ROMANOS 10
10
1Cherɨvɨ reta, añetete chepɨa pe aipota yae jare ayerure Tumpa pe vae ko Israel pegua reta oyemboasauka vaerä. 2Echa chepuere chemiari jesegua reta, kërai jae reta ikɨ̈reɨ yae oyeokuai tëi Tumpa pe, ërei mbaetɨ añete vae oikuaa kavi reve. 3Echa mbaetɨ oecha reta Tumpa iporombojupi, oeka reta kërai jae aeño oyembojupi vaerä. Mbaetɨ oyeko reta Tumpa iporombojupi re. 4Echa Cristo re opa ma oyembopo Moisés iporookuai, opaete oporogüɨrovia vae reta oyembojupiuka vaerä.
5Echa mborookuai rupi oyembojupi vae regua Moisés oikuatía körai: “Kia nunga oyapo kuae mbaembae vae, oikoveta.”#Lv 18.5. 6Ërei mborogüɨrovia rupi oyembojupiuka vae re Tumpa jei körai: “Agüɨye ndepɨa pe ere: ‘¿Kia ra oyeupita ara pe?’ (Kuae ko güeru vaerä ɨvɨ pe Cristo), 7ani agüɨye vi ere: ‘¿Kia ra ogüeyɨta ɨvɨkua guasu pe?’ (Kuae ko güeru vaerä Cristo omanogüe reta ipɨte güi.)” 8Ërei Tumpa ¿mbae pa jei?: “Cheñee köiño oï ndegüi.#Dt 30.12-14. Ndeyuru pe jare ndepɨa pe.” Jae ko kuae ñee mborogüɨrovia pegua romoërakua ïru vae reta pe vae. 9Nde rere yave Jesús, jae ko yandeYa, jare rerovia ndepɨa pe Tumpa omoingove ye omanogüe reta ipɨte güi yave, reyemboasaukata ko. 10Echa yandepɨa ndive ko yaroviata, yayembojupiuka vaerä, ërei yandeyuru pe ko yae yayemboasauka vaerä.
11Echa Tumpa Iñee pe jei körai: “Opaete güɨrovia jese vae, ngaraa oñemomaraiuka.”#Is 28.16. 12Echa judío jare judiombae vae ndive Tumpa mbaetɨ ko omboyoavɨ. Echa yandeYa ko jae opaete vae iYa, jare jae omee jeta, oyerure chupe vae reta pe. 13Echa opaete oyerure yandeYa jee re vae oyemboasaukata ko.#Jl 2.32. 14Ërei ¿këraita pa oyerure yandeYa pe, mbaetɨ yave güɨrovia jese?, jare ¿këraita pa güɨrovia, mbaetɨ yave oendu jesegua?, jare ¿këraita pa oendu, mbaetɨ yave kia omombeu chupe? 15Jare ¿këraita pa kia omombeu chupe, mbaetɨ yave kia oyemondo? Echa oyekuatía oï körai: “Ipöra yae ko yogüeru oväe ñee mbɨakatu pegua omombeu vae reta.#Is 52.7. Ñee ikavi vae omoërakua vae reta.”
16Echa mbaetɨ opaete oendu ñee ikavi vae, Isaías jei rami, echa jei: “CheYa, ¿kia ra güɨroviata romoërakuagüe re?”#Is 53.1. 17Echa, yaendu vae rupi ko, yaporogüɨrovia. Jare yaendu vae ko, Tumpa iñee.
18Ërei taparandu: ¿Oenduä etei ra? ¡Oendu reta tëi ko! Echa Tumpa Iñee pe oyekuatía oï körai:
“Opaete rupi ojo iñee reta,#Sal 19.4.
opaete ɨvɨ iyapɨ rupi ojo oväe iñee reta.”
19Taparandu ye: ¿Mbaetɨ ra oikuaa Israel pegua reta? Echa tenonde voi Moisés jei körai:
“Pomoägüɨroukata tëta mbaetɨ chembae vae rupi.”#Dt 32.21.
20Jare Isaías jei vi oipoɨumbae reve körai:
“Mbaetɨ chereeka vae reta cheväe,
ayekuaauka mbaetɨ oparandu cheré vae reta pe.”#Is 65.1.
21Jare Isaías jei vi Israel pegua reta re körai: “Ara ñavo arökuavee tëi chepo tëta ipɨapochɨ jare iñeereendumbae vae pe.”#Is 65.2.
Currently Selected:
ROMANOS 10: GUABD
Highlight
Share
Copy
Want to have your highlights saved across all your devices? Sign up or sign in
Biblia DC Guaraní Bolivia © Bolivian Bible Society, 2001.
