Isaya 14
14
1 #
Int 102:13,16; Is 54:7,8; Jer 31:3,4,10,11; Zek 1:17; Is 60:4,5,10 Nkaambo Jehova uyoofwida Jakobo luzyalo, uyoosala limbi ba-Israyeli akubabika munyika yabo beni. Nkabela beenzu bayooliswanaanya abo, bayookakatila kuluzubo lwa-Jakobo. 2Bantu bayoobabweza akubasisya kubusena bwabo, nkabela bantu baluzubo lwa-Israyeli bayoobavuba munyika ya-Jehova, babe bazike babo abazike basimbi babo, Bayootola mubuzike abo ibakataanguna kubanjizya mubuzike, alimwi bayooendelezya basikubapenzya.
3Lino mubuzuba obo Jehova naazookulemunwida buusu bwako amapenzi aako amilimo yako miyumu njiwakabelesegwa, 4#Is 13:19; Hab 2:6uyoobelesya cikozyano eci cakusampaula mwami wa-Babuloni. Uyooamba kuti, Waleka buti sikupenzya? Waleka buti munzi mulemu? 5Jehova watyola musako wasizibi, inkoli yabeendelezi, 6ibakali kuumya bantu zyuumo lyoonse, ibakali kukomya bantu cabukali lukomo lutakasigwi. 7Nyika yoonse yaumuna, yatontola. Lino boonzomoka kwiimba. 8#Is 55:12; Ezk 31:16Ayalo misamu yakupresi ilakusekelela, amisamu yakedari yaku-Lebano. Ilati, Kuzwa kuciindi eco niwakafwiinsigwa, takucikwe muntu uuza kutugonka. 9Cikalilo cabafu cakunsi cakukankamya mbucikutambula, Cilakubusizya basangu, basolozi boonse banyika. Cabusya bami boonse babamasi kuzyuuno zyabo. 10Boonse balatyabana, balakwaambila kuti, Ma! Sa sunu wakompaama mbuli ndiswe? Sa waba mbubonya mbuli iswe? 11Kulisumpula kwako kwaselusigwa kucikalilo cabafu, acikwala catuntimbwa twako, Imvunyu zilaya bufumba kunsi lyako, azyalo ziyokansi zilakuvumba, 12#Ciy 8:10; 9:1Ma! Waloka buti kuzwa kujulu, O intanda, mwana wabucedo! Wagonkwa buti ansi yebo owakafwii-nsya bamasi! 13#Malo 2:1; Dan 8:10; Ciy 12:4; Int 48:2; Mt 11:23; Lk 10:15Wakaamba mumoyo wako kuti, Nkatante kujulu. Nkaimike cuuno cangu cabwami kujulu lyanyenyeezi zya-Leza. Nkakale atala lyacilundu cambunganino kumabazu aakumusanza. 14#Zef 2:15; 2 Tes 2:4Nkatante kujulu loko kwiinda mayoba. Nkakozyane a-Leza Mupati. 15#Is 47:8; Ezk 28:8,9; Mt 11:23; Inc 12:23Nekubaboobo uzooselusigwa kucikalilo cabafu, kumagolelo aacilindi. 16Boonse bakubona bayookweebela, bayookuyeeya kuti, Sa ngooyu muntu iwakazungaanya nyika? Sa ngooyu iwakateketya masi? 17Sa ngooyu iwakasaala nyika yoonse kuti ibe mbuli inkanda? Sa nguwenya iwakavwinyuna minzi yayo? Sa nguwenya iwakakasya baange bakwe kuzwa muntolongo? 18Bami babamasi boonse buyo baloona cabulemu, umwi aumwi muŋanda yakwe mwini. 19Pele uwe wasoowegwa kuzwa kukabanda kako mbuli mutabi uusesemya, ulisamide bajayidwe bayasidwe apanga, baseluka kumabwe aamucilindi, mbuli mutunta uulyatwiidwe. 20Tookooyooswananizigwa abo mukuzikwa, nkaambo nyika yako waibisizya, abalo bantu bako wabajaya. Bana basikucitazibi tabakooyooambwa lyoonse. 21#Kul 20:5; Job 18:19; Mt 23:35Amubambile bana bakwe bujayi nkaambo kamilandu yawisaabo, kuti batabuki kukuvuba nyika akuzuzya nyika yoonse minzi. 22#1 Bam 14:10; Tus 10:7Njoobuka kukubalwisya, mbwaamba Jehova wamakamu; njoonyonyweda Babuloni izina abantu basyaala, abana alunungu, mbwaamba Jehova. 23Njooubika kuti ube cikalilo canungu, ube maziba aamaanzi. Njooukukuzya cikukuzyo calunyonyoono, mbwaamba Jehova wamakamu.
24 #
Is 10:5-34; Nah 1:1–3:19; Zef 2:13-15 Jehova wamakamu wakonka kuti, Ncobeni ciyooba mbubonya mbundiyeeyede, makani ayo ngaonya ngendalailila ayoocitwa. 25Njoopwaya muAsuri mucisi cangu akumulyataula azilundu zyangu. Elyo ijoko lyakwe liyoozwa kulimbabo, amukuli wakwe uyoogwisigwa kumakuko aabo. 26Ngaaya makani aakanzwa aanyika yoonse. Ndeeli ijanza litandabikidwe kukulwisya bamasi boonse. 27#2 Mak 20:6; Job 40:8; Is 23:9; Jer 4:28Nkaambo Jehova wamakamu nguwakosola makani. Nguni uukonzya kwaalobya? Ijanza lyakwe lilitandabikidwe. Nguni uukonzya kulibweedezya?
28 #
2 Bam 16:20; 2 Mak 28:27 Lino cilengano eci cakabonwa mumwaka ulya naakafwa mwami Ahazi. 29#Jer 47:1-7; Ezk 25:15-17; Am 1:6-8Utasekeleli, O cisi coonse ca-Filistiya, nkaambo kakuti inkoli iyakakuuma yatyoka, nkaambo kuzwa kumiyanda yanzoka kulazwa cipile, nkabela micelo yakwe iyooba inzoka inkali iiuluka. 30Elyo bana bataanzi babatengwana bayoosaninwa, abalo bacete bayoolala cakutayoowa. Nkabela njoojazya miyanda yako inzala, abantu bako basyeede bayoojayigwa. 31Kolila, O mulyango. Koomoka, O munzi. Weenzunuka, O cisi coonse ca-Filistiya. Nkaambo kulazwa busi kunyika, nkabela taakwe uutasika kuciindi ncabikilwa. 32Lino batumwa babamasi bayoovwiilwa nzi? Bayoovwiilwa kuti Jehova nguwakatalisya Ziyoni, nkabela mumonya mu-Ziyoni bacete babantu mobayoojana macijilo.
Currently Selected:
Isaya 14: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
