, ɔ ndɔ siə utilə umə́ əə́?» Yə́susu a sɛ́á: «Baánɛ, buɔsɛ́ bɔ́ lɛ boóko na niómo nɛ́ bɛháwɔa na bɛ́fandɛ́ əə́? Ábá mɔndɔ a ndɔ kɛnda na buɔsɛ́, abáka a lɛ úmbúfə́nə bɔkɔasɛ́á, a ndɔ sinənə muɛsɛ, a ndɔ isəmú yɛ́ yɛ́ɛyɛ misí sinə. Mba, ábá a ndɔ kɛnda na bulúə́, abáka a úmbúfəkənə bɔkɔasɛ́á, a lɛ bá na isəmú.»
Ɛnaka a hɔ́ɔ́kɔ́ nɔ́yɛ́, a ná kɔndá a sɛ́á: «Yəsúə́ ɛŋgɔ́áyɛ́ a Lásalɔ a ná ákáná ɔ hinó, mba, ɛkasɛ mɛ ákáná mɛ́ wɛɛ́ya hunyíə́.» Bɔkɔ́nɛna bá ná wɛɛ́ya batá bá sɛ́á: «Á Isə́lúkú, ábá a ná ákáná ɔ hinó, a ŋɔ niŋə.» Ɔ taká, Yə́susu a ka hɔ́kɛna ɛlɔ́áyɛ́ nyɛmbɛ́ yɛ Lásalɔ, mba, bɔkɔ́nɛna bá ka əbú fɛka ɔwá, a ndɔ hɛ́na ɛlɔ́áyɛ́ hinó hɛ́ itə́mbí. Əlimə yɛ nɔ́yɛ́, Yə́susu a ná bəə́bu lɛ́na tə́lə́ŋu a sɛ́á: «Lásalɔ a lɛa wə́ə́tɔ. Mɛ ndɔ nɛhɔnɔ ɔ́kɔ mɔŋɛ́ŋa bɔkɔasɛ́á mɛ sá báá umə́, nɔ́yɛ́ yɛ́ ŋɔ báá mɔsɛ́ŋɛ́ ɛ́lɔ́áyɛ́ ənú ɔkɛaka ɔwá nɔ lumínínə. Mba, tɔ́ ákáná ɔ ɔwayɛ́ ɛmɛ́ŋɛ́.» Əlimə yɛ nɔ́yɛ́, Tɔ́masɛ ɔwá bá ndɔ ɛ́lɛnɛna bá sɛ́á: Ɔmbɔ́ásalɛ́, a ná bɔsɔ́kɔ́ bɔkɔ́nɛna lɛ́na a sɛ́á: «Tɔ́ əsú ákáná tɔ́na mbá tɔ wə́ə́níə́ na wəsúə́ Muinə́niə.»

Ikúílí Yə́susu a ná káfámá, bá ná wɛɛ́ya lɛ́na ɔwá, ɔ́ tunó túnisə ɛ́sɛ́á bá ná Lásalɔ nyəə. Ɛ́sɛ́á Bɛtánia yɛ́ sa bá hata na Yəlúsalɛma, hoóyi na tukóló tɔ́lálɔ́ tɔ́ amaná, Bɛyútɛnɛ biəŋí bá ka ndá Máta na Malɛ́á bíhíkə ɔ malɛlá má wəbúə́ munínyə́. Ɛnaka Máta a ɔ́kɔ́ bá ndɔ laa ɔwá Yə́susu a lɛa ɔ ɔsákɔna, a ná ákáná ɔ ɔwayɛ́ nɛnyáná, mba, Malɛ́á a ná tíkə́nə́ tuənə́tɔ́ ɔ miímə. Máta a ná Yə́susu lɛ́na a sɛ́á: «Á Isə́lúkú, ata ɔ báá háha, há wamɛ́á munínyə́ a sá wə́ə́. Mba ata nɔ́yɛ́, mɛ ndɔ manya ɔwá ata isíŋáka, Huɛlɛ́ a ndɔ aŋɔ́á índiəkinə yatɛ́ yikimə ɔyɛ́á ɔ ndɔ wɛɛ́ya bataka.» Yə́susu a sɛ́á: «Wawɔ́á munínyə́ a ndɔ hɔŋɔakɛa.» Máta a sɛ́á: «Ɛ́ɛ! Mɛ ndɔ nɔ́yɛ́ manya, a ŋɔ hɔŋɔa ɛnáká bəwə́nú bəkimə bá hɔŋɔ́ákɛ́á ɔ hinó hínítifə́.» Yə́susu a sɛ́á: «Mɛaŋɔ́á mɛ lɛ́á nɛhɔŋɔa, mɛaŋɔ́á mɛ lɛ́á buɔmɔ́. Wɛ́ɛ́yɛ́ ɔwá a ŋɔ nɛ́áyɛ́á nɛkɔmba tálɛ́na ɔ ɔwámɛ, ata a ŋɔ wə́ə́, a ŋɔ nɔmɔkɔ. Nɔ́yɛ́, wɛ́ɛ́yɛ́ ɔwá a ndɔ niŋə, ɔwá a ndɔ nɛ́áyɛ́á nɛkɔmba tálɛ́na tɔ́na ɔ ɔwámɛ, a sa ndá wəə. Ɔ ndɔ nɔ́yɛ́ lumininə əə́?» Máta a sɛ́á: «Ɛ́ɛ, á Isə́lúkú! Mɛ ndɔ lumininə ɔwá, aŋɔ́á ɔ lɛ́á Mɛ́sia, á Mɔná wa Huɛlɛ́, wɛ́ɛ́yɛ́ ɔwá a ná hɔ́ánána ɔndasá ɔ misí.»

Ɛnaka á hɔ́ɔ́kɔ́ nɔ́yɛ́, Máta a ná ákáná á wayɛ́á munínyə́ busíə́ á Malɛ́á, a ná wɛɛ́ya lɛ́na ɔ hɛtɔkɔ a sɛ́á: «Isə́lúkú a báka háha, a ndɔ aŋɔ́á ɛ́lɛna.» Ɛnaka Malɛ́á a bɛ́ɛ́yɛ́ bɛtambá ɔ́kɔ́, hɔasábɔ! A ná hɔalɛ́na, a ná ákáná ɔwayɛ́ busíə́. Ɔ taká, Yə́susu a sa bá a nɔ́ kafámá ɔ hitikə, a ka báá ɔ ɛbɔ́ka ɔyɛ́á Máta a ná wɛɛ́ya ɛ́nyánána. Bɛyútɛnɛ ɔbá bá ná báá ɔ miímə na Malɛ́á ɔ ɔwayɛ́ ukokoliniə, bá yámá a nɔ́ hɔalɛna tɔfá ɔ fámáka, bá ná wɛɛ́ya oŋgóníə́. Bá fɛkaka ɔwá, a nɔ́ ákáná ɔ malɛlá ɔ ɛmɛ́ŋɛ́ yɛ munyə́. Malɛ́á a ná káfámá ɔ ɛbɔ́ka ɔyɛ́á Yə́susu a ná báá. Ɛnaka a wɛɛ́ya yámá, a ná kɔa ɔ ɔwayɛ́ makɔlɔ́, a sɛ́á: «Á Isə́lúkú, ata ɔ báá háha, há wamɛ́á munínyə́ a sá wə́ə́.» Yə́susu a ná Malɛ́á yámá a ndɔ bɛ́sába na Bɛyútɛnɛ ɔbá bá ná wɛɛ́ya ɔŋgɔ́kɔ, a ná sakɛ́mála, wə́yíə́ mɔlɛ́má wɔ́ ná bítúŋúlə́lə. A sɛ́á: «Hə́níə́ nɔ ná wə́yíə́ umimə bɛ́lɛ́na əə́?» Bá sɛ́á: «Á Isə́lúkú, sɔ́nɔ, ɔ ndɔ siəkinə.» Yə́susu a ná mə́kúnúə́ ɔ malɛlá. Bɛyútɛnɛ bá sɛ́á: «Nɔ́ siəlínə ɛ́sɛ́á a ná bá a ndɔ wɛɛ́ya hikiə.» Mba, bɔ́mɔtɛ́ ɔ uwəbú ətíə́ bá sɛ́á: «Ɔwayɛ́ ɔwá a ná məə́sə má mundímə́ndímə úbúnə́, ɛlɔ́áyɛ́ yatɛ́ a sa kotiə ɔwá, Lásalɔ a lɛ wə́ə́ əə́?»

Yə́susu a ná sakɛ́málá tɔ́na, a ná ákáná ɔ munyə́, wɔ́ ka báá ihíkə yɛ́ muɔkɔ tɔ́ákátɔ, wúmotí híkínə́tɔ́ ɔ nifínínə́. Ɔ yɛ́ɛ́yɛ́ ikúílí, a ná láá a sɛ́á: «Nɔ́ wííyí muɔkɔ hɛ́kɛ́á.» Máta á munínyə́ wa muwə́nú, a ná wɛɛ́ya lɛ́na a sɛ́á: «Á Isə́lúkú, a ndɔ numbə mɔbɛ́á, ɔ taká ɔ́ tunó túnisə tɔ́ɔtɔ ɛ́sɛ́á bá ná wɛɛ́ya bɛ́lɛ́na ɔ munyə́.» Mba, Yə́susu a sɛ́á: «Mɛ sa aŋɔ́á lɛna ɔwá ábá ɔ ná lumínínə, ɔ ŋɔ tuúmə tɔ́ Huɛlɛ́ siəkinə əə́?» Bá ná yɛ́ɛ́yɛ́ ikúílí muɔkɔ hɛ́kɛ́á. Yə́susu a ná məə́sə bə́líə́ ɔ ɔmbáŋá, a sɛ́á: «Á Ába, mɛ ndɔ aŋɔ́á bíhóliə bɔkɔasɛ́á ɔ ná mɛaŋɔ́á ɔ́kɛna. Mɛ ndɔ manya bikúílí bikimə ɔwá ɔ ndɔ mɛaŋɔ́á ɔ́kɛ́na, mba, mɛ ndɔ hɛ́na nɔ́yɛ́ ɛlɔ́áyɛ́ bɛndɔ ɔbá bá ná mɛaŋɔ́á nɛ́ŋɛ́lɛ́na ɔkɛaka ɔwá, bá lumínínə́ bá sɛ́á aŋɔ́á ɔ ná mɛaŋɔ́á lɔma.»
Ɛnaka a hɔ́ɔ́kɔ́ nɔ́yɛ́, a ná yə́mə́ nióni nɛŋɛ́ŋa a sɛ́á: «Á Lásalɔ fámá hɔ́yɛ́!» Lásalɔ a ná fama, makɔlɔ́ na makátá ɔ́lɔ́kɔ́kɔ́tɔ́ na bifəsiə, bɔ́áyɛ́á busíə́ bɔŋɛ́nátɔ́ na ɔmbɔ́mɔ́. Yə́susu a ná bɛndɔ lɛ́na a sɛ́á: «Nɔ́ wɛɛ́ya humbúlə́kə, nɔ́ wɛɛ́ya niása á ákana.»


Bɛyútɛnɛ biəŋí ɔbá bá ná ndá Malɛ́á bíhíkə́, bá ná siəkínə́ yatɛ́ ɔyɛ́á Yə́susu a ná kɛ́áka, bá ná níə́búə́ nɛkɔmba tálɛ́ná ɔ ɔwayɛ́. Mba, bɔ́mɔtɛ́ ɔ uwəbú ətíə́, bá ná ká Bɛfalísia kɔ́ána, bá ná bəə́bu nífúnə́kínə́ yatɛ́ ɔyɛ́á Yə́susu a ná kɛ́áka. Bisə́lúkú bɛ́ bətitiəmahánɛna na Bɛfalísia, bá ná kɔtákána ɔ nindúmə́ nɛŋɛ́ŋa nɛ́ bəkə́lə́siə bá sɛ́á: «Wɔ́ɔwɔ mɔndɔ a ndɔ tɔŋgɛtɛ́nɛ́á tɔ́ yələ́mənə kɛa tuəŋí, nəníə́ tɔ́ kɛ́áka əə́? Ábá tɔ ná niása ɔwá a ákánána ɔ busíə́, ɛkasɛ bəkimə bá níə́búə́ nɛkɔmba tálɛ́ná ɔ ɔwayɛ́, nɔ́yɛ́, bɛndɔ bá Lɔ́ma bá ŋɔ nda yəsúə́ Tɛ́mbɛlɛ na búə́súə́ bɔnɔŋɔ katáka.» Mba, ɔmɔtɛ́ ɔ uwəbú ətíə́ ɔwá a ná báá isə́lúkú mɛŋɛ́ŋa yɛ bətitiəmahánɛna ɔ hítə́yí hiɔŋɔ, nɛ́áyɛ́á niínyə á Kayífi, a ná bəə́bu lɛ́na a sɛ́á: «Nɔ lɛ ndɔ ɔ́kɔ ata bɔkɔa. Nɔ́ bílúmə́kíníə́ muɛsɛ, yɛ́ lɛa mɔsɛ́ŋɛ́ ɛlɔ́áyɛ́ ənú ɔwá, mɔndɔ ɔmɔtɛ́ á wínə́ ɛlɔ́áyɛ́ bɔnɔŋɔ, nɔ́yɛ́ mbá bɔnɔŋɔ bukimə bɔ́ sɔ́ ŋɔ nímə.» Bɛtambá bɛ́ Kayífi bɛ́ sa bá bɛ́ ndɔ húlínə na wɛɛ́ya bɛ́múɛ́tɛ́, mba, ɛ́sɛ́á a ná báá ɔ hítə́yí hiɔŋɔ isə́lúkú mɛŋɛ́ŋa yɛ bətitiəmahánɛna, a ka bá a ndɔ hɔ́ɔ́ ɛ́sɛ́á mɔhɛ́nátɔtányɛ́ ɔwá, Yə́susu a ná hɔ́ánána uwínə ɛlɔ́áyɛ́ bɔnɔŋɔ. Táta ɔ́maná ɛlɔ́áyɛ́ bɔnɔŋɔ bíbúə́, mba, ɔ́ ɔkɛaka ɔwá baná bá Huɛlɛ́ ɔbá bá lɛ́á sámbánátɔ́ bá báá ɔ bɔlatɔ́. Ɔ botolokiə ɔ hítə́yí hinó, bá ná bɛtɛ́nɛ́mɛ́ná ɛtá á Yə́susu ɔ ɔwɔ́nɔ. Ɛlɔ́áyɛ́ nɔ́yɛ́, a ná súkə́ ɔ ɔbála na ɔ ɔlɔɔ ɔ mianyɔ́ ɔ ətíə́ yɛ Bɛyútɛnɛ. A ná bísúə́lə́ ɔ yɛ́mɔtɛ́ misí ɔ ɛmɛ́ŋɛ́ makɔ́tákɛ, ɔ bətínə́ ɔyɛ́á bá ndɔ ɛ́lɛnɛna, Ɛfalahími, ɔmɔ́tɔ́yɛ́ á ná tuənə́kínə na báyɛ́á bɔkɔ́nɛna.


Básɛ́ka, á ɛŋganda ɔ Bɛyútɛnɛ, yɛ́ ka báá hoóyi bɛndɔ bá bɔnɔŋɔ bəəŋí bá ná báláka ɔ busíə́ bɔ́ ikúílí ɔ Yəlúsalɛma, ɛlɔ́áyɛ́ nibínə́ŋəsiə. Bá Yə́susu siəkə, ikúílí ɔyɛ́á bá ná bákɔ́na ɔ Tɛ́mbɛlɛ, bá bɛ́bátaka bəə́bu na bəə́bu bá sɛ́á: «Baánɛ, a sɔ́ ŋɔ ndasá ɔbánɔ́ ɔ ɛŋganda əə́?» Bisə́lúkú bɛ́ bətitiəmahánɛna na Bɛfalísia bá ná nɛkálɔ túmbə́kíə́ ɔwá, ábá mɔndɔ a ná manyá ɔ ɛbɔ́ka ɔyɛ́á Yə́susu a lɛ́á, a nda bəə́bu lɛ́na ɔkɛaka ɔwá mbá bá wɛɛ́ya halɛ́na.

Listen to Yɔhánɛsɛ 11