Mak 1

Yon Baptais beleŋ gitik iryiŋ

1Baraŋ igiŋ gabe Yesu Kristu, Al Kuruŋ Urmiŋ gote baraŋ fudinde goyen miŋ ureŋ tihim.

2Be, Al Kuruŋ beleŋ Urmiŋ mere iryiŋ goyen mere basaŋ almiŋ porofet kura Aisaia beleŋ asaŋde gahade kayyiŋ:

“Meteŋ alne teŋ kermeke meheŋ heŋ kuyeŋ.

Kuŋbe beleŋge kerde gunyeŋ.”#1:2 Mere gabe Aisaia beleŋ ma kayyiŋ. Malakai beleŋ kayyiŋ. Gega Aisaiabe Al Kuruŋyen mere basaŋ mar kuruŋ bana goŋ niŋ al deŋem keŋkelakbe gogo geb, Mak beleŋ Aisaia deŋem kayyiŋ. Malakai 3:1

3“Sawsawa po kuruŋ naŋa bana goŋ al kura forok yeŋbe alya bereya beleŋ Doyaŋ Al Kuruŋyen mere nurde gama ird ird niŋ dufay gitik teŋ teŋ ge gahade kuware tagalde hiyeŋ:

‘Doyaŋ Al Kuruŋyen beleŋ kernaŋ.

Beleŋmiŋ sope irde huwa irnaŋ,’ yiriŋ,” yitiŋ hi. Aisaia 40:3

4Niŋgeb Yon Baptaisbe sawsawa po kuruŋ naŋa bana forok yeŋbe alya bereya baptais yirde saba tagalde hinhin. Sabamiŋbe gahade: “Mata buluŋtiŋ yubul teŋ Al Kuruŋ niŋ bitiŋ mulgaŋ henaŋ. Irkeb Al Kuruŋ beleŋ mata buluŋtiŋ halde dunke baptais tenayiŋ,” yineŋ hinhin. 5Irkeb alya bereya Yudia naŋa goyen bana niŋ taun kuruŋ Yerusalemya naŋa bana goŋ niŋ taun hoyaŋya hoyaŋya goyen budam wor po Yon hitte kuŋ hinhan. Kuŋbe mata buluŋmiŋ ge Al Kuruŋ pohogay irkeb Yon beleŋ Yodan fete baptais yirde hinhin.

6Yonbe dapŋa kamel wuyŋeŋ beleŋ uliŋhor irtiŋ goyen hor irdeb dapŋa sikkeŋ gore po teŋ kaŋmiŋ irde uliŋhor kerkek goyen mal temdere giti irde hiyen. Irdeb biŋge igiŋ kura ma nene hiyen. Gusuya yalaŋgu fimiŋya nene hiyen. 7Yeŋbe mere gahade tagalde hinhin: “Ne harhoknerbe al kura wayyeŋ. Yende saŋiŋbe kuruŋ wor po, nere folek. Niŋgeb ne gahade gare epte ma yeŋ ge teŋ meteŋ kuruŋ titek hime. Kahaŋ basaŋmiŋde niŋ kaŋ urguŋ kaŋ yugu teŋ teŋ gobe meteŋ kuruŋ moŋ gega, go wor ne beleŋ epte moŋ yeŋ nurde hime. 8Nebe fe uliŋ po baptais dirde hime goyenpoga yeŋbe Holi Spirit beleŋ baptais diryeŋ,” yineŋ hinhin.

Yesu baptais tekeb Satan beleŋ tuŋaŋ uryiŋ

(Matiyu 3:13–4:11; Luk 3:21-22; 4:1-13)

9Be, go kamereb Yesu beleŋ Galili bana go niŋ taun dirŋeŋ Nasaret tubul teŋ Yon hitte Yodan fe siŋare wayyiŋ. Irkeb Yon beleŋ tukuŋ fe alare baptais iryiŋ. 10Be, Yesu gob baptais teŋbe fe ala tubul teŋ siŋare wakeb goya goyen po naŋkiŋ hol yiriŋ. Irkeb Yesu beleŋ keneŋ hikeya Holi Spirit beleŋ yeŋ hitte kalyiŋgi foy teŋ kattiŋ yara teŋ kateŋ kipiryiŋ. 11Irde naŋkiŋ hol yitiŋ bana gore al melak kura forok yeŋ Yesu mere iryiŋ: “Gebe urne, bubulkuŋne wor po. Ge niŋ amaŋeŋ wor po nurde guneŋ hime,” inyiŋ.

12Be, go kamereb Holi Spirit beleŋ Yesu goyen sawsawa po kuruŋ naŋa bana goŋ bul irde tukuriŋ. 13Tukukeb wawuŋ 40 goŋ hinhin. Irkeb uŋgurayen kuruŋmiŋ Satan beleŋ Yesu mata buluŋ tiyi yeŋ tuŋaŋ urde hinhin. Dapŋa duwi fuleŋam yaŋ kahal bana hikeya Al Kuruŋyen miyoŋ beleŋ doyaŋ irde faraŋ urde hinhan.

Yesu beleŋ komatmiŋ yawaryiŋ

(Matiyu 4:12-22; Luk 4:14-15; 5:1-11)

14Be, Galili naŋare niŋ doyaŋ al kuruŋ Herot Antipas beleŋ Yon teŋ koyare kiryiŋ. Go kamereb Yesu go Galili naŋare kuŋbe Al Kuruŋyen mere igiŋ goyen tagalde hinhin. 15Mere tagalde hinhinbe gahade: “Al Kuruŋ beleŋ alya bereyamiŋ doyaŋ yireŋ yeŋ bikkeŋ nalu kiryiŋ gobe gago binde hihi. Niŋgeb yeŋ yufuk bana hitek yeŋ nurde haŋ kenem mata buluŋtiŋ yubul teŋ Al Kuruŋ niŋ bitiŋ mulgaŋ heŋbe meremiŋ ge dufaytiŋ saŋiŋ irnayiŋ,” yinyiŋ.

16Be, Yesu go Galili Makaŋ fereŋ kuŋ heŋyabe Saimonya kuliŋ Andruya makaŋde kamaŋ temeyde hike yinyiŋ. Ire itiŋya gobe makaŋ dapŋa yad yad mar. 17Be, Yesu beleŋ irem go yeneŋbe, “Wayyi. Waŋ ne gama niryi. Irkeb al yade Al Kuruŋ hitte yukuŋ yukuŋ mar direŋ,” yinyiŋ. 18Irkeb goyare po kamaŋmiŋ yubul teŋ Yesu gama iraryum.

19Be, muŋ kura kutŋeŋ teŋbe Yemsya kuliŋ Yonyabe naniŋ Sebediya meteŋ marmiŋya hakwamiŋ hende heŋ kamaŋ sope irde hike yinyiŋ. 20Yeneŋbe ire itiŋya goyen wor hoy yiryiŋ. Irkeb irem go naniŋya meteŋ marmiŋya hakwa bana po yubul teŋbe Yesu gama iraryum.

Yesu beleŋ uŋgura takira tiyyiŋ

(Luk 4:31-37)

21Be, Yesuya komatmiŋ meheŋde yawaryiŋ goya irde Kapeneam taunde kwamiŋ. Kuŋbe Yuda marte usaŋ nalu Sabat hekeb Yesu beleŋ Yuda marte gabu ya bana hurkuŋbe gabu ya bana goŋ hinhan mar goyen saba yiryiŋ. 22Irkeb sabamiŋ go nurdeb saba gobe Moseyen saba tagalde haŋ mar beleŋ tagalde haŋyen yara moŋ, irde Al Kuruŋyen saŋiŋ miŋyaŋ beleŋ saba titiŋ yara saba tike keneŋbe dinoŋ kok yamiŋ. 23Be, goyare goyenbe uŋgura ketal urtiŋ al kura gabu ya bana goŋ hinhin gore kekew tiyyiŋ. 24Kekew teŋbe gaha inyiŋ: “Yesu, Nasaret niŋ al! Gebe daha dire yeŋ wayha? Gwamuŋ dure yeŋ wayha? Neb nurde guneŋ hime. Gebe Al Kuruŋyen Urmiŋ wor po,” inyiŋ. 25Irkeb Yesu beleŋ mere hitemde po, “Bada hawa, irde al go tubul teŋ kat kwa!” inyiŋ. 26Irkeb uŋgura gore al goyen uguŋ po aŋgor aŋgor irde kekew teŋbe tubul teŋ kat kuriŋ.

27Be, al gor hinhan mar gore keneŋbe hurkuŋkat wor po teŋbe tigiri teŋ kadom gusuŋaŋ gird tiyamiŋ. “Ey, gab dahadebe gago? Saba gabe tiŋeŋ wor po, Al Kuruŋyen saŋiŋ miŋyaŋ. Niŋgeb uŋgura wor meremiŋ nurdeb al go tubul teŋ busaharhaŋ!” yamiŋ. 28Irkeb Yesuyen mere momoŋ gobe Galili naŋa bana goŋ bemel po kuruŋ heŋ kuriŋ.

Yesu beleŋ al budam guram yirde hinhin

(Matiyu 8:14-17; Luk 4:38-41)

29Be, Yemsya Yonya irde Yesuya komatmiŋ hoyaŋ kura goya gobe gabu ya go tubul teŋbe goyare po Saimonya Andruyat yare kwamiŋ. 30Yare gorbe Saimon teŋakbe aygaŋ buluŋ po irke ferde hinhin. Irkeb goke Yesu momoŋ iramiŋ. 31Irkeb kuŋ keneŋbe haniŋde tanarde faraŋ urde isaŋ hekeb aygaŋ gob tubul tiyyiŋ. Irkeb bere go huwardebe Yesuya komatmiŋya goyen biŋge kaŋ yunyiŋ.

32Be, Yesuyen mere momoŋ nuramiŋ mar beleŋbe goyen wawuŋbanare goyen ŋumtuk urde hikeb Sabat nalu hubu hihi yeŋbe Yesu hitte garbam marya uŋgura beleŋ ketal yurtiŋ marya kuruŋ goyen yade wayamiŋ. 33Be, Kapeneam taunde niŋ al buda kuruŋ goyen waŋ Yesu hinhin ya goyen diliŋ mar gabu iramiŋ. 34Irkeb Yesu beleŋ garbammiŋ kurayen kurayen goyen sope yiryiŋ. Irdeb uŋgura beleŋ al ketal yurtiŋ goyen wor yakira tiyyiŋ. Goyenbe uŋgura gore Yesube al gwahade yeŋ nuramiŋ. Gega, “Ne niŋ ma tagalnayiŋ,” yineŋ utaŋ yiryiŋ.

Yesube Galili naŋa bana saba tagalde hinhin

(Luk 4:42-44)

35Be, naŋa hako ga fay urde hikeyabe Yesu huwarde ya go tubul teŋ naŋa al miŋmoŋde kuriŋ. Kuŋbe Al Kuruŋya mere teŋ hinaryum. 36Irkeb Saimonya kadom yagoya beleŋ kuŋ yeŋ ge naŋkeneŋ hinhan. 37Irde keneŋbe, “Al buda kuruŋ gayen ge niŋ naŋkeneŋ haŋ,” inamiŋ. 38Irkeb Yesu beleŋ wol heŋbe, “Nebe saba tagal tagal niŋ wamiriŋ. Niŋgeb wake tiyuŋ biŋyaŋ biŋyaŋ ga wor kuniŋ. Kuŋ goyaŋ wor saba tagalde tukeŋ,” yinyiŋ. 39Gwaha yeŋbe Galili naŋa bana kuŋ Yuda marte gabu yayaŋ saba tagalde uŋgura yakira teŋ hinhin.

Yesu beleŋ al kura busuka miŋyaŋ sope iryiŋ

(Matiyu 8:1-4; Luk 5:12-16)

40Be, al kura busuka miŋyaŋ beleŋ Yesu hitte waŋ kahaŋ miŋde kuku kaŋbe eseŋ mere irde, “Dufayger wilakŋeŋ nurde ha kenem igiŋ sope nirayiŋ,” inyiŋ. 41Gwaha inkeb Yesu beleŋ buniŋeŋ wor po nurdeb haniŋ temeyde al go tanaryiŋ. Irdeb, “Igiŋ sope gireŋ geb, igiŋ hawa!” inyiŋ. 42Irkeb goyare po usu buluŋ go hubu hekeb igiŋ hiriŋ. 43-44Irkeb Yesu beleŋ, “Al hoyaŋ kura mata gake momoŋ ma yirayiŋ,” ineŋ hayhay irdeb, “Al Kuruŋ doloŋ ird ird mata doyaŋ mar hitte po kuŋ ulge yikala yirayiŋ. Irkeb ulge go keneŋ fudinde igiŋ hihi yekeb Mose beleŋ bikkeŋ yiriŋ mata goyen gama irde dapŋa kura teŋ mel go yunkeb ge niŋ teŋ Al Kuruŋ kumga teŋ unnayiŋ. Irkeb al tumŋaŋ fudinde igiŋ haha yeŋ gennayiŋ,” ineŋbe, “Igiŋge kwa!” inyiŋ. 45Goyenpoga al go siŋare kuŋbe igiŋ hiriŋ goke mali po tagalde tukuriŋ. Irkeb mere go kuŋ kuruŋ hiriŋ. Goke teŋbe Yesu goyen taunyaŋ kawan heŋ kutek ma irkeb al miŋmoŋ naŋayaŋ po heŋ kuŋ hinhin. Goyenbe albe tiyuŋ kurhan mat kurhan mat kinniŋ yeŋ waŋ hinhan.

Currently Selected:

Mak 1: dah

Highlight

Copy