ZEKARIAH 7
7
Ahok-he A-an Kehum Atum Aphan Hemphu Aningdokde
1Darias recho kecho phli aningkan sirkep achiklo mate Chislev achiklo lo, nikhap phli arni Hemphu alam Jekariah along vangthulo. 2Bethel asor Hemphu pen kangjinso kepahangjisi Sharezer lapen Regemmelek lapen halatum amonit atum aphan toilo. 3Lapen “Ne chiru-charnap pen pho achiklo aphrang-phrang aningkan Ne keklemver asonthak thak anhum nangjima” pu muluk a-Hemphu ahem kedo akurusar atum lapen montri atum aphan karjuji ninghang-lo. 4Ansi muluk a-Hemphu alam nelilong vang-lo; 5“Det kedo-an arat aphan kurusar atum aphan punon, nangtum an kehum ahut lapen pho achiklo lapen throksi achiklo kechiru-kecharnap ahut, pima ningkan throksi kep la Nephanle nangtum an kehum kalima? 6Lapen nangtum kecho kejun kalima? 7Jerusalem monit plengset ahut lapen rengdok-rengni pen rongsopi-heihei komchen kedo un ahut lapen Nitur anat lapen Thoi anta monit plengset ahut lahei alam aphrang amontri atum pen ajok Hemphu pachethang thelangma?”
Kekroithekthe Helo Ban Kedamnang Athe
8Lapen Hemphu alam Jekariah along vangthusi pulo, 9“Muluk a-Hemphu lasonsi pulo, ahok akangsai-heihei padonang, abangphutin akorte aphan kechinghon lapen kangjinso chepaklang nangji, 10hemepi, jangre, bang adet amonit lapen keduk atum aphan chenek-ri; lapen nangtum angbong baduta aning arlo akorte aphuthak abethursi kehingno klemri.” 11Bonta halatum karjuji aphan dengdedet-lo, lapen chingkinodaksi angthin chepathelo lapen karjulongle-detjisi ano chedendedet-lo. 12Muluk a-Hemphu amethang akarjong pen ajok ketoitang aphrang amontri atum pen nangkelo aron lapen alam-heihei karjulongledetjisi halatum aning arlong ason thak thak chepangtang-lo, la apotsi muluk a-Hemphu jasemet pensi aningthilo. 13Lapen Alangli halatum aphan kehang ahut halatum arjujedet asonthotsi halatum kehang ahut Alangli arjulongledetpo pusi muluk a-Hemphu pulo. 14“Lasi Ne halatum aphan tomon-mongvepi pen halatum chinine-pinlang adet-heihei angbong papratseiji. Lason halatum ke-otang adim ingsamrisi kehelat abang avedet-lo lapen la kemesen adet pangsamrilo.”
Currently Selected:
ZEKARIAH 7: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
