Matiu 15

U hihatuts tara lo na turu hatubuna

(Mak 7:1-13)

1-2Ba palair u Parasi na u tson hihatuts tara Lo i la uama i Jerusalem me la uarima tere Iesu memi rangate ren, “Taraha tsiponi ba u katunun tsitsilo i tamölö te hipus ner u hihatuts ti halan u katuun pan i tarara i manasa? Nori ema galus mameri a limaren bate töan nour!” 3Be Iesu e ranga palis ranen me poeiena, “Gaha tsiponi te hipus me na mi limiou u hihatuts tere Sunahan bate kukute miou u hihatuts turu katunura i manasa? 4E Sunahan e ranga me poeiena, ‘Hapaneiam u tamamilimiou na u tsinamilimiou. A katuun te ranga homi nena e tamanen tsi e tsinanen egi atung hamate korui.’ 5Kaba u hihatuts i tamilimiou e poeiena, ‘A katuun te ka mena a ka te tatei taguhena e tamanen tsi e tsinanen, nonei e tatei poeiena, A ka teka a ka tere Sunahan.’ 6Ba u raranga te poeiena, ‘Hapaneiam e tamamilimiou’ ema la uanei tara katuun teka. Temar ranga uami limiou. E markato uana teka, alimiou e roron hala putemiou u raranga tere Sunahan te kukute mena milimiou u hihatuts turu tubumilimiou. 7-8Alimiou u katuun u gamogamo! E propet Aisaia e ranga hamana koruia tara markato i tamilimiou, me poeiena,

‘U katuun teka e hatsunono tune ria lia turu ranga tuun i taren,

kaba i toriren na turu hakhakats i taren e ka halehana ba koru nariou lia.

9Nori e mastein hatsunone riou lia,

kaba nori e roron hihatuts ner a man markato turu katuun tuun,

bate poeier e hihatuts ner a man markato tere Sunahan!’ ”

A man ka te kato hakorkoriana hamana rena u katuun

(Mak 7:14-23)

10Be Iesu e ngö mera nei u katuun i tanen me poeiena, “Hengoiam, ba limiou te ateimiou! 11A ka te la uana i runguna katuun ema kato hakorkoriane nei a katuun. Kaba a ka lasi te lakasanama i runguna a katuun te kato hakorkoriane nen.” 12Ba u katunun tsitsilo e la uarima i tanen memi poeier, “U Parasi ema hanigeri u raranga te katoe mula lö ba nori e raharahar.” 13Be Iesu e poeiena, “Noahasina. U katuun teka e hereri u pulung u omi te ka ria tara kui tere Tamar. Nonei e pate baba ranoen. 14Nori e hererari u katuun u matakiou te peigiraier a palai. Ba tara pöata te peigena a töa katuun a matakiou a tana matakiou has ba nori te rus hoboto uar i kiou.”

15Be Pita e poeiena i tanen, “Alö go hatei ramei lam a ka te poeiena u haharuei te katoe mula lö.” 16Be Iesu e poeiena i taren, “Alimiou ema ka noahas memi ta niatei. 17Alimiou go atei sileiam, a mamanaka te tasuna i runguna katuun e la uana i torinen batena lakasa ba pouts banena u tuenrei. 18Kaba manka te lakasa nama turu rung e la nama i torina a katuun. Nonei a manka te kato hakorkorianena a katuun. 19Na manka man omi teka e la nama tara katuun: u hakats u omi na hipöli na tsikolo na kop na u ranga u gamo, na u tuts. 20A manka teka te kato hakorkorianena a katuun. Kaba tegi nou menai a kannou ualima u tabuna galus, a ka teka ema kato hakorkoriane nei a katuun.”

A nihamana tara töa tahol

(Mak 7:24-30)

21Be Iesu e la ba nena a han teka me la uana tara han turu katuun tema Jiu ri te sukusukuia tara man taun i Taia na i Saidon. 22Ba töa taholuna tara provins i Kenan te kaia tara han teka e la uana i tanen bena ranga hataatagina i tanen me poeiena, “O Tsunono, a Hatutubunei tere Devit! Alö go taatagi namou lia! U liliahanei u omi e karia tara pien tahol i tar!” 23E Iesu ema ranga töa nai tatsi töa tatsi ranga i tanen. Ba u katunun tsitsilo e la uarima tere Iesu me ranga hatagala meren, “Hala ban! Taraha, nonei e kukute mera neira u tabe.”

24Be Iesu e ranga palisina me poeiena, “E Sunahan e hala sil puku me melia u katunura i Israel te taiar. Na lö ema Jiu mi.” 25Kaba a tahol e lama memi hatukunna i matanen me poeiena, “O Tsunono, taguhe moulia!”

26Be Iesu e ranga palisenen, me poeiena, “E ma matskö nei tegi lu menai a kannou tara galapien bate ba naria turu muki.” 27Ba tahol e hatanganana, “U mana koru, o Tsunono. Kaba u muki e roron nou noa haser a matsi kannou te pururukuna turu tebol turu Tsunono i taren.” 28E Iesu e atei sil temar hakats uu a tahol teka. Ba Nonei e ranga palisenen me poeiena, “U nihamana i tamölö e tagala koruna. Na ka te ngile mölö e butu hamanasana.” Ba pien tahol i tanen e niga pouts hamanasa hasina.

E Iesu e kato haniga poutsir u katuun u parpara

29Be Iesu e laba nena a han teka me sila uana i rehina Ramun a Perperere i Galili. Ba nonei ena seina turu pokus me gumna. 30Bu katuun u parpara e la uarima i tanen, me la merima u katuun ti ma antunan tataalai, na u korus, na u matakiou, na u katuun u biru, na palair u katuun has u parpara ti kamei a siki, me haka rarien i mouna e Iesu. Ba nonei e kato haniga pouts ranen. 31Ba u katuun e asingoto koruner ti hengo menaien ti ranga uu biru, na ti tara meraien u katuun u korus na u katuun tima antunan tataalai i niga pouts, na u katuun u matakiou i tara pouts. Ba nori i soloseier e Sunahan a Tsunonona i Israel.

E Iesu e hanour a 4,000 tara katuun

(Mak 8:1-10)

32Be Iesu e ngö gögono rena u katunun tsitsilo i tanen me poeiena, “Alia e taatagi koru regu u katuun teka, taraha nori i ka gono meiou lia turu topisa u lan bate moana ta ka tegi noueien. Alia e raman hala kalakala meragien a bes, taraha nori ena mots tutupu ria i maroro.” 33Ba u katunun tsitsilo i tanen e rangate ren, “Ime te sabie roara ta kannou tega antunaia turu katuun u parpara koru teka tegi hanou raien?” 34Be Iesu e rangata ranen, “A lahisa beret te ka memi limiou?” Ba nori e poeier, “A tohit a beret na matsi iena has.” 35Be Iesu e ranga mera nei u katuun egi gum ia turu tsiktsiki. 36Ba nonei e luena a tohit a beret na matsi iena, me haniga uana tere Sunahan, me pose ranen me hala raneien u katunun tsitsilo, ba u katunun tsitsilo e molamola rarien u katuun. 37Ba nori hoboto e nour me masulur. Ba u katunun tsitsilo e luer a tohit a kalobaka a saputu tara man nouba i taren. 38U hihase turu katuun ti nou e noaia tara 4,000 tara pal tson peisa, kaba a touhaliou na galapien ima ase rai. 39Be Iesu e töan hala kalakala rena u katuun, ba nonei e osana tara tolaala, ba nonei e la uana tara pal han i Magadan.

Currently Selected:

Matiu 15: HLA 2020

Highlight

Copy