Genesis 20

Abraham, Abimelek ele dilah nai

1Dimppa Abraham nug dayomppanu aha, wan atu onig Negeb ukka, aab aɗit onilah Kades, Sur ele gamalahppa oiyom. Oiya ukke, deɗ laa aab laa onig Gerar, appa nug wau ele goya, aben amuppa daapiɗ. 2Appa daayya, Abraham nug Sarahnu aum. “Nug amu, da appinal,” awa aum. Anam aum amunu, Gerar dilag king Abimelek nug Sarah nug wau daakkunu awom. 3Awom, amge dimppa Kayak Nug tulppa Abimelek amegppa aum. “Na ah aome ele amu, nug danab ele amunu, na mauhme daattem,” awa aum.

4Nug Sarah awom, amge Abimelek, Sarah ele ii oipiɗ amunu, Abimelek nug Kayak oɗeppa awa aum. “O Naɗi, da, dahilad daup oh ele, ig beɗunigppa aab iitta. Ig anam daattem amunu, na heppe, ig mauhkkunigte? 5Ah gamu nug ahnu, ‘Nug am da appinal,’ aum, amu ah nug danabnu ele, ‘Nug am da awal,’ aum. Da heinne, beɗulppa aab iitta doomi,” awa aum.

6Abimelek anam a amu, Kayak Nug tulppa eɗua, nug amegppa aum. “Da doottem, na keeke imu heme, amge na doonna ii hee, na beɗunppa aab iitta amunu, da hei, na dahilppa hipunin ii heme. Da hei, na nug ele ii oipiɗ. 7Amge gemu na heppe, ah amu nug gamu toppa eɗua ukkaɗ! Aɗinu? Nug gamu am propet, amu nug nahipnu unuqidkku. Unuqitteb, na ii mauhmana, amge na heppe, eɗua ii gokku dayeb amu, na imu doye! Na, amu nahipadppa ele oh, ag genab mauhkkulag,” awa aum. 8Kayak Nug anam a, dimppa wagɗe buttuanab amu, Abimelek nug nuhig ehanittak anuqak danab oh onilagppa e uɗieg, amelagppa keeke amu ohnu aum. Haen nug a doona amu, ag huan baɗappig. 9Baɗanna amu, Abimelek nug Abraham onigppa e uɗie, amegppa aum. “Na ihinignu aɗi heme? Da nahipnu eheɗ aɗi hemi amunu, na kobol imu he, da, dahilad daup ele, ig oh beɗunigppa aab okkai ele iikku daattem? Na keeke ii helom aakku heme. 10Aɗinu na anam heme?” awa aum. 11Nug anam a amu, Abraham nug Abimelek oɗeppa awa aum. “Da dakka da nai inam oolppa mattimi. ‘Aben imuppanu danab ag Kayaknu ebehilag oh bodoetta le mak ii dootteb amunu, ag Sarah aoglagnu hena, da iuppeg mauhkkul.’ 12Laa ele, nug am genab da appinal. I mamenih laippu, amge i aninih piɗe piɗe amunu, da nug aomi. 13Da aomi, amu dimppa Kayak a, da aben laih gokkulnu ahami amu, haen amuppa da Sarah amegppa inam ami. ‘Na dahilnu oo mauhak doottem dayeb amu, na amunu ib inamppa ippuniɗkkutnu oɗ medattem. I oiɗɗa, na aben ohppa dahilnu inam akkut. “Nug am da awal.” ’ ” Abraham nug anam aum.

14Abraham anam ana male amu, Abimelek nug Sarah eɗua Abraham mettom. Nug makau, sipsip amu begbeg maɗi nid maɗi ah ele Abraham mettom. 15Mettowa amu, nug Abraham amegppa aum. “Wan imu oh dahil. Na aben laa anidna daakkutnu oot heeb, am daakkut,” awa aum. 16Aria, Abimelek eɗua Sarah amegppa aum. “Danab ah nahipad ag nahipnu dabmak eheɗ aoglagtai. Amunu amu, da amu bappaidkkulnu 11.5 kilogram silwa na awan medattem. Da danab ah oh ag na beɗunppa aab laa ii daatte dooglagnu ool daatte. Danab ah oh ag na beɗuppa aab iitta anidkkulagnu ool daatte,” awa aum.

17-18Abimelek nug Sarah awom amunu, haen amuppa kobol amunu Yawe Nug he, Abimelek wau, amu nuhikkud begbeg maɗi ah ele ag nid menuglagnu elele iitta daappig. Amge dimppa Abimelek he, Sarah eɗua Abraham toppa ukkom, haen amuppa Abraham nug Kayak amegppa unuqitte, Kayak Nug he, Abimelek, nug wau, nuhikkud maɗi ah ele oh, ag eɗun, baula nid menuadkkulagnu elele daappig.

Currently Selected:

Genesis 20: NB

Highlight

Copy