Myeelwe 18
18
Amwi makani aaba-Levi aabapaizi: milimo yabo azipego zyabo
1 #
My 17:13
Lino Jehova wakaambila Aroni kuti, Webo abana bako aluzubo loonse lwauso, mularola mukuli wamilandu yacikombelo; alimwi webo abana bako mulatola milandu yabupaizi bwanu. 2#Matl 29:34; My 3:6-10Abalo bana bakwanu, musyobo wa-Levi, musyobo wauso, ubaletele, kuti baswanizigwe ayebo, bakugwasye milimo, webo abana bako nimuli kunembo lyatente lyacizuminano. 3#My 3:25,31; 16:40; 4:15Babambe milimo yako amilimo yoonse yatente, pele tabeelede kuswena kufwaafwi kuzibelesyo zisalala nanka kucipaililo, kuti batafwi, balo anywebo nyoonse. 4Baswanizigwe ayebo, babambe milimo yatente lyambunganino, milimo yoonse yatente; pele kutabi muntu umbi uumuswenenena. 5#Kul 27:21; 30:7; Lev 24:3; 1 Mak 9:19-33Amubambe milimo yacikombelo amilimo yacipaililo, kuti bana ba-Israyeli batabukilwi limbi bukali. 6#My 3:12,45Amubone! Ndagwisya bana bakwanu ba-Levi akati kabana ba-Israyeli, babe cipo canu; mwabapegwa kuli-Jehova kuti bacite milimo yatente lyambunganino. 7#Heb 9:3,6; 1 Sam 6:19Lino yebo abana bako mulacita milimo yabupaizi mumakani oonse aacipaililo amakani aazintu zyoonse zili mukati kacisitilizyo. Bupaizi bwanu ncencico ncimwapegwa kulindime; kufumbwa muntu umbi uuswena kufwaafwi uleelede kufwa.
8 #
Lev 6:16,18; 7:6,32; Dt 6:11; Kul 40:13,15 Lino Jehova wakaambila Aroni kuti, Bona! Ndakupa kufumbwa cisyaala cazipaizyo nzindatentelwa, zintu zyoonse zisalala zyabana ba-Israyeli, zibe caabilo cako acabana bako. Ngumulao walyoonse. 9#Lev 2:2,3; 4:22,27Nceeci ncimwapegwa akati kazintu zisalalisya zisyaala kukutentwa: zipaizyo zyabo zyoonse, zipaizyo zyabo zyabusu, zipaizyo zyabo zyazibi, azipaizyo zyabo zyamilandu, zyoonse buyo nzibandiletela zilasalalisya kulinduwe akubana bake. 10Munoozilya mubusena busalalisya; baalumi boonse bayoocilya; ciyoosalala kulindinywe. 11#Kul 29:27,28; Lev 7:30,34; 10:14; Dt 18:3; Lev 22:2Aceeci acalo ncicako: zipo nzebaleta, zipaizyo zyakuyumba zyabana ba-Israyeli. Ndazipa nduwe abana bako balombe abasimbi. Ngumulao walyoonse. Kufumbwa uusalala muŋanda yako unoolya. 12#Kul 23:19; Dt 18:4Zintu zyoonse zinono zyamafuta azilwela zyamasaansa azyamaila, kabalwebalwe nkebaletela Jehova, zyoonse ndazipa kulinduwe. 13Micelo yoonse, iitaanguna kubizwa munyika yabo nzebaletela Jehova zilaba zyako; kufumbwa uusalala muŋanda yako unoolya. 14#Lev 27:28Zintu zyoonse zyaba-Israyeli zipegwa limwi kuli-Jehova zilaba zyako. 15#Kul 13:2; 34:20; Lev 27:20,27; My 3:13; Kul 13:13Bana boonse bataanzi mbebatuulila Jehova, nebaba bantu nebaba banyama, balaba bako; pele bana bataanzi babantu baleelede kunununwa, abana bataanzi babanyama batondwa baleelede kunununwa. 16#My 3:47; Lev 27:2,6; Kul 30:13; Lev 27:12; Ezk 45:12Muulo wabo wakunununwa, nkokuti ciindi camwezi omwe wakuzyalwa, uleelede kuba masyekeli osanwe aansiliva, nkokuti masyekeli aacikombelo (isyekeli ngemagera aali makumi obile). 17#Dt 15:19; Lev 3:2,5Pele mwana mutaanzi waŋombe na wambelele na wampongo, aba tabanununwi pe; balasalala, Bulowa bwabo uleelede kubusansaila acipaililo, amafuta aabo aleelede kutemwa, abe cipaizyo cili abweema bubotu bwakubotezya Jehova, 18#Kul 29:26-28; Lev 7:31pele nyama iisyaala ilaba yako, mbubonya mbuli katiti kakuyumba amweendo wacikungu walulyo. 19Zipaizyo zyoonse zisalala bana ba-Israyeli nzebaletela Jehova, ndazipa nduwe abana bako balombe abasimbi, Ngumulao walyoonse, cizuminano citapwayiki calyoonse alyoonse kunembo lya-Jehova, kulinduwe akulunyungu lwako. 20#Dt 10:9; 14:27; 18:1; Jos 13:14,33; Int 16:5; 73:26; Ezk 44:28Nkabela Jehova wakaambila Aroni kuti, Yebo tokooyooba alukono munyika yabo, tokooyoopegwa caabilo akati kabo pe. Mebo ndime caabilo cako alukono lwako akati kabana ba-Israyeli.
21 #
Lev 27:30-33; Dt 14:22-29; 12:17-19; Neh 10:37; 12:44; Heb 7:5,8 Lino ba-Levi, ndabapa zipanzi zyoonse zyakumi zyambono zyabaIsrayeli, bazikone, nkaambo kamilimo yabo njebabeleka, milimo yatente lyambunganino. 22#Lev 22:9Bana ba-Israyeli tabakooyooswena limbi kufwaafwi kutente lyambunganino, kuti batajani mulandu, batafwi. 23Ba-Levi mbebanoobeleka milimo yatente lyambunganino, alimwi mbembabo banooyumuna mukuli wamilandu yabo. Ngumulao walyoonse mumazyalani aanu oonse. Aboobo tabakooyooba alukono akati kabana ba-Israyeli. 24#Dt 10:9Nkaambo zipanzi zyakumi zyabana ba-Israyeli nzebatuulila Jehova, nzenzizyo nzendapa ba-Levi kuti zibe lukono lwabo. Ncencico ncendabaambila kuti, Tamukooyooba alukono akati kabana ba-Israyeli,
25Lino Jehova wakaambila Musa kuti, 26#Neh 10:38Ambila ba-Levi kuti, Ciindi nemutambula zipanzi zyakumi zyabana ba-Israyeli nzendamupa kuti zibe lukono lwanu, muleelede kugwisya mulinzizyo cituulo cakutuulila Jehova, cipanzi cakumi cazipanzi zyakumi. 27Eco cituulo canu ciyooambwa mbubonya mbuli maila aakucipolelo ambuli kuzula kwacisinino cawaini. 28Aboobo anywebo muyootuulila Jehova cituuzyo cizwa muzipanzi zyanu zyakumi nzimutambula kumaanza aabana ba-Israyeli. Muleelede kugwisya cituulo mulinzizyo, mupe Aroni mupaizi. 29Muzipego zyanu zyoonse amugwisye cituuzyo cakutuulila Jehova, nkokuti zintu zinono zyamulinzizyo, cipanzi cisalalisya. 30Kobaambila kuti, Mwaatula zintu zinono zyamulinzizyo, eco ciyooyeeyegwa kuba-Levi mbuli maila aakucipolelo ambuli cizwa mucisinino camasaansa. 31#Mt 10:10; Lk 10:7; 1 Kor 9:13; 2 Kor 12:13; Gal 6:6; 1 Tim 5:18; 1 Tes 5:12,13Munoozilya kumasena oonse, nywebo abasiŋanda banu, nkaambo ncecilumbyo canu nkaambo kamilimo yanu njimubelekela itente lyambunganino. 32#Lev 19:8; 22:16Tamukooyoojana milandu nkaambo kanzizyo, mwamana kupa zinono zyazyo. Mutasofwaazyi zintu zisalala zyabana ba-Israyeli, kuti mutafwi.
Currently Selected:
Myeelwe 18: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
