Aposol 4

E Pita mere Jon i haka raia turu Kout Pan turu Jiu

1E Pita mere Jon i ranga noahas ia turu katuun, ba u pris na tson pepeito kap turu polis ti tara kapiin a Luman Lotu Pan na u Sadiusi e la uarima i taren. 2Nori i raharaha koru mei ti hatuts meraien u katuun, e Iesu e takei poutsia tara tou mate, e haröto nena u katuun ti mate hakapa e takei pouts has riou. 3Ba nori e pile kap raier ere Pita mere Jon me karabus raren tegi kout meraien turu tanu lan, taraha a ka e lahi hakapa. 4Kaba a katuun a parpara koru ti ka me hengoeier u raranga i taren me hamana korur, me hapara lel raier a pala ti hamana mamia tere Iesu. Na u hihase tara pal tson hoboto e sukusukuia turu 5,000.

5Ba turu hamahö ba pal kapan turu Jiu na u tson hihatuts tara Lo e gono hoboto ria i Jerusalem. 6Nori i gono hoboto mei e Anas a tsunono pan turu pris, na e Kaiapas ne Jon ne Aleksenda, na palai has ti pala uu tara tsunono pan turu pris. 7Ba nori e hatuol raria a huol a aposol i mataren me rangata raren me poeier, “Ime tu lue ma limiou a nitagala tu kato haniga pouts memi limiou a katuun teka? Alimiou u kato memien a solo teresi?”

8Ba u Namnamei u Göagono e saputena e Pita me ranga palis uana i taren, “Alimiou u pal kapanira i Israel na u tsunono. 9Alimiou e rangata ramou lam i romana tara ka a niga te katoi lam ti kato haniga pouts menai lam a katuun a mou omi na ime temar niga pouts uaien. 10Alia e ranga hatei mera goulimiou hoboto na u katuun hobotora i Israel. A katuun teka te tuoluna i matamilimiou e niga pouts mei a nitagala tara solona e Iesu Kristo na i Nasaret. Nonei tu hanila namia limiou tara kuruse be Sunahan e hatakei pouts noa hase nen tara tou mate. 11Nonei e Iesu a katuun te ranga nena u Buku u Göagono bate poeiena,

‘Alimiou e heremi u katuun te hatakeier a luma. Na katuun teka e here ii a hatu tu rama naiam limiou.

Kaba nonei a hatu te niga balana tara toukuina tara luma.’

12“E möa ta taina ta katuun tega tatei lu pouts merai u katuun tere Sunahan. Tara mamana han hoboto i puta, e Sunahan ema hanige ii ta taina ta katuun tega tatei lu pouts merai ra tere Sunahan. E Iesu puku lasi.”

13Nori i asingoto koru ni timar ranga hatagala uu ere Pita mere Jon batema matout ri, me tara marei haser a huol a katuun teka ima la meia tu skul pan. Nori i asingoto koru me tara marei taleier ti lala gono menaien e Iesu i manasa. 14Ba nori e hahalongolo mer ti tara menaien nonei a katuun ti kato haniga poutsi bate tuol gono meraiena ere Pita mere Jon. 15-16Ba nori e ranga meraier a huol a aposol egi lakasa, ba nori te hirari ria i taren pouts. Ba nori e poeier, “A saha ka te katoe roura i taren? U katuun hoboto te ka ria i Jerusalem e atei siler ti kato menaien u mirakol pan teka, na ra ema tatei holis narien. 17Kaba aragi ranga hatagala meraien ba nori tema tatei hala lel nari tu raranga tara palair u katuun tara solona e Iesu. Taraha, u bulungana teka e namots hula la na turu katuun hoboto.”

18Ba nori e ngö hatasu pouts raren, me ranga hatagala mera rien tegima rarare lel menaien e Iesu, na tegima hihatuts lel has menaien a solonen.

19Bere Pita mere Jon e ranga palis raren me poeier, “Alimiou peisa tego hamoue iam a saha ka te nigana i matana e Sunahan. Alam ego hengo raiou limiou, tsi alam go hengoi e Sunahan? 20Alam ema antunan hahalongolo ba nami a ka tu tari lam na tu hengoe lam.” 21Ba pal kapan e ranga hatagala lel mera ren me töan hapurese raren. Nori ima sabe ii ta markato tegi mar hahuna sila meraien, taraha u katuun hoboto i ranga me soloseier e Sunahan tara ka te butu. 22Taraha, a katuun te butu ia u mirakol teka e kamei u tohats u maloto u hiningal, nonei e lan tsonpan hamanasa.

U kristen i singo sil tegi tagala uaien

23Ba nori e hapurese raier ere Pita mere Jon ba nori e la pouts uaier turu katuun i taren mena hatei rarien a manka ti rangein u pris pan na pal tsunono. 24Pöata ti hengoien, ba nori e gono hobotor me singo uaier tere Sunahan me poeier, “O Tsunono, alö tu kato u kolö na u puta na u tasi na mamanaka te ka ria i taren. 25I manasa u Namnamei u Göagono i tamölö e ranga silaia tere Devit e tubumulam a katunun kui i tamölö me poeiena:

‘U palair u katuun i raharaha koru.

Nori i mastein korupaköni a Tsunono.

26U tsunono pan turu han i puta i tuol me hanei siler a hiatatung.

Aa, u katuun u kapan i gono hoboto sil tegi hiatatung

gono menaien a Tsunono e Mesaia.’

“U Namnamei u Göagono temar ranga uu teka. 27Na ka teka e butuia i Jerusalem. U mana koru, e Herot a King na e Pontias Pailat a gamman i gono hoboto mer a pal kapan i tamulam u Jiu na u katuun halhal. Nori i gono hobotoia tara taun teka tegi kato homi menaien e Iesu, nonei a katunun kui a Göagono i tamölö tu hopö kap mamin lö tego Mesaia. 28Tara nitagala i tamölö na turu ngil i tamölö, alö u kits hakapi u raranga tara manka teka tega butu. Ba nori u katuun e gono siler tegi kato menaien a mamanaka teka. 29O Tsunono, alö go tara tala, te ranga sil mena rien u katunun kui i tamölö, hatagala ramou lam ba lam te ranga hatagalam batema tatei matoutmi. 30Alö go harötein a nitagala i tamölö bate kato haniga pouts rem u katuun te ka mer a siki, bate katoeiem u mamana mirakol tara nitsunono tere Iesu a katunun kui a Göagono i tamölö.”

31Tara pöata ti singo hakapaien, ba makum ti gono ien e tagasina. Nori hoboto i saputu mei u Namnamei u Göagono me tanian hatei ner u raranga tere Sunahan, nori ima matout ii.

U katuun i hiamolamola hobotein a mamanaka i taren

32A pala ti hamana i ka mei u töa puku u tori na u töa puku u hakats. E möa ta töa i taren tega ranga bate poeiena, “A manka teka, a manka pepeisa i tar.” E möa. Kaba mamanaka hoboto i taren era manka hobotoien. 33U aposol i hatein u raranga te takei pouts uu a Tsunono e Iesu, na u ranga i taren e tagala koru. Be Sunahan e hala hoboto raneien a nisasaala pan. 34E möa ta töa i taren tega makmakum ban ta ka. U katuun ti kamei u tsiktsiki tsi a luma i hahol naien, ba nori emi piou pouts ner a moni tara manka ti hahol naien. 35Ba nori emi hala narien turu aposol, ba u aposol e molamola rarien u katuun hoboto e antunaia timar makmakum hapopoien tara mamanaka.

36Hena, a töa katuun a solonen e Josep te tuhanaia tara tolo i Saiprus na te hatubunaia tere Livai. U aposol i ngöeien e Banabas. A mouna solo teka e poeiena, “A katuun te katoena u rangan hitaguhu.” 37Nonei e haholin a makumun tsiktsiki i tanen, memi piou nena a moni te lueien turu aposol.

Currently Selected:

Aposol 4: HLA 2020

Highlight

Copy