Matayo 25

Cikozyano cabasimbi basibwiinga bali ikumi

1 # Lk 12:35; Ciy 19:7 Lino Bwami bwakujulu buzookozyanisigwa abasimbi bali ikumi ibakabweza malampi aabo kuti baye kuyoocinga simusa. 2Nkabela bosanwe akati kabo kabali basongo, bamwi bosanwe kabali bafubafuba. 3Nkaambo abo bafubafuba nibakabweza malampi aabo teebakabweza mafuta, 4pele basongo bakabweza mafuta munsazi zyabo antoomwe amalampi aabo. 5Lino simusa mbwaakamuka kusika bakafukula boonse akuona. 6Nkabela akati kamasiku kwakamvwigwa loongololo lwakuti, Amulange, ngooyu simusa! amuzwe mukamucinge. 7Lino abo basimbi boonse bakabuka akubamba malampi aabo. 8Elyo bafubafuba bakaambila basongo kuti, Amutwaabile mafuta aanu, nkaambo malampi esu azima. 9Pele basongo bakavuwa, baamba bati, Ambweni taakoozulila aswebo anywebo. Kamuya kubasambazi, mulyuulile nubeni. 10Lino nibakacili kukuula, simusa wakasika. Mpawo abo ibakalibambide bakanjila awe mupobwe, nkabela mulyango wakajalwa. 11#Lk 13:25Lino musule abo basimbi bamwi bakasika abalo, bati, Mwami, Mwami, tujulile. 12#Mt 7:23Pele wakavuwa kuti, Ncobeni ndamwaambila kuti nsimuzi. 13#Mt 24:42Nkaambo kaako amulangile, nkaambo tamuzi buzuba niciba ciindi.

Cikozyano camatalenta

(Luka 19:11-27)

14 # Lk 19:11-27 # Mt 21:33 Kulikozyene amuntu iwakaamba kuya kucisi cimwi, elyo wakaita bazike bakwe, wakabaabila imbono zyakwe. 15#Rom 12:6Umwi wakamupa matalenta osanwe, umwi obile, aumwi lyomwe. Umwi aumwi wakapegwa mbuli inguzu zyakwe. Mpawo wakainka. 16Lino oyo iwakatambwide matalenta osanwe wakaabelesya, wapindauka matalenta amwi osanwe. 17Mbubonya obo ayooyo iwakatambwide obile wakapindauka amwi obile. 18Pele oyo iwakatambwide lyomwe wakainka, wasya ansi, wasisa mali aamwami wakwe. 19Lino nicakaba ciindi cilamfu mwami wabazike abo wakasika, wabalingula. 20Mpawo oyo iwakatambwide matalenta osanwe wakaleta matalenta amwi osanwe, wakati, Mwami, wakandipa matalenta osanwe. Langa! ndijene ambi matalenta osanwe. 21#Mt 25:23; Mt 24:45-47; Lk 16:10Mwami wakwe wakamwaambila wati, Wabotya, nomuzike mubotu musyomesi. Wakasyomeka kuzintu zice, ndakukazika kuti ube azintu zinji, njila mubusekelezi bwamwami wako. 22Alimwi oyo iwakatambwide matalenta obile wakasika, wakati, Mwami, wakandipa matalenta obile, Langa! ndijene ambi matalenta obile. 23#Mt 25:21Mwami wakwe wakamwaambila wati, Wabotya, nomuzike mubotu musyomesi. Wakasyomeka kuzintu zice, ndakukazika kuti ube azintu zinji, njila mubusekelezi bwamwami wako. 24Lino oyo iwakatambwide italenta lyomwe wakasika, wakati, Mwami, ndakuziba kuti uli muntu muyumu, ulatebula nkotabyala akubunganya nkotaminza, 25nkabela ndakayoowa, ndakaya kuyoosisa munyika italenta lyako. Langa, ndeeli lyako! 26Lino mwami wakwe wakamuvwiila kuti, Nomuzike mubi mutolo, wakaziba kuti ndatebula nkuntabyalide akubunganya nkuntaminzide. 27Nkaambo kaako wakeelede kubika mali aangu mumaanza aabalondozi, elyo kukuboola kwangu nindakatambula mali aangu ampindu yao. 28Lino amumunyanzye italenta, mulipe oyo uujisi matalenta aali kumi. 29#Mt 13:12; Mk 4:25; Lk 8:18Nkaambo umwi aumwi uujisi uzoopegwa cakuyungizizigwa, pele umwi aumwi uutajisi uzoonyanzigwa niciba ncajisi, 30#Mt 8:12; 22:13; Lk 13:28Alimwi, oyo muzike uutakwe milimo amumusowele mumudima waanze, oko kuzooba kulila akuluma ntwino.

Lubeta lupati

(Ciyubunuzyo 20:11-15)

31 # Mt 16:27; 19:28; Zek 14:5; Ciy 20:11-13 Lino Mwana a-Muntu naazooboola mubulemu bwakwe antoomwe abaangelo bakwe, uzookala acuuno cabulemu bwakwe, 32#Rom 14:10nkabela misyobo yoonse izoobunganisigwa kubusyu bwakwe. Mpawo uzoobaandaanya mbuli mweembeli mbwaandaanya imbelele ampongo. 33#Ezk 34:17Lino imbelele uzoozibika kululyo lwakwe, impongo uzoozibika kucimwensi cakwe. 34Lino mwami uzooambila abo bali kululyo lwakwe, kuti, Amuboole, inywe nomuyandwa kuli-Taata, amukone bwami mbumubambilidwe kuzwa kumalengelo aanyika. 35#Is 58:7Nkaambo ndakafwa inzala, mwakandipa kulya; ndakafwa inyota, mwakandinywisya, ndakali mweenzu, mwakandikondezya; 36ndakali cintanda, mwakandisamika; ndakali mulwazi, mwakandiswaya; ndakali muntolongo, mwakandizida. 37#Mt 6:3Lino balulami bazoomuvwiila kuti, Mwami, ndilili nditwakakubona koli sinzala, twakusanina; nanka sinyota, twakunywisya? 38Ndilili nitwakakubona koli mweenzu, twakukondezya; nanka sicintanda, twakusamika? 39Ndilili nitwakakubona koli mulwazi na koli muntolongo, twakuzida. 40#Tus 19:17; Heb 2:11Nkabela Mwami uzoobavwiila kuti, Ncobeni ndamwaambila kuti, mbuli mbumwakacitila obo umwi naba muniini akati kabakwesu aba, mwakacitila ndime mbubonya. 41#Mt 7:23; Ciy 20:10,15Ino uzooambila abo bali kucimwensi cakwe kuti, Amuzwe kulindime inywe numutukidwe, munjile mumulilo uutamani ngwabambilidwe Diabolosi abaangelo bakwe. 42Nkaambo ndakafwa inzala, teemwakandipa kulya; ndakafwa inyota, teemwakandinywisya; 43ndakali mweenzu, teemwakandikondezya; ndakali cintanda, teemwakandisamika; ndakali mulwazi amuntolongo, teemwakandiswaya. 44Lino abalo bazoovuwa, bazooamba kuti, Mwami, ndilili nitwakakubona koli sinzala na sinyota na mweenzu na sicintanda na mulwazi na muntolongo, teetwakakukutaukila? 45Mpawo uzoobavwiila kuti, Ncobeni ndamwaambila kuti, mbuli mbumwakatacitila obo umwi naba muniini akati kabaaba mbubonya teemwakacitila ndime. 46#Dan 12:2; Joh 5:29Nkabela aba bayoonjila mumapenzi aatamani, pele balulami bayoonjila mubuumi butamani.

Currently Selected:

Matayo 25: Ibbaib63

Highlight

Copy