Matiu 12

U rarangana turu Lan u Göagono turu Jiu

(Mak 2:23-28, Luk 6:1-5)

1Nonei tara pöata e Iesu e tataala silaia i gusuna man kuin wit turu Lan u Göagono turu Jiu. Ba u katunun tsitsilo i tanen e besir ba nori e tanian patsikeier a man hua turu wit be noue ren. 2Pöata ti tareia u Parasi a ka teka ba nori e poeier tere Iesu, “Tara, u katunun tsitsilo i tamölö e katoeier a ka tema antunan kato nari turu Lan u Göagono.”

3Be Iesu e poeiena i taren, “Alimiou go mala rit hanigeiam a ka te katoe e Devit na man hahikapien i tanen tara pöata ti bes ien. 4Ba nonei e tasuna tara luma tere Sunahan me nouena a beret a göagono ti hakeia i matana e Sunahan. Taraha, nonei na man hahikapien i tanen egima tatei noueien. Taraha, a beret puku turu pris. 5Na limiou go mala rit hanigeiam a Lo tere Mosis te hatei nena u pris puku lasi te tatei kui ria iahana Luman Lotu Pan turu Lan u Göagono. 6Na lia e hatei ragou limiou, a ka te kana teka e pan bala koru nena a Luman Lotu. 7Alimiou sanena te atei silemiou te mouna uana u raranga teka, ba limiou tema kato homi rami u aposol i tar. Alia e ngilegu, alimiou go taatagi raiam a palair u katuun, ema haats nei. 8Taraha, Alia tu butun Katunuma te pan bala has negu u Lan u Göagono.”

A katuun te ka mei u ualima u mate

(Mak 3:1-6, Luk 6:6-11)

9Be Iesu e la banena nonei a han mena tasuna tara luman lotu turu Jiu. 10Na e kamei a katuun a lima mate e ka. Ba nori e rangate ren me poeier, “A Lo i tarara e haniga has nena tegi kato haniga pouts mei a katuun turu Lan u Göagono?” Taraha, nori i sake ta maroro tegi kout meien e Iesu.

11Be Iesu e poeiena i taren, “Tega ka meia ta töa i tamilimiou a töa sipsip, ba sipsip te rus hongo uana iahana kiou turu Lan u Göagono, e hana, alö ma antunan lusei poutse meien iahana a kiou? 12Na a katuun e pan bala koru nena a sipsip. Na Lo i tarara e tatei haniga has nena tegi taguhu mei a katuun turu Lan u Göagono.” 13Be Iesu e poeiena tara katuun, “Alö go haparori a limamölö.”

Ba nonei e haparorena a limanen, me niga pouts here nei a hapalana a limanen. 14Ba u Parasi e lakasar mena korupakö ner tegi mar atung hamate menaien e Iesu.

A katunun kui te hopö kapiin e Sunahan

15Na pöata te atei sileia e Iesu a ka teka, ba nonei e la ba nena a han teka, ba parpara koru a katuun e kukute nen. Ba nonei e kato haniga hoboton töa rena u katuun ti kamei a siki. 16Ba nonei e ranga mera neien e gima hahatei rai a palaier u katuun. 17-18A ka teka e butu sil tego kato hamana menaien u raranga ti ranga naia tere propet Aisaia.

“Nonei a katunun kui i tar teka, a katuun tu hopö kapiin lia.

Na lia e ngil koruegen.

Na lia e hale goien u Namnamei i tar,

ba nonei te habulungana has nanou a markato a matskö i tar turu katuun tema Jiu ri.

19Kaba nonei ema ku hapan noi na ema ngala hapan has noi.

Na e möa nou ta katuun tego hengo u raranga i tanen tara man maroro.

20Nonei ema antunan pekoe nei u nga te magmagolona,

na ema antunan kato hoseinei u lam tema kulupu haniga nei.

Kaba nonei e kui tuun las nou,

e antunana te kato hatagala hanigan töa nanouen a markato a matskö.

21Na u katuun tema Jiu ri e hamane roen bate hahalose ren.”

E Iesu na e Belsebul

(Mak 3:20-30, Luk 11:14-23)

22Ba nori emi piou naria a katuun a matakiou na biru tere Iesu. Be Iesu e kato haniga poutse nen, ba nonei e tarana me ranga pouts hasina. 23Ba u katuun hoboto e asingoto korur me poeier, “Nonei toum a pien tson tere Devit?”

24Pöata ti hengo naia u Parasi a ka teka ba nori e poeier, “Tara nitagala tere Belsebul, a tsunono turu liliahanei, ba nonei te antunan tsuga bara lala u liliahanei u omi.”

25E Iesu e atei sil u hakhakats i taren be poeiena, “Tegi hiatatungia u katuun tara töa han pan, ba han teka te omi nou. Na tegi lukataia a töa han tsi a töa hun haposa, bate hiatatungur bate möa nou ta hun haposa tega ka haniga. 26Ga tega tsugeia e Satan u katuun i tanen pouts, ga nonei e luba pouts has nanen i tanen pouts. Bora, ga nipepeito tere Satan e mar tagala uanou ime? 27Sanena lia ego tsuga ba merai u liliahanei u omi a nitagala tere Belsebul, go katunun tsitsilo i tamilimiou e mar tsuga ba mera rouien ime? Bora, ga u katuun pouts tala i tamilimiou te ona pouts rariou limiou. 28Na te Namnamei tala uanen tere Sunahan te tsuga mera gilia u liliahanei u omi, ga Nipepeito tere Sunahan e la tala uanou i tamilimiou.

29“Tega ngilin tasuia ta töa ta katuun i luma tara katuun a tagala, nonei ega kits kap mam bin a katuun a tagala. Ba nonei te töan tasuna bate luena a manka i tanen. 30Esi tema ka gono menei lia, nonei ema ngile nei lia. Na katuun tema gono bera nei lia u katuun, nonei e tsuga ba raneien lia. 31Na lia e hatei ragou limiou, e Sunahan e tatei luba nanou a mamana markato a man omi. Kaba esi te ranga homi nena u Namnamei tere Sunahan, e Sunahan ema tatei luba nanoi a markato a omi teka i tanen. 32A katuun te ranga homi nanou lia tu butun Katunuma, e Sunahan e tatei luba nanou a markato a omi i tanen. Kaba a katuun te ranga homi nena u Namnamei u Göagono, e Sunahan ema tatei luba nanoi a markato a omi teka i tanen, tara pöata i romana, na tara pöata i murimuri has.”

U ruei na hua i tanen

(Luk 6:43-45)

33Be Iesu e rangana me poeiena, “U ruei u niga e ka mena a hua a niga. Na u ruei u omi e ka has mena a hua a omi. U katuun e tara mamer a hua bate töan atei siler u ruei u niga tsi u omi. 34Alimiou u katuun tara kökötsi. Ime te tatei mar ranga mena milimiou a manka man niga te katuun omi uamilimiou? A ka te kana turu tori, u rung te ranga halakasa nanen. 35A katuun a niga e halakasena a manka man niga, na katuun a omi e halakasa hasena a manka man omi.

36“Na lia e hatei ragou limiou, turu Lanin Hahuna alimiou e hala raroui a nihahuna tara man ranga pinopino a man omi tu ranga naiam limiou. 37Tara man raranga noahas i tamölö e Sunahan e ngöe noi lö a katuun a niga tsi a katuun a omi.”

U katuun i ngilin tarein tu mirakol

(Mak 8:11-12, Luk 11:29-32)

38Ba palair u tson hihatuts tara Lo na u Parasi e poeier tere Iesu, “Tson Hihatuts, alam e ngilin tara nem tu mirakol i tamölö.”

39Be Iesu e ranga palis ranen me poeiena, “Alimiou u katuun u omi tara pöata i romana te rangata silemiou tu mirakol. Kaba alia ema tatei haröto ragi limiou tu mirakol. A hatöatongo lasi tere Jona a propet i manasa te haröto ragi lia limiou. 40E Jona e kaia i torina a iena pan u topisa u lan na topisa a bong, na Alia tu butun Katunuma e ka hasegou u topisa u lan na u topisa a bong iahana u tsiktsiki. 41Pöata te butu noa u lanin hahuna, ba u katunura i Ninive te tuol roa turu kout bate hatei ner a markato a omi turu katunura i romana. Taraha, a tei Ninive i hengoe u raranga tere Jona me hapolaser a man markato a man omi i taren. Na töa katuun te pan bala nena e Jona e kana teka. 42Na turu lanin hahuna, a tetahol panina i Siba e tuol noa turu kout bate hatei nena a markato a omi turu katunura i romana. Taraha, nonei e lama i lehana koru tegomi hengo menaien u hihatuts u niga tere King Solomon. Na lia e hatei ragou limiou, a katuun te pan bala nena e Solomon e kana teka.”

U namnamei u omi e tuku pouts

(Luk 11:24-26)

43Be Iesu e ranga lenina me poeiena, “Alimiou u katuun u omi ra i romana e heremi u katuun u momolö. Pöata te la ba nena a liliahanei a omi a katuun, ba nonei te lagi sakesakiena ta makum tegona husa ien tara makum a palaka. 44Ba nonei e poeiena, ‘Alia e la pouts uagou tara luma tu la ma lia.’ Ba pöata te la pouts men batemi sabiena a luma e ka haniga, na e kaka pukuna, na i salo hagogosi na e ka haniga. 45Ba liliahanei a omi e lana mena lu lelena a tana tohit a liliahanei, ti omi koru naien. Ba nori emi karia iahana katuun teka. Ba nonei e omi bala koru lel tala nena temar omi tutuun uaien. Te markato has uariou u katuun u omi ra i romana.”

E tsinane Iesu na u toulanen

(Mak 3:31-35, Luk 8:19-21)

46Pöata te ranga noaia e Iesu turu katuun, be tsinanen na u toulanen te tukur. Ba nori e tuol ria ielesala me rangata ner tegi ranga uaien tere Iesu. 47Ba töa katuun e hatei nen, “E tsinamölö na u toulamölö te tuolur ielesala e ngilin ranga ria i tamölö.”

48Be Iesu e ranga palise nen me poeiena, “Esi nonei e tsinar na eresi u toular?” 49Be Iesu e tus uana turu katunun tsitsilo i tanen me poeiena, “Nori teka u tsinar na u toular. 50Eresi te kukutieier u ngilngil tere Tamar i Kolö nori u toular na u hahinar nu tsinar.”

Currently Selected:

Matiu 12: HLA 2020

Highlight

Copy