AKAM 11

Jerusalem Amondoli Mate Kekroi-asong Aphan Pitor Kechethandam Alam

1Jihudi kalidet atumta Arnam alam dengtang-lo pu alam ketoitang atum lapen Judia adet adang kedo kekroitang atum arjulong-lo. 2Pitor Jerusalem arongsopi kedam ahut, Jihudi kalidet atumta reng-rot ennangji pu kepu atum alangliphan sorsarsi pulo, 3“Nangli kopi apot si hala reng-rot ke-en-e, Jihudi kalidet ahem alohi do damlo, lapen halatum pen chorap rap-lo!” 4Lasi Pitor kecheng pen keplangtang alam an halatum aphan than pamesi pulo:

5“Neli Joppa arongsopi along Arnam kardom un ahut neli mek rengjengsi ning arjan thek-long-lo. Sining pen pe akethepi ano phli pen nangkepahir ason kopine ahormu nang kesun neli thek-long-lo, lapen la nelidung bikok-lo. 6Neli la lang pamesi thek-long-lo, labangso arlo pirthe athak kedo akeng hongphli api, nampi api, keklim api, lapen angsong kangjar avo hei hei dolo. 7Ansi neliphan kepu ase neli arjulong-lo, ‘Thurnon, Pitor, nang la pathira chonon!’ 8Bonta neli pulo, ‘Jonghe setta lapu kali, Hemphu! Chokertang, kalite kangthirthe ahormu ne ingho lut-lepinlang.’ 9Bonta sining pen ase neliphan puthot batai hini aphong pulo, ‘Arnam kepangthirtang ahormu ingthirthe puri.’ 10Lason batai kethom plang-lo. Aphisi ke la kadokave ahormu sining angsong chirungponthudet-lo. 11Halabangso ahut mamat bang kethom amonit neli kedo ahem along nanglelo. Halatum aphan Sijeria pensi neli long nangtoilo. 12Ansi nang dunmomepin pen halatum along dunnon pusi Karjong neliphan pulo. Joppa pen la bang throk atumta neli long Sijeria nangdunlo, lapen nelitum kadokave Kornelias ahem damlo. 13Alangli nelitum aphan thanlo: Sining apherangke inut alangli hem along arjapthersi alangliphan pulo, ‘Komane aphan Joppa arongsopi toira Pitor pu a-Simon aphan pavannon. 14Alangli nangliphan lam thanji, lapen labangso alam pen ajok nangli lapen nangli hem asor atum an jokpetji.’ 15Lapen neli lam kethan kepangcheng ahut, halatum aphuthak Karjong Kangthir hirlo, lapen lake kechengsi ahut nelitum aphuthak Karjong Kangthir nangkehir asonthot-lo. 16Ansi neli Hemphu kepu alam chematha damlo, atheke alangli pulo, ‘Jon ke lang pensi baptisom pilo, bonta nangtum aphan ke Karjong Kangthir pensi baptisom pipo.#Akam 1.5 17Lasi etum Hemphu Jisu Khristo aphan kekroicheng ahut Arnam ekepi adan asonthot adan hala Jihudi kalidet atum aphanta pitang-lo, lake klangdak-lo. Arnam aphan kekhangji, neli komatma!”

18Halatum labangso alam arjulongsi hala pen apar alangliphan sorsarse-det-lo, lapen Arnam aphan anong pathesi puhurlo: “Tangte Jihudi kalidet atumta aning chiruisi kejut-un-e achethe kelongji aphan Arnam halatum aphanta ahut keme pitang-lo!”

Antiok Amondoli Mate Kekroi-asong

19Stephan aphan kepathi ahut, kekroitang atum aphan kechenek pen ajok kekroitang penang atum ke pratseisi Phonisia adet, Saipras alanglompi lapen Antiok arongsopi anta damsi than-pachethang-lo; bonta Jihudi atum aphan apar ke halatum badu aphanta birta keme thanthedet-lo.#Akam 8.1-4 20Tebonta akaprek atum, atheke Saipras alanglom along lapen Sairen adet kedo kekroitang atum Antiok arongsopi damsi Jihudi kalidet atum aphanta thansi Hemphu Jisu alamjir a-Birta Keme thanlo. 21Hemphu halatum aphan rapdunlo lapen ake-ongpi amonit atum kroisi Hemphu anat chetevarlo.

22Jerusalem arongsopi amondoli mate kroi-asongta labangso abirta arjulong-lo. Lasi halatum Barnabas aphan Antiok arongsopi toilo. 23Alangli hadak nanglelo, lapen Arnam halatum aphan kepi akangjinso thek-longsi aning arong-lo; lapen ning aklong pen Hemphu aphan kekroi thirklong non pusi alangli halatum aphan choningrilo. 24Barnabas ke inut mesen, Karjong Kangthir pen keplengset lapen kekroi thirklong abang-lo, lapen ake-ongpi amonit atum Hemphu aphan kroilo.

25Ansi Sol aphan keridunjisi Barnabas Tarsas arongsopi damjuilo. 26Alangli Sol aphan longsi alangliphan Antiok vandet-lo, lapen alanglitum banghini ningkan kangthim hadak amondoli mate kroi-asong amonit atum pen chingrumbomsi ake-ongpi amonit atum aphan thanlo. Ladak Antiok helo kekroitang atum aphan Khristian pu kepu paphrangcheng adimlo.

27Halabangso ahut Jerusalem pen Arnam amontri penang atum Antiok vang-lo. 28Halatum angbong pen Agabas pu inut abang thursi Karjong ajakong pen ajok mo aphi keplangji alam paklangsi pulo, “Pirthe adang akhim thurji.”#Akam 21.10 (Anke Klodias recho ahut si labangso alam chekok-lo.) 29Ansi Judia adet kedo kekroitang atum aphan kerapjisi sangho atum abangphutinta un an dan kelojisi pathik-lo. 30Halatum lapusonsi klemlo, lapen labangso atangka Barnabas lapen Sol arideng pisi mondoli akesar atum aphan lolo.

Currently Selected:

AKAM 11: KARBIBSI

Highlight

Copy