Jeremiya 10
10
Zikozyano nzibakomba bamasi nzintu zyabuyo
1Amuswiilile ijwi Jehova ndyaamba aandinywe, noluzubo lwa-Israyeli. 2#Lev 20:23Mbuboobu mbwaamba Jehova. Mutaiyi ziyanza zyabamasi. Mutayoowi zitondezyo zyakujulu mbubaziyoowa bamasi, 3nkaambo inkombelo zyabamasi nzyabuyo. Balatema musamu mulusaka, asimilimo ulaubezyabezya kaleba. 4Lino cikozyano ncabezede balacisamika ingolida ansiliva. Balacikankamizya insando anembe, kuti citasunzuluki. 5#Int 115:5,7; Hab 2:19Zili mbuli ciyamizyo mumuunda wamakowa. Tazyaambi pe. Zilayumunwa buyo, nkaambo tazikonzyi kweenda. Utaziyoowi pe, nkaambo taakwe bubi mbuzicita, abwalo bubotu tazibwene kubucita. 6#Kul 8:9; Int 86:8,10Taakwe uuli mbuli nduwe, O Jehova. Nduwe mupati, azina lyako lili anguzu. 7#Ciy 15:4Nguni uukonzya kukaka kukuyoowa, O mwami wamasi oonse, nkaambo kuyoowegwa nciceelelo cako? Akati kabasongo babamasi amumami aabo oonse taakwe uuli mbuli nduwe. 8Boonse buyo mbafubafuba, mazinzili, Ma! Zikozyano nzisamu buyo. Lulayo lwazyo ndwabuyo. 9#Dan 10:5Insiliva iifulidwe ilaletwa kuzwa ku-Tarisi, ayalo ingolida ilazwa ku-Ufazi. Nzezilenge zyasimilimo, zilacitwa amaanza aamufuzi. Zilisamine masani aamabala mabala, kusia akusalala; zyoonse nzezilenge zyabasimilimo bacenjede. 10#1 Tim 6:17Pele Jehova ngu-Leza wakasimpe, Leza muumi, Mwami uuteeli. Nyika ilakankama kubukali bwakwe, amisyobo yabantu tiikonzyi kwiima nji naakalala.
11(Mbuboobu mbumweelede kubaambila. Baleza abo ibatakalenga ijulu anyika bayoomaninina munyika, tabakooyoobonwa limbi ansi ano.)
12 #
Matl 1:1,6; Job 38:4; Int 89:11; 136:5; Is 40:28; Jer 51:15; Inc 14:15 Nguwe iwakalenga nyika kunguzu zyakwe, iwa bamba luwa mubusongo bwakwe, akutandabika majulu mumaanu aakwe. 13Ijwi lyakwe nilimvwigwa, maanzi alapyopyongana kujulu, asikunku ulamuuntumusya kuzwa kumagolelo aanyika, Ulacitila imvula indabo, amuzilondwedo zyakwe mwaagwisya muuwo. 14Bantu boonse mbafubafuba, babula luzibo. Bafuzi boonse zikozyano zyabo nzibafula zilabausya insoni, nkaambo zikozyano zyabo nzyabuyo, taziyooyi pe. 15Tazijisi milimo, pe, nzilenge zyalweeno, aboobo mubuzuba bwakuswayigwa kwazyo ziyooloba. 16#Int 16:5; 73:26; Jer 51:19; Malo 3:24; Dt 32:9; Int 74:2Caabilo ca-Jakobo tacili mbuli ezi pe; nkaambo ngonguwe iwakabumba zintu zyoonse, abaIsrayeli ngomusyobo ngwakonede. Jehova wamakamu ndizina lyakwe.
Bantu balaya mubuzike. Cikombyo cakukumbila luse
17Nyampula mukuli wako, uwe nokede mumunzi uusinkinizizidwe. 18#Ezk 6:10Nkaambo mbuboobu mbwaamba Jehova. Ciindi ecino ndatapula bantu banyika. Njoobaletela mapenzi ngebayoomvwa. 19#Mik 7:9Maawe! Ndapenga! Mibunda ilacisa. Pele ndakaamba kuti, Obu bulwazi bwangu nsikonzyi kubucija. 20Itente lyangu lyafwa, intambo zyangu zyoonse zyadunsuka, bana bangu bandisia, tabawo, taakwe limbi uukonzya kukankamina itente lyangu nikuba kubamba zisitilizyo zyangu. 21Nkaambo beembeli bafubaala, tababuzyi makani kuli-Jehova. Nciceeco ncibatajanina coolwe, amatanga aabo oonse amwaika. 22Yamvwigwa impuwo! Alasika makani! Lupyopyongano lupati lulazwa mucisi cakunyika, lulasaala minzi ya-Juda, ibe cikalilo cabamwaaba. 23#Int 17:5; 119:116,117; Tus 16:1O Jehova, ndizi kuti muntu waansi tezi kubamba kabotu inzila yakwe. Muntu ulaya bweenda, pele tabwene kweenzya intaamu zyakwe. 24#Int 6:1; Jer 30:11; Hab 3:2O Jehova, kondilaya, pele kulaya kwako kube alubeta lubotu, Utandilayi cabukali bunji, inga ndaloba. 25#Job 18:21; 1 Tes 4:5; 2 Tes 1:8Bukali bwako kobutilila bamasi batakuzi amisyobo iitalemeka izina lyako, nkaambo bakalidilila Jakobo, bamumanisya, acikalilo cakwe bacinyonyoona.
Currently Selected:
Jeremiya 10: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
