Incito 14

Mbobakacita ku-Ikoniyo

1Mu-Ikoniyo bakanjila amwi mucikombelo caba-Juda, kukukambauka kwabo banji ba-Juda aba-Helene bakasyoma. 2Pele ba-Juda basicinguni bakabusya myuuya yabamasi, babatongaukizya mane babisizya babunyina. 3Nkaambo kaako bakaakukala oko ciindi cilamfu, balakambauka ecamba mu-Mwami, walo wakazibya kusinizya kwejwi lyaluzyalo lwakwe, kukupa kuti zitondezyo amalele acitwe kumaanza aabo, 4Pele bantu bamumunzi bakaandaana, bamwi bakali kuba-Juda, bamwi kubaapostolo, 5Nkabela bamasi, antoomwe aba-Juda abami babo, nobati kababukile kubapenzya akubafusa mabwe, 6bakaakuziba, batijila ku-Lustro aku-Derbe, minzi yamu-Lukaoniya, akucisi cizingulukide, 7oko bakambauka Makani Mabotu.

Paulo mbwaakaponya muntu uutyokede. Ba-Lukaoniya mbobakayanda kupaila baapostolo

8Eno ku-Lustro kwakali mwaalumi uwatakali kujisi nguzu kumaulu aakwe, wali kutyokede kuzwa mwida lyabanyina, taakwe naakali kweenda pe. 9Oyo wakamumvwa Paulo ulaamba, walo naakamulangisisya akubona kuti ujisi lusyomo lwakuponyegwa, 10wakati ejwi pati, Ima cakoololoka amaulu aako. Mpoonya wakasotoka, weendeenda. 11Nkabela makamu makamu aabantu nobakabona ncaakacita Paulo, bakoompolola muci-Lukaoniya bati, Mizimo yatuselukila eziimo zyabantu, 12Eno Barnaba bakamwaamba kuti ngu-Jupitere, a-Paulo kuti ngu-Merkuri, nkaambo ngowali kwiinda kukukambauka. 13Nkabela mupaizi wacikombelo ca-Jupitere, icakali kumbele lyamunzi, wakaleta basune engala zyamalangalanga kumilyango, kuti apaile antoomwe amakamu makamu aabantu. 14Kwale baapostolo, ba-Barnaba a-Paulo, nobakamvwa obo, bakazapaula zyakusama zyabo, basotokela mukati kabantu, baloompolola, 15bati, Nobaalumi, ino mucitilanzi zintu ezi? Aswebo tuli bantu buyo mbuli ndinywe, tumukambaukila Makani Mabotu kuti muzileke ezi zintu zyabuyo, musandukile kuli-Leza uupona, uwakacita ijulu enyika, alwizi, azintu zyoonse izili mumo, 16Kuciindi cakamana wakaleka masi oonse kuti aende muziyanza zyao. 17Nokubaboobo takalekede kulilungulula walo, mbwaakacita kabotu akumupa imvula eziindi zyazilyo izizwa kujulu, wazuzya myoyo yanu kulya akubotelwa. 18Bakaamba majwi aya, nokubaboobo kwakacili kuyumu kukasya makamu makamu aabantu kuti batabapaili.

Paulo mbwaakafuswa mabwe ambobakapilukila ku-Antiokeya

19Kwalo kwakasika ba-Juda abakazwa ku-Antiokeya aku-Ikoniyo, bakabasungilizya abo bantu, bafusa Paulo mabwe, bamukwelela kunze amunzi, bayeeya kuti wafwa, 20Pele basikwiiya nobakacili kwiimvwi mumbali lyakwe, wakabuka, waima wanjila mumunzi. Nobwakaca bakainka a-Barnaba ku-Derbe, 21Nobakakambauka Makani Mabotu kulooyo munzi akusandula basikwiiya banjibanji, bakabweeda ku-Lustro, aku-Ikoniyo, akuAntiokeya. 22Bali kuya buyumya myoyo yabasikwiiya akubalaya kuti bajatisye kulusyomo bati, kumapenzi manjimanji inga tulanjila mu-Bwami bwa-Leza. 23Mumbungano zyoonse nobakabasalila bapati, akukomba mukuliimya kulya, bakababika ku-Mwami ngobali kusyomede. 24Nkabela bakaandulula mu-Pisidiya, basika ku-Pamfuliya, 25Nobakakambauka makani ku-Perge, bakaselemukila ku-Ataliya, 26kuzwa oko bakaboola ku-Antiokeya abwaato, nkobakapedwe kuluzyalo lwa-Leza kuya kumulimo ngobakamanide. 27Nobakaakusika bakabunganya mbungano, babalungulwida zyoonse Leza nzyaakabacitila, akuti wakajulila bamasi mulyango walusyomo. 28Eno bakakala abasikwiiya ciindi cilamfu-lamfu.

Currently Selected:

Incito 14: Ibbaib63

Highlight

Copy