Hosea 7
7
1Nindasi ponye Israyeli, ndilyonya milandu ya-Efraimu ilalibonya, azibi zya-Samariya. Nkaambo balacita cakweena; babbi balanjila mumaanda, abafumpi balasaala anze. 2#Tus 5:22; Int 90:8Tabayeeyi mumyoyo yabo kuti bubi bwabo boonse ndabwiibulukwa. Lino milimo yabo beni niiibacede, ilalibonya kumeso aangu. 3#Rom 1:32Balakondezya mwami abubi bwabo, abalo basilutwe akubeja kwabo. 4Boonse mbasimamambe. Bali mbuli cijikilo ncaatenta mujiki, ncaaleka kusosela akuleka kukanda zinkwa mane zikafufumuke. 5Mubuzuba bwabuzyalwe bwamwami wesu basilutwe balalicisya-cisya cakukolwa, balayobayoba abasikucapa. 6Nkaambo myoyo yabo ilapya mukati cakuvwiyavwiya. Busiku boonse bukali bwabo buloona, pele bwaca buyo bulabuka mbuli mulilo uuyaka. 7#2 Bam 15:10; Is 9:13Boonse balapya mbuli cijikilo, balalya babetesi babo. Bami babo boonse bawa, taakwe naba omwe uukwiilila ndime.
Cisi ca-Israyeli mbucipilingene
8 #
Int 106:35
Efraimu ulavwelanya abamasi. Efraimu ncinkwa citasandwidwe 9Inguzu zyakwe bazimanizya beenzu, pele walo tezi. Imvwi zyadabika amutwe wakwe, pele tezi. 10Kulisumpula kwaba-Israyeli nkokubapesya mulandu, nekubaboobo tabana kupiluka kuli-Jehova Leza wabo, tabana kumuyandaula. 11Efraimu uli mbuli inziba imfubafuba iitakwe boongo. Balatamauka-tamauka cakwiita ba-Egepita acakuya kuba-Asuri, 12#Lev 26:14Lino mukutuntulika kwabo njooyala lusabwe lwangu alimbabo, njoobaselusya ansi mbubonya mbuli bayuni bakujulu. Njoobauma mbubonya imbungano yabo mbuyaswiilila kale. 13Maawe kulimbabo, nkaambo bapambuka kulindime! Lunyonyooko lubasikile, nkaambo basotoka imbeta zyangu. Ndakayanda kubavuna, nekubaboobo bakandaamba cakubeja. 14#Job 35:9; Int 78:34-37; Is 29:13; Jer 3:10Kundikomba tabandikombi camoyo woonse pe. Amalo aabo balalilila maila awaini buyo. Balalitenda-tenda, balandisampaula. 15Ndime ndakabaiisya akuyumya maboko aabo, nekubaboobo bandiyeeya bubi. 16#Int 73:9Kupiluka balapiluka, pele tabapiluki kuliyooyo uuli kujulu. Bali mbuli buta bupepuka. Bami babo ipanga liyoobajaya, nkaambo kakusampaula kwandimi zyabo. Eci ncebati sampauzigwe mucisi ca-Egepita.
Currently Selected:
Hosea 7: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
