ROMANOS 12

Oporogüɨrovia vae reta jeko

1Jáeramo, cherɨvɨ reta, pomoñera Tumpa iporopareko rupi, pemee chupe perete, mɨmba oyeyukagüe Tumpa pe oñemee rami, peñeñono tee chupe, jae omboyerovia vae. Echa jupi ko körai añetete rupi pemboete vaerä Tumpa. 2Agüɨye mo peiko añave ipɨa jemimbota reño yogüɨreko vae rami. Peipoepɨ peyemongeta, oyepoepɨ vaerä vi peikogüe vae jare peikuaa vaerä Tumpa jemimbota re; jae ko ikavi yae vae, omboyerovia vae, jaekavi yae vae.

3Tumpa ipɨakavi rupi oñemee cheve vae rupi jae peve kuae: Agüɨye kia ave toyemongeta iyé tuicha yae ko vae, jókuae güɨnoi vae güi. Ërei metei ñavo toyemongeta kavi iyé Tumpa omee chupe mborogüɨrovia rupi vae re. 4Echa metei yanderete re ñanoi jeta mbaembae, ërei mbaetɨ metei vae ave oyovake iparavɨkɨ; 5jökorai ko yande, yepe tëi jeta yae, ërei yayeapo ma metei jeteño Cristo re, jare opaete vae ñaï metei ramiño ïru reta ndive.#1 Co 12.12.

6Tumpa ipɨakavi rupi omee yandeve mbaepuere oyoavɨ avɨ vae yandepoki vaerä. Mbaepuere güɨnoi Tumpa iñee omoërakua vaerä vae, tomombeu mborogüɨrovia oñemee chupe rupi; 7mbaepuere oyeokuai vaerä vae, toyeokuai kavi. Oporomboe vaerä vae, toporomboe kavi; 8oporomboarakuaa vaerä vae, toporomboarakuaa kavi. Mbae ipuere omee ïru vae pe vae, tomee ipɨa yerovia reve kavi. Tenondeguarä oï vae, toporookuai kavi. Oporomborɨ vaerä vae, toyapo oyerovia reve.#1 Co 12.4-11.

Oporogüɨrovia vae reta kërai yogüɨreko vaerä

9Peyoaɨu añetetegüe rupi. Pemotareɨ ikavimbae vae, pemomoe ikavi vae. 10Peyoaɨu oñoëtara ete vae reta rami. Pemae kavi oyoe peyomboete reve.

11Peparavɨkɨ peakɨmbae reve. Peräta ngatu avei peyeokuai yandeYa pe.

12Peäro yandeYa peyerovia katu reve. Pepɨaguasu peiporara yave. Peyerure avei Tumpa pe.

13Oporogüɨrovia vae oata mbae re vae pemborɨ. Pemboresive kavi mboupa.#Heb 13.2; 1 P 4.9.

14Peñee kavi, ikavimbae oyapo peve vae reta kotɨ.#Mt 5.44; Lc 6.28. Peñee kavi, agüɨye peyepopeyu jese reta.

15Pevɨa katu, ovɨakatu vae reta ndive. Peyaeo, oyaeo vae reta ndive.

16Metei ramiño peiko oyoupii. Agüɨye peyembotuicha, jaeño peyea iparavete vae reta ndive. Agüɨye pearakuaa yae pemae peyé.#Pr 3.7.

17Ikavimbae vae oyapo peve vae pe, agüɨye pemboekovia ikavimbae vae pe. Peeka peyapo ikavi vaeño opaete vae jovake. 18Pepuere rupi peiko kavi mbɨakatu rupi opaete vae ndive. 19Cherɨvɨ reta, agüɨye pe etei peeka peyepɨ vaerä mbae ikavimbae vae oyapo peve vae kotɨ. Pemaeño Tumpa toiporarauka chupe.#Dt 32.35. Echa oyekuatía oï körai: “Oiporarauka vae ko che. Che tamboekovia chupe.” 20Jayave, oyovaicho ndekotɨ vae iyɨmbɨaɨ yave, emee tokaru. Jare iɨuve yave, emee toɨu. Echa jökorai yave, jova pɨ̈tata imara güi.#Pr 25.21-22. 21Agüɨye eñemoamɨriuka ikavimbae pe. Jaeño ikavimbae emoamɨri ikavi vae rupi.

Currently Selected:

ROMANOS 12: GUABD

Highlight

Copy