Nesie onona ua man samatoro karisaa anori rapeka na Anahatana ihoka re upu momou arihon otoe Mesir runa karisaa ita Yahudiu iai poroti wan resaa tewa. Sio imam no sio mainaya na sio matuhete Musa ne maunauna wason onina arena, nanie osota Yesus puru-purumene na ohunui. Oahata, “Ne pene isotai tau karisaa rei. Tea mo, mka mansia pusiso oatana na umau. Openeso oatin tau ita.”
Tau rei, Yesus waira nia Betania, ria Simon ne numa. Ia mo, naone ikupu unte wan iake tewa nai osa. Oyo ia pina isa ihokai mai Yesus irori potone. Potone rei mo, ounai arihon hatu. Oapataui tau mina tunne wan haue rihue. Mina rei mo, ounai arihon ai namte. Yesus wain iaiki, oyo ia pina rei ihoka, ikuparehi potone rei tionae, samatoro isona mina rei roe Yesus unui. Sio umau noi rei oakapuku tanui. Reiso oasei mai umau ata, “Ia pina rei mo, iuna sai-sai mina san rei, nan tahae? Mina rei mo, sani iaheniki mo, mka isupu kepen panesi. Kepen sani ia isa isupu kati tau musum osa. Kepen rai, mka iruire osi sio mosokinia!” Reiso oakapuku tau ia pina rei.
Ne Yesus iasau osiso ata, “Ia ruai! Omi nanie oakapuku tanui nan tahae? Ia ne hali san rei osiku, areimo iake. Sio mosokinia wason okatamo sui osa. Kani mo maue, omaha oakahaiso sui osa. Ne Au mo, mka ukatamo sui osa tewa. Ia pina reini iuna pusire waron imaha iunare. Mka umataku, oyo oaunutuku, ne ia pina rei isonaku tau mina pusu monne naone nea.
Atinu mai ia-ia nanie uasau osimo. Sui supa-supan man mai tuniai reini, osima na Sou Iake rerihoni Au, mka oatinu rerihoni ia pina rei na anoo rapeka runai.”

Yudas mo, ia isa arihon Yesus ne mampusua hutusa rahana ua. Ia mo, ia on pan nia Kariot. Ieui pan sio imam no sio mainaya, nanie iahen Yesus osiso. Sio nanie ohunui, reiso oatinu tau anamanae rei, anoo mirika. Oahata, “Mka arui kepen osia sani arori Yesus osima.”
Reiso Yudas inina arena na irori Yesus osiso.
Tau ranie hatae wan mataanoe arihon karisaa ita Yahudiu iai poroti wan resaa tewa sio orehi rompau. Orehi rompau tau karisaa anori rapeka na Anahatana ihoka rea upu momou arihon otoe Mesir. Tau rei, sio mampusua oasei tau Yesus ata, “Upu. Tau karisaa anori rapeka na Anahatana ihoka rea upu momou arihon otoe Mesir mo, nanie aseka tau re muaina sui supa?”
Reiso Yesus iaisosi sio ua ata, “Uamo oeu roe kota Yerusalem. Mka onusu kota rei, onoo ia hanaie isa iasaoa tihu naniae wan nanae unene. Oeu opusui. Mka inusu numa isa. Hoka noi, oyo oasei tau numa upue ata, ‘Upu. Ma ia matuhetene inina kamar wan nanie iai ikata ne mampusua. Nanie iai tau karisaa anori rapeka na Anahatana ihoka rea upu momou arihon otoe Mesir. Reiso kamar na iaiki wanpa?’ Mka iautuu na kamar isa roe naue wan mainae. Katerau runa pusire waroro matane nea. Seka tau pusire roe rei nea.”
Reiso uaso oeuso roe kota rei. Hoka roe, oyo onoo pusire pannuhu sani sae waron Yesus iasau runare rei. Reiso oseka tau muai karisaa rai.
Nene pumono pan san rei, Yesus ihokai roe kamar rei ikata ne mampusua hutusa rahana ua rei. Hoka roe, oyo oaiso. Sio wason oaiso, oyo Yesus iasau ata, “Atinu mai ia-ia nanie uasau osimo. Ia isa arihon omi reini wain iaiki ikataku, mka iaheniku osi sio wason nanie ohunuku.”
Oatinu tau rei, anoo nnai. Ia isa iasei ata, “Ia reimo, au te sae rei?” Oyo ia isa honu iasei honu ata, “Ia reimo, au te sae rei?” Oasei rotu-tu pusiso oasei san rei.
Oyo Yesus iasau ata, “Ia rei mo, ia isa arihon om hutusa rahana ua reini. Ia rei mo, wain inono poroti poe pirune osa runaku. Tea mo, Au, Tumata reini mo, Anahatana Ihitiku mo, mka umataku sani Anahatana iaunutui nea rei. Ne ia wain iaheniku osi we nisau mo, mka siraka tanui. Nene iake tau ia rei, pene iamrae nea.”
Reiso wason oaiso, oyo Yesus inana poroti oyo iainisi iainaa na Anahatana. Iahata, “Ama. Uainisi iake arihonia. Ano mo, Ano aia tau nante na tuamane pusiki utui. Auna gandum raruhu on poe tuamane na auna poroti tanui.”
Oyo ikihoi tau hanai, isamai osi ne mampusua, iahata, “Onana poroti rei na oaiki. Areini mo, tinaiku.”
Ita inana koinanae. Iainisi iake arihon Anahatana. Iahata, “Ama. Uainisi iake arihonia. Ano mo, Ano Aia tau nante na tuamane pusiki utui. Ahaye tau anggur huaya.”
Oyo irui koinanae rei osi ne mampusua. Sio pusiso oninu mkane-mkane. Iahata, “Areini mo, Au we nasi. Mka umataku, we nasi renia na sio pusiso oanei ata Anahatana iuna osiso sani naone itotoe. We nasi rei renia tau sio panesi. Atinu mai ia-ia, nanie uasau osimo. On reini, Au mka uninu tihu anggur tewa nea rotu-tu Anahatana irime ne mansiau.”
Oyo sio ohete ahinae oainaa na Anahatana samatoro oeuso roe pupue wan nanae Saitun.

Yesus sio wason oeuso roe pupue wan nanai Saitun. Wason arena tinai tihue oyo iasau osi ne mampusua ata, “Mka pusimo orumamo oarihoniku. Tea mo, oaunutui tau Anahatana ne anamanaya ata Anahatana iasau san reini,
‘Mka uhunu ia mamsakae,
oyo ne rompau pusiso oruma wena-wenaso.
Sio umau su ria, sio umau su nau.’
Ne mka uamahaiku honu, oyo ueu uanaone poe otoe Galilea. Mka opusu tau muie.”
Petrus iasau ata, “Upu. Masike sio pusiso oeu arihonia iae, mka au mo, ueu uarihon ano tewa.”
Oyo Yesus iasau ata, “Atinu mai ia-ia, nanie uasau osimo. Mka-mka pumono, manue retunkeko nai ua tewasi oimo, ano asau ata ationa Au tewa, rotu-tu nai tonu.”
Iahata, “Uasau osia, Upu. Masike umataku nnaya iae, upeneku uasau ata uationaya tewa!”
Oyo ne mampusua pusiso oasau san rei oi.

Oyo Yesus na ne mampusua oeuso ria nisi wan nanae Getsemani. Hoka ria, oyo iasau osi ne mampusua ata, “Oru-ruemo mai rei, na ueu uainisi arihon Anahatana.”
Oyo ieu ikata Petrus, Yakobis, na Yohanis. Anoi reuponu. Iahana anoi mtinte nai osa. Iahata, “Anoku mtinte nai osa. Uahana nanie umataku nea. Onapa mai rei na osaka-saka.”
Oyo ieui hainau mkane, samatoro irike tune poe tuamane. Iainisi tau Anahatana na kani pene sinsarai. Iahata, “Ama, amaku, Ano amaha auna sae man. Reiso uainisi arihonia na kani pene sinsaraku. Ne pene pusu Au we maue. Ne pusu Ano me maue.”
Oyo Yesus inuniki poe ne mampusua tonu rei. Isupuso wasopo onekeso. Iasei tau Petrus ata, “Simon, anekea rei si? Ueu uarihonimo potuina tewasi, ne omaha osaka-saka tewa! Saka oainisi tau Anahatana na iakahaimo na pene ia aia sakahatene ireamo na opalalosa. Mansate, anomo nanie rapusu manisate. Ne okua tewa tau tinaimo ramankaeso.”
Oyo ieu iarihonso honu, nanie iainisi san sinasi rei honu. Iainisi pusi oyo, inuniki honu pan tonso. Isupu tonso onekeso honu. Tea mo, matao usena mtinta. Reiso oanei tewa nanie oasau sae osi Yesus.
Yesus inuniki mai tanso nai tonu, oyo iasei ata, “Onekemo oaranahamo asi? Onekemo hasae rei nea. Mata hun tewa nea, mka oahen Au, Tumata Reini mo, Anahatana Ihitiku, osi sio wason opalalosa. Ohanumo roe, na ieuta. Onoo ia wain iruiku wain ihokai nea.”

Yesus wain ianamana asi mo, sira tau Yudas, ia isa arihon sio mampusua hutusa rahana ua rei, ihokai ikata sio panesi. Sio rei orori tunua runa kahitata. Sio imam no sio mainaya, sio matuhete Musa ne maunauna, runa sio ona Yahudi nesia rei sahoro oaisosi sio rei na nanie osota Yesus. Yudas iasau osiso nea ata, “Ia wain oninai mo, mka umukiki na oationai. Osotai oyo ororiki. Osakai ia-ia.”
Ihoka noi, oyo sira tau ieui haineke Yesus. Iahata, “Ano Ona Matuhetene.” Oyo imukiki. Imukiki oyo, sio rei osotai na oaresiki. Ia isa wain hainekeso, isaru ne tunue, oyo iseha sio imam no ia mainae ne manorine isa tinai totue hae. Oyo Yesus iasei tanso ata, “Omi ata kan Au mo, Au kahatene si? Tu-tu ohokamo orori tunua na kahitata nanie osotaku si? Aikee onon ranie uatuhetemo pan Anahatana ne numa mainisie, ne osotaku tewa. Ne osotaku san reini mo, reeu sani Anahatana ne anamanaya reasau.”
Oyo sio mampusua pusiso oruma oarihon Yesus.
Ia hanai nasonane isa pan rei, irehe nipae man, ipusu Yesus. Oyo sio nanie osotai, ne inosu ne nipae rei, oyo irumai sanakui.

Sio orori Yesus pan sio imam no ia mainae. Hoka pan oyo, sio imam no sio mainaya, sio matuhete Musa ne maunauna, na sio ona Yahudi nesia rei pusiso oamanouso. Petrus ipusu Yesus on ria hainau rotu-tu inusui pan sio imam no ia mainae rei ne numa tihue. Hoka pan oyo, iruei iasa tinain haineke usa ikata sio mamsakaya. Sio imam no sio mainaya runa sio pusiso wason sinasi rei onina sio umau na osima runa Yesus ne isanaya na oruiki osi sio wason no kawasa ohunui. Ne osupu ne isanae isa tewa. Sio panesi ohoka orun oakarota rerihoni Yesus, ne no mamrunia osa tewa. Pusiso oruni tamena-tamena. Reiso no kawasa tewa na oaisosi sio ohunui.
Oyo sio umau ohitio roe, samatoro oruni oakarota rerihoni Yesus ata, “Ami atinui iasau ata, ‘Mka ukohu Anahatana ne numa mainisie reini wan mansia onanai, oyo onona ua, uapuoo honue honu. Areimo mansia oakahaiku uapuooi tewa.’”
Aikee sio no mamrunie osa tewa.
Reiso sio imam no ia mainae iooi kua tihue, oyo iasei tau Yesus ata, “Sio rei orun me kahatena. Ne Ano asau sae isa tewa tau sae?”
Ne Yesus iamaturui man. Iasau sae isa tewa. Oyo sio imam no ia mainae rei iasei honu ata, “Ano mo, Ia Aia wain Anahatana Ihitia na Apuheu Mansia si? Ia sahoro ami ainaa nnai, Anai si?”
Iahata, “Au wan rei nea rei tea. Mka pusimo onoo Au, Tumata Reini mo, Anahatana Ihitiku, urue mai Ia wain Ne Kawasa hanai wanane. Mka uhokaku honu on roe nante pan yahu anoa.”
Iatin san rei, oyo sio imam no ia mainae ikiha ne papite na sio oanei ata anoi resaa tau Yesus. Iahata, “Reiso pene susa nina sio umau wason onoo tau matao nea. Omi ruamo oatinui ianamana sani Ia mo, Anahatana rei. Oapamata sou sapan?”
Sio pusiso oapamata sou ata Yesus isana, reiso kahurae ohunui. Oyo sio umau ohuto Yesus, okanihoo nete matai usena na inoo mosa tewa, oyo ohitai oaumaniki. Oasau osiki ata, “Masi asima mai. Ia seia ihitaya?”
Sio mamsakaya ohita Yesus panesi oi.

Petrus waipan iasai pan usa asi, oyo ia pina makahaie isa tau sio imam no ia mainae ihokai mai tanui. Inoo ata Petrus wain iasa tinain haineke usa, oyo iarinii uai anoe ia-ia, samatoro iasei tanui ata, “Ano sahoro akata ia Nasaret rei oi rei tea! Ia Nasaret wain nanai Yesus rei tea!”
Iahata, “He. Au mo, uationa Ia rei tewa. Uanei tewa. Ano wan asau na sae rei?”
Oyo Petrus ieui pan mitanunue.
Ia pina makahaie rei inoo Petrus, oyo iasau osi sio pan rei ata, “Mansate, ia reini mo, ia isa arihon sio wason opusu Yesus rei.”
Iahata, “Au? Au mo, tewa!”
Oyo sira tau sio pan rei oasau osi Petrus ata, “Titue! Ano mo, ano isa arihon sio rei. Tea mo, ano on ria otoe Galilea tea!”
Oyo Petrus isopa ihete Anahatana. Iahata, “Uationa Ia rei tewa. Sani uakarota mka Anahatana iapasanaku!”
Mata hun tewa oyo, manue retunkeko honu. Retunkeko nai ua nea. Oyo Petrus anoi repeka na Yesus ne anamanae. “Mka-mka mono repan, manue retunkeko nai ua tewasi oi mo, ano auhaa nai tonu nea ata ationaku.”
Reiso Petrus iran anoi repunoko nai osa.

Listen to Markus 14