Mataio' 9

Ve Gebili Ma Izesu' Do Lamine' O-dine' Gamazi

(Maleko' 2:1-12; Luka' 5:17-26)

1Ne'mine likevo Izesu' aza sipiu' dizo izipahala zuhosi noso ohunolo' tine' mili ledi vi eze numuno ebe've Kahanaumila vani'. 2A'mida nene ve malite ve ma amuzolo hele gese' ogavo minive gebili ma ngakaku' ongo neivo zalo' mili di neida ani'. Ido' vekise ingine gebili ma ha do lamine' o-deleseive li gili ele'vole' ani' nene Izesu' aza mo ningo gelo a'mine gebili mamu' ti' lo line': Gipe'neho, gei' lihimeka nene mo apase-gedekuve. Nemu' nene luka gaka ngi lo minivo. 3Ne'mine lavo Zuda vete laa' ani' mono' apizi ngimaa' ave malite lu'ningu' ti' li gili minani': Ve mene ve'mo gamazi noline' ne'mo nene O'moso ivile' o-daa' gamazi nolive. 4Ne'mine li nigilavo Izesu' aza lu'ningu' gilani' gamazi nene ningo gelo ti' lo lo-ngimine': Lingine lutingu' gatine goloso nanimu' nigilave. 5Lingine nenikumu' nene sozavo' laa' neive li gilaa' nahe. Naza ve gebili nemu' lihimeka mo hulo-gedekuve luvoni' nene soza lolohe lamine' lolohe ma gilamilisave lo lapa nomivo noluvoni'za sozalo' ve minuvodini ve gebili mamu' nene oto vozo nolo-duvo oto vamivo soza luvoni' nene soto' ogavo novozo helalove lo gelo ve gebili mamu' oto vozo loo ma lamuvodine. 6Ido' naza O'mosolati' ve gihile misubouko lengi' lihimetine apase-lengedaa' amuzo do nouve luvoni' nene soza lamo lamineto' noluvoni' nene ningi gililizave lo idise ogo molo oloni' nene lingine gililo lo ve gebilimu' ti' lo line': Gaza oto ngakaka do geho numungala vozo. 7Lavo ve gebili aza oto numu'vela vine'. 8Evene' muki' ingine nene ningi ngehelele izavo leli' gidini ve ne'mine amuzo imingumu' ve li O'moso opo'ni lani'.

Izesu' Mataio'ni Vise Lo-dine' Gamazi

(Maleko' 2:13-17; Luka' 5:27-32)

9Izesu' aza a'mine minine' numunguti' lemo akala novo ve ma gulive Mataio' nene takisi moni daa' ine' numu'veu' gono do neivo ningo ti' lo lo-imine': Gaza oto ne'meto ano. Ne'mine lavo aza oto e'meto vine'.

10Ido' Mataio' numu'veu' Izesulesi noso' nite' ni nizavo takisi moni daa' avesi ido' Zuda veti lou' gamazilo' e'mete lamine' isa'mave gohi ma nesi muki' numungu' dizi ikevo izipahala zuhosi makato' noso' nite' nii minani'. 11Ni nizavo Halisaio' mono' laa' ave ingine ningi izipahala zuho longo' i-ngidi ti' li lani': Lingine tisatine nene takisi moni daa' ave golososi ido' lihime daa' ave lingesi noso' nite' makato' nene nanimu' ninave. 12Li lani' nene Izesu' gelo ti' lo lo-ngimine': Luso ve aza lamine' haza minave do lamine' o-ngedelesa osa'miha inite' gizi davemukovo' nene oga' neive. 13Naza a'mine'mine ogo evene' lisihe' i minavemu' amuvoni'za evene' lihime'inesi vemu' uvoni' ve. Nemu' lingine vi O'moso'mo line' gamazi ma mono' godolou' ti' lo minine' ma'mi monovomu' vise' igi gililo:

Inite' neni' nimi oloku' gizaa' nene lamine' neiha

Neni' giluvoni' nene

evenekumu' mulumo'ine gili nasahili' o-ngedaa' ne'mo ivile' o neive.

Noso' Nite' Malise Oga' Nemu' Longo' I-dani' Gamazi

(Maleko' 2:18-22; Luka' 5:33-39)

14Neloti' nene mono' noso holo-ngedaa' ive Zohane' izipahala zuholite Izesuda igi ti' li longo' i-dani': Lazasi ido' Halisaio' mono' laa' avesi monokumu' ve lo noso' nite' nene malise oka' oka' ogo minaa' noune'za geze izipaha zuho nene malise isa'mako nanimu' nave. 15Ne'mine li likevo Izesu' ti' lo lo-ngimine': Ve mali'mo vene' di imiliza gameneu' olize izo noso' nite' gize vata' ogo eze zuho molo-ngedavo ingine aza a'mingu' ha neivo mulumo gili-di noso' nite' malise ilizado' nehe. Ne nomive. A'mine'mine igi naza nouvosa nene lamine' gili nizanako noso' nite' malise amilisaha engi' vovo'ninguti' biluvalite neze nele'mizi di vilizani' gamene nene mo aliteleseive. A'mine gamene alitavo mulumo gili-nidisa noso' nite' malise ilisave.

16Ido' lavolavo gosohototi' ngomo ma huki saketi litehe hukido' mili ongotilizani' nene ngingili lo gelelehe' ogavo ne'mo naba hukaa' neinako nemu' lavolavo olihe ngingili lamine' neti' ngomo ma huki saketi litehelo' mili ongotisa'mave. 17Ido' a'mine'mine igi lingine vaini noso gosoho' ne'mo meme' ize losuvodunu' lili' ani' gomise nene izo pou' loo vaini noso lepo vo gomise'vesi nene goloso ogalive li vaini noso gosoho' gituho' galakala' neidi'mo nene lulu izavo gomise liteheli'mo ngipu lo hukiline' o miningu' nene ma ohizi milisa'mave. Vaini noso gosoho' gituho' galakala' neivo nene meme' ize losuvo gosohotunu' lili' ani' gomise gosohoku' nene ohizaa' nave. Ne'mine ikevo gomisesi vaini nososi nene lamine' ha minaa' nasive. Ne'mine line' nene aza mono' lo-ngemaa' ine' nene gosoho' nenako izipahala zuho igi mili ilizani' monovo ne'mo a'mine Zuda veti monovo litehe malo' vo damingumu' nene line'.

Gizebo Ve'mi Aluvo Hilinguti' Izesu' Do Ote-dingumukisi Vene' Ma Izesu' Oko'nolo' Initeto' Do Gelo Lamine' Inekumukisi Mataio' Gizine' Gamazi

(Maleko' 5:21-43; Luka' 8:40-56)

18Izesu' nene gamazi lo-ngemo neivo mono' gizebo ve mali'mo eze neida ogo gubi' noize emo ti' lo line': Alune ma nene idise a'mene nohiline'zo gaza ogo anga oko'nolo' hitanivo gohi vele gizo otelive losa noluve. 19Lavo Izesu' aza oto mono' gizebo ve nene e'meto izipahala zuhosi vani'. 20-21Nivavo vene' ma venelite ike'nilo' ike'nilo' ningaa' ani' siki nene mate-desa'mivo mino gamene ha'nalo' ninge do vo mino kilisimasi tuvelu (12) minine' vene' ne'mo naza oko'nolo' damo ha Izesu' genegana'velokovo' do gelelodi'mo nene lamine' olosuve lo gelo Izesu' mehenelati' ogo genegana've gahevela do giline'za 22Izesu' aza mine velepe' izo a'mine vene' nene vonu' belo ti' lo lo-imine': Aluneve, gele ele'vole' anidi'mo nene lamine' ogange. Gaka muki' gelaa' aine' ma nene gohi gelamozo. Ne'mine lo-davo lite' lo a'mido' lamine' giline'. 23Ti' ogavo Izesu' aza vo mono' gizebo ve ma'mi numu'veu' dizo ningine' nene alungo mulumo gili polope' mili evene' muki' ive nama igi nizavo ningo ti' lo line': 24Alungo nene ma helamine'. Haza okise ongo neize. Heta igi vilo lo lo-ngedavo gize' i-dani'. 25Ti' igi evene' muki' ingine heta vi osu' likevo Izesu' aza numungu' dizo vo alungo ne'mi analo' nodavo otine'. 26Ne'mine ogavo guvele nene hutile' ogo mone osu' line'.

Evene' Sita' Ma Ve'ine Goloso O Vine' Izesu' Do Lamine' O-ngidine' Gamazi

27Ido' Izesu' aza numuno nene hulo novivo ve'ine likive sita' ma e'meti nivi asi naba li ti' li lasine': Guvelesi ve naba Davidi' a'vo ezelo' medelo minanive make, gaza mulumote ningevo. 28Likesivo Izesu' aza numungu' dizo neivo ve sita' ingine dizi minida minikesivo Izesu' ti' lo longo' o-ngidine': Lingine gilasine' inite' nene neni' ha oloseive li mo gili ele'vole' i nizasihe. Ne'mine lo longo' o-ngedavo ti' li li-imasine': Guvekasi ve, laza mo gele ele'vole' o nosive li li-imasine'. 29Li-imikesivo ve'nido' nodo gelo ti' lo line': Lingine gili ele'vole' asine' ne'mino lengita gihile soto' ivo. 30Ne'mine lo nolivo ve'ine nene lamine' ogavo ve'ine niningasivo amuzonga lo-ngedo ti' lo line': Lingine inite' o-lingiduvoni' memu' evene' hamokisi gilikelizaze. Li-ngimamilizo. 31Line'za ingine vi Izesu' guvele nene li hutile' ikesivo guvele nene buu lo a'mine ebe' nabau' nene mone piline'.

Izesu' Sikalahu' Golosoli'mo Ve Ma Lulo Hize Tilavo Gamazi Lamilido' O Minive Nene Do Lamine' O-dine' Gamazi

32Ido' neloti' Izesu've ezesi monave nesi limi heta navo evene' malite ve ma sikalahu' goloso lulou' minidi'mo gamazi lamilido' o vive ma nene ele'mizi Izesuda ani'. 33Ele'mizi ikevo Izesu' aza sikalahu' goloso evene' lulouti' imisele hulavo a'mine ve nene gamazi api' ogo line'. Lavo evene' muki' ingine ningi vo'ine goloso vavo ti' li lani': Isilaele' misubou' mene ne'mine ma soto' ivo ningamune' ve. 34Ne'mine li lani'za Halisaio' mono' laa' ave nete ti' li lani': Sikalahu' goloso ngimiselo do nohuline' amuzo nene sikalahu' golosoliti guve'inesi velati' dosa nene nongimiselive lani'.

Izesu' Aza Evene' Mulumo'ine Ningine' Gamazi

35Ido' Izesu' aza numuno ebe' naba' naba ido' ngomo ngomo mukiku' nene mone mone ogo evene' mono' numungu' mono' apize ngeme ngeme' ogo ido' O'moso'mi gizebomu' gamazi lamine' nene lo-ngeme ngeme' ogo ido' inite' ato ato' gizi davesi gilizevo alevesi nene do lamine' o-ngidine'. 36Ido' evene' muki' goloso ezela ani' nene ningo ingine sipisipi izelo' gizebo ve'ine ma nomivo minani' ma'mine igi muhele' ahele' igi gopo minani' nenako nemu' nene mulumo'ine ningo muluno hukine'. 37Ne'mine ogavo izipahala zuho aneza gamazi ma evenekumu' lo molo ne'mine lo lo-ngimine': Evene' mene gopo ikelizaze. Mingu' nene noso' nite' muki' goloso o molani'za a'mingu' gono dalonive nene ngomosi' minekunge. 38Nemu' nene lingine mine melehida likevo gonolo' ve ma ngimiselavo vi minamuno dolizilizave line'.

Currently Selected:

Mataio' 9: aso

Highlight

Copy