Jenɨzɨzɨ 21
21
Seraa' Aazakɨmɨ mɨlyaa'.
(21:1-8)
1-8Evɨraamɨ kwarame 100 (waanɨ aadɨretɨ) wavɨlavakei kaimɨraayarɨ kyawakɨna' Gotɨyai sara wɨdake' Evɨraamɨ “Gannya yaya' Aazakɨ,” wɨda'. Aazakɨ sawɨta daryaai daryaai daryaai darɨ' kajɨnna' ganɨmaangai gamɨre kɨlaakevɨ pɨkarya ya'. Seraa' wɨda' “Gotɨyai nɨmɨnyɨna tewaanna yɨnɨkelyɨra. Nɨmɨjɨ nɨmɨre a'mwelyɨ sa'naai a'mwe ne'naai kaimɨraayarɨ maaroi. A'mwe a'mwera jɨka maregyɨpɨ'delyɨra,” wɨda'.
Seraa' Aazakɨmɨ aamunya mujaayɨ yakegaa' Evɨraamɨ munne naange' ya'.
Evɨraamɨ Ehaasɨ Yɨzɨmelɨjɨ sawaarɨ wɨdasaa'.
(21:9-21)
9-21Ehaavɨre kaimalei Yɨzɨmelɨ Aazakɨmɨ maanga dada mala tamɨna yadaa'nyɨ Seraa' wanganaka Evɨraamɨmɨ wɨda' “Ehaasɨ gamɨre kaimɨraayalyɨ sawaarɨ duthaaso! Gɨmɨ bala'gɨzɨ ‘Yɨzɨmelɨ nɨmɨre gɨlyɨvɨsa namaaradɨka!’ da'gɨzɨ duthaaso!” Mi'na kuda' Evɨraamɨmɨ gannya kaimɨraayaryaba kale wia'. Kale wiadaa'nyɨ Gotɨyai wɨdɨna “Ehaasɨ Yɨzɨmelɨjɨ sawaarɨna kale magyannera! Dɨvi sagaa' gɨmɨre kaimɨraaya Yɨzɨmelɨmɨre kwala naanga yɨrɨvadengɨ. Sa' Aazakɨ jɨwaalɨvaanga nebulyai naangelyɨra.” Yɨrɨka kavura' Evɨraamɨ Ehaavɨne wapaajɨ aalyasɨ wɨjaavaka wɨda' “Dahaa' dɨwila!” Kuda' kɨnaai yagalya'ma'na yagɨla kaanna kaanna yamaryagɨla kwaaka kayaa'na naanga Bɨyazivana yɨ'ma'na. Yɨ'ma'na kyagi dɨvidaasɨ aalɨtala kune' wa'dɨsɨ yɨta maalɨkikɨ yɨkaavɨlyavɨ Ehaa' Yɨzɨmelɨmɨ yagalya'mavaka pɨba mwaalɨna ya'. Mwaalakebadaa'nyɨ dɨna “ ‘Nɨmɨre kaimalei baladerɨ tɨnna nangamudɨka!’ dena yɨkaavɨlyavɨ mwaaidɨsɨ pɨba mwaaimwa.” Sara dɨna kya' Gotɨyare mamaayai ejelɨyai Ehaavɨ jaka wɨdɨna “Lɨka minnera! Yɨzɨmelɨ kɨnna dadaasɨ wɨ'nɨwa. Gamɨ mwaalajare kwala naanga yadengɨ.” Sagaa' Gotɨyai aalɨyɨmɨnyavɨ yɨbwarɨdaakwa'. Kyɨbwarɨdaakwa' Ehaa' aalya yɨrɨna yaka gawaalɨvɨ wirina ya'. Yɨzɨmelɨ a'mwei yɨma'naka Kwaaka Paraanɨ mwaala'. “A'mwe Yɨzɨpɨ mwaalya' maarana!” Ehaa' daka maaraka Yɨzɨmelɨmɨna wɨjaava'.
Evɨraamɨ Avimɨlekɨ “Nya'mweigɨ,” dɨnyei.
(21:22-34)
22-31Avimɨlekɨjɨ gannya a'mwe naangelyɨ saraai Evɨraamɨmyawɨnna bahɨla wɨdɨna “Gotɨyai gɨhaimwadelyɨra. Gɨmɨnyɨne ja'mweinyɨ yɨma'nɨgeinyɨra. ‘Yuyagaa' ja'mwei yɨma'nɨdeinyɨ,’ nebwina nyɨdana! Kwaasɨ nadɨthɨka!” Sara wɨdɨna kya' Evɨraamɨ wɨda' “Avimɨlekɨ, ja'mweinyɨ. Sara dɨwaanya' gɨmɨre gɨthaayadɨvɨsara nemɨre aalɨbunyavɨ kuka ma'mwaava.” Kuda' Avimɨlekɨ “Nɨmɨ mujɨweinyɨra,” yawɨraka wɨda' “Yagaala da' myawɨriwana.” Sara kuda' Evɨraamɨ jɨlɨkyaawarya Avimɨlekɨmɨne wɨmaarya'. Nabaai sipɨzipɨya dɨwɨnya dawaai dawaai dawaai da' gavinya pɨba wɨmwaaihɨna ya'. Wɨmwaaihɨna kya' Avimɨlekɨ wɨda' “Sa gavinya pɨba be'na wɨmwaihɨwaana?” Mi'na kuda' Evɨraamɨ wɨdɨna “Sipɨzipɨya sa dɨmaa'dengɨna a'mwe pwara yawɨpɨ'de' ‘Evɨraamɨ aalɨhavi’ nɨnnya’ lɨkɨnɨkesɨra,’ ” wɨda'. Savɨdaasɨ kwaakavɨne yaya' Bɨyaziva wɨdɨna ya' Evɨraamɨ.
32-34Evɨraamɨ mi'na kya' Avimɨlekɨjɨ gamɨre a'mwe naangelyɨ saraai kɨrɨnnya Kwaaka Pɨlɨzɨtɨyana wɨna. Kaanna wɨna kyagi Evɨraamɨ “Gotɨyai gazagaasagaa' mwaaladelyɨra,” daka Bɨyaziva yɨta dɨragɨnya burɨnna yaka Gotɨyarɨna yɨleyagaala wɨda'.
Currently Selected:
Jenɨzɨzɨ 21: byr
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.