Jenɨzɨzɨ 19
19
Sothomɨ Gamora kayaaka yɨgalakyaa'.
(19:1-29)
1-3Sawɨsaburɨ Sothomɨ angeburɨnna ejelɨyaraai walaabahi. A'mwe Lotɨ tɨkuryaba mwaaidɨ'nyɨ ejelɨyaraai kulaabahi Lotɨ wɨda' “Ata bwa'naana! Nɨmɨre angevɨna kaanya wawaajɨ anga savɨ wa'mwaraana!” Kuda' ejelɨyaraai wɨdahi “Aala, mwasaba se wa'mwaraka!” Sara wɨdɨna kyagi Lotɨ “Nɨmɨre angevɨ waraana! ‘Aala,’ be'na dɨwaala? Nɨmɨre angevɨ wa'mwaraana?” Sa' kuda' gamɨjɨ wɨlɨna yeva wapaaya nyɨna ye'.
4-11Ejelɨyaraai “Naarɨmɨ se wa'mwaraka!” dahɨla yamaze yɨna'na yadakɨlyɨ Sothomɨ mwaalyara kaanna bɨna yeva Lotɨmɨ jaka wɨdɨna “A'mweraai gawɨ mwaaihɨla? Dɨmakwalyaama! Nemɨ saraarɨ ata lɨmwanna yaana!” Sara kude' Lotɨ walyuna yaka kaanya tihɨ'na ya'. Tihɨraka kumɨnyɨ wɨda' “Sarɨmɨ kayaa'na mipɨnera! Nɨmɨre taayawaai saaigɨ'nyawaai mwaaihɨlyawaarɨ dɨmaarila! A'mweraarɨna myawɨpɨnera!” Mi'na kuda' Sothomɨ mwaalyara wɨde' “Gɨmɨ maaveigɨnyɨra. Nemɨnyɨna gɨmɨ dɨnemaremwaaideigɨ daaka! Gɨmɨnyɨna naangeva'na kayaa'na yaana! Baa'na nedɨwaana!” Sara kude' ejelɨyaraai Lotɨmɨ angevɨdaa'nyɨ mwagi'namaata yagɨla kaanya tihɨ'na yagi. Tihɨ'na yagɨla Sothomɨ mwaalyaraavɨ tɨnna galapɨnyɨwanna kyagi Sothomɨ mwaalyara tɨnna mwanganyeva “Kaanya' gavanaka?” deva deva tɨnna wanganyɨ'maa'na ye'.
12-14Ejelɨyaraai Lotɨmɨ wɨdahi “Gotɨyai ‘A'mwe anga davanyara kayaa'na yadɨvɨsara daaka?’ daka yawɨra'. Anga davɨdaa'nyɨ kɨnɨdakaavihi dɨwila! Naarɨmɨ wo'daaina yakadera.” Mi'na kudahi Lotɨ a'mweraai gamɨre taayawaarɨ maarya'neraarɨ kaanna wɨna yaka yagaala wɨda' “Nemɨ yarai lɨkaanya wawaana! Anga dava kayaaka yadevera.” Sara kuda' sa' a'mweraai kadɨka mu'nyɨ yagɨla saba mwaalagi.
15-22Yɨrɨke' gaai pu'daasɨyagaa' dɨkaa'na, ejelɨyaraai Lotɨmɨ yagaala naanga wɨdɨna “Dahaasagaa' nemɨ yarai kaanyaana!” Wɨdɨna kyagi Lotɨ kave mwaalɨna kya' saraai Lotɨmɨjɨ gannya a'mwevɨjɨ kɨrɨnnya taayawaarɨjɨ “Yarai kaanyaana!” wɨdahɨla magapɨrina yagɨla angebadaa'nyɨ kaanna makuna yagi. Ejelɨyaraai wɨdɨna “Yarai, yarai, ayahi tɨgɨnyɨma'nya mipɨnera! Mugunyavɨna lɨkaanya jɨlaawila! Nabaibɨthɨka!” Sara wɨdɨna kyagi Lotɨ wɨda' “Mugunyavɨna kaanya yɨlaawia'na lɨka yɨwana. Angebanna yaya' Sawa nɨmɨ wɨlaawɨjɨwana?” Kuda' ejelɨyaraai wɨdahi “Yo, yarai.”
23-29Yarai kaanna wɨna yaka Lotɨ nyɨlyai gaai bilapijɨ'daa'nyɨyagaa' anga Sawa wɨlɨna ya'. Wɨlɨna kya' Gotɨyai dɨkesɨ sɨla dɨ'nakesɨ sangɨ burɨke sɨrɨmya'bɨsa' Sothomɨ angebanna Gamora angebanna wasɨ'na kya' angeba kayaaka yɨna ya'. Wasɨ'na kya' Lotɨmɨre balaanga' tɨgɨnyɨma'nya kya' a'mwevɨ galyewaa'mwanna kya' a'mwe' saala yɨma'nyɨna ya'. Mwanyagaa' Evɨraamɨ Sothomɨ Gamora angeba dara wanganake' “Ai, yunebanna jɨsa' jimwa'!”
Lotɨmɨre Taayawaai Mawaavɨrɨjɨ Amonɨmɨjɨ mɨlyei.
(19:30-38)
30-38Dɨvi sagaa' Lotɨ Sawa angeba mwaalya'nei lɨka yadaa'nyɨ gamɨjɨ gamɨre taayawaalyɨ mugunyangɨna kaanna waweva simaangeyawɨ mwaalɨna. Mwaaidapɨjɨ a'mwe sɨraange' gya'mwevɨ wɨda' “A'mweraai nehɨmaarikade'naai mamwaalyɨgoi. Nehɨrɨnɨmaangerɨ aalya waainɨya' wɨjaavakadera. Mi'na wɨjaavakwoihɨri kaimɨraaya mɨlakade'naarɨne' sɨnnawɨ nɨmɨjɨ gamɨjɨ se waraka! Dɨvi gɨmɨjɨ se darila!” Sawɨsavɨ sɨraange' sara kya' sa' myawɨrya' Lotɨ. Sawɨta pɨri ganyaabulaangesɨ waragɨla sagaa' sɨmunya myawɨrya'. Kɨnadaai sara yɨ sɨraange' kaimɨraaya Mawaavɨrɨ mɨla'. Yɨ ganyaabulaange' kaimɨraaya Amonɨmɨ mɨla'. Savɨdaa'nyɨ Mawaavɨrava Amonɨmɨvava yɨma'nyɨna ye'.
Currently Selected:
Jenɨzɨzɨ 19: byr
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.