Ba-Roma 7

Cikozyano camwanakazi uufwidwa mulumaakwe

1Alimwi sa tamuzi, bakwesu (ikuti ndaambila basikuziba Mulao) kuti Mulao uli abwami kumuntu kuciindi ncacipona, 2Nkaambo mwana kazi uukwetwe ulaangidwe ku-Mulao amulumaakwe nacipona, pele mulumi afwa, walubuka kumulumaakwe. 3Nkaambo kaako kuti waba amulumi umbi ciindi ncacipona mulumaakwe, elyo ulaambwa kuti ngusibumambi, pele mulumaakwe afwa, elyo walubuka ku-Mulao, nkabela tali sibumambi pe, nikuba kuti waba amulumi umbi. 4#Kol 2:14Mbubonya obo, nubakwesu, anywebo mwakafwida Mulao kumubili wa-Kristo, kuti mukabede umbi, nkukuti oyo iwakabusigwa kuzwa kubafu, kuti tukazyalile Leza micelo, 5#Rom 6:21Nkaambo kakuti nitwakacili anyama zisusi zyazibi zyaku-Mulao zyakali kubeleka muzizo zyesu akuzyazya micelo yalufu. 6#Rom 8:1,2; 6:2,4Pele sunu tulilubukide ku-Mulao, nkaambo tulifwidide eco ncitwakajatilwa, kuti tube abuzike bupya, nkutaamba bukulukulu bwamalembe pele bwamoyo.

Mulao ncintu cibotu

7 # Kul 20:14,17; Dt 5:18,21 Lino twaambe buti? Sa Mulao nzezibi? Ne! nikwatali Mulao, nindataakuzi zibi. Ikuti Mulao niwatakaamba kuti, Utabi sibbivwe nindataakuzi ibbivwe. 8#Rom 5:13Lino zibi nizyakaba aciindi ceelede, zyakabelesya oyo mulazyo akucita mulindime mabbivwe oonse. Ikuti na taakwe Mulao, zibi zilifwide. 9Mebo ciindi cimwi cakutaba a-Mulao ndakali muumi, pele mulazyo niwakasika, zibi zyakapononona elyo mebo ndakafwa, 10#Jak 1:15; Lev 18:5Mbuboobo mulazyo wakuleta buumi ndakaujana nguwenya kuti ngwalufu. 11#Matl 3:13Nkaambo zibi nizyakajana ciindi ceelede, zyakabelesya mulazyo kuti zindeene, nkabela nguwenya nguzyakandijazya. 12#1 Tim 1:8Ncobeni Mulao ulasalala, awalo mulazyo ulasalala, uliluleme akubota. 13#Rom 5:20Lino sa cintu cibotu ncicakandibeda lufu? Ne! nzizibi, nkaambo zibi nzizyakabelesya cintu cibotu cakundetela lufu, kuti zibi ziboneke mbuzibede, nkukuti zibi zibije loko nkaambo kamulazyo.

Bubotu abubi mbuzilwana mumoyo wamuntu

14 # Int 51:5; Joh 3:6 Nkaambo tulizi kuti Mulao nguwamuuya, pele mebo ndi wanyama buyo, ndi muzike wazibi. 15#Gal 5:17Eco ncincita nsicizi, nkaambo eco ncinjanda kucita teensi ncico ncincita pe, eco ncinsula ncencita. 16Lino kuti cintu ncintayandi ncencita, nkukuti ndazuminina Mulao kuti mubotu. 17Lino teensi ndime uucicicita pe, nzizibi zindikalilide mukati. 18#Matl 6:5; 8:21Nkaambo ndizi kuti mulindime (nkukuti munyama yangu) tamukali cintu niciba cimwi cibotu. Ikuti kuzumina kwalo nkukuli, pele kucita cintu cibotu nsikujene pe, 19Nkaambo cibotu ncinjanda nsiciciti pe, pele cibi ncintayandi ncico ncincita. 20Lino kuti cintu ncintayandi ncencita, nkukuti teensi ndime uucicicita pe, nzizibi zindikalilide mukati. 21Lino mbuboobo mbunjana ku-Mulao, ciindi ncinjanda kucita kabotu, nceciindi nciconya ncetuli aco cibi. 22Nkaambo ndakondelwa Mulao wa-Leza mukati kamoyo wangu, 23#Gal 5:17; Jak 4:1; 1 Pet 2:11pele ndabona mulao umbi muzizo zyangu, uulwisya mulao wamoyo wangu, nkabela ndaba mwaange wamulao wazibi uuli muzizo zyangu.

Kristo nguutuvuna kunkondo eyi

24Maawe! ndi muntu uusampaukide ncobeni! Ino nguni uukonzya kundivuna kumubili oyu walufu? 25#1 Kor 15:57Ngu-Leza, Ndamulumba kuli-Jesu Kristo Mwami wesu! Mbuboobo kumoyo wangu ndabelekela Mulao wa-Leza, pele kunyama ndabelekela mulao wazibi.

Currently Selected:

Ba-Roma 7: Ibbaib63

Highlight

Copy