Matiu 28

E Iesu e takei pouts ia tara tou mate i tanen

(Mak 16:1-10, Luk 24:1-12, Jon 20:1-10)

1I murina te kapaia u Lan u Göagono, tara bongbong koru turu Sanrei, be Maria Matalina na taina Maria e lar tegina tara menaien a kioun mate. 2Ba nun a tagala e songots gasina, taraha a angelo tara Tsunono e lama i Kolö me hategele ba nena a hatu, me gumna ielunen. 3A matanen e alesala herei u kanaha, na u hasobö i tanen e hiaka herei u köasi. 4Ba u soldia e matout korur ba nori e toltololor me hererari u katuun u mate.

5Ba angelo e poeiena tara touhaliou, “Alimiou goma tatei matoutmi. Alia e atei silegu alimiou e sake miou e Iesu ti nila naia tara kuruse. 6Nonei ema ka neia teka. Nonei e takei pouts lala tara tou mate i tanen, temar ranga noahas uaien. La muma batemi taremiou a makum te opöien. 7Bora alimiou go la boroboro mula batena hatei ramiou u katunun tsitsilo i tanen, ‘Nonei e takei pouts hakapaia tara tou mate, na nonei e la mam ranou limiou i Galili. Tena tare moien limiou.’ Hakats naiam a ka te ranga mera gulei lia limiou.”

8Ba nori e la boroboro ba tuun ner a kiou, nori i matout kaba i ka noahas mei a nisasaala pan, me piata tunur tina hatei meraien u katunun tsitsilo i tanen. 9Be Iesu e sabe ranen i maroro me hatsi bongbong ranen. Ba nori e la uarima i tanen, memi pile ria i mounen me hatsunone ren. 10Be Iesu e poeiena i taren, “Ma matoutmi. La iam batena ranga meramiou a man hahatoulana i tar bate la uar i Galili, nori ena tare roa lia ili.”

U hahatei turu soldia

11Tara pöata ti la poutsia a touhaliou, ba a palair u soldia e la pouts uar tara taun mena hahatei rari u pris pan a manka hoboto te butu. 12-13Ba u pris pan e gono meraier u pal kapan me kitseier u ranga. Ba nori e hala rari u soldia a moni pan koru me poeier, “Alimiou egona mar ranga merami u katuun teka, ‘U katunun tsitsilo tere Iesu e la rima i bong memi koper u tuenrei i tanen tara pöata te soho mula lam.’ 14Na te hengo nanoa a gamman a ka teka, alam e tatei hale mien tu raranga tu niga, ba limiou te möa mou ta niomi.” 15Ba u soldia e lueier a moni me katoer a ka ti ranga meraien tegi katoeien. Na nonei u raranga teka ti hatei rai u Jiu hoboto nonei tara pöata bate la nama na e hatei noahas naren i romana.

E Iesu e butuia turu katunun tsitsilo i tanen

(Mak 16:14-18, Luk 24:36-49, Jon 20:19-23, Aposol 1:6-8)

16Ba u töa u maloto na töa tara katunun tsitsilo e la uar turu pokus i Galili te hatei raien e Iesu tegi la uaien. 17Ba nori e tareier e Iesu me hatsunone ren, kaba palai i tareien me hula hakatsir. 18Be Iesu e la hasukusuku uama i taren me poeiena, “E Sunahan e halei lia a nitsunono hobotona i Kolö na i puta. 19Bora, alimiou go la uaiam tara man hun katuun hoboto tara mamana han bate kato ramien u katunun tsitsilo i tar. Ba limiou te baptais ramen tara solona e Tamar na tara solor, a Pien Tson i tanen, na tara solo turu Namnamei u Göagono i tanen. 20Ba limiou te hatuts ramien tegi kukute menaien a mamanaka tu ranga merai lia limiou. Bate hakats namiou: alia e ka gono nitöa mera gou limiou e antunanoa tara kapakapana a pöata.”

Currently Selected:

Matiu 28: HLA 2020

Highlight

Copy