Deuteronomo 25
25
Makani aakuuma basikubisya amilao imwi iisiyenesiyene
1Na bantu balijisi makani, na baaleta kunkuta, alimwi babetesi bababeteka, cakululamika baluleme acakupa basikubisya mulandu, 2#Lk 12:48; Tus 19:29; Mt 10:17na sikubisya uleelede kuumwa, mubetesi amulazike kuti aumwe kumeso aakwe azyuumo zyeelede kubisya kwakwe. 3#2 Kor 11:24; Job 18:3Ulakonzya kuumwa azyuumo zili makumi one, pele teelede kwiindilizya; na waindilizya kumuuma, nkokuti munyoko ulasampukilwa buntu bwakwe.
4 #
1 Kor 9:9; 1 Tim 5:18; Tus 12:10 Utamwaangi kumulomo musune uulyataula maila.
5 #
Mt 22:24; Mk 12:19; Lk 20:28; Matl 38:8; Rut 1:12 Na babunyina balikede antoomwe, alimwi umwi wabo wafwa katajisi mwana, mukamufu teelede kukwatwa kumuntu buyo; muzyalwanyina mulumaakwe uleelede kumukwata, abe mwanakazi wakwe, amucitile bweelede muzyalwanyina mulumaakwe. 6#Matl 38:9Lino mwana mutaanzi ngwazyala uyoolya izina lyamukwabo mufu, kuti izina lyakwe litafwidilili mucisi ca-Israyeli. 7#Rut 4:7-8Na oyo muntu tayandi kukwata mukamuzyalwanyina, mwanakazi aye kubapati kumulyango wamunzi, abaambile kuti, Muzyalwanyina mulumaangu wakaka kubusizya mwanaakwabo izina mucisi ca-Israyeli, tayandi kundicitila bweelede. 8Lino bapati bamunzi wakwe baleelede kumwiita, baambaule awe. Lino na wakakilila cakwaamba kuti, Nsiyandi kumukwata, 9#Rut 4:7; Is 20:2mukamuzyalwanyina uleelede kumuswenenena kumeso aabapati, amugwisizye insangu kucituta cakwe akumuswida mate kubusyu, avuwe kuti, Mbuboobo mbweelede kucitilwa muntu uukaka kuyakila mwanaakwabo luzubo. 10#Tus 6:33; 1 Tim 3:7Lino izina lyaluzubo lwakwe lilaambwa akati kaba-Israyeli kuti nduzubo lwayooyo iwakagwisigwa insangu.
11Bantu bobile na balwana amweenzinyina, na mwanakazi waumwi waboola kuzoovuna mulumaakwe mumaanza aayooyo ngobalwana awe, alimwi watambika ijanza lyakwe akumujata kubuntu bwakwe, 12#Dt 19:13muleelede kumukosola ijanza, mutamufwidi insoni pe.
13 #
Lev 19:35-36; Tus 11:1; 20:23; Ezk 45:10; Am 8:5; Mik 6:11 Utabi amabwe aabulemu aapambukene munkomo yako, ibbwe ipati abbwe diini. 14Amuŋanda yako utabi azyeelesyo zipambukene, cipati aciniini. 15#Kul 20:12Uleelede kuba abbwe lyabulemu lizwide liluleme, aceelesyo cizwide ciluleme, kuti uongole anyika eyo Jehova Leza wako njakupa. 16#Tus 11:1; 20:23; Am 8:5-7; 1 Kor 8:9-11; 1 Tes 4:6; Ciy 21:27Nkaambo boonse bacita obo, nkokuti boonse basilweeno, ncisesemyo kuli-Jehova Leza wako,
17 #
Kul 17:8-14; 1 Sam 15:2-9 Mutalubi ncibakamucitila ba-Amaleki munzila nimwakazwa ku-Egepita. 18#Neh 5:9,15; Int 36:1; Tus 16:6; Rom 3:18Wakamufumpa munzila, wamunyonyweeda boonse ibakali musule, nimwakawizukide akukataala. Takwe naakayoowa Leza pe. 19#1 Sam 15:3Nkaambo kako, Jehova Leza wanu naayoomupa cilyokezezyo kuti mukale cakuliiba akutapenzegwa kulibasinkondonyoko boonse beengelede omo munyika Jehova Leza wanu njamuvubya, amunyonyoone ciibalusyo coonse cabaAmaleki ansi ano. Mutalubi pe.
Currently Selected:
Deuteronomo 25: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
