Jeremiya 13
13
Cikozyano camulembo
1Mbuboobu Jehova mbwaakandaambila. Wakati, Koya, ukalyuulile mulembo uutuba, usame mucikungu cako, pele utauniki mumaanzi pe. 2Mpoonya awo ndakaula mulembo, mbubonya mbuli Jehova mbwaakalailila, akuusama mucikungu cangu. 3Lino ijwi lya-Jehova lyakandisikila lwabili, liti, 4#Int 137:1; Mik 4:10Bweza mulembo nguwakaula, ngosamine mucikungu cako, lino nyamuka, uye ku-Firate, ukausise nkuko mumpangala yakumandomba. 5Elyo ndakainka ku-Firate kuyoousisa, mbubonya mbuli Jehova mbwaakandilailila. 6Nkabela naakamana mazuba manji, Jehova wakandaambila kuti, Nyamuka, uye ku-Firate, ukagwisye mulembo ngundakakulailila kusisa nkuko. 7#Is 64:6; Jer 24:8; Malo 3:45Mpawo ndakainka ku-Firate, ndasya, ndagwisya mulembo omo mundakausiside, nkabela mulembo wakabija, kautacijisi milimo abuniini.
8Lino ijwi lya-Jehova lyakandisikila, liti, 9#Lev 26:19Mbuboobu mbwaamba Jehova. Mbubonya obo mbunjoobisizya kulisumpula kwabantu ba-Juda akulisumpula kupati kwa-Jerusalemu. 10#2 Mak 36:15,16; Jer 9:14; 11:8Aba bantu babi, bakaka kuswiilila majwi aangu, beenda aruzinguni zyamyoyo yabo, baya butobela baleza bambi kuti babamanine milimo akubakomba, bayooba mbubonya mbuli mulembo oyu uutacikwe milimo abuniini. 11#Matl 17:7; Kul 19:5; Jer 33:9Nkaambo mbubonya mbuli mulembo mbuujata kucikungu camuntu, ambebo ndakajatya luzubo lwaIsrayeli aluzubo lwa-Juda loonse kulindime, mbwaamba Jehova, kuti bandibede bantu bali ampuwo, batembaulika, bali abulemu. Nekubaboobo teebakaswiilila pe.
Cikozyano canongo zyawaini
12Lino uleelede kubaambila majwi aya. Mbuboobu mbwaamba Jehova Leza wa-Israyeli. Inongo zyoonse zilazuzigwa waini. Lino bayoovuwa kuti, We! Sa tatuzi kuti nongo zyoonse zilazuzigwa waini? 13#Int 60:3; Is 63:6; Jer 25:27; Ezk 23:32-34; Ciy 14:10Nkabela uyoobaambila kuti, Mbuboobu mbwaamba Jehova. Amubone! Bantu boonse banyika ino, bami bakede acuuno cabwami ca-Davida, abapaizi, abasinsimi, aboonse bakede mu-Jerusalemu, boonse buyo njoobazuzya bukolwi. 14Nkabela njoobaumputanya, umwi aumwi amweenzinyina, bamawisi abana babo boonse antoomwe, mbwaamba Jehova, Nsikooyoobafwida buuya niluba luzyalo niluba luse. Njoobanyonyoona buyo.
Musinsimi ulacenjezya bantu aamapenzi aaboola
15 #
Dt 32:29
Amuswiilile akucenjeka matwi. Mutalisumpuli pe, nkaambo Jehova waamba. 16#Jos 7:19; 1 Sam 6:5; Joel 2:12; Am 8:9; Is 5:30; 59:9; Int 44:19Amulemeke Jehova Leza wanu naatana kumuletela mudima, maulu aanu naatana kulebwa atala lyazilundu zyalundindiwana. Nimuli mukulangila mumuni, inga uyoousandula kuba eenzule calufu amudima uusia mbi. 17Pele na mwakaka kuswiilila, moyo wangu uyoolila kumbali nkaambo kakulisumpula kwanu, ameso aangu ayoolizya misozi minji loko nkaambo kamatanga aa-Jehova aatolwa mubuzike.
18 #
2 Bam 24:12
Amwaambile mwami abanyina kuti, Amukale mucuuno cakulibombya, nkaambo musini wanu wabweebesi waloka kuzwa kumutwe wanu. 19#Lev 26:31Minzi yaku-Negebi ilijalidwe, taakwe uuijalula. Cisi coonse ca-Juda cilitoledwe mubuzike, coonse buyo cilitoledwe mubuzike.
20 #
Jer 6:22
Lanzya meso aako, ubone abo bazwa kucisi cakunyika. Buli kuli butanga mbowakapegwa? Zili kuli imbelele zyako zyeebeka? 21Lino uyooambanzi noyoojana kuti abo mbowakaiisya omwini kuba bayandwi bako wababika kuti babe basilutwe baka? 22#Jer 16:10; Is 47:2; Nah 3:5Sa ulabuzya kuti, Nkaambonzi aya makani andisikila? Nkekaambo kazibi zyako zinji, malogwe aako ncaayubunwidwa, amaulu aako ncaasofwaazisigwa. 23Sa mu-Etiopiya uusia ulakonzya kusandula cikanda cakwe? Sa siluwe ulakonzya kusandula mabala aakwe? Na kwaba obo, lino anywebo mulakonzya kucita kabotu nomuzibide kucita bubi. 24Njoomumwaisya mbuli buungu muuwo wamunkanda mbuubbubbula. 25#Job 20:29; Jer 10:14; Mik 3:11Nceeci cisolo canu, caabilo ncindamubikila, mbwaamba Jehova, nkaambo kakuti waluba ndime, wasyoma zyakubeja. 26#Malo 1:8; Hos 2:10Ambebo njoosamununa malogwe aako kubusyu bwako, kuti cinswe cako cibonwe. 27#Jer 5:8; 2:20; Is 65:7Ndibwene zisesemyo zyako, mamambe aako, ndibwene mbolila muzisusi zyako, abwaamu bwako mbocita antangalala atala lyazilundu. Maawe kulinduwe, O Jerusalemu! Ino uyoosalazigwa lili?
Currently Selected:
Jeremiya 13: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
