Bassar Ntcham - 2008 Edition (Drama NT)

BIBLE EN N'TCHAM (Bassar) © Alliance Biblique du Togo, 2013.

Míǹ boonee ní Yeesu dūtì Galiilee mɔɔgbandi lapu pu - bi gíti yíì dimɔɔlee yii Tiibeeriyaadi mɔɔl. - Kunipaau nín kántì u ŋáaǹ maamaacib bin ki cáaǹ bibunliibee puee ní bi nìn nóó-u. Ní u nì u-boonnooliibi jɔ́m̀ digbantandi diba pu ki kāl̀. Juuda yab jiŋaaliu un bi yíì Dilákatil jiŋaaliuee nìn tóobiń. Yeesu kpēēyee, kunipaau di dòoń u-ceeyee, ní u bí Fiiliipi yii: «La ní ti làá ká tijin kí dā kí tīī bin kɔkɔ bí nee ń jī dee?» - Ama Yeesu nìn nyí min ní u làá ŋée, u nìn pée lī míǹ kí kpèè yii Fiiliipi làá kíí-u yii ba ní. - Ní Fiiliipi kíí-u yii: «Báà ti yaa dū animbil jitɔmbi alaataa ali ki dá kpɔnɔb, an kaa làá bà bi-kɔkɔ kikatii kikatii gba.» Ní u-boonnooliibi kansikin ubɔ, Siimɔn Peetroo naal un bi yíì Andreeyee, bí-u yii: «Kinaacimpɔmbiki kiba bí doo ki cáań ɔɔji yim kpɔnɔb biŋmoo nì ijɔm ili. An kaa nín ŋūǹ kí ŋá kunipaau nee tiba ní.» Ní Yeesu bí-bi yii: «Yàntīmaan binib ń kàl̄!» Kumɔsɔŋu kubɔ nìn bí niin tikpil, ní bi kāl̀ ku-pu. Bi nìn bàn̄ kii kutukub biŋmoo nyɔkɔm. Ní Yeesu yōoǹ kpɔnɔbee ki jáam̀ Unimbɔti an pu ki wāatì ní ki dūu yākatì-bi, ní ki tí yākatì ijɔm mun, min báà ŋma lèe. Bi jíń ki díkée, ní u bí u-boonnooliibi yii: «Tòòmaan akati ŋin kíǹee, tiba ń taa bīil̀!» Bi kóoǹ kpɔnɔb biŋmooyee katiŋi ŋin bi nìn ŋmɔ́ ki kíǹee, ki gbéeǹ tikabiti saalaa nì tili. Yeesu ŋá maamaaci gbanti samaa kée, ní bi bí yii: «Tilafuŋman, kijapaai nee di sá Unimbɔti bɔnaatiliu un máaǹ kí dāan̄ duulinyanee.» Yeesu béè yii bi làá cúú-u mpɔn kí kàan̄ dibeelee, ní u fātìi tí nín jɔ́ḿ digbantandi pu u-baba.


Kujoou jóotèe ní Yeesu boonnooliibi nín sìntī dimɔɔlin ki kɔ́ buŋalimbu ki fātìi nín cá Kapeernayum watil. Kunyeeu mun nìn mɔ́ Yeesu kaa láá bāań bi-cee. Kubuŋkpaaŋŋu kubɔ kíĺ ki bíi jītí ki yòontí tinyiŋgban. Bi nín ŋàal̄ ki bàn̄ ataŋkpee aŋmoo kii aluu nyɔkɔmee, ní ki ká Yeesu nín tɔ́kɔń nnyim pu ki còomìń ki dòoń buŋalimbu ceeyee, ní bi fāŋkì. Ní Yeesu bí-bi yii: «Taa fàŋkìmaan, an sá man!» Niinee ní bi bí yii bí kpáaǹ-u, kpalaayee, buŋalimbu mun pūtì dūu sāā dimɔɔgbandi laakin bi cée.

Kutaa wúntèe, kunipaau gbíntìi kā dimɔɔgbandi lapu pu. Bi nìn ká yii buŋalimbaantiibu di yú niin, ní Yeesu kaa kɔ́ buŋalimbu gbanti, u-boonnooliibi ŋmaniŋma di kɔ́ ki búntì. Ama iŋaliŋfi iba nìn nyánní Tiibeeriyaadi tiŋkin ki bāań laakin ti-Dindaan nìn mēē ki pàkā Unimbɔti ki wāatì ní bi nín ŋmɔ́ kpɔnɔbee caŋin. Kunipaauee nín kaa ká Yeesu kaa ká u-boonnooliibi muee ní bi kɔ́ iŋaliŋfee ki búntì Kapeernayum kí nyàab̀ Yeesu.

Bi bàn̄ niin ki ká-uee, ní ki bí yii: «Ukpil, ŋyunti ŋulɔŋu ní a bāań doo ní?» Ní Yeesu bí-bi yii: «Ibaamɔn, ibaamɔn ní m tùkù-ni, ni nín ŋmɔ́ kpɔnɔb ki díkée pu ní ni nyàab̀-mi, kaa sá maamaacib bin dàkā-ni m nín sá uŋyee pu. Ní taa nín̄ tūǹ ditundi tijin tin kaa yúntée pu, nín̄ tūm̀maan tijin tin yúntí ki tìì dimaŋfal din kaa cáá dikúntilee pu. Tijin gbantee, man Kinibiki di làá tīī-ni tíǹ, di sá yii man ní m-Baa Unimbɔti tīī an pɔŋŋu daaŋku.» Niinee ní bi bālifì-u yii: «Ti máaǹ kí ŋá mana ní án nīn sá min Unimbɔti lèe ní?» Ní Yeesu kíí-bi yii: «Unimbɔti nín là miŋyee di sá ní fōō man un u túnnée kí kíí.» Ní bi bí-u yii: «Maamaaci ulɔu ní a làá dàkà-ti kí wàatī ní tí nín fōō-si kí kíí ní? Àá kudaaŋŋu kulɔkɔ ní a làá ŋá tí ká? Ti-naanjab nìn jīǹ tijin tin bi yíì maanee kuteeun, kii an nín ŋmàn̄ Unimbɔti gbɔŋku poon puee, yii: <U nìn tìì-bi tijin tin nyēeń yilpuee ní bi jīǹ.>» Niinee ní Yeesu kíí-bi yii: «Ibaamɔn, ibaamɔn ní m tùkù-ni, an kaa sá Mooyiisi di tīī-ni tijin tin nyēeń yilpuee, m-Baa di tìì tijimmɔntiil tin nyēeń yilpuee. Tijin tin Unimbɔti tììyee di sá un nyánní yilpu ki tìì binib kɔkɔ dimaŋfalee.» Ní bi bí-u yii: «Ukpil, nín̄ pée tìì-ti tijinee baabadal!»
Ní Yeesu bí-bi yii: «Man di sá tijin tin tìì dimaŋfalee. Un yaa dɔ́miń m-ceeyee, ŋkùm kaa ti cútí udaan jaanjaan, míǹ ní un yaa tí fōō-mi ki kííyee, nnyinnyoo kaa ti cútí udaan jaanjaan. Ama, m pée tùkū-ni: ni-nimbiliŋ ká tin m ŋée ní naa fōō-mi ki kíí. Bin bin m-Baa tīī-mee kɔkɔ làá dāan̄ m-cee. Un di yaa dɔ́miń m-ceeyee, maa làá fá udaan, kun puee m nyánní yilpu ki dɔ́miń kí ŋá un túnní-mee nín là puee ní, an kaa sá man m-ba nín là puee. Un túnní-mee nín là puee di sá ḿ taa fá bin u tīī-mee kansikin báà ubɔ kí dāá fìkitī bi-kɔkɔ ŋwinjoolkaa dal. M-Baa nín là min miŋyee sèé, yii un sá kamaa yaa ká man u-Jipɔɔn ki fōō-mi ki kííyee ń ká dimaŋfal din kaa cáá dikúntilee, ní man ń dāá fìkitī-u ŋwinjoolkaa dal.»
Yeesu nín lī yii úǹ di sá tijin tin nyánní yilpuee pu ní Juuda yab bíi gbùkum̄ u-pu ki lì yii: «An kaa sá Yeesu, Jooseefi jipɔɔn un timbi nyí u-baa nì u-neeee? Kin an ŋá mana ní u gíti lì yii úǹ di nyánní yilpu ní?» Ní Yeesu kíí-bi yii: «Ní taa nín̄ gbùkum̄ ni-ŋmaniŋma míǹ! Ubɔ kaa ŋūǹ kí dāan̄ m-cee an yaa kaa sá m-Baa un túnní-mee di cáań udaan, kí wàatī ní man ń nín fìkitī-u ŋwinjoolkaa dal. Kii Unimbɔti bɔnaatiliibi nín ŋmàn̄ puee yii: <Unimbɔti làá dàkà bi-kɔkɔ bí béé-u.> Mimmee, bin kɔkɔ yaa pílifì m-Baa ki fōō u nín dàkà puee dòoń man cee ní. Báà ubɔ kaa ká m-Baa Unimbɔti, asee man un nyánní u-ceeyee, man baba di ká-u. «Ibaamɔn, ibaamɔn ní m tùkù-ni, un yaa fōō-mi ki kííyee cáá dimaŋfal din kaa cáá dikúntilee. Man di sá tijin tin tìì dimaŋfalee. Nì min kɔkɔ ni-naanjab nìn ŋmɔ́ maana kuteeunee, boonee bi dāa kpíì. Ama tijin tin nyánní yilpuee, un yaa jíń tintee kaa ti kúù jaanjaan. Man di sá tijin tin nyánní yilpu ki cáá dimaŋfalee. Un yaa jíń tijin gbantee làá nīn bí kí nīn cá jaanjaan. Tijin tin m làá tīī binib kɔkɔ ń nīn cáá dimaŋfalee di sá m-wunti.»
Niinee ní Juuda yab bíi kpákà bi-ŋmaniŋma tikpil yii: «Nì mana ní u ŋūǹ kí tīī-ti u-wunti tí ŋmɔ́ míǹ?» Ní Yeesu fātìi bí-bi yii: «Ibaamɔn, ibaamɔn ní m tùkù-ni, ni yaa kaa ŋmɔ́ man Kinibiki wunti, kaa nyùn̄ m-fatikuu muee, naa làá ká dimaŋfal. Ama sii un yaa ŋmɔ́ m-wunti ki nyùn̄ m-fatikuuee ká dimaŋfal din kaa cáá dikúntilee, ní ḿ dāá fìkitī-si ŋwinjoolkaa dal. Kun puee m-wunti di sá tijimmɔntiil ní m-fatikuu mun sá tinyɔkaal tin sá timɔntiilee. Un yaa ŋmɔ́ m-wunti ki nyùn̄ m-fatikuuee bí m-ni ní ma mun bí udaan ni. M-Baa un túnní-mee nín cáá dimaŋfal puee ní u-puee ma mun cáá dimaŋfal. Míǹ ní un yaa fōō-mi ki jíńee mun kāntí dimaŋfal man pu. Tijin tin nyánní yilpuee nín bí puee dee. Tíǹ kaa bí kii tin ni-naanjab nìn jíń, boonee ki dāa kpíìyee. Sii un di yaa jíń tijin gbantee làá nīn kíǹ ki bí kí nīn cá jaanjaan.» Tin tin Yeesu nìn sòon̄ Kapeernayum kpafidiikun ki dàkā binibee dee.

Yeesu boonnooliibi tikpil nín gbìl̄ tibɔti gbantee, ní bi bíi lì yii: «Tibɔti nee pɔ̄ɔ̄ tikpil! Ŋma di ŋūǹ kí pīlifì-tì?» Yeesu béè yii u-boonnooliibi bíi gbùkum̄ tibɔti gbanti puee ní u bālifì-bi yii: «Tibɔti gbanti páb́-ni níii? Mimmee, ni yaa láa ká man Kinibiki fātìi jɔ́ḿ laakin m nìn pée bíńee fáà? Unil nì u-pɔ́ɔǹtam kɔkɔ sá fám ní, see Ŋfam di tìì dimaŋfal din kaa cáá dikúntilee. Míǹ ní m-bɔti tin m sòon̄ nì nee sá Unimbɔti Fam ní ki sá dimaŋfal. Ama ni-kansikin biba bí, kaa fōō ki kíí.» Kun di yì-tì Yeesu sòon̄ mimmee di sá u nìn pée nyí bin kaa fōō ki kííyee doooo ŋkilkaamin, nì un làá dāá dū-u kí tīī binannanliibee. Ní u lī-bi yii: «Míǹ pu ní m tùkū-ni yii ubɔ kaa ŋūǹ kí dāan̄ m-cee an yaa kaa tin sá m-Baa Unimbɔti di cáań-u.»
Ki yōoǹ an yuntiŋu ní Yeesu boonnooliibi tikpil yíì, kaa ti nóó-u. Niinee ní Yeesu bí u-kpambaliŋ saalaa nì alee yii: «Kin nimbi fáà, ni mun kaa làá nīn cáaa?» Ní Peetroo kíí-u yii: «Ti-Dindaan, sii di cáá tibɔti tin tìì dimaŋfal din kaa cáá dikúntilee. Ŋma cee ní ti làá gíti cù? Timbi fōō sii ní ki kíí, ní ki nyí yii sii di sá Circirdaan un nyánní Unimbɔti ceeyee.» Niinee ní Yeesu bí yii: «Man di kaa nìn lēē-ni binib saalaa nì bilaaa? Ama ni-kansikinee, ubɔ sá Sitaan ní!» Juudasi un sá Siimɔn Isikaariyɔti jipɔɔnee pu ní u nìn sòon̄ míǹ. Di sá yii nì min kɔkɔ Juudasi mun nìn sá u-kpambaliŋ saalaa nì alee kansikin dibee, úǹ di làá dū-u kí ŋúbíǹ binannanliibi.

Listen to Jean 6