Genesis 21

Abraham Sarah ele Aisak menupiɗ

1Aria, Abraham nug wau Sarah ele aa oieheh, Yawe Nug Sarahnu oo bodoette enanag maɗoɗ ele hak kobol dim lamitta, Nug anukka Sarahnu keeke hekkunu nai anan qakkom amu, Nug heum. 2Nug he, Sarah nug oo ele daye, Abraham nug danab kaino oiyeye, Sarah nug nid danab menuom. Kayak Nug anukka Abraham amegppa hekkunu nai ana qakkom amu, haen amuppanab Sarah nug nid menuom. 3Sarah menue amu, Abraham nug bekka onig Aisak ataɗom. 4Aria, deɗ eblaih ewamppa Abraham nug Kayak hekkununab aum bia Aisak gaɗa otaɗom. 5Abraham nug maɗ 100 dayeye, Sarah nug Aisak menuowa, 6nug aum. “Kayak Nug he, da imak maɗoɗppan gamag ahakppanu aomi daattem. Amu danab laa oh ag keeke dahilppa beum dooglag amu, ag ele anamib dooglag,” awa aum. 7Sarah nug anam ana, nug baula aum. “Danab aun laa nug anukka Abraham amegppa inam alo? ‘Na waat nug nahip nid menua, huh medakku?’ Amge keeke amu genab beum. Aɗinu? Abraham nug kaino dayeye, da nid danab nuhig menumi,” awa aum. 8Anam a dimppa Aisak nug ena me, Sarah nug huh aɗitte, deɗ amuppa Abraham nug hobul okkai heum.

Sarah nug Hagar lamittom

9Isip ah Hagar nug Abraham bekka Ismael menuom. Aria, Sarah nug Ismael, Aisak ele qiɗ heeheh anatom. 10Anata amu, nug Abraham amegppa aum. “Na begbeg maɗi ah amu, nug bekka ele lamatppe ukkeɗ! Aɗinu? Begbeg maɗi ah amu bekka nug aug maha nakok laa iinab aoma. Da bekkal Aisak nug nukka aokku,” awa aum.

11Sarah anam aum, amge Ismael ele nug Abraham bekka amunu, Abraham nug oo uugnab doyom. 12Nug oo uugnab doyom, amge Kayak Nug Abraham amegppa aum. “Na Hagar, bekka ele dilah oot uugnab aib doome. Sarahnu nai amu dim lamitte! Aɗinu? Na buɗunadnab am Aisak, nuhigppa bekkulag. 13Da heppi, Hagar bekka buɗub ag ele huu okkai bena, wanppan wan laa ahilag, ag appa daaglag. Aɗinu? Nug ele na bekkat,” awa aum.

14Kayak Nug anam a amu, deɗ amu uue, wagɗe buttuanab Abraham nug ee laa, amu nippud doɗ gaɗappa hak ele awa, le ita, keeke amu oh Hagar gugappa mewowa, amu he gopiɗ. Hagar nug ukka ukka, atu taɗak onig Berseba, amuppa hamu oiyom. 15-16Hagar nug oiyeye, le iitta me, Hagar nug Ismael atu taɗakppa ad nakok logoppa uuitte dayeye, nug nakok uma ukka dayom. Aɗinu? Nug dabmak inam awom. “Da nid neekkitte daappi mauhknunu amu elele iitta,” dabma gaye, ⌊nid ele gayom⌋. 17Haen amuppa Kayak Nug nidnu gayak doye, nuhig engel hab aabppanu Hagar onigppa eum. “Hagar attem he gaattem? Kayak Nug nid danab nahip laih uppa niitte amu, Nug nuhig gayak doyom amunu, na aib baɗame. 18Na gona, nid nahip atogno! Aɗinu? Da heppi, nug buɗuppud ag appatna, huu okkainab, ɠagattag ele daaglag,” awa aum. 19Kayak Nug anam awowa, Nug Hagar ehanitte, Hagar nug le moɗ antta, nug ukka, nippud doɗ gaɗappa hak, amuppa nug le ita, nid le mettom. 20Aria, Kayak Nug nid amu ele daayya, nug ena ma, atu taɗak amuppa dayaya, nug danab lat doɗo ewa doya auta autanab awak ele oiyom. 21Nug atu taɗak onig Paran amuppa dayeye, nug anig Isip ah laa awa mettom.

Abraham, Abimelek ele aa kekeɗ daamyanu nug tituanpiɗ

22Haen amuppa Abimelek, amu nuhig ban daup ikki anuqak onig Pikol ele, aa Kayak Nug Abraham ele daapiɗ anidya, aa Abraham gumidya goya, Abimelek nug Abraham amegppa aum. “Na keeke oh hettem amu, Kayak Nug na eleib daattep 23amunu, na ippa Kayak noobppa, da amelppa na dahilppa, da bekkaladppa, amu da buɗuladppa ele hambuppuak kobol laa ii dim lamidna, aria na da, wan imu, na gemu laihnu danab ippa ina daattem amu, na da, wan imu eleppa oo bodoettak kobol, da nahip-ppa hemi, na kobol amu dim lamidna oikkutnu nahip nai ɠagattag qena, anam akkutnu oɗ medattem.” Abimelek nug Abraham amu akkunu oɗ mettom. 24Abimelek nug anam akkunu a, Abraham nug anam aum.

25Amu Abraham nug le moɗ nuhig laa Abimeleknu maɗi nid ag yab aoppig, nug amunu Abimelek amegppa aum. 26Abraham nug le moɗnu a amu, Abimelek nug Abraham oɗeppa awa aum. “Danab aun heum amu, da ii doottem. Da gemu iikkuib ae doottem. Na anukka da amelppa ii ame,” awa aum. 27Abimelek anam a amu, Abraham nug nuhig sipsip laala, amu makau laala ele Abimelek mette, aa nug tituanpiɗ. 28Aa nug tituanya, Abraham nug doɗ sipsip balat nuhig eblaih aɗit baula ele awa otia, piɗe meum. 29Anam he amu, Abimelek nug Abraham oɗ mettom. “Diig aɗinu na sipsip balat eblaih aɗit ele diina, piɗe meme?” awa oɗ mettom. 30Awa oɗ mette amu, Abraham nug amegppa aum. “Da na sipsip balat eblaih aɗit ele imu at daaglagnu diina, amuppa na tutukku dookkut, da le moɗ imu buumi dookkutnu ool daatte,” awa aum. 31Aa aben amuppa nug tituanyaya, aa Kayak onigppa ahilah nai ɠagattag qeya apiɗ amunu, nug aben amu onig Berseba ataɗom.

32Aa Berseba appa nug tituanya maloya amu, Abimelek, amu nuhig ban daup ikki anuqak Pikol ele aa eɗuya, Pilistia wanppa gopiɗ. 33Aa ukkaeh, Abraham nug Berseba appa ad tamarisk eppom, amu nug amuppa Yawe, Nug Kayak hanhan daatte amu, nug Nug noobppa dup noa binag meum. 34Keeke amu oh dimppa amu, Abraham nug Pilistia wanppa haen elab nakok dayom.

Currently Selected:

Genesis 21: NB

Highlight

Copy