Mataio 2

Ta Mitema sou Lavulavu no Aso Uxali Utelo Ane'i Mine'e sou Imaisou Iesu

1Malia mivo'onu Iesu no tuala ne Vetiliemu, no xalee lia tila ne Iutaia, no voxo ane Elodesi muxolu tatananu tuala. Ane mivo'onu Iesu mukalu xe ili'i la ta mitema sou lavulavu me'a no aso uxali utelo mine'e ne Ielusalemu. 2#Iti 24:17La ane'i mitalitali'i aloxo 'o. “Molomolo e muxali lexe anu tatananu tuala ne Iutaia ne Anu muxolu 'ava? Xo nengi temaisou oto sou no xalee mutelo no anu aso uxali utelo, la sou nexi tene'e sou talotu ulai noxou.” 3Xe Elodesi tatananu tuala mulomu aloxo ne la anu muxavutala piena no anu, mo ta mitema ne Ielusalemu kalumo. 4La sou Elodesi muavuti la mu'avali'a ta kisi'a ta aili'i xe ta mitema sou lavulavu no 'a lapuloto ne Isilaeli mine'e mipita sou mutali'isi'a lexe mivo'onu Kalisito a ne'ei? 5Ane'i mikolinu lexe, “Ne Vetiliemu no xalee lia tila ne Iutaia. Xo ta mitema sou palomatana mikaukavu aloxo.

6 # Mai 5:2; Ioa 7:42 ‘Nini ta mitema ne Vetiliemu no xalee lia tila ne Iutaia,

nini naxavutala lexe nini mii vitanisi no iei tatananu tuala ne Iutaia uasi.

Xo tila uxali noxine, sou usaxila'a ta mitema noxilo ne Isilaeli.’”

7Xe Elodesi musova anaxu mulai noxi'a ta mitema sou lavulvavu ne la mitalumesi, la milai noxou sou ulavusou laixe noxi'a lexe oto ne muxali a talu. 8La sou anu mupalusi'a milai ne Vetiliemu, la muvikalane'i aloxo 'o. “Ngingi ngalai la ngakamuli molomolo ne laixe. Lexe ngingi naxali sou ukalu la sou ngasovanu vaikala ulivu une'e noxilo. Mo eni kalumo alai alotu noxou.” 9Xe ane'i milomusou vaikala noxou tatananu tuala ne mukalu, la sou ane'i milai. Ane'i mimaisou oto loxo ane'i mimaisou te'i no aso uxali utelo, oto ne muulaxune'i mulai mutulu muisalili teitexi no tani e molomolo ne muai no anu. 10Xe ane'i mimaisou oto aloxo ne la mi'osa manina. 11#Lex 72:10-15; Ais 60:6La ane'i mi'unalai no tani, la mimaisi'a keakea ilee nenu Malia, la mixola'u tava'a vo'uxu mo mitangatulu mulu'elai no lia sou milotu mulai noxou keakea. Ane'i mino'u mimii e loxo xoulu, xe ueli, xe avuavu e tuma'u laixe sou milolovolo mulai noxou. 12Xe miai no 'olovoxo la miai pipiena lexe Lataua muvikalane'i lexe mamu sou ngingi ngalivu ngalai noxou Elodesi, la sou ane'i mimulinu vote'i vileli sou milivu milai no tualasi'a.

Iosepu Ilee Semau Mo Keakea Mivula Milai ne Aixiputo

13Ane'i milivu mukalu, la sou Iosepu muai pipiena lexe angelo noxou Tila muxali noxou la muvikalanu aloxo 'o. “Natulu mo nano'a keakea ilee nenu mo ngavula ngalai ne Aixiputo. Ngaxolu ne ulai uxali no anu voxo ane lexe eni avikala neni. Xo Elodesi anu ukamulinu keakea ne sou lexe uvau usoli.” 14Anu muavuti la muvulane'i keakea ilee nenu no 'olovoxo la ilo'a milai ne Aixipto, 15#Ose 11:1La ilo'a milai mixolu ne mutalo no voxo ane Elodesi musoli, la mimii ane ne anu mumomosou vaikala vile Tila muxalixu te'i no anaxu itema sou palomatana vile ne muvikala aloxo 'o, “Eni a'avalou alixeni uatu ne Aixipto.” 16Xe Elodesi mulavu lexe ta mitema sou lavulavu no aso uxali utelo 'ole ne mikalavoinu, la anu la'iaxu misevile la anu mupalusi'a ta mitema sou 'oto'oto noxou milai no tuala tila ne Vetiliemu. La muvikalane'i aloxo 'o. “Ngalai no tuala tila mo ngave'ave'a ta molomolo ta mulu e tauu iexa'a muxali loxo tamei mo ulu'e isoisoli.” Xo anu xavutalau lexe u'vea ta molomolo ta kitukitu e ta neni'a mi'vo'one'i no voxo ane ne. Umomomo loxo anu mutali'isi'a ta mitema sou lavulavu lexe voxo ane vaa ne oto muxali no anu. 17La sou mimii ane ne umomosou vaikala noxou Ieremaia itema sou palomatana mulemolu aloxo 'o.

18 # Tav 35:19; Iel 31:15 “Tama tila mo imatengalei ilomu sou uxali no tuala tila ne Lama.

Ia Lakeli itatamasi'a ta 'ili'e misoisoli.

La ane imasaxa lexe ta mitema ixolixoline uasi.

Xo ta 'ili'e tavu'alo ne ixolu uasi.”

Iosepu Ilee Semau mo 'Ili'a Milivu

19Ili'i no voxo e Elodesi musoli mukalu, la Iosepu muxolu ne Aixiputo. Anu muai pipiena lexe angelo noxou Tila muxali noxou la muvikalanu aloxo 'o. 20“Nini natulu, mo nano'a molomolo ilee nenu 'o mo nalivu ulai ne Isilaeli. Xo ta mitema imasaxa lexe iva'u keakea ne a misoisoli mukalu.” 21Iosepu muavuti la muno'a keakea ilee nenu milivu milai no tuala tila ne Isilaeli. 22Anu mulomu lexe Akelao muno'u tanixu momu Elodesi sou usaxila'a ta Iutaia. Iosepu mumama'u sou lexe ulai no xalee ane ne. La Lataua muvikalanu no anu aipiepiena lexe nalai no tuala tila ne Xalilaia. 23#Ais 11:1; 53:2; Luk 2:39; Ioa 1:45La sou anu mulai muxolu no tuala tila ne ilemolu lexe Nasaleti. 'Ilixo ane ne mumomosou vaikala noxi'a ta mitema sou palomatana lexe, “Ane'i ilemolu lexe itema si'e Nasaleti.”

Currently Selected:

Mataio 2: ataNTpo

Highlight

Copy