Luka 24

Jesu mbwaakabuka

(Matayo 28:1-16; Marko 16:1-8; Johane 20:1-18)

1 # Mt 28:1-8; Mk 16:1-8; Joh 20:1-13 Eno mubuzuba butaanzi bwensondo cifumofumo bakasika kucuumbwe, balijisi tununkilizyo ntobakabambide, abamwi bakeza abo, 2Bajana ibbwe ilyakasinkide acuumbwe lyakunkulisigwa kale. 3Bakanjila mukati, pele tabakuujene mutunta wa-Mwami Jesu. 4Elyo nobakacili kuzingidwe aceeci, baalumi bobile bakaima abo, balisamide izimwekesya, 5Mbobakaankamene akukotamika masyu aabo aansi, baalumi abo bakabaambila kuti, Ino mulangawidanzi uupona akati kabafwide? 6#Mt 16:21; 17:22-23; 20:18-19; Mk 8:31; 9:31; 10:33-34Tamo omuno pe, ulibukide. Amuyeeye mbwaakamwaambila naakacili kuGalilaya 7kuti, Mwana a-Muntu uleelede kwaabwa mumaanza aabantu babi, abambulwe, akabuke kubuzuba bwatatu. 8Ndilyonya bakayeeya majwi aakwe, 9bazwa kucuumbwe, baakwaambila abali kumi muumwi makani aya, akulibamwi boonse. 10#Lk 8:2,3Bakali Maliya Magadalene, a-Joana, a-Mariya banyina Jakobo, abakaintu bamwi abakaambila baapostolo makani aya. 11Amajwi aya akaba anga ncaano kulimbabo, tabakabasyomede. 12Pele Petro wakanyamuka watijaanina kucuumbwe, waakusondela, wabona masila ali alike, nkabela wabweeda uliyoowede azeezyo izyakacitika.

Izyakacitika munzila iiya ku-Emau

13 # Mk 16:12,13 Eno kuliboobo buzuba mbubonya bobile kulimbabo bakali kuya kumunzi uwali kutegwa Emau, uwali abamaile abali musanu mubabili kuzwa ku-Jerusalemu. 14Bakali kuya bwaambaula zintu izyakacitika. 15#Mt 18:20Eno nobakacili kuya bwaambaula akubuzyanya, Jesu mwini wakaswena afwaafwi ambabo, weenda abo. 16Pele meso aabo akalivumbidwe kuti batamuzibi. 17Nkabela wakababuzya kuti, Ino makaninzi aya ngomuya bwaambaula nomuya bweenda? Baima balyeetezya. 18Umwi kulimbabo uwali kutegwa Kleopa wakamuvuwa kuti, Sena nduwe olike ookede muJerusalemu, ootezi makani aakacitika omo kumazuba aya ngoonya? 19#Mt 21:11Wakababuzya wakati, Ino makaninzi? Bakamwaambila kuti, Makani aa-Jesu wa-Nazareta, uwakali musinsimi uujisi nguzu kumilimo akumajwi kumbele lya-Leza akubantu boonse, 20pele bapaizi bapati abeendelezi besu bakamwaaba kuti abetekelwe lufu akubambulwa. 21#Lk 1:68; 2:38; 19:11; Inc 1:6Kwalo swebo twali kusyoma kuti ngonguwe uuzoonununa Israyeli. Eno atala lyazeezyo zyoonse sunu aba mazuba otatwe kazicitidwe zintu ezi. 22#Lk 24:1-11Alimwi bakaintu bamwi benkamu yesu batuyoosya, abali kucuumbwe cifumofumo. 23Baakujana mutunta wakwe tuuwo, baboola bati, Twabona cilengaano cabaangelo abaamba kuti muumi. 24#Lk 24:12; Joh 20:3-10Abamwi mbotwali abo bakainka kuyoobona kucuumbwe, baakujana mbubuli kwaamba kwabakaintu, pele walo mwini tabakamubwene. 25Mpoonya awo wakabaambila kuti, Nywebo nobafubafuba, nomuli emyoyo iikakila kusyoma oonse ngobakaamba basinsimi. 26Sena Kristo taali kweelede kuciswa obo akunjila mubulemu bwakwe? 27#Dt 18:15; Int 22:1-21; Is 53:1-12Elyo kuzwida kuli-Musa akubasinsimi boonse, wakabapandulwida makani aamu-Magwalo oonse aamwaamba lwakwe mwini. 28Nkabela nobakasika afwaafwi amunzi nkobakali kuya, walo wakaba anga wandooindilila, 29pele bakamukombelela bati, Kala aswebo nkaambo lyandoobbila zuba, nkumazuba. Mpoonya wakanjila kuzookala abalo. 30#Lk 22:19Naakali kukede abo akulya, wakabweza mukamu, walumba, wuukomona, wabaabila. 31Mpoonya meso aabo akajuka, bamuziba, ndilyonya wabazeluka. 32Eno balyaambauzya bati, Sena myoyo yesu teyali kupya muzyamba zyesu, naali kuza bwaambaula aswebo munzila, aleeliya naali kutupandulwida Magwalo? 33Kuciindi eco nciconya bakanyamuka, babweeda ku-Jerusalemu, baakubajana abali kumi muumwi abakali abo balibungene antoomwe, 34#1 Kor 15:4,5bati, Nkasimpe Mwami wabuka, walibonya kuli-Simoni. 35Nkabela bakabalungulwida makani aamunzila, ambobakaakumuziba kukukomona mukamu.

Jesu mbwaakalitondezya kulibali kumi muumwi (Johane 20:19)

36 # Mk 16:14-18; Joh 20:19-23; 1 Kor 15:5 Nobakacili kwaamba makani aya, walo mwini wakaima akati kabo, wati kulimbabo, Amube aluumuno. 37#Mt 14:26Pele bakaankamana akuyoowa, bayeeya kuti babona musangu. 38Elyo wakabaambila kuti, Ino mulikatazizyanzi? Ukuzumanana oku kuzwidai mumyoyo yanu? 39Amubone maanza aangu amatende aangu, ndime ndemwini, amundijate mundibone, nkaambo musangu tajisi nyama azifuwa mbuli mbomundibona ndili azyo. 40Ucimana kwaamba obo wabatondezya maanza aakwe amatende aakwe. 41Nobakacili kutasyoma nkaambo kakubotelwa, anobakacili kuyoowede, wakababuzya kuti, Sena mujisi cakulya ano? 42#Joh 21:5,10Bakamupa ntuli yanswi iyakayokwa, 43Wakiibweza, walya kumbele lyabo.

44 # Lk 9:22,45; 18:31-33 Elyo wakabaambila kuti, Nendakacili anywebo ngaaya majwi ngendakamwaambila aakuti, Makani oonse aakali kwaamba ndime, aalembedwe mumulao wa-Musa amubasinsimi amuntembauzyo, aleelede kuzyulila. 45Ndilyonya wakajula miyeeyo yabo kuti baamvwe Magwalo. 46#1 Tim 3:16Alimwi wakabaambila wati, Mboobu mbokulembedwe, kuti Kristo uleelede kuciswa akubuka kulufu mubuzuba bwatatu 47akwalo kuti kukambaukwe muzina lyakwe kweempwa akujatilwa kwazibi kumasi oonse, kusaanguna ku-Jerusalemu. 48Ndinywe bakamboni bamakani aya. 49#Inc 1:4; Joh 15:26; 16:7Eno amubone, ndiyoomutumina cisyomezyo ca-Taata, pele kamukede mumunzi wa-Jerusalemu mane mukapegwe nguzu izizwa kujulu.

Jesu mbwaakabweeda kujulu

(Incito 1:9-11)

50 # Inc 1:9-11 Nkabela elyo wakabatola mane kuyoosika afwaafwi a-Betaniya, wakatambika maanza aakwe, wabalongezya. 51Eno naakacili kubalongezya wakaandaana abo, watolwa kujulu. 52#Joh 16:22; 14:28Ndilyonya bamukomba, babweeda ku-Jerusalemu akubotelwa kupati, 53bakali muntempele lyoonse, balalumbaizya Leza.

Currently Selected:

Luka 24: Ibbaib63

Highlight

Copy