Intembauzyo 22
22
Kumupati wabasikwiimba. Iimbwe mbuli Insya yabucedo. Intembauzyo ya-Davida
1 #
Mt 27:46; Mk 15:34; Heb 5:7 Leza wangu, Leza wangu, wandisiilanzi?
Utantamukilanzi kukundifutula, kumajwi aakulila kwangu,
2Leza wangu, ndakukwiilila isikati, pele tondivwiili,
Amasiku ndabula kulyokezya.
3 #
Is 6:3; Ciy 4:8 Pele nduwe Uusalala,
Nduwe uukona intembauzyo yaba-Israyeli.
4Bamatateesu bakali kukusyoma,
Kabasyoma, lino wakali kubavuna.
5Kabakukwiilila, lino bakali kwaangununwa,
Kabasyoma, elyo kabatausigwi insoni.
6 #
Is 53:3
Pele mebo ndi ciyokansi buyo, nsili muntu pe.
Ndisampaukide kubantu, akucapwa kucisi.
7 #
Mt 27:39; 9:24; Mk 15:20,29; Lk 23:35; 16:14 Boonse bandibona balandiweela.
Balandisyundumikila milomo, balandigunina-gunina amitwe yabo,
Balati,
8 #
Mt 27:43
Alisisye kuli-Jehova, amufutule;
Amuvune, aakuli umubotelwa,
9Pele nduwe wakandigwisya mwida lyabama,
Nduwe wakandisyomya nindakacili kunkolo,
10Ndakasiigwa munaanza aako kuzwa kukuzyalwa kwangu,
Nduwe Leza wangu kuzwa mwida lyabama.
11Utanditantamukili, nkaambo mapenzi ali afwiifwi,
Nkabela taakwe umbi sikundigwasya.
12Bapoho banji bandeengelela,
Bapoho baku-Basani bandizyunguluka.
13 #
Int 35:21; 1 Pet 5:8 Balaaseme kumilomo yabo,
Mbuli mulavu uukwamauna akuvuluma.
14Ndaba mbubonya mbuli maanzi aatilwa,
Zifuwa zyangu zyoonse zyapwayika.
Moyo wangu waba mbuli bunzuka,
Weenzunuka mukati kacamba cangu.
15 #
Tus 17:22
Inguzu zyangu zyayuminina mbuli lukaye,
Alulimi lwangu lwanamatila kucilakwila.
Wandooneka mulusuko lwalufu.
16 #
Zek 12:10; Lk 23:33; Joh 20:27 Nkaambo babwa bandeengelela,
Inkamu yabasizibi yandizyunguluka,
Bandiyasa kumaanza akumaulu.
17Ndakonzya kubala zifuwa zyangu zyoonse,
Lino balo balandeebela, balandidunamina.
18 #
Mt 27:35; Mk 15:24; Lk 23:34; Joh 19:24 Balaabilana zyakusama zyangu,
Acibaki cangu balaciwaalila cisolo.
19O Jehova, utanditantamukili,
o inguzu zyangu, fwambaana kundigwasya.
20Undivune kupanga,
Abuumi bwangu kubabwa.
21 #
2 Tim 4:17
Undifutule kumulomo wamulavu,
Amoyo wangu uupengede kumeja aabanyati,
22 #
Heb 2:12; Joh 20:17 Lino njoolwiida bakwesu makani aazina lyako,
Njookutembaula akati kambungano.
23Inywe nomuyoowa Jehova, amumutembaule;
Nolunyungu lwa-Jakobo, amumulemeke;
Lunyungu loonse lwa-Israyeli lumulemye.
24Nkaambo tasampauli na kusesemwa mapenzi aauupengede,
Tasisi busyu bwakwe kulinguwe pe,
Waswiilila kulila kwakwe.
25Kulinduwe nkocizwa cilumbyo cangu;
Ndalondola zikonkezyo zyangu kubusyu bwabasikumulemeka.
26Bapengede bayoolya akukuta,
Abaabo bayandaula Jehova bayoomutembaula.
Myoyo yanu ibe abuumi lyoonse!
27 #
Int 2:8
Magolelo oonse aanyika ayooyeeya, ayoosandulukila kuli-Jehova;
Inzubo zyoonse zyabamasi ziyoomukotamina.
28 #
Int 47:7-9; Zek 14:9; Mt 6:13 Nkaambo bwami mbobwa-Jehova,
Ngonguwe uuendelezya masi.
29 #
Is 26:19
Boonse baneneede banyika bayoomukotamina,
Abalo bali mubulongo bayoomuvundamina,
Ayooyo uukacilwa kuvuna buumi bwakwe,
30Bana bayoomumanina milimo,
Azyalani liciza liyoolwiidwa impuwo ya-Mwami,
31Bantu batanazyalwa bayooambilwa makani aabululami bwakwe, Bayoomvwa kuti mbuboobo mbwaakacita.
Currently Selected:
Intembauzyo 22: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
