Incito 21

1Notwakaandaana abo akunjila mubwaato, twakalulama ku-Kose, buce ku-Rode, kuzwa oko ku-Patara, 2Awo notwakajana bwaato bukila ku-Foinike, twakanjila twainka, 3Notwakabona Kupro twakainda kulumwesi, twalulama ku-Suriya, nkokuya ku-Turo twaakuseluka, nkaambo nkokwakali kuyoogwisizigwa lubono lwamubwaato, 4Awo notwakajana basikwiiya twakalyokezya mazuba aali musanu mwaabili. Eno abo Muuya wakabaambya kuli-Paulo kuti atainki ku-Jerusalemu. 5Naakainda mazuba ayo, twakabweza alimwi mulweendo lwesu, bakatusindikila boonse, antoomwe abakaintu abana, mane kumafutila aamunzi, nkabela twakafugama ankomwe yalwizi, twakomba. 6Twalayana, twanjila mubwaato swebo, balo babweeda kumunzi.

7Notwakamanizya lweendo lwamubwaato kuzwa ku-Turo, twakasika ku-Tolemai. Nkabela twakaanzya babunyina, twalyookezya abo buzuba bomwe. 8Nobwakaca twakainka, twakaya ku-Kaisareya. Oko twakanjila muŋanda ya-Filipo, mukambausi, umwi wabali musanu mubabili, twakala awe. 9Eno oyu mwaalumi wakali kujisi bana basimbi bone abatezi mwaalumi, abakali kusinsima. 10Nkabela notwakacili kukede oko mazuba manjimanji, kwakasika musinsimi uuzwa ku-Judaya, uutegwa Agabo, 11Wakeza kulindiswe, wakabweza lutambo lwa-Paulo, walyaanga mwini kumaanza akumaulu wati, Wakaamba Muuya Uusalala kuti, Mukamwini lutambo olu, mbobuya mbobayoomwaanga ba-Juda baku-Jerusalemu, bakamwaabe kumaanza aabamasi. 12Notwakamvwa obo, twakamukombelezya, swebo abankuko, kuti atainki ku-Jerusalemu. 13Nkabela Paulo wakavuwa wakati, Mwaba anzi ncomulila akutyola moyo wangu? Nkaambo ndilibambilide kuti intaangwi buyo, pele akufwa ku-Jerusalemu, nkaambo kezina lya-Mwami Jesu. 14Elyo mbwaatakali abusungilizye twakamuleka twakati, Luyando lwa-Mwami alucitwe.

15Munsi lyamazuba ayo twakali bamba, twakaya ku-Jerusalemu, 16Twakasindikilwa basikwiiya bamwi baku-Kaisareya, bautola kuli-Masoni waku-Kupro, sikwiiya waciindi nkotwali kuyeeya kuyoolyokezya.

Mbwaakalisalazya muntempele

17Notwakasika ku-Jerusalemu, babunyina bakatutambula akubotelwa. 18Nobwakaca twakanjila a-Paulo kuli-Jakobo, abapati boonse bakaliwo. 19Naakamana kubaanzya, wakabalungulwida comwe comwe zintu zyoonse nzyaakacita Leza akati kabamasi kumulimo wakwe. 20Balo nobakamvwa obo, bakalemeka Leza, bakati kulinguwe, Wabona, mukwesu, mbwiibede myaanda yemyaanda yaba-Juda abakasyoma, alimwi boonse balajatisisya mulao, 21kwalo bakaambilwa aanduwe, kuti ulaiisya ba-Juda boonse bamu-masi kuleka mulao wa-Musa, akuti ulabaambila kutapalula bana babo nokuba kweenda muziyanza zyeciindi. 22Ino kucitwe buti? Ncobeni bantu balamvwa kuti wasika. 23Aboobo kocita mbotukwaambila. Tulijisi baalumi bone abakalyaanga kuli-Leza, 24ubatole balo, ulisalazye ambabo, ukabalungile mulandu wabo, kuti banyoolwe kumitwe yabo. Ndilyonya boonse bayooziba kuti taziwo ezyo zintu nzobakaambilwa aanduwe, pele kuti ayebo omwini uenda kabotu akubamba mulao. 25Kwalo kumakani aabamasi abakasyoma, twakalemba akubeteka kuti balikasye kuzintu izipailwa mizimo, akubulowa, akulizisinwa, akumamambi. 26Mpoonya awo Paulo wakatola baalumi abo, nobwakaca wakalisalazya antoomwe ambabo, wakanjila muntempele, waamba kumana kwamazuba aakulisalazya, mane kwapailwa cipaizyo caumwi umwi wabo.

Paulo mbwaakajatwa

27Nokwati kamane mazuba ayo aali musanu mwaabili ba-Juda baku-Asiya nobakamubona muntempele, bakabusya bantu boonse, bamujata, 28baloompolola kuti, Nobaalumi ba-Israyeli, amuzoogwasye. Ngooyu uuiisya boonse kumasena oonse, kuti bapambane abantu, amulao, abusena buno, Alimwi waleta aba-Helene muntempele, wabisya busena obu busalala, 29Nkaambo bakalibwene kale Trofimo waku-Efeso ngwaakali awe mumunzi, ngobakacita anga kuti Paulo nguwakamuleta muntempele. 30Mpoonya munzi woonse wakanyongana, bantu bakalundumukila amwi, bajata Paulo, bamukwelela anze lyentempele. Ndilyonya yakajalwa milyango. 31Nobati kamujaye, kwakaambilwa musolozi mupati wabasilumamba kuti Jerusalemu woonse ulipyopyongene. 32Ndilyonya wakatola basilumamba abasunguli, wabazuzaanina, nobakamubona musolozi mupati abasilumamba bakaleka kumuuma Paulo. 33Nkabela musolozi oyo mupati wakaswena, wakamujata, walailila kuti aangwe enketani zyobile, wabuzya kuti nguni, na ncinzi ncaakacita. 34Kwalo bamwi bakoompolola cimwi, abamwi icimbi mukati kamakamu makamu aabantu, eno mbwaakakakilwa kuzibisya nkaambo kakuyoba, wakalailila kuti atolwe mukati. 35Naakasika acitantilo, wakatembekwa basilumamba nkaambo kakutonkana kwabantu. 36Nkaambo kwakatobede makamu makamu aabantu, baloompolola kuti, Azwe!

Mbwaakalikazizya kumakamu aaba-Juda

37Eno Paulo naati kanjizigwe mukati, wakakumbila musolozi mupati kuti, Nkoondyaambe cintu kulinduwe. Walo wakati, Sena ulicizi ci-Giriki? 38Sena toli mu-Egepita ulya uwakabusya lupyopyongano kumazuba aakainda, akusolwedela munkanda baalumi bajayi abakali makumi one eemyaanda? 39Paulo wakati, Mebo ndili mu-Juda waku-Tarso wamu-Kilikiya, muntu wamumunzi uujisi mpuwo. Eno ndakumbila, kondizumizya kuti ndyaambe kubantu. 40Naakazumizigwa, Paulo wakaima acitantilo, watambika janza kubantu. Nobakaumuna boonse, wakaamba mumwaambo waci-Hebrayo wakati:

Currently Selected:

Incito 21: Ibbaib63

Highlight

Copy