Jobu 30
30
1Pele lino baniini kulindime balanditabuluzya;
Bantu bamawisi mbindakateelede kupa mulimo wamubwa wabutanga bwangu!
2Mbantu batakonzyi amaanza aabo kundiletela mpindu
Nkaambo nguzu zyabo zyamana.
3Balikotede akaambo kanzala akubula;
Balapulukuta zisyu zyamusokwe akuzungazunga munkanda,
4Kabacela matu munsi lyaziteo,
Akulya miyanda yazipama.
5Batandwa buyo kuzwa nkobakala bantu
Baboompolola kuti mbabbi.
6Nkobakala nkumimpata,
Amumpako amumpangala.
7Balaitana akati kaziteo,
Akuswanaana munsi lyamutungambabala;
8Mbabana babafubafuba,
Mbabantu basingwa akuzimaanisigwa kuzwa kunyika.
9 #
Job 17:6; Int 35:15; 69:11 Anukuti lino ime ndi lwiimbo lwabo;
Ndi kalabiko kabo.
10Balasesemwa ndime akundizandukila;
Ii, bandibona balandiswida mate.
11 #
Job 12:18
Ndatesegwa, ndateteesegwa
Akutalemeka kwabo kwakutaliiata.
12 #
Job 19:12
Inkamu yabayobeka bandilwanya,
Bandikakanyana kuti banyonyoone;
13 #
Int 69:26
Basinka nzila yangu yakulobokela,
Balisungwide kuleta lusaalo lwangu
Kabatajisi uubalesya,
14 #
Int 18:4; 69:14,15; Is 8:7,8 Balaliwaala kulindime mbuli mumwaatuko,
Kabandivuumukila mubwaanda busaalwa,
15Aboobo ziyoosyo zyandiboolela;
Lukondo lwangu lwapepuka,
Akuliiba kwangu kwamana mbuli joba.
16 #
1 Sam 1:15; Is 53:12; Int 22:14; 42:4 Lino muuya wangu ulalitila mubuusu,
Kulyeetezya kulandijata.
17 #
Job 33:19-21; Int 6:2 Masiku zifuwa zyangu zilapulukuta;
Kucisa kulandipapamuna takuleki.
18 #
Job 2:7
Lukanda lwangu lulileketene abulwazi bubi,
Lulitantamukide kuzizo zyangu.
19Leza undidumpukizizye mukabanda,
Ndaba buyo kasuko atwe.
20 #
Int 22:2; Mt 15:23 Tokoondivwiila kuti ndalila kulinduwe;
Ndilaima pele tondilangi.
21Waba mukali kulindime,
Anguzu zyajanza lyako ulandikwapaula.
22Ulandisansasansa muluuwo,
Ndaengaulwa muguwo lyalo.
23Ndilizi kuti uyoondileta kulufu,
Kuŋanda yalo iimikilidwe boonse bapona.
24Nekubaboobo muntu uubbila ulavunguluka janza lyakwe,
Kaompolweda lugwasyo mumapenzi aakwe.
25 #
Lk 19:41; Joh 11:35; Rom 12:15 Teembubo kuti ndakali kulilila bapengede,
Kuti muuya wangu wakali kuusila babula?
26 #
Jer 8:15
Elyo ndalangila bubotu pele kwaboola bubi;
Ndalindila mumuni pele kweza mudima,
27Moyo wangu wapya, taubatami;
Mazuba aamapenzi andeenzya,
28 #
Malo 3:1,2 Ndeendeenda kakutakwe uunduumuzya,
Ndaima akati kabantu, kandili kuti ngwasigwe;
29 #
Int 102:6
Ndimweenzinyina buyo wabamwaaba bakuwa,
Amuzwalani ku-Mpowani,
30Lukanda lwangu lulasia akumozoka,
Zizo zyangu zilapya antuntumaanzi.
31Kalumbu kangu kalalizya buyo ziimbo zyamalilwe;
Anyeele zyangu zili mumajwi aabalila.
Currently Selected:
Jobu 30: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
