Aposeli 13

Misosovosi'a Valunavasi Ilou Saulo sou Mipalusi'a Milai Mia'aloxu Vaikala Noxou Lataua no Tuatuala

1Ioxe, ta mitema ane ane'i mimuxaxu tane'i noxou Iesu e mixolu ne Antioki ne se'i ne ta mitema sou palomatana xe se'i ne ta mitema sou ilosi'a lavulavu sou 'ilixo laixe noxou Lataua. Vile noxi'a anu Valunavasi mo Simeoni e ualasou vile lexe Nixelu xe Lukio anu itema sie Kilene mo Saulo xe Manaeni. Manaeni ne ilou tatananu tuala Elodesi mivaitami no mine no molomoloxa'a. 2#Apo 9:15No mine ane'i ilo'a ta mitema ne mipita sou mipelemu mo milotu noxou Tila, la Uleenu Tavuna muvikalane'i aloxo 'o, “Ngakalipalane'i Valunavasi ilou Saulo mo ngaxexene'i ilou ixolu va'axu sou i'oxonu xaixai ane Eni e'avali'axu.” 3#Apo 6:6La sou ane'i mipelemu mo milingasi'a xe mi'italonu avo'a noxi'a ilou sou mialusi'a mukalu, la sou mipalusi'a ilou milai.

Valunavasi Ilou Saulo Milai Mixali ne Kipulosi

4No voxo ane ne, la Uleenu Tavuna muxolu noxi'a la mulutulixa'a ne Antioki sou milu'e no Selukia, la mitelo no anu lasipi mivaxa no la'olu ne Kipulosi. 5#Apo 12:12; 15:39No mine ane'i mixali ne Salamisi, la milai no taasou lalotu noxi'a ta Iutaia sou misoko mia'aloxu vaikalau Lataua. No voxo ane ne, la Ioanesi e ualasou vile lexe Maluko ne ilo'a kalumo sou musuuline'i ilou no anu xaixai. 6Ane'i mixixaoxao no nano no la'olu Kipulosi, xe mukalu, la sou ane'i miuatulai ne Paposi, la sou mixalisou itema vile anu itema sou aalu iouiou vile e ualasou lexe Balu-Iesu e itema si'e Iutaia ne anu itema sou palomatana kalakalavoi. 7Anu itema ane ne mulavusou ilou itema sou usaxila'u la'olu ane ne e ualasou lexe Seluxio-Paulo e anu itema sou lavulavu laixe. Anu mu'avali'a Valunavasi ilou Saulo milai noxou xo anu mumasaxa lexe ulomusou vaikala noxou Lataua. 8Ia itema sou lavulavu sou aalu iouiou ne ualasou vile no anu vaikala Xiliki lexe Elimasi ne mumasaxa lexe u'oxo pekia'usou xavutala noxou itema sou usaxila'u la'olu ne sou umuxamuxaxu tanu noxou Iesu uasi, la sou muvikala sou mu'oxo latolosi'a Valunavasi ilou Saulo. 9Ia Saulo e ualasou vile lexe Paulo ne Uleenu Tavuna mu'ana'ana noxou, la anu mumatakisou Elimasi ne la muvikalanu aloxo 'o, 10“Nini satani 'olu. Nini itema sou na'oxo masuanu mimii laixe. Nini ne'ana'ana no anu 'ilixo sou kalakalavoi ilou iisuiisu, mo nini namitema sou naxiuxiunu mii ane Tila mu'oxonu manina ne sou naxalixu uxali kalavoi. 11#Apo 9:8Mo namaisou vaimomo 'o si, la Tila xaviinu ulu'e noxine la ieni utomu mo namaisou lamana vile la uasi maxuveeni sevile.” Xe alaxu vilesisi 'o la mii e loxo tamuxala isivoxoxu ne mune'e mutomu iou, la sou anu mukamuli itema vile sou lexe usu'ulinu sou utetelisou no avolu mo usu'ulinu sou utilau. 12Ioxe itema sou usaxila'u la'olu mumaisou mii aloxo ne, la mukuluke no anu vaikala Tila la sou xavutalau muavuti sou mumuxamuxaxu tanu noxou Tila.

Valunavasi Ilou Paulo Mia'aloxu Vaikala Noxou Lataua ne Antioki Ane Muxolu no Nano no Tuala Xalee Tila Pisitia

13 # Apo 15:38 Paulo ilo'a ta mitema e mimulinu ne mutelo no lasipi me'a ne Paposi milai ne Peluxa ane'i mixolu no nano xalee lia tila ne Pamfulia, la Ioanesi e ualasou vile lexe Maluko ne mu'umesi'a a lai ne sou mulivu mulai ne Ielusalemu. 14Io ane'i me'a ne Peluxa ne mole milai mixali ne Antioki anu muxolu no nano no xalee lia tila ne Pisitia. Xe no voxo Tavuna, la ane'i milai mi'una no taasou lalotu noxi'a ta Iutaia sou mixolu no lia. 15Ioxe ane'i miitisou Lavuku sou lapuloto noxou Mosesi xe vaikala ane ta mitema sou palomatana mikaukavunu. La ili'i sou ta tatila no 'a taasou lalotu noxi'a ta Iutaia ne mipalusou itema vile sou mulai muvikalane'i Paulo ilou Valunavasi aloxo 'o, “Ta vivixe, nexi tamasaxa lexe ngingi ngane'e mo lexe mengi vaikala mose'i lailaixe, la ngapeletotosi'a ta mitemamexi no anu.” 16La Paulo mutulu la mutolosou avolu mulai noxi'a ta mitema sou lexe ixolu tasiau xo anu uvivikala. La sou anu musoko sou muvikala aloxo 'o, “Ngingi ta mitema sie Isilaeli, mo ngingi ta mitema ane ta Iutaia uasi ia ngalavusou ngalolotu ulai noxou ne, ngingi ngalomu une'e noxilo. 17#Mul 1:7; 6:6; 12:51Ngingi ta Isilaeli Latauamengi xo Anu musosovosi'a ta 'ilu'ilusungengi mukalu, la mu'oxone'i sou milai mixolu ne Aixiputo mole mixali ta piena misevile, xe mukalu la sou anu molu mulivunixa'a no Anu xavi noxou sou milaa ne Aixiputo. 18#Iti 14:34; Lap 1:31-32La Anu mutavule tu'umaxu no anu 'ilixo noxi'a mo musaxila'a mumomomo loxo tauu ie itemaxu tamei no nano no xalee lia vitanisi. 19#Lap 7:1; Ies 14:1Xe Anu muavuti, la mualivulane'i ta mata muxatele tamei ne Kanani. Io mu'italonu lialia ane ne noxi'a ta mitema ne Isilaeli. 20#Kis 2:16; 1Sa 3:20La sou mimii ta piena muxali no nano no anu tauu ie itemaxu mavulovexa tamei mo mavulovexa ta'uve (450). Xe ili'i no mine ta Isilaeli mino'u lialia ane ne mo mixolu no anu mukalu, la sou Lataua molu musosovosi'a ta mitema ane sou lexe itulu ta kisikisi'a sou iulaxune'i ne mulai mutalo no mine itema sou palomatana Samueli muxali.

21 # 1Sa 8:5, 19; 10:20-24 Xe ta mitema miavuti la milinga sou itema vile sou uxali loxo ane'i i'a motuxu tuala vile. La sou Lataua mulosi'a Saulo e Kisi 'olu xe anu no anu mata noxou Beniamini. La anu muxali mutuxu tuala noxi'a la muxolu musaxila'a mumomomo loxo tauu ie itemaxu tamei. 22#1Sa 13:14; 16:12; Lex 89:20Ia Lataua muavuti la, la muxexeenu, io musosovosou Deviti sou muxali mutuxu tuala noxi'a. Xe Anu muavuti la muvikala lamana noxi'a aloxo 'o, ‘Eni exexeenu Saulo io esosovosou Deviti anu Iesi 'olu ne anu itema vile e Eni elavusou opoonu lexe ulai la anu umulimuli masaxa noxilo ukalusi.’ 23#2Sa 7:12-16La sou Lataua mulosi'a ta Isilaeli Iesu itema sou pamauli ne loxo musakiinu vaikalasou. Lexe itema sou pamauli uxali noxou Deviti. 24#Mat 3:1-2La sou no mine Iesu uxali uao, la Ioanesi e itema sou u'ulosinge mua'alo la muvikalane'i ta mitema sie Isilaeli lexe ixiu opone'i mo ixiu tumaliau 'ilixo masumasua noxi'a mo sou anu Ioanesi u'ulosi'a. 25#Ioa 1:20, 27No voxo ane Ioanesi sou ukalusou xaixai noxou, la anu mutalisi'a ta mitema aloxo 'o, ‘Ngingi ngemaisilo la ngexavutala lexe eni 'ena'ei io? Eni itema e ngingi ngaxoxomaiou Anu a eni 'o uasi. Ia ngingi ngalomu Anu itema ne ili'i xe une'e la eni amomomo sou alulusou lamota sou siovesou tava'u uasi, xo eni amitema vitanisi.’ 26Ioxe, ngingi ta vivilo e ngingi Avalaamu ta 'ilu'ilusunu, xe ngingi ane ta Iutaia io ngemama'u noxou mo ngetoxonu, ngingi ngalomu, vaikala sou mauli mune'e noxinge muisalili. 27Ia ta mitema ilo'a ta tatila ane'i ane mitulu loxo ta kisokisou tuala tila ne Ielusalemu ilavusou Iesu loxo Anu itema sou pamauli uasi. La mivau musoli. Ia ane'i mi'oxonu aloxo ne la mumomomo sou vaikala noxi'a ta mitema sou palomatana milemolu tei e ane'i iitisou mo ilomusou no voxo Tavuna utotomu. 28#Mat 27:22-23Ixalisou susu vile noxou sou ivau usoli no anu uasi, ia ane'i xavine'i vitanisi sou mivikalanu Pilato lexe uvau Iesu usoli. 29#Mat 27:59-60Ane'i mi'oxo aloxo ne noxou sou mimomomo sou mimii ane muai no nano no anu Lavuku Tavuna teinu. Mukalu, la sou ane'i milaxanixu teitexi no ovu valautu sou milu'e mimulaxu no anu lulu. 30Ia Lataua mutulusou no anu lulu sou soli la mumauli. 31#Apo 1:3, 8Ili'i no anu la ta mitema ukalusi e ilo'a Iesu mimuamua'i no vote'i me'a ne Xalilaia sou mitelai ne Ielusalemu mimaisou no voxo ta pieana. 32Ioxe la sou mii e nexi taa'alomengi a'alo laixe no anu 'o ne nexi taa'alomengi sou itema e Lataua musakiinu vaikala sou noxi'a ta 'ilu'ilusunenge tatei lexe upalusou une'e sou ulivulinenge. 33#Lex 2:7Aloxo ne, la sou Anu mutulusou Iesu no 'a lulu sou soli sou lexe umomomo sou vaikala ane Anu musakinusinge noxi'a ta 'ilu'ilusunenge tatei. Vaikala sou mii ane ne mikaukavunu muai no nano no anu Lavuku sou Lexe tameisou muvikala aloxo 'o, ‘Nini ne nini 'alixeni. Vaimomo 'o Eni axolu loxo Eni Mamine.’ 34#Ais 55:3Aloxo ne, la sou anu Momu ne mutulusou no anu lulu sou soli, mo uai u'ui no anu lulu ne uasi. Anu muvikala aloxo 'o, ‘Eni emasaxa lexe aalusine no anu aalu iou vilesisi aloxo Eni ealusou mutuxu tuala Deviti. Aalu ane laixe anu uxali manina.’ La sou mii ane Anu mulemolu ne muxali manina loxo Anu musakiinu vaikalasou. 35#Lex 16:10La sou vaikala vile kalumo muxolu no anu Lavuku sou Lexe muvikala aloxo 'o, ‘Nini umomomo sou namalanixu Itema sou xaixai noxine e malemalenga ne uai u'ui no nano no lulu ne uasi.’ 36Ioxe la sou nenge telavusou lexe Deviti ne no mine uao mumauli mo muxoxolu no lia 'o, la anu itema sou umulinu masaxa noxou Lataua mo anu u'oxo xaixai laixe manina. Ia ili'i no mine anu musoli, xe miasixu no anu lulusi'a ta 'ilu'ilusunu, la vasimolu ne muai mu'ui no nano no lulu ne. 37Io Itema ane ne Lataua mutulusou no anu lulusou soli, la vasimolu uai u'ui no lulu ne uasi. 38Aloxo ne la sou ta vivilo eni emasaxa lexe ngingi ngalavusou laixe aloxo 'o, no anu soli noxou Iesusi la anu muxexeenu susu noxinge aloxo nexi tea'alomengixu. 39#Rom 10:4Io lapuloto noxou Mosesi ne umomomo sou uxexeenu 'ilixo masumasua noxinge sou ngaxali ngaisalili uasi. Ia Anu itema ane ne si Anu mumomomo sou uxexeenu 'ilixo masumasua noxi'a ta mitema ane'i ane imuxamuxaxu tane'i noxou, la sou Anu uleme'a lexe ta mitema lailaixe. 40La sou ngingi ngaxaxai laixe, xo loxo 'o io mii e ta mitema sou palomatana milemolu tatei ne uxali u'oxo masuangengi.

41 # Ava 1:5 ‘Ngingi ta mitema e ngamolovila'isou Lataua.

Xe ngakuluke, mo ngasoli.

Xo Eni a'oxonu mii vile uxali no nixi noxinge.

La sou lexe itema vile uvikalangengi no anu mii ane lexe Eni a'oxonu ne,

la ngingi ngamuxaxu tangengi no anu uasi.’”

42No mine Paulo mua'alo mukalu xe ilou Valunavasi milaa no taasou lalotu noxi'a ta Iutaia, la ta mitema mitalisi'a ilou sou lexe no Voxo Tavuna ane ili'i la, ilou ilivu ine'e la sou ia'aloi'a la no anu vaikala ne. 43Ili'i no mine ane'i milaa no alalotu, la ta mitema ta Iutaia ta piena xe ta mitema ane'i ane ta Iutaia uasi io imulinu lalotu moxi'a ta Iutaia sou ilo'a ta Iutaia milotu mipita no taasou lalotu noxi'a ta Iutaia ne mimuline'i Paulo ilou Valunavasi. Sou ilou mipeletotosi'a sou lexe itulu pekia'a aloxo ne si no anu alauna noxou Lataua.

44Xe ili'i no anu Voxo Tavuna ane ne, la sexasisisou ta mitema ukalusi no anu tuala tila ane ne mine'e mipita sou milomusou vaikala noxou Tila. 45Ioxe no mine ta Iutaia mimaisou lexe ta mitema ta piena musuku milomuxu vaikala noxou Tila, la sou ane'i opone'i masuau Paulo xe mivikala tumalou noxou xe mivikala masumasua no anu a'alo noxou kalumo. 46#Apo 3:26; 18:6Aloxo ne, la sou Paulo ilou Valunavasi mivikala pekia'u io i'ume uasi ia ilou mivikalane'i aloxo 'o, “Vaikalau Lataua ne tanixu lexe taa'aloxu tei a noxinge ne. Ia xo ngingi ngexiunu tumalingeu, la iou loxo ngingi ngexavutala lexe ngano'u mauli ane kaluxusou uasisi uasi. La sou ngingi ngalomu. Nexi noxou vaimomo 'o taxiu ulai noxi'a ta mitema ane'i ane ta Iutaia uasi. 47#Ais 49:6Xo Tila mupalusixe la muvikala aloxo 'o,

‘Eni apalusine sou nalaixu lamana ane 'o noxi'a ta mitema ane'i ane ta Iutaia uasi.

Mo sou ta mitema ukalusi no lialia 'o ino'u mauli ane kaluxusou uasi.’”

48Xe ta mitema ane'i ane ta Iutaia uasi ne milomusou vaikala ane ne, la ane'i mi'osa mo miitinu Tila ualasou sou vaikala noxou. La sou ta mitema ta piena e Lataua musosovosi'a sou lexe ino'u mauli ane kaluxusou uasi ne mixali ta mitema sou imuxamuxaxu tane'i. 49Aloxo ne, la sou vaikala noxou Tila mutaasou xalee lia tila ane ne mukalusi. 50Xe ta Iutaia la'iaxa'a la sou mi'una tane'i noxi'a ta sema e ualasi'a tatila ane'i ane milavusou ilotu noxou Lataua mo ta kisokisou sou xalee lia tila ane ne. La sou ane'i miavuti sou mi'oxe ive'ave'a Paulo ilou Valunavasi sou mikusai'a milai va'axu no xalee lia tila noxi'a. 51#Mat 10:14; Apo 18:6Xe ane'i ilou miavuti, la mivutasou lomulo no tava'a mulai noxi'a io ilou mixililiie'i ia milai ne Ikonia. 52La ta mitema ane'i ane mimuxaxu tane'i noxou Iesu ne mixamulinu 'osa'osa mo mi'ana'ana no anu Uleenu Tavuna.

Currently Selected:

Aposeli 13: ataNTpo

Highlight

Copy